Salta al contenuto principale
bittese spogliatoio coumbu
Su Tonara torrat gràtzias a Salvatore Boi, su Fonne arrespundit cun Giovanni Cadau

Coppa Italia de Promozione: cuatru gol in totu tra is de Vitzi e is de Thiniscole, prexiu mannu po su giòvunu Columbu

S'ùrtimu domìnigu chi eus cundiu cun is partidas de is diletantis est stetiu in su mesi de Martzu, sa primu dii. Apustis no nc'est stetiu pru nudda, e totus scieus beni cumenti funt andadas is cosas e seus sigurus chi no serbit a nudda a arrepiti torra is pròprius fueddus de sèmpiri.

Imoi peròu podeus castiai a su benidori cun coru bonu, ligeru e isperantzosus: su mundu de sa bòcia in Sardinnia s'est torrau a allui, po su prexiu mannu de giogadoris, allenadoris e pruschetotu de is tifosus.

Sa Coppa Italia, duncas, s'at arregallau is primus dexiaseti partidas in totu, undixi chi ballint po sa Promozione e ses chi ballint invècias po s'Eccellenza.

Po su chi pertocat sa Promozione, nci funt stetias otu bìncidas, feti tres is partidas acabadas in paridadi.
Una de custas est stetia sa batalla tra is de su Fonne e is de su Tonara: is arrubius-nieddus, sighius de mister Marchi, ant fatu su primu gol cun Salvatore Boi, unu giogadori tra is prus espertus in totu sa categoria, chi ndi aproillat apustis de medas annus passaus impari a is de su Seulu, e chi imoi est giai prontu, aicci parit a su mancu, a fai su trabballu cosa sua puru impari a is cumpangius nous. In su secundu tempus de sa partida, peròu, apustis de duus minutus de giogu, est arribau su gol puru po un antru giogadori de importu mannu e de esperientza po sa Promozione e, est craru, po is biancus-brau sighius de mister Cucca: seus chistionendi de Giovanni Cadau, chi at fatu su puntu po s'1 a 1.

Sa batalla tra is de sa Bittese de Vitzi e is de sa Montalbo de Thiniscole, invècias, s'est serrada cun su resultau de duus a duus: is piciocus allenaus de Matzuzzi ant fatu duus gol cun Saporito e Castelluccio, in sa primu mes'ora de su primu tempus, ma is biancus-arrubius de domu funt arrannescius a si ndi scabulli cun sa fusilada de Sanna, chi at torrau a oberri totus is giogus propriu me is urtimus minutus de su primu tempus e agoa, in su secundu, ant cassau is de su Thiniscole cun su gol fatu de Columbu, unu piciocheddu giòvunu meda chi in sa prima bessida uficiali cun sa primu scuadra (est a nai sa scuadra de is mannus) at agatau giai su prexiu prus mannu po unu giogadori.

In questo articolo
Campionato:
Argomenti:
Stagione:
2020/2021
Tags:
Promozione
Coppa Italia