Salta al contenuto principale
tortolì esultanza

Su "Cunsillu Diretivu" ndi sciusciat totus is giogus de is diletantis; imoi nc'at a essi de cumprendi cumenti aderetzai is cosas

Sa nova, a nai sa beridadi, fiat badda badda in s'ària da meda tempus: po sa primu borta de candu esistint, is campionaus de bòcia de is diletantis funt stetius sciusciaus prima de s'ora.
Est sa decisioni chi ant pigau, pròpriu ariseu merìceddu, is de su "Consillu Diretivu", cun su presidenti Gabriele Gravina chi at obetu is traballus, e duncas is arrexonamentus, a mesu dìì, impari a totus is atrus cunsilleris: dhoi fiant, po nd'arremonai una pariga, Dal Pino, Marotta e Lotito po sa Sèrie A, Balata po sa Sèrie B; Ghirelli, Baumgartner e Lo Monaco po sighiri is interessus de sa Lega Pro; po sa Lega Natzionali de is Diletantis dhoi fiant, invècias, Sibilia, Acciardi, Baretti, Frascà, Franchi e Montemurro.

A sa fini, duncas, no nc'est stetiu nudha de fai; est a nai: at bintu su tiau de su Coronavirus, cussu dannu mannu chi si nd'est protziu in pitzus, prus o mancu, a mitadi de su mesi de Friàrgiu e chi at ghetau a fundu e susu totus is giogus e is fainas po custu duamilla e binti (chistioni chi ballit, puru, po is piciocheddus me is scolas, tanti po si nd'arregodai, chi depessit diaderus serbiri, chi no est feti su mundu de su sport chi ndi bessit a arrogus apustis de totu custa istoria).

In d-unu primu tempus, totus bisamus chi, mancai, si podessit torrai a partiri cun is giogus giai de su sabudu de Pasca Manna, ma is cosas apitzus de su spaniamentu de sa mobadia ant trigau a s'aderetzai torra, e mancai is de sa LND nc'apiant sèmpiri isperau, a su mancu fintzas a oi, si funt depius ponni su coru in paxi, cumenti si narat.

Imoi crasi, chi est cenabara, su binti-duus de su mesi de Maju, nc'at a essi un atru atobiu, sèmpiri de is de sa LND, po decidi cumenti cuncodrai is cosas po cussu chi pertocat is listas e, pruschetotu, po cumprendi cumenti  pesai sa stagioni chi at a benni. Scieus giai, de su restu, chi no at a essi facili ponni totus de acordiu.

In questo articolo
Campionato:
Argomenti:
Stagione:
2019/2020
Tags:
Coronavirus