Salta al contenuto principale
natzionale sarda vittorio pusceddu

Vittorio Pusceddu cojat sa Natzionale Sarda de bòcia: est issu s'allenadori nou

Arribant noas de importu mannu po sa “Natzionale Sarda de bòcia”: sabudu passau, su binticincu de su mesi de gennàrgiu, nc'est stetiu un atobiu cun is giornalistas po chistionai de s'assòtziu nou, “Fùbalu Asd”, e de totu is cosas chi ant a benni in su duamilla e binti. Tra is atrus ant chistionau Vittorio Sanna, Stefania Campus, Gabriele Cossu, Bernardo Mereu e Vittorio Pusceddu.

Stefania Campus, chi est sa presidenti de “Fùbalu Asd”, contat: «Seus dexi personas in totu chi sigheus custa faina. Nosu pentzaus chi s'assotziu potzat a essi una manera nova po fai connosci sa Sardìnnia in su mundu. Teneus puru un acapiu cun su MSP».
Sa “Fùbalu Asd” at a sighiri, in su benidori, is fainas de sa scuadra sarda de calciu a undixi pesada de cussus de sa FINS (Federatzione Isport Natzionale Sarda), chi fintzas a imoi fiat me is manus de Bernardo Mereu, s'ex allenadori, tra is atrus, de s'Olbia, chi in su fratempus est lompiu a traballai puru cun su Cagliari Football Academy ma abarrat àintru a sa “Fùbalu Asd” po donai una manu de agiudu.

Vittorio Sanna scoviat sa stòria chi nc'est apitzus de su nomini de s'assotziu: «Fùbalu est unu fueddu antigu, chi fiat manigiau po nomenai su giogu de su calciu; pròpriu po custu eus decidiu de ddu scerai».
Gabriele Cossu est prexau meda po cumenti funt andendi is cosas in sa FINS: «Mi iat a praxi a torrai gratzias a totus cussus chi funt sighendi custa faina; eus traballau meda po ndi pesai sa Natzionale Sarda de calciu e imoi si nci seus ghetendi in atrus cuatru sports».

S'allenadori nou de sa “Natzionale Sarda” de bòcia est Vittorio Pusceddu, ex giogadori, me is annus otanta, de su Casteddu, e s'allenadori de sa Primavera de is arrubiu-asullus.
«Seu prexau meda — contat Pusceddu —, apa a sighiri su traballu fatu da chini ci fiat prima de mei, circhendi de nci ghetai in mesu cussus giogadoris fortis chi perou no funt arrannescius, fintzas a imoi, a fai a biri totu cussu chi scint fai».

Sa “Natzionale Sarda” at a torrai in campu su bintinoi de su mesi de maju, in Portovecchio, contras a cussus de sa Corsica.

In questo articolo
Allenatori:
Argomenti:
Stagione:
2019/2020
Tags:
Natzionale Sarda
Fùbalu Asd