Salta al contenuto principale
sulcis d-cup

Sa LND trabballat po serrai is giogus me is campionaus regionalis ma ndi studat giai su "Trofeo delle Regioni" e is ùrtimas partidas de sa Coppa Italia de Eccellenza

Cenàbara passau, su trexi de su mesi de Donniasantu, is de su Cunsillu Diretivu de sa Lega Natzionali de is Diletantis si funt atobiaus totus in pari (in cussa chi in italianu si tzerriat "video-conferenza"), po cumprendi mellus cumenti funt andendi is cosas (e, pruschetotu, cumenti ant a andai in su benidori) in su mundu de sa bòcia in Sardìnnia, mescamente po su chi pertocat is diletantis e, duncas, partendi de is scuadras de s'Eccellenza, chi est su campionau regionali de importu prus mannu.

In dii de oi, seus lompius a su dexiaseti, nisciunu podit sciri candu ant a podi torrai a partiri is giogus, poita custa, si cumprendit beni, est una decisioni chi ant a depi pigai is de su Guvernu, cumenti sussediu giai in totus custus mesis.

Duncas seus abetendi chi arribit su cuatru de su mesi de Idas, candu, a cantu parit, ant a spaciai is obbrigus e is règulas cuncodradas cun s'urtimu DPCM, bessiu pròpriu me is ùrtimus diis de su mesi de Ladàmini, e ant a arribai novas chi, isperaus, potzant essi diaderus bonas, po su sport ma pruschetotu po sa vida de is pipius e su trabballu de is mannus.

Pròpriu cumenti sussèdiu in su mesi de Martzu de s'annu passau, is dotoris de sa LND funt traballendi po circai de serrai is giogus in campu, intamis me is ufficius, in s'istadi.
Su duamilla e bintunu, intzandus, de cussu chi arrannesceus a ndi cumprendi, at a essi carrigu meda de partidas, poita nc'ant a essi de recuperai is garas de su mesi de Donniasantu (funt sartadas cincu giorronadas in totu) prus cussas chi funt sartadas in su mesi de Ladàmini.
Pròpriu po custu, fadendi su contu puru de su fattu chi su spaniamentu de su virus sighit a andai ainnantis, sartant, giai de imui, is ùrtimas partidas de sa Coppa Italia, cussas chi pertocant, duncas, is scuadras de totu Italia chi ant bintu sa Coppa in sa regione cosa insoru.

Sartant puru, giai de imui, is partidas de cussus chi tzerriaus play-off natzionalis, seus chistionendi sèmpiri de su campionau de Eccellenza, tra totus is scuadras, duncas, chi arribant a su de duus postu in sa lista (cosa custa chi ballit puru po is campionaus de is piciocheddus de sa Juniores).
Fortzis peròu sa nova prus marigosa est cussa chi pertocat su chi tzerriant "Torneo delle Regioni", chi no at a biri sa luxi po su secundu annu de sighiu, unu peccau mannu meda, mescamente po totus is giogadoris prus piticus, chi ant abarrai tristus e a buca asciuta.

In questo articolo
Campionato:
Argomenti:
Stagione:
2020/2021
Tags:
Eccellenza