Salta al contenuto principale
bittese esultanza

Coronavirus: s'importu mannu po imoi est sa saludi de sa genti, sa bòcia at a benni a pustis, ma no si sciri candu

A su binticuatru de martzu, a pustis de catodixi diis, prus o mancu, de su cumintzu de cussa chi tzerriant “quarantena”, parit craru a totus chi custu carraxu mannu chi nd'at fatu aproillai aforas su tiau de Coronavirus iat a podi sighiri po un antru bellu pagheddu de tempus. Naraus diaici poita, in custu giassu, fintzas a s'antra dii a su mancu, nosu de Diario Sportivo eus sighiu is fainas de su mundu de sa bòcia, non seus dotoris e apitzus de su virus no podeus nai prus de su tanti. Podeus feti circai, po primu cosa, de ligi i numerus e de cumprendi cumenti funt andendi is cosas: in Italia cussus chi nd'ant bodditu sa mobadia funt sempri de prus; in totu su mundu si chistionat de calicuna cosa cumenti a trexentu mila apuntoraus, po giai trexi mila motus in duuscentu istadus: una pandemia. Cussus chi detzidint a pitzus de su sport, su Guvernu, su Ministru Vincenzo Spadafora, impari a totus cussus de is Federatzionis Sportivas, fintzas a imoi ant circau de castiai a sa cosa cun coru bonu e gana bella: est a nai, pentzendi sempri a candu s'iat a podi torrai a giogai. Nc'est stetiu duncas calincunu chi bisàt de biri torra is giogadoris in campu giai po su cincu de abrili, calincunu chi nd'est bessiu narendi chi sa Serie A iat a podi torrai a partiri mancai de su tres de su mesi de maju, o a su prus a tradu, me is primus diis de su mesi de làmpadas. Nisciunu de issus peròu, a cantu parit, est brintau in sa bidea chi po cust'annu is giogus ant a abarrai firmus. De una parti, mancai, nc'est sa gana de no studai is afroddius de sa genti, pruschetotu in custu momentu diaici marigosu, ma de s'antra nc'est su pèrigulu de contai fabas, poita, est craru, chi sigheus diaici nc'ant a essi strobus mannus po s'economia e, ancora de prus, po sa saludi de is personas. Sa bòcia, po fortza, est una cosa chi at arribai a pustis.

In questo articolo
Campionato:
Argomenti:
Stagione:
2019/2020
Tags:
Coronavirus