Su Cannonau Jerzu si pintat de arrosa: nascit sa primu scuadra totu de pipieddas

Cussus de su Cannonau Jerzu no penzant feti a fai spàssiai is maschiteddus; difatis po sa primu borta, in sa bidda, ddoi est una scuadra de calciu pesada propriu po totus is pipieddas chi bolint giogai a bòcia, su spantu est mannu meda.

S'annu passau, ses piciocheddas giogànt impari ai mascus in sa scuadra de is Pulcini, una cosa chi ballit feti po is giogadoris prus piticus, fintzas a is cuindixi annus. Apustis sa crica de ses est crèscia a otu pipias, diaici sa sotziedadi at pentzau de ghetai su bandu po ndi circai atras.
Eleonora Piroddi, chi giogat ancora a calciu a cincu, e Valentina Allegria, chi at acabau de pagu, impari a Federica Laconi, imoi sighint, cun prexu mannu, sexi femineddas in totu; duas, Serra e Lai, nd'arribant de Osini, is atras funt de Jerzu. A nai sa beridadi no nci funt meda scuadras in Ollastra, e fortzis in totu sa Sardìnnia, cun cussa biga de pipias.

Cristiana Lotto, chi est sa filla de unu de is prus mannus giogadoris de su Jerzu, e Michela Salis funt diaici fortis ca giogant puru cun is piciochedus de is “Esordienti”, no po fait numeru, est craru, ma poita donant una bella manu de agiudu a binci is partidas.

Is femineddas de su Jerzu ant sempri fatu bella figura: po imoi giogant contras a is pipieddus de Murera, Santu Idu e Biddeputzi; candu ddas bint arribendi, sa genti abarrat a buca oberta, poita no ci creint, ma apustis su spantu est mannu meda po cumenti si movint in campu: currint de una parti a s'atra, cumenti a badrunfas, e no timint mai de ponni sa camba candu nc'est de firmai unu pipiu de s'atra scuadra.

Is boxis funt arribadas puru a is origas de cussus de su Casteddu, chi in su benidori ant a depi pesai una scuadra totu de feminas prus matucas, poita imui tenint feti s'Under 13, s'Under 14 e s'Under 15. Tres pipieddas de su duamilla e seti giogant giai po sa Rappresentativa.
S'afroddiu de su presidenti Gianluigi Piroddi est meda, ma sa bidea de cuncodrai una scuadra po fai giogai is feminas a bòcia fiat benida in conca, po sa primu borta, in su duamilla e duus – duamilla e tres, a sa bon'anima de Marcello Laconi.

Imoi, a cantu parit, ant a nasci atras scuadras de pipieddas puru me is biddas acanta de Jerzu.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020