Sa Nuorese in duos ghetos, Mariotti. “In Copa tretu a chie giogat prus pagu, como s’Albalonga e amus gasi atopadu sas primas deghe”.

Dae sa bìnchida contra de sa cabulista Ostiamare a sa trasferta in domo de s’Albalonga. In mesu sa cualificatzione a sos 32esimos de Copa Itàlia a pustis bintu in su campu de su Castiadas. Sa Nuorese at ismentigadu luego su ko de Arzachena e Marco Mariotti agatat cunfirmas bonas finas dae chie in campionadu at giogadu pagu in prus de dare tretu a sos pitzinnos de su vivaju comente a su de su ’98 Tupponi o de su ’99 Catte, chi at fatu s’esòrdiu suo in su Sarrabus. “Semus cuntentos chi amus coladu su turnu – narat su tècnicu romanu – ca nos permitit de dare tretu a chie giogat prus pagu sighende sa filosofia nostra de giogu chi est cussa de inghitzare s’atzione dae palas, de non nde fuliare sa botza e de èssere bastantes sìncheros. Totu custu l’amus fatu a in antis de unu Castiadas chi at postu in campu sa matessi iscuadra chi at giogadu domìniga colada contra de s’Asrtrea, cun giogadores de balia che a Schumacher, Berardi, Coquin. A bìnchere s’iscuadra titulare est unu prexu mannu e, foras de chie giogat e de s’adade sua, su chi contat est sa crèscida de su grupu”.