Salta al contenuto principale
villamassargia esultanza

Su mundu de sa bòcia in Sardinnia circat de andai ainnantis: oi si recuperant duas partidas po s'Eccellenza e cuatru in Promozione

Arriendi e brullendi, seus giai lòmpius a sa metadi de su mesi de Làdamini, cun is campionaus chi, mancai a arrogus e a mussius, funt sighendi a andai ainnantis.
Dònnia domìnigu peròu, dhu scieus beni poita nd'eus chistionau giai medas bortas, ndi sartant calincuna cosa cumenti a su binticincu po centu de is partidas chi s'iant a depi giogai, e totu po crupa, scieus beni custu puru, de su Covid.

Nci funt medas scuadras, difatis, chi tenint giogadoris apuntoraus e duncas depint abarrai in assètiu; in medas biddas, invècias, is sindigus ant depiu serrai is campus sportivus, cumenti est sussediu, po nd'arremonai unu, in Nurri, in su mesi de Cabudanni, cun is arrubius – brau, chi currint in su Girone A de sa Primu Categoria, ma chi po imui no tenint nemancu unu minudu de giogu me is cambas.
Su numeru de is mobàdius, in totu Italia e puru innoi in Sardinnia, est sighendi a nd'artziai, diaici nc'est genti meda, pruschetotu tra is allenadoris e is giogadoris, chi timit giai chi is giogus si potzant torrai a frimai chitzi, ma po oi obeus circai de studai, po su chi s'arrannèsciri, is pentzamentus legius.

In s'interis chi seus scriendi custus fueddus, difatis, nci funt in campu is de s'Atletico de Uri, contras a is de su Taloro de Gavoi, e is de su Bosa, contras a is de sa San Marco, po su chi pertocat su campionau de Eccellenza. Abarrant diaici de recuperai otu partidas.

Po su chi pertocat is duus campionaus de sa Promozione, oi s'ant a giogai cuatru partidas in totu: is de sa Tharros s'atobiant cun is de s'Atletico de Cortoghiana; is de su Bidda Matràxia arricint is de su Crabonaxa; is de su Santu Tiadoru, invecias, funt gioghendi, de is cuatru de su merì, in domu de is de su Calanzanos; is de su Fonne, si d'ant a biri contras a is de sa Bittese de Vitzi.
Po su chi pertocat sa Promozione, mancant ancora cincu partidas de giogai po aparixai is cosas.

Serraus cun d-unu consideru: chi is giogus funt sighendi a andai innantis est pruschetotu gràtzias a su traballu de is presidentis e de is socius (est a nai is dirigentis) de is scuadras, chi traballant a totu dì po cuncodrai is cosas me in su campu e po essi prontus, duncas, a nd'arrici is tifosus, circhendi de arrispetai totus is regulas.

In questo articolo
Squadre:
Campionato:
Argomenti:
Stagione:
2020/2021
Tags:
Eccellenza