Salta al contenuto principale
villacidrese mucchio

Sa LND at a fai de totu po permiti a is scuadras de is diletantis de serrai is giogus in campu: est unu bisu o una promissa?

"Serrai is giogus in campu": est custa sa bidea de is de sa LND, chi in dì de oi, peròu, po cumenti funt andendi is cosas, tenit su sabori de una promissa, o fortzis iat a essi mellus a dhu tzerriai bisu. A nai sa beridadi, est sa pròpriu cantilena chi eus intendiu a partiri de su mesi de Martzu, candu is campionaus si funt frimaus po sa primu borta, e sciesus beni cumenti funt andadas is cosas apustis, cun is decisionis apitzus de is bìncidoris pigadas, in s'istadi, aintru de is uficius de sa Lega.

Po sa stagioni de su duamilla e dexianoi \ duamilla e binti, duncas, nd'ant fatu artziai de categoria totus is scuadras chi fiant a su primu postu de sa lista, donendi sa possibbilidadi a is scuadras chi fiant a su de duus postu in sa lista de fai domanda po cussu chi in italiano si tzerriat "ripescaggio". Nc'est de aciungi, po essi crarus, chi s'atra borta is campionaus fiant giai lompius a prus de sa mitadi, cun totu is partidas de su girone de s'andada giogadas, e giai scarescias puru, e una bella pariga de su girone de sa torrada giai fatas.

A custu giru, invècias, sa chistioni parit prus traballosa: is de s'Eccellenza ant acutu a cabai in campu po seti giorronadas, ma si depint recuperai calincunca cosa cumenti a trexi partidas; is de sa Promotzione e is de sa Primu Categoria ant acutu, invecias, a pesai cincu giorronadas in totu, cun ses partidas ancora de giogai, po su chi pertocat is primus, e adderetura trintunu partidas (spratas me is cuatru gironis) po is secundus.
Chi si poneus a dha sas contai beni, ndi bessit aforas chi nc'ant a essi de giogai cinquanta partidas po aparigiai is cosas. Chenza chistionai de sa Secunda Categoria.
E, de cussu chi si cumprendit castiendi cumenti funt andendi is cosas in totu Italia, sa Sardìnnia no est sa regione posta peus: in Campània difatis, po nd'arremonai una, funt sartadas giai centu e cincu partidas; noranta-duus cussas sartadas me is campionaus de is diletantis in Emìlia Romagna, centu e trexi in su Làzio, cinquantotu in Ligùria, setantanoi po su chi pertocat su Piemonte e sa Valle D'Aosta, cincuanta-cincu funt is partidas sartadas, in totu, me is primas ses giorrònadas in Sicìlia, noranta-duus, invècias, cussas ancora de giogai in Veneto.

In questo articolo
Campionato:
Argomenti:
Stagione:
2020/2021
Tags:
Eccellenza