Salta al contenuto principale
gononepallone

Is giogus andant ainnantis a arrogus e a mussius: in su Girone C de sa Primu Categoria sartant seti partidas

De su restu, dhu sciestus giai: po su mundu de su sport su duamilla e binti no est stetiu un annu bonu, a  su mancu fintzas a imoi, e totu po crupa de su Covid, chi nd'at sciusciau is giogus in totu Europa, po no nai in totu su mundu.

Su dannu est stetiu mannu meda, chi contaus chi funt sartadas, tra is atras cosas, puru is Olimpiadis e is Europeus de bòcia.
Sa cosa de importu, apustis de una istadi innui pariat chi is cosas fessint torrendi a si ponni apostu, fiat de partiri cun is campionaus. E diaici ant fatu.
Candu seus lompius a sa de tres giorronadas in Sèrie D, in Promozione e in Primu Categoria (is de sa Secunda Categoria nd'ant giogau feti duas, in Eccellenza invècias funt giai lompius a sa de cincu ), peròu, seus acatendusndi chi nci funt medas dificultadis, pruschetotu po su chi pertocant is règulas de sighiri, cun is giogadoris chi depint abarrai in assètiu po duas cidas dònnia borta chi nc'est su suspetu de essi atobiau calincunu chi podit essi apuntorau.

Domìnigu passau duncas, po fai un esèmpiu, in su Girone C de sa Primu Categoria funt sartadas, pròpriu po custu motivu, ses partidas de is noi chi si depiant giogai: unu disacatu.Imoi at a serbiri passientzia meda, in s'interis chi is de sa Lega cumprendant candu s'ant a podi torrai a recuperai.

Candu no scis chi as a podi cabai in campu po duas cidas de sighiu, peròu, su spassiu acudit a spaciai in pressi, e po cumenti funt andendi is cosas in dii de oi, nc'est sèmpiri sa timoria chi is de su Guvernu potzant decidi de studai torra totu de una dii a s'atra.

Ma po imui, a su mancu a ligi is novas chi s'agatant àintru de su Decretu nou, pesau me is ùrtimas oras, is campionaus iant a depi sighiri a andai ainnantis.
A cantu si cumpendit, is novidadis de importu prus mannu pertocant is diis de passai in assètiu, che de catodixi diventant dexi.
No cambiat nuda, invècias, po su chi pertocat sa cantidadi de genti chi podit brintai a biri sa partida: su cuindixi po centu de is chi nci capint in su logu, ma is tifosus, no depint e no podint essi, comentecasiat, prus de milli.

In questo articolo
Campionato:
Argomenti:
Stagione:
2020/2021
Tags:
Prima Categoria