Salta al contenuto principale
sadali

Adamo Marci e sa scuadra de su Sàdili, un'acàpiu chi andat a innantis de annus

Adamo Marci est siguru: su coru cosa sua, seus chistionendi de calciu, est craru, est totu po su Sàdili. S'allenadori e su presidenti Mariano Pilia si connoscint de diora meda e traballant impari, dònnia annu, circhendi de pesai sa scuadra cun is piciocus de sa bidda e cun s'agiudu de calincunu stràngiu, e is cosas funt andendi beni meda. Mancai chenza tenni meda dinai de spendi po cunvinci is giogadoris prus fortis a giogai cun issus, difatis, is biancus-brau funt sempri me is primus postus de sa classifica. Po imoi tenint bintiduus puntus e funt tenendi su passu de is scuadras prus mannas, cumenti sa Tharros de Aristanis, po ndi arremonai una, ma sa cosa chi contat de prus de totu est su spàssiu.

«Fatzu s'allenadori de su duamilla e cincu – duamilla e ses; nareus chi cussu chi intendu po su calciu est cumenti un'amori, giogu a bòcia de candu tenia trexi annus e apu sighiu puru candu, de Casteddu, seu torrau in Sàdili». Is arregodus bellus no amancant de siguru. «S'annu passau eus bintu sa partida contras a sa scuadra de Biddaxidru, po cuattru a tres, a s'ùrtimu secundu; podis cumprendi su prexu e s'afròddiu chi tenestus; issus fiant is prus fortis, nd'est bessia una partida toga meda, a su mancu po nosu chi giogaus in Prima Categoria». Poi Marci acciungit. «Mi nd'arregodu cun prexeri mannu puru de s'annu chi ndi seus torraus a artziai de sa Terza Categoria; su Sàdili no fiat mai acabau diaici in basciu, de su setantaseti, e po prus de binticincu annus est sempri stètiu in Prima o in Seconda Categoria». Sa Promozione, po imoi, abarrat unu bisu. «Binci su campionau candu nci funt squadras fortis cumenti su Biddaxidru de s'annu passau, o sa Tharros, no est facili; nosu perou si dda giogaus chenza bregùngia». Sa genti de sa bidda no amancat mai a su campu po fai su tifu. «Nareus chi funt sempri is proprius, de una biga de tempu, no si podeus chesciai».

In questo articolo
Squadre:
Allenatori:
Campionato:
Argomenti:
Stagione:
2019/2020
Tags:
Prima Categoria
Girone B