Salta al contenuto principale
cartina italia covid dpcm

S'Italia pintada in tres caboris: grogu, arangiu e arrubiu; is de sa Sèrie D arriscant de abarrai firmus cumenti a is diletantis

De una dii a s'atra si ndi seus scidaus cun sa cartina de s'Italia pintada de grogu, de cabori de arangiu e de arrubiu: dònnia regione tenit unu cabori chi corrispùndiri, naraus diaici, a su spaniamentu de su virus e duncas a su numeru de apuntoraus e, mescamente, a is arriscus chi nci funt po is cristianus, fadendi su contu pruschetotu de is postus chi abarrant sbuidus me is uspidalis, po cumprendi cantu mobadius, chistionaus pruschetotu de is chi staint mabi meda, si podint arriciri e atendi. In Sardinnia, po nd'arremonai una, is cosas no funt andendi mabi cumenti podestus pentzai me is cidas passadas, pighendi po bonas is novas chi ndi funt arribadas de su Guvernu cun s'ùrtimu DPCM, bessiu aforas pròpriu ariseu, ma cun custu no obeus narai chi si podeus fai pigai de s'afroddiu, antzis nc'est pagu de arriri, ma tocat a pentzai puru chi nc'est genti chi stait peus de nosu: seus chistionedi de is de sa Lombardia, de su Piemonte, de sa Valle D'Aosta e de sa Calàbria, chi, po su chi podit serbiri, imprassaus a forti de innoi.

Ma torraus a is fainas nostas: de cantu si cumprendit, eus a podi sighiri a fai atividadis e allenamentus, a curri e mancai a passillai, aforas de domu, me is parcus, me is bias o me is parchegius (parit una brulla, ma cun is palestras e is piscinas serradas, sa genti est incumintzendi a s'atobiai me is logus prus strambus).
Is novas prus bonas, duncas, arribant po is pipius e is piciochedus prus piticus, chi ant a podi sighiri a andai a scolla.
Scieus puru chi nci funt sotziedadis, de cussas chi traballant impari a is giovanus, chi funt sighendi, o torrendi a incumentzai, cun is atividadis me is logus obetus, e si fait prexei.

Is daboris, peròu, nd'arribant candu chistionaus de su mundu de sa bòcia: cun is campioaus de s'Eccellenza, de sa Promozione, de sa Prima e Secunda Categoria firmus, a su mancu fintzas a su tres de su mesi de Idas, abarrat alluta feti sa Sèrie D, ma no scieus cumenti ant a fai, poita at a essi proibbiu, tra is atras cosas, a si spostai de una regioni a s'atra: si cumprendit beni, intzandus, chi po is scuadras sardas chi giogant contras a cussas de su Làzio o de sa Campania funt arribendi tempus legius, ma nd eus a cumprendi calincuna cosa in prus giai a partiri de is oras chi ant a benni, cun is de sa LND chi funt traballendi po cicai de aderetzai is cosas, po su chi at a essi possìbbili.

 

In questo articolo
Campionato:
Stagione:
2020/2021
Tags:
Serie D