Salta al contenuto principale
tortolì foto bomber
Is de su Taloro, de sa Tharros e de su Bidda Matraxia abetant de torrai a giogai

Su Tortolì ndi pigat is tres puntus in domu de su Ceraxius, bincit puru sa Monteponi contras a s'Arborea; is tataresus de sa Lanteri ndi faint cuatru a Oschiri

E duncas, su mundu de is scuadras diletantis sardas de bòcia nci d'at fata a torrai a partiri: apustis de is duas partidas chi balliant po sa Coppa Italia, domìnigu passau si funt giogaus puru is primus noranta minudus de is campionaus, partendi de is de s'Eccellenza e arribendi a is cuatru gironis de sa Prima Categoria, chentza si ndi scaresci de is de sa Promozione.
No amancant peròu is daboris e is pentzamentus acapiaus a su Covid, una chistioni chi, a cantu parit in dii de oi a su mancu, at a sighiri a andai ainnantis po un antru bellu arroghedhu de tempus.

Ndi scint calincuna cosa is de su Taloro Gavoi, chi no funt cabaus in campu po sa batalla contras a is de s'Atleticu de Uri, in Eccellenza; in Promozione, invècias, totu frimu in domu de is de sa Tharros, chi ant a depi abetai po giogai sa partida contras a is de su Cortoghiana; sa pròpria cosa ballit po is de su Bidda Matzràxia, chi depiant arriciri is de su Crabonaxa, ma po immui no s'est fatu nudha. Po su chi pertocat su Girone B, invècias, funt sartadas is partidas tra is de su Calangianus e is de su Santu Tiàdoru, tra is de su Fonne e is de Vitzi e tra is de su Porto Torres e is de su Porto Cervo.

Po su chi pertocat is arrisurtaus, invecias, fait spantu su cuatru a zero pesau de is de su Tortolì in domu de su Ceraxius, cun is gol chi portant sa firma de Stefano Mameli, chi nd'at fatu duus me is primus dexi minudus de sa partida, de D'Amico, cun d'unu tiru togu meda, e de Timpanaro, chi sighit a essi unu de is giogadoris de importu prus mannu in sa rosa. Arribant tres puntus puru po sa Monteponi de Bidd'e Cresia, chi bincit in domu de is de s'Arborea po tres a unu: apustis de su gol fatu de Mascia, is arrubius-brau funt arrannescius a ponni torra is cosas deretas cun D'Agostino, duus gol po issu e, agoa, in su secundu tempus, cun bomber Samuele Curreli. In su Girone B, is tataresus de sa Lanteri ndi faint cuatru in domu de is de Oscheri, cun Igene e Farina chi si pretzint is aplausus; cuatru funt is gol puru de is de s'Usinese de Saba e Nuvoli contras a is de su Bonorva.

In questo articolo
Squadre:
Campionato:
Argomenti:
Stagione:
2020/2021
Tags:
Promozione