Salta al contenuto principale
obbligo di mascherina

Is de su Guvernu cumandant s'òbbrigu de sa carotedda a totu dì; po is giogadoris s'ora e mesu de sa partida parit unu sartidu in paradisu

Is allenadoris chi intendeus, giai dònnia cida, e chi si contant cumenti funt andendi is fainas po su chi pertocat is campionaus sardus de bòcia, parint totus d'acòrdiu: su duamilla e binti sighit a essi un'annu dificili, no feti po su sport, nc'aciùngeus nosu, ma po sa vida de sa genti.

«Is cosas chi fintzas a su mesi de Friàrgiu pariant machimis, imoi benint a essi sa normalidadi», scoviat Michele Cannas, s'allenadori de s'Ulassa, chi currit in su Girone A de sa Primu Categoria.

Est berus: de candu s'agatat, s'omi est arrannèsciu a s'arrangiai e a si ndi scabulli fintzas de is arroris prus mannus, e sa lista iat a podi essi longa meda. Duncas no podeus perdi totus is isperas pròpriu imoi.
Su riscu prus mannu, peròu, est cussu de si ndi scaresci de cumenti andànt is cosas ainnantis de s'arribbu de su tiau de virus: is pipius prus piticus, mescamente, iant a podi cresci, seus fadendi feti un esèmpiu, est craru, chenza mancai podi sciri ita bolit nai castiai is atrus in faci candu andas a passillai in sa bia. Po cussu, totus bisaus chi custu mabi potzat isparessi impressi. Ma po imoi, nc'est ancora pani tostau de matziai.

Tra totus is cosas chi si podint ligi in s'ùrtimu decretu fattu bessiri de is de su Guvernu, difatis, nc'est s'òbbrigu de portai cussa chi tzerriaus "carotedda" giai a totu dì, pruschetotu candu ci bessis, mancai po spreviai o, mescamente, po fai is cumassionis. Parit una brulla, ma a parri de chini est scriendi is arrègulas chi depeus sighiri, s'emus a depi tenni sa carota apitzus a su bruncu e apitzus a su nasu puru candu abarraus aintru de domu. E comentecasiat, in domu etotu funt proibbius is atòbius cun prus de ses personas, mancai siant amigus o parentis de istrintu.

Pròpriu po custu, pruschetotu po is piciocus chi cabant in campu, cuss'ora e mesu de giogu parit unu sartidu in paradisu, unu prexu chi no fait a contai a fueddus; est a nai ca, po una fitixedda de merì, est cumenti chi ti ndi potzat diaderus scaresci de totu su budrellu chi su virus at pesau in totu su mundu.

Ma apustis de is tres fruscius de s'arbitru, is daboris torrant a lestru, poita benit mabi meda fintzas a cumbidai s'atra scuadra in cussu chi in italianu si narat "Terzo Tempo" e ca, si cumprendit beni, est (o fiat) una de is cosas prus togas de is partidas de is diletantis.

 

In questo articolo
Campionato:
Argomenti:
Stagione:
2020/2021
Tags:
Covid