Domìnigu de partidas po is de sa Sèrie C e de sa Sèrie D: duus gol de Ragatzu bastant a s'Olbia po firmai su Renate, is de su Murera bincint contras a su Gladiator

Is scuadras sardas chi currint me is campionaus de Sèrie C (seus chistionendi mescamente de is de s'Olbia) e de Sèrie D sighint a cabai in campu, impari a is professionistas de sa Sèrie B e a is grandus campionis de sa Sèrie A.

Pròpriu domìnigu passau, su trexi de su mesi de Idas, is biancus de s'Olbia funt arranèscius a firmai sa iscurrizada de su Reate, sa primu de sa lista cun trinta-duus puntus, ingotus gràtzias a dexi bìncidas e duus paregius: sa partida s'est serrada cun su resultau de duus a duus.

Su Renate, chi nd'est arribau a su "Nespoli" cun sa crara bidea de si ndi pinnigai sa de otu bincida de sighiu, nd'at ingotu su primu gol apustis de tres minutus de giogu, cun Daniele Ragatzu chi est stetiu bravu meda a bati su portieri de is strangius, Gemello, cun d'unu tiru de punizioni. Apustis feti de seti minutus, peròu, Kabashi at torrau a ponni su resultau in paridadi.
In su secundu tempus, invecias, a su de cuindixi minutu, su Renate arrannescit a sfundai torra sa porta difèndia de Tornaghi, cun Galuppini chi aciapat su gol chi ballit po su unu a duus.
Ma me is ùrtimus minutus de sa partida, torra Daniele Ragatzu si ponidit sa scuadra cosa sua me is pabas e agatat, cun d'una giogada de campioni, su tiru de is undixi metrus chi ballit po su duus a duus finali e, duncas, po unu bellu puntu po is piciocus sighius de mister Canzi.

Sa Sèrie D, po su chi pertocat su Girone G, invècias, est torrada a partiri cun is partidas de su calendàriu, est a nai cun sa de seti giorronada, apustis de cincu domìnigus (incumentzendi de s'otu de su mesi de Donniasantu, fintzas a su ses de su mesi de Idas) chi funt serbius po recuperai una bella fita de totus cussas partidas chi funt sartadas me is cidas passadas.

Nudha de fai, peròu, sèmpiri po crupa de su tiau de virus, po is de s'Alzaghena, chi ancora tenit medas giogadoris apuntoraus; po is de su Latte Dolce, chi depiant giogai contras a is de su Nocerina; e po is de sa Torres, chi depiant partiri po giogai in domu de is de s'Insieme Formia.

In campu, invècias, funt cabaus is de su Crabònia, chi si ndi funt pigaus unu puntu contras a is de su Nola, cun sa batalla chi est acabada cun su resultau de unu a unu; bincida po is de su Murera, chi in domu cosa insoru ant batiu, po duus a unu, is de du Gladiator, gratzias a is gol fatus de Cadau e Virdis.
Domìnigu de scaresci in pressi, invècias, po is de su Lanusè, chi nd'ant bodhitu una bella surra in domu de is de su Monterosi, cun Sivilla chi at fatu totus e tres is gol po sa scuadra sua.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020