E duncas, cun custu artìculu, est a narai, mellus, cun s'artìculu chi ndi bessit aforas oi, seus arribbaus (seus arrannèscius a arribbai, chi mi parit potzat sonai mellus puru) a sa fini de su mesi de Treulas puru, chi est su de seti mesis de s'annu, e a mei no mi parit nemmancu berus, de cumenti est sighendi a si nci bobai su tempus, ca po sa metadi cust'annu puru (e seu chistionendi, mi parit craru puru, de su duamilla e binticincu) est bellu ca fatu, est bellu ca scroxau (cumenti mi benit de narai, fatu fatu, gioghendi prus a fai su poeta chi su giornalista).E duncas, eia, po custa cida mi seu promìtiu (e si promitu, a bosatrus puru, immoi chi nci seus, ca de su restu seis cussus chi custus artìculus ddus lìgeis) ca m'apa a strollicai (sèmpiri chi nci dda fatzu, e megu a brullai, si cumprendit?) meda ma meda prus pagu de su chi apu fatu sa cida passada. Ca po agatai s'echilìbbriu (cumenti si narat) seu pentzendi ca ia a podi fai, mancai, una cida innoi prenu fintzas a cucuru de contus e de contixeddus (e duncas, eia, de cussus chi tzerriu strollichiminis) s'artìculu chi ndi bessit aforas po su chi pertocat is novas (ca me is artìculus chi ndi pesu, chi scriu in italianu su giogu, e su spàssiu, benit a essi meda ma meda prus pagu, est a narai giai nudda), e sa cida avatu, mancai, si chistionu feti de bòcias e de resultaus. Sèmpiri chi nci dda fatzu, est craru, ca cumenti eis a sciri (cumenti eis a essi cumprendiu, chi eis lìgiu a su mancu un artìculu tra cussus chi nd'apu pesau in custus ùrtimus duus annus) mi bastat pagu, mi bastat feti unu fueddu (unu mesu fueddu, mancai puru), po partiri cun is chistionis, cun is arraxonamentus e duncas, in unu fueddu, eia, cun is strollichiminis. Ma po custa cida apa a circai de fai a bonu: e de su restu, de su tempus chi passat (est a nai, de su tretu chi eus fatu, aintru de s'annu, e de su tretu chi s'abarrat ancora de fai, chi mi cumprendeis po su chi seu circhendi de si narai) nd'apu giai chistionau, e pròpriu a s'incumintzu de custu artìculu etotu, e po su restu, no tèngiu nesciuna gana (a su mancu: no tèngiu gana de ddu fai oi) de abarrai innoi a si chistionai (o a murrungiai, peus puru!) de sa basca chi est fadendi, e de totus is strobbus chi si nd'arribbant, candu fait basca manna: ca po primu cosa no arrannèsceus a dromiri, nè a su noti e nemmancu a su megama; e in prus si pigat mabi a papai; e depeus abarrai a totu dì bufendi acua, chi no si boleus sicai, cumenti si iat a podi narai. Po no chistionai, duncas, de totu su sentzu chi ddoi est in giru e chi si spitzuat e chi si fait trumentai prus (meda de prus, po ddu narai mellus puru) de su tanti chi iat a serbiri. Fadendi su contu, in prus, ca medas de nosu (e in sa truma mi nci sticu deu puru) depint sighiri a trabballai, mancai siat arribbada s'istadi (e a fai beni is contus, s'istadi nd'est brintada giai de unu mesi e mesu, est a narai, de prus de corantacincu diis), cun totu is dannus chi custu cumportat, partendi, pròpriu, de sa gana chi mancai nemmancu nc'est. E mi parit una cosa crara: ca cumenti nd'arribbat s'istadi, iat a praxi unu pagheddeddu a totus (deu creu de podi narai custu) a si pigai unu pagheddeddu (mancai calincuna orixedda feti, po incumentzai) de pàsiu, e biaus is chi si ddu podint permiti. Ca po su chi mi pertocat, est de candu fia unu piciocheddu chi apu scerau (e apu pediu a su Cielu, po si contai sa cosa a trassa de poeta, prus ca a trassa de giornalista) de guadangiai, mancai, prus pagu de su chi ndi pesant medas personas, ma apu prefèrriu su de tenni, mancai, un'orixedda in prus, scapia de su trabballu (e si cumprendit) po sighiri is fainas de importu chi, a sa fini, funt is passionis prus mannas chi tèngiu in custa vida (e chi m'agiudant a abarrai in peis, chi m'agiudant a andai ainanntis), e po su chi mi pertocat, seu chistionendusì de sa filosofia (mi parit craru, e de su restu s'arremonu sa cosa fatu fatu, mancai feti me is artìculus chi ndi pesu in sardu etotu). E duncas, eia, apu sèmpiri pediu a su Cielu de podi tenni su tempus po pentzai (su fueddu chi cratzat mellus est pròpriu custu) a is cosas mia puru, e no feti a is chistionis acapiadas a su trabballu. E duncas, chi si depu narai sa beridadi (cumenti mi sucedit de fai fatu fatu), mi intendu basau de sa bona sorti; e de su restu, no apu mai pediu a su Cielu de benni a essi sa persona prus arrica chi s'agatat in custa isula (e mancu sa persona prus arrica, e mi parit bastanti craru puru, chi s'agatat in Italia); ma po sa cantidadi de tempus scapiu chi tèngiu (scapiu de su trabballu, si cumprendit, berus est?), mi parit de podi narai ca sa vida cosa mia est unu bisu. Ma apustis, tocat a narai, puru, ca po dònnia cosa nci funt is cosas bonas e is cosas mabas: po dònnia, dònnia cosa. Ca chi tenis su dinai, intzandus murrungias ca no tenis su tempus po fai su chi iast a bolli; e chi tenis su tempus po fai una biga manna de cosas, peròu, mancai ti iat a podi sucediri, puru, ca no tenis su dinai (e duncas, sa possibbilidadi) de ddas fai. E duncas, a sa fini de is giogus (cumenti si iat a podi narai, fadendi su contu ca scriu custus artìculus po unu giàssu chi sighit is partidas de bòcia de su mundu de is diletantis), nc'est s'arriscu de no essi mai prexaus. Ca sa frigadura de sa vida, a bortas, benit a essi pròpriu custa. E mi ndi seu acatau feti immoi ca, a sa fini, dda apu acabbada a mi strollicai etotu. E duncas, eia, po torrai a is chistionis de importu de cust'artìculu etotu (e is cosas de importu, in s'artìculu, no benint a essi, custu est pagu ma seguru, is strollichiminis cosa mia), sigheus a chistionai (e a arraxonai apitzus) de totus is scuadras chi nd'ant cassau sa bìncida de su campionau cosa insoru. E apustis de s'essi chistionau de is de sa Gioventudi de Sarroch (chi nd'ant serrau sa stagioni a su primu postu de sa Lista A), e apustis de s'essi chistionau (est sucèdiu pròpriu sa cida passada a custa) de is de su Deximu (de is de sa Decimo 07, po scriri su nomini in italianu puru), chi nd'ant cassau sa bìncida de su campionau po su chi pertocat sa Lista B, po custa cida si tocat (nc'est pagu de si perdi, pagu de si sbàlliai, mi parit de podi narai custu, a su mancu) a chistionai de is de su Cardedu, chi nd'ant cassau su primu postu in sa Lista C, e duncas, s'artziada, torra, in su campionau de sa Primu Categoria. E m'acàpiu, mancai feti po un'antra parighedda de segundus, a su chi si fia narendu ainnantis, in custu artìculu etotu, e duncas a su tempus chi serbit po sighiri is fainas, is passionis cosa tua; ca chi tui tenis unu trabballu chi no ti lassat assèbiu, nemmancu po mesu segundu, intzandus acudis feti a dromiri, a papai, e a trabballai, torra (chi est cussu chi giai giai mi sucedit candu su trabballu chi depu fai, chi ndi depu pesai po su giàssu de su Diàriu Sportivu benit a essi mannu meda, e fintzas tropu; e custa cosa sucedit, mescamente, in su mesi de Maju, chi est su periodu, duncas, e si cumprendit beni, innoi is scuadras ndi cassant sa bìncida de is campionaus e duncas, eia, nci funt una biga manna de allenadoris de intendi po ndi pesai is ciaciarradas e is intervistas, e tocat a fai su trabballu in seti, dexi diis, cun totu cussu chi custu cumportat). Ma chi tui tenis una passioni manna de sighiri (cumenti iat a essi sa passioni chi tenit, chi s'intendit aintru de su coru unu giogadori, mancai siat unu diletanti, o mescamente chi est unu diletanti, fadendi su contu ca is diletantis ndi cabant in campu feti po si spreviai e po su spàssiu chi nd'arricint, e no de seguru po incasciai barcas e barcas de dinai cumenti, invècias, faint is grandus campionis chi currint in su campionau de sa Sèrie A), intzandus ti depis scerai (depis circai, depis isperai de agatai, chi si praxit de prus cumenti sonat sa cosa) unu trabballu chi ti permitat de tenni calincuna ora scapia in prus. E nci funt medas allenadoris, duncas (e seu chistionendi sèmpiri, est craru, po su chi pertocat su mundu de is diletantis), ca no arrannèscint a andai ainnantis cun sa carrièra cosa insoru, pròpriu poita no tenint su tempus. E sa pròpriu cosa ballit, e si cumprendit, po is giogadoris puru. Candu ses unu piciocheddu piticu de edadi (chi mancai depit pentzai feti a andai a iscola) intzandus is cosas benint a essi prus facilis; ma is dannus nd'arribbant candu incumentzas a trabballai (chi tenis sa bona sorti, a su mancu, iat a fai a narai custa cosa puru, de agatai unu trabballeddu, ca nc'est stètiu unu periodu, una dexina de annus fait, innoi sa genti no arrannèsciat a agatai trabballu nemmancu po sbàlliu). Ca nci funt medas giogadoris, e si cumprendit, ca ant dèpiu serrai sa carrièra cosa insoru, e ant dèpiu, mancai, arrefudai de andai a giogai in scuadras de importu, in su campionau de s'Ecellenza, poita no teniant su tempus po sighiri is allenamentus. Ca si cumprendit beni custa cosa puru: prus ndi artzias de categoria, e prus is giogus si faint tostaus; e prus is giogus si faint tostaus, e prus ti serbit a sighiri is allenamentus, po ti cuncodrai, po su tanti chi fait, po giogai is partidas de su domìnigu. E de su restu, si cumprendit custu puru, chi tui giogas in una scuadra chi currit in su campionau de sa Segunda Categoria, intzandus depis sighiri, mancai, duus allenamentus a sa cida. Ma chi tui arrannèscis a nd'artziai, mancai, a giogai in su campionau de sa Promotzioni, o de s'Ecellenza, po no chistionai duncas de su campionau de sa Sèrie D, intzandus is allenamentus benint a essi, mancai, tres o fintzas cuatru a sa cida. E duncas nci funt giogadoris e allenadoris chi ndi depint studai su bisu cosa insoru, mi parit craru, poita no arrannèsciant a si scabulli de su trabballu. Ca su trabballu serbit po bivi, custu est craru, ma a sa fini, a bortas su trabballu benit a essi unu dannu mannu, puru. E duncas, eia, dda acabbu de si fai sa conca a acua (cumenti si megàt sa bon'anima de mamma mia) e, mancai, atacaus a chistionai de resultaus de partidas, de puntus in sa lista e de totu su chi pertocat unu campionau, una stagioni de giogus. E duncas, eia, si fia narendu ca po custa cida si tocat, si spetat (chi si praxit de prus cumenti sonat) a andai a castiai cumenti funt andadas is cosas me in sa Lista C (e seu chistionendi de su mundu de sa Segunda Categoria, gei si ddu arregodais, berus est?), chi est cussu, m'acudu a si ddu narai (a bortas nci siant personas chi no ddu sciint, e deu seu innoi pròpriu po custu puru, e mi parit bastanti craru), chi pertocat is scuadras ollastrinas. E duncas, eia, a su primu postu de sa lista, cumenti s'apu giai arremonau ainnantis, agataus is de su Cardedu, chi cust'annu funt stètius sighius de un allenadori giòvuneddu, ma chi at fatu giai a biri a totus su de bonu chi sciit fai, cumenti est Massimu Corda. E duncas, (pròpriu cumenti seu costumau a fai candu chistionu de is scuadras chi funt arrannèscias a ndi cassai su primu postu de sa lista in su campionau), sa primu cosa chi mi benit de fai, est cussa de andai a castiai is numerus chi nd'ant pesau is de su Cardedu etotu, ca a sa fini, si iat a podi narai ca is numerus funt su sprigu prus craru (ddi nau diaici, a su mancu, gioghendi unu pagheddeddu a fai su poeta, sèmpiri chi mi ddu permiteis) po cumprendi cumenti est andanda sa stagioni de una scuadra. E duncas, po immoi acudu a si narai, eia, ca is de su Cardedu ant serrau su campionau cun calincuna cosa cumenti a setantunu puntus in busciaca, chi ndi funt arribbaus gràtzias a bintitres partidas bintas (apitzus de bintotu bessidas) e a is duas partidas chi ant serrau cun su resultau siddau in paridadi (ddi nau diaici) e chi ant portau, me is busciacas de is biancus-arrùbius, feti duus puntixeddus. E si cumprendit, deu creu. E po cumprendi cantu funt stètius fortis is de su Cardedu, si potzu narai ca sa scuadra chi est arribbada a su segundu postu de sa lista (e duncas a is pabas de is de su Cardedu etotu), e megu a chistionai de is de su Biddamanna Strisàili, funt stètius bonus a ndi cassai sessantatres puntus, chi funt otu in mancu de is chi nd'ant cassau is primus de sa lista. E duncas, podeus sighiri a castiai is numerus, mancai, po un antru pagheddeddu: e si potzu narai, immoi chi nci seu, ca is de su Cardedu funt stètius bonus a ndi pesai calincuna cosa cumenti a centu e sexi gol (e tanti gei funt unu, si iat a podi narai. Antzis, deu creu ca is de su Cardedu siant stètius una de is scuadras chi est arrannèscia a ndi cassai sa cantidadi prus manna de gol in totu su mundu de su càlciu in Sardìnnia), ma nd'ant ingotu, puru, calincuna cosa cumenti a corantacuatru gol, e si cumprendit ca chi tui sceras de atacai cun dexi giogadoris, totus in pari, intzandus lassas su campu (e is ocasionis) puru a is aversàrius cosa tua, chi cumprendeis su chi seu circhendi de si narai (e chi no arrannèsceis a ddu cumprendi, deu creu ca is cosas ant a benni a essi prus craras candu s'apa a intregai is fueddus chi m'at regalau Corda, chi est s'allenadori de sa scuadra, cumenti s'apu giai arremonau. E chini podit sciri, mellus de s'allenadori etotu, cumenti funt andadas is cosas?). Po si fai a cumprendi de ita totu seus chistionendi, duncas, si potzu feti narai ca, eia, is de su Biddamanna Strisàili funt stètius bonus a ndi pesai calincuna cosa cumenti a otantacuatru gol (e megu a chistionai, intzandus, de is gol fatus, deu creu ca si cumprendat, berus est?), e nd'ant incasciau (nd'ant ingotu) feti bintinoi. Mancai siat berus, puru, ca sa scuadra chi nd'at cassau su tanti prus piticheddu de gol (m'est bèniu de ddu narai diaici, e diaici, cumenti m'est bèssiu, lassu sa cosa, isperendi ca no si dispraxiat tropu) est stètia, a sa fini, cussa de su Scalepranu, cun feti bintitres gol incasciaus. E immoi chi ddus apu arremonaus, si potzu narai, puru, ca is de su Scalepranu ant serrau sa stagioni a su de tres postus in sa lista (e duncas, no est berus, est a narai ca sa cosa no ballit sèmpiri, ca sa scuadra chi, a sa fini, ndi incasciat su tanti de gol prus piticu, est cussa chi ndi cassat sa bìncida de su campionau), cun sessantaduus puntus allogaus in busciaca, chi funt feti unu in mancu de is chi nd'ant cassau is de su Biddamanna, cumenti apu tentu su modu de si contai ainnantis in custu artìculu etotu. E duncas, immoi chi seus arribbaus a custu puntu de sa faina, e de s'artìculu, deu creu ca sa cosa mellus chi si potzat fai siat cussa de andai a arraxonai, impari, apitzus de is fueddus chi m'at regalau Massimu Corda candu si seus intèndius a su telefunu po ndi pesai sa ciaciarrada chi eus fatu apustis chi is de su Cardedu ndi iant cassau sa bìncida de su campionau; ca de su restu, is allenadoris funt is ùnicus ca podint sciri cumenti funt andadas, diaderus, is cosas, me is noi mesis de giogus. «Seus chistionendi de una stagioni bella cantu fadiosa, grai meda po su chi pertocat is emotzionis chi eus tentu sa possibbilidadi de bivi. Ma is cosas, fait a narai custu puru, si funt andadas beni meda: sa scuadra cosa mia at fatu a biri cosas togas meda siat me is partidas chi eus giogau in domu e siat me is partidas chi eus giogau in domu allena, cumenti si iat a podi narai. Su de arrannèsci a binci una surra de partidas, totu de sighiu, e su de essi arrannèscius, prus o mancu, a ndi pesai calincunu puntixeddu in dònnia giorronada, s'at permìtiu, a sa fini, de ndi cassai su primu postu in sa lista». E a fai is contus nci poneus pagu meda, cumenti mi praxit a si narai fatu fatu: is de su Cardedu, custu est pagu ma seguru, funt stètias una de is scuadras chi nd'ant pesau sa cursa prus toga, tra totus cussas chi s'agatant in su mundu de is diletantis sardus. «Seus stètius bonus a ndi cassai calincuna cosa cumenti a setantunu puntus, chi ndi funt arribbaus, po su prus, gràtzias a bintitres partidas bintas: sa media, duncas, sa media de is puntus a partida, megu a narai custu, est de duus e cincuanta po dònnia bessida chi eus fatu, e mi parit de podi narai ca est bella arta. Po su chi pertocat s'atacu, invècias, is cosas si funt andadas mellus puru, chi cumprendeis su chi si bollu narai: seus stètius bonus a ndi pesai calincuna cosa cumenti a centu e sexi gol in totu, e deu creu ca custa siat stètia una de cussas cosas chi si funt bessidas mellus, e sa diferèntzia tra nosu e is atras scuadras nd'est bessida aforas, deu creu, pruschetotu po custu motivu, po sa fortza chi eus tentu in atacu. Su giogadori cosa nosta chi nd'at pesau su tanti prus mannu de gol, e megu a chistionai, est craru, de Samueli Lorrai, nd'at fatu calincuna cosa cumenti a coranta, a solu, ca funt giai sa metadi, e si cumprendit de cantu podit essi prexau, e de cantu seus prexaus nosu puru. Ma is atrus piciocus prus matucheddus de edadi, e megu a chistionai, duncas, de cussus cun s'esperièntzia prus manna a is pabas, s'ant donau una manu de agiudu manna meda, e pruschetotu, ant donau una bella manu de agiudu a is piciocheddus prus giòvuneddus, e mi parit craru puru. Su de binci custu campionau duncas no est stètiu facili, mancai si potzat pentzai su contràriu; no est stètiu facili, megu a narai custu, mescamente poita sa scuadra s'annu passau est arribbada a is ùrtimus postus de su campionau de sa Primu Categoria, e duncas nd'est cabau in Segunda». E cussa de su Cardedu no est de seguru sa primu, o s'ùnica storia chi si contaus e chi pertocat una scuadra chi torrat a binci unu campionau apustis de essi arribbau me is ùrtimus postus, in sa stagioni ainanntis. E deu creu ca custa siat una de is letzionis de importu prus mannu chi si nd'arribbant de su mundu de sa bòcia, una de cussas letzionis chi si podint acumpangiai (cumenti m'est bèniu de ddu narai) in sa vida cosa nosta, cussa de dònnia dì; candu intendu sa storia de cussas scuadras chi funt torradas a partiri, fintzas mancai a arribbai a binci unu campionau, apustis chi ant tentu strobbus e dannus mannus, mi fait totu pentzai ca po sa vida cosa nosta is cosas andant, prus o mancu, diaici etotu: oi ti lassas cun sa sposa o cun su sposu cosa tua e prangis, cras ti torras a ponni impari cun calincunu (o calincuna, ballit aguali, est craru) e ses torra prexau cumenti sa Pasca Manna; oi ses tristu cumenti su mari in s'ierru (cumenti si iat a podi narai, chi mi permiteis de giogai unu pagheddeddu a fai su poeta, e no feti su giornalista), e cras ses torra allirgu cumenti unu crucueu candu ndi torrat su sobi de su beranu apustis chi acabbat s'ierru. Ma torraus a nosu e, duncas, a sa stagioni de importu mannu chi nd'ant pesau is de su Cardedu. «Chi andaus a castiai beni beni cumenti si funt andadas is cosas, podeus biri chi seus abarraus a su primu postu de sa lista giai de sa de cuatru giorronadas de sa lista de partidas chi balliat po s'andada; e custu bollit narai, duncas, ca seus stètius is primus de sa lista, is primus de sa classi po binticuatru partidas de sighiu, s'una avatu de s'atra, e de seguru no funt pagus. Est berus, puru, ca nci funt stètius momentus, in custa stagioni etotu, innoi is aversàrius cosa nosta funt arrannèscius a arribbai giai giai a si cassai, chi est su chi est sucèdiu, de su restu, a is de su Scalepranu, ca a sa segunda giorronada de sa lista de partidas de sa torrada s'agatàt a feti tres puntus de nosu, est a narai, gei si cumprendit beni, deu creu, cun tres puntus in mancu de is chi tenestus nosu. Ma apustis, gràtzias mescamente a sa bìncida chi nd'eus cassau pròpriu in sa partida contras de issus, chi s'est serrada cun su resultau de unu a zeru e chi eus giogau in domu nosta, tra is atras cosas, seus arrannèscius a torrai a partiri a forti, e seus arrannèscius a ddus stesiai in sa lista, e megu a chistionai, est craru, de is aversàrius cosa nosta, gei si cumprendit berus? Podeus narai, duncas, ca apustis de cussa partida no nc'est stètia nemmancu una scuadra chi est arrannèscia a s'acostai a prus de cincu puntus. Is de su Biddamanna Strisàili, peròu, funt arrannèscius a mantenni obertus is giogus po sa bìncida de su campionau, fintzas a una pariga de giorronadas fait; issus puru funt stètius bonus a ndi pesai una stagioni de importu mannu e immoi s'ant a podi giogai totus is cartas chi ancora tenint me is manus me is partidas finalis, cussas chi tzerriaus play-off (a trassa de cumenti narant is ingresus etotu, e custu no est de seguru s'ùnicu fueddu chi nd'eus furau a is ingresus e chi manigiaus in su fetianu ndr); a parri miu funt una de is scuadras prus fortis chi ant a curri po circai de ndi artziai in su campionau de sa Primu Categoria, fadendi su contu de sa cantidadi manna, manna meda, de giogadoris fortis chi tenint in sa rosa». Apustis Massimu Corda torrat a chistionai de sa scuadra cosa sua e de cumenti ddis funt andadas is cosas. «Candu tenis sa possibbilidadi de trabballai cun una truma de giogadoris giòvuneddus, e piticus de edadi, duncas, depis fai su contu ca sa scuadra cosa tua iat a podi curri, pròpriu poita seus chistionendi de piciocheddus giòvuneddus, meda ma meda prus a forti de is aversàrius; e pròpriu apitzus de custa cosa eus circau de ndi pesai is partidas cosa nosta; pròpriu custa cosa est bènida a essi sa fortza prus manna de su Cardedu. S'est sucèdiu, fatu fatu meda, de ndi bessiri aforas, cumenti si narat, pròpriu me in s'ùrtima parti de sa gara, fadendi su contu ca giai sa metadi de totus is gol chi eus fatu nd'est arribbada tra su de otanta minudus e is minudus finalis de sa partida. Custa est sa cosa, a su mancu a parri miu, chi si fait a cumprendi mellus sa fortza chi eus tentu, po su chi pertocat is cambas, e su coru. Po su chi pertocat s'atacu, invècias, deu creu ca Samuele Lorrai est stètiu unu de cussus giogadoris chi nd'at pesau, chi nd'at sforrau una stagioni de oru, chentza de sballiai, giai giai, nemmancu una partida. Est stètiu perfetu, cumenti si narat, ma a sa fini, e custu mi parit bastanti craru, no ndi cabàt in campu a solu, ma antzis, tocat a dividiri is mèritus, cumenti si narat, cumenti si iat a podi narai, in parti agualis tra issu e totu su restu de is giogadoris de sa rosa cosa nosta, chi ndi funt cabaus, impari a issu, in campu po totus is partidas chi eus giogau cust'annu. Deu apu sèmpiri circau de cunvinci is piciocus cosa mia a giogai a s'atacu, chi cumprendeis su chi si bollu narai; mi fait prexei candu is piciocus ndi cabant in campu po si spassiai, e arrannèscint a si spassiai, duncas. E mi fait prexei, e meda puru, candu chini benit a castiai is partidas, e megu a chistionai, duncas, de is tifosus, arrannèscit a si spassiai, cantu, chi no de prus de su chi faint is giogadoris cosa mia. Eia, est craru, candu atacas cun totus is giogadoris chi tenis in campu, ti podit sucedi de lassai sa possibbilidadi, ddi naru diaici, a is aversàrius cosa tua de ti podi fai calincunu gol in prus de is chi mancai iast a pigai chi sa scuadra abarressit serrada in difesa, chi arrannèsceis a mi sighiri po su chi seu circhendi de si narai. Est berus, nd'eus dèpiu boddiri una bella biga de gol, est a narai ca nd'eus incasciau unu bellu tanti, no si podeus cuai, ma candu atacastus, candu currestus concas a sa porta de is aversàrius, po ddu narai diaici puru, fintzas is terzinus, fintzas is difensoris s'ant donau una bella manu de agiudu. E sa pròpriu cosa si iat a podi narai, duncas, po is centrucampistas. Ma potzu narai ca totus is piciocus chi ndi funt cabaus in campu po custas bintotu partidas chi eus dèpiu giogai, funt stètius bonus a ndi pesai unu trabballu de importu mannu, chi s'est sèrbiu, est craru, po ndi cassai su primu postu e, duncas, sa bìncida de su campionau. E duncas, torrendi a nosu, no si ndi podeus scaresci de is coranta gol chi est arrannèsciu a ndi pesai Lorrai, ma is atrus atacantis puru ant fatu su trabballu cosa insoru, chi est stètiu bonu meda, e si cumprendit, ma sa pròpriu chistioni ballit po is centrucampistas, e megu a pentzai a Matteu Carta, chi a solu nd'at pesau calincuna cosa cumenti a undixi gol e bintitres passàgius po su gol de is cumpàngius (eia, cussus ca in ingresu tzerriaus "assist", ca est unu fueddu chi manigiaus fatu fatu candu chistionaus de partidas, ma est unu fueddu, e gei si cumprendit, chi mancai benit a mabi a furriai in sardu. Ma deu nc'apu provau, cumenti podeis ligi a solus, de su restu ndr). Seus chistionendi, duncas, de unu giogadori chi iat a podi giogai, e beni meda, in categorias prus mannas, custu est pagu ma seguru, de sa Segunda Categoria. Opuru mi benit de pentzai a Matteu Rubiu, un antru de cussus giogadoris chi s'at donau una manu de agiudu de importu mannu meda, gràtzias a totu s'esperièntzia chi tenit a is pabas, e chi s'est guadangiau, ddi naru diaici, in totus is annus chi at fatu gioghendi a càlciu in su mundu de is diletantis: cun trintases annus fatus de si portai avatu at fatu a biri a totus, torra, totu su de bonu chi sciit fai cun sa bòcia tra is peis; chistionaus de unu giogadori chi benit a essi unu lussu po su chi pertocat su campionau de sa Segunda Categoria, e gei si cumprendit beni, deu creu custu». E duncas, m'est bènniu in conca de domandai a Massimu Corda cali est stètia, sèmpiri segundu issu, est craru, sa partida binta prus toga, cussu de importu prus mannu. «Is partidas chi eus bintu e chi s'ant prenu su coru de prexu e de afròddiu, fintzas a cucuru, funt stètias medas, ma sa isfida chi s'at fatu a cumprendi, fortzis prus de totus is atras, ca podestus diaderus curri po sa bìncida finali de su campionau, est stètia cussa chi eus giogau a Istersili, fadendi su contu ca festus perdendi, cun su resultau de unu a zeru, ma a sa fini seus arrannèscius a ndi cassai is tres puntus, cun su resultau finali de tres a unu. Custa est stètia, de seguru, una de is partidas prus tostadas, prus fadiosas, ma s'at donau puru sa forza, e meda puru, po sighiri a curri a forti fintzas a s'ùrtimu segundu de custa stagioni». E s'allenadori de su Cardedu, cumenti est giustu, e mi parit craru, at tentu fueddus de importu mannu (fueddus drucis cumenti a su mebi, si iat a podi narai diaici ndr) po totus is dirigentis de s'assòtziu ollastrinu. E duncas, m'at contau ca «is dirigentis, a su mancu a parri miu, est craru, funt stètius bonus a ndi pesai unu trabballu bonu meda, fadendi su contu chi nd'ant pesau una rosa forti, una truma de piciocus ca m'ant sighiu in totu e po totu, de su primu segundu de sa preparatzioni fintzas a s'ùrtimu segundu de sa partida chi eus giogau in s'ùrtima giorronada. Deu creu, duncas, de depi torrai gràtzias, e mi parit diaderus su minimu, cumenti si iat a podi narai, a totus is dirigentis ca ant fatu parti de s'assòtziu, e ant trabballau, e meda puru, a foras de contu, po su beni de su Cardedu; in prus, tocat a narai custu puru, immoi chi nci seu, ant tentu su coràgiu de donai is crais de sa scuadra a un allenadori giòvuneddu, de trintacincu annus, e chi s'est agatau a sighiri, po sa primu borta in sa carriera cosa sua, una scuadra de mannus, ddi naru diaici, apustis de essi trabballau feti cun is piciocheddus de sa Juniores, e apustis, cumenti a vice-allenadori. Is dirigentis, duncas, si iat a podi narai custu puru, funt sighendi a andai ainnantis cun su trabballu cosa insoru, chi funt portendi ainnantis mancai me is ùrtimus annus no sèmpiri is cosas funt andadas beni cumenti podiant bisai, e megu a chistionai, est craru, de sa trocidura, de sa turrada chi nd'ant dèpiu boddiri s'annu passau etotu. Sa bidea de is dirigentis de su Cardedu, duncas, fiat cussa de fai giogai, impari a is mannus, me in sa scuadra de is mannus, cumenti si iat a podi narai, puru, totus is piciocus de sa bidda chi giogànt, giai, in sa scuadra de sa Juniores, e chi me is ùrtimus duus annus, me is ùrtimas duas stagionis, po ddu narai mellus puru, nd'ant cassau sa bìncida de su campionau cosa insoru. Sa cosa de importu prus mannu, duncas, est stètia cussa de nci ponni, in sa rosa, impari pròpriu a is piciocheddus prus piticheddus de edadi, unu cantu de giogadoris cun unu pagheddu de esperièntzia in prus me is pabas, chi funt arribbaus a si donai una manu de agiudu e chi nd'arribbant de is biddas chi nci funt innoi a giru a giru, acanta de Cardedu etotu. Ma no si ndi podeus scaresci, de su restu, ca medas piciocus, medas giogadoris de importu chi fadiant parti de su Cardedu fintzas a s'annu passau, fintzas a sa stagioni passada, ant scerau de ndi sciusciai s'acàpiu chi tèniant con nosu, po andai a giogai cun atras scuadras. Nci fiat comentecasiat sa bidea, e ballit po totus, e in sa truma mi nci pòngiu deu puru, est craru, de ndi pesai unu progetu chi potzat andai ainnantis, puru, po totus is annus chi ant a benni; est cumenti a nci ghetai is fundamentas po ndi pesai una domu: po cussu ca is dirigentis ant decìdiu de ndi pesai sa rosa de sa scuadra cun una surra de giogadoris giòvuneddus, e est pròpriu po cussu puru chi ant scerau de donai is crais de sa scuadra a un allenadori giòvunu cumenti a mei etotu. E arribbau a custu puntu de sa ciaciarrada, mi iat a praxi a torrai gràtzias a totus is personas chi ant trabballau a su costau cosa mia, partendi, duncas, de Mirko Langiu, chi est su segundu allenadori de sa scuadra de is mannus, ma sighit puru is piciocus de sa Juniores (est s'allenadori de sa scuadra de sa Juniores puru, duncas, e deu creu ca si siat cumprèndiu beni ndr); in prus, mi iat a praxi a torrai gràtzias a Andrea Ibba, chi est s'allenadori de is portieris cosa nosta; ant fatu unu trabballu de importu mannu meda e funt arrannèscius, pròpriu impari a mei, a ndi pesai custu miraculu sportivu, mi benit de ddu tzerriai diaici, a su mancu». Po su chi pertocat su benidori, invècias, Corda m'at fatu a sciri cumenti dda pentzat, mancai is cosas no potzant essi craras, a su mancu po immoi. «Chi pròpriu ti depu narai sa beridadi, no mi praxit candu ti lassant in una panchina de una scuadra feti poita ses arrannèsciu a binci su campionau s'annu ainnantis; custu bollit narai, duncas, ca eus a trabballai impari, po s'annu chi at a benni puru, feti chi nc'at a essi su tanti, ddi naru diaici, po agatai torra s'acòrdiu. Ma est craru ca de parti de is dirigentis de su Cardedu nci siat sa gana de sighiri cun mei, e po mei, duncas, est craru custu puru, ballit sa pròpriu cosa, ma po immoi no si potzu narai cumenti ant a andai is cosas, poita no si seus ancora atobiaus, e megu a chistionai de mei e de is dirigentis, est craru, po cumprendi mellus cumenti funt postas is cosas». Attività realizzata col contributo della Regione Sardegna. IMPRENTAS 2024-2025. LR 22/2018 art. 22