Salta al contenuto principale
seui arcuerì esultanza

Sa Sèrie A at a abarrai firma fintzas a su mesi de Làmpadas, is de sa Lega Pro giobia chi benit ant a precuntai a sa FIGC de serrai sa stagioni

Apitzus de is fainas de sa Sèrie A eus giai spendiu medas fueddus: a oi is cosas no funt ancora craras, est a nai chi at a tocai a abetai fintzas a su dexiotu de su mesi de Maju po cumprendi calli ant a essi is arregulas de sighiri po si torrai a atobiai totus impari po is allenamentus; is de su Guvernu, in s'interis, a partiri de su ministru de su sport Vincenzo Spadafora, cun totus is dotoris chi sighint sa chistioni, funt circhendi de cumprendi chi is solutzionis bogadas aforas de is scuadras chi giogant in su campionau prus mannu potzant andai beni o chi, mancai, nc'at a essi de arrangiai calincuna cosa. Feti apustis, s'at a cumprendi ita nd'at a essi de sa Sèrie B e, pruschetotu, de sa Sèrie C, chi, semperemmai, ant a podi tenni is strobus prus mannus a torrai a partiri, tra is atras, po una chistioni de dinai. Po no chistionai, poi, de sa Sèrie D, chi est, naraus diaici, su cullegamentu tra su mundu de is diletantis e cussu de is professionistas.

Giogadoris, allenadoris e presidentis iant a bolli sciri, si cumprendit beni su poita, ita nd'at a bessì aforas po cust'annu, po cumprendi pruschetotu cumenti ant a bandai is cosas s'annu chi benit. Su presidenti de sa Lega Natzionali de is Diletantis, Cosimo Sibilla, sighit a arrepiti chi su bisu est sèmpiri cussu de acabai de giogai is campionaus, cosa chi ballit puru po su de Eccellenza, de Promozione e de Primu e Secunda Categoria.

Chi sa Serie A iat a podi torrai a partiri giai de is primus domìnigus de su mesi de Làmpadas, in dii de oi parit traballosu meda feti pentzai chi is atrus potzant fai a su pròpriu.
In s'interis, is de sa Lega Pro, cun su presidenti Francesco Ghirelli in primu fila, s'ant atobiai giobia chi benit, su seti de su mesi de Maju, po precuntai a sa FIGC de serrai is giogus diaici cumenti funt imoi, mancai fadendi aziai in Serie B is cuatru scuadras chi s'agatant primas in sa lista.

In questo articolo
Argomenti:
Stagione:
2019/2020
Tags:
Coronavirus