Andaus a castiai cumenti funt andendi is cosas in su campionau de sa Segunda Categoria: in sa Lista A nci funt tres scuadras chi no ant ancora pèrdiu nemmancu una borta

E duncas, sa prima nova chi si potzu donai po oi est ca, eia, nci dda eus fata a brintai in su mesi de donniasantu (nci dda eus fata a nci lompi, chi si praxit mancai de prus diaici po cumenti sonat); e duncas, eia, teneus de si scroxai (chi mi permiteis de manigiai custu fueddu, isperendi ca nesciunu tengiat calincuna cosa de murrungiai) su de undixi mesis de s'annu puru, chi a su mancu po su chi mi pertocat at a essi bellu longu e, nci podeis scumiti (cumenti si iat a podi narai fuirendindi sa trassa de s'italianu) at a essi puru bellu fadiosu, a su mancu po su chi mi pertocat. 

Ma a sa fini apa a pigai po bonu su consillu chi mi nd'arribbat fatu fatu de totus is allenadoris chi intendu po ndi pesai is intervistas chi ndi bessint aforas in su giàssu de is amigus de su Diàriu Sportivu: e intzandus, eia, is allenadoris mi contant sèmpiri ca sa cosa mellus chi una scuadra podit fai, chi una truma de gigoadoris podit fai, est cussa de pentzai a una partida a sa borta, e mescamente candu su campionau est incumentzau de pagu tempus; e sa pròpriuu cosa apa a circa de fai deu po su chi pertocat su mesi de dònniasantu: unu passiteddu a sa borta, unu passiteddu a sa dì, e apa a circai de pentzai feti a su trabballu chi depu fai in su fetianu (e mancu mali ca tengu unu trabballeddu de sighiri, po no m'arrosciu tropu aintru de sa dì, e megu a brullai, e si cumprendit; e mancu mali ca tengu ancora unu bellu trabballeddu, chi est cussu de scriri is artìculus chi ligeis in custu giàssu etotu, e chi mi permitit de mi ndi scabulli de totus is cosas chi nci funt de pagai po abarrai apitzus de custu mundu chi mi parrit macu meda e totu ghetau apari), cida po cida, chentza de mi morri cumenti nd'arribbat su lunis (e megu a narai ca su lunis po unu giornalista sportivu est sa dì prus fadiosa e prus trumentosa, fadendi su contu ca nc'est de si torrai a si contai totus is cosas chi sucedint me is campus de giogu in su fini de cida, po is partidas), e circhendi de fai totu su bonu chi arrannèsciu me is atras diis, circhendi de arribbai a su cenabara (chi benit a essi sa dì chi tengu scapia de su trabballu) chentza de tenni su crobeddu totu buddi buddi, cumenti si iat a podi narai. 

E duncas, immoi chi nci seu, e immoi chi s'apu arremonau totu su trabballu chi tengu de fai po custu mesi, andaus a castiai mellus cumenti ant a andai is cosas: e duncas, eia, po su mesi de donniasantu nc'ant a essi cuatru giòbias, e duncas, est craru, ant a bessiri aforas (sèmpiri chi su Cielu at a bolli custu beni po mei, e duncas, eia, sèmpiri chi apa a abarrai sanu e cun sa gana bona, cumenti est sucedendi in dì de oi de su restu) cuatru articulus pesaus (e scritus) in su sardu chi si fueddat in su Campidanu de mesu, po su chi pertocat is Novas de su Diàriu Sportivu: e duncas, eia, a fai is contus nci poneus pagu meda: is giòbias nd'ant a arrui su cincu (ca est oi, ca est sa dì, a sa su mancu, innoi ndi bessit aforas custu artìculu chi teneis asuta de is ogus), su doxi, su dexennoi e su bintises; po su chi pertocat su contu de is lunis, invècias, su mesi de donniasantu s'at a serrai (nemmancu a ddu fai aposta, fadendi su contu ca est sa dì prus fadiosa, cumenti s'apu contau immubagora) de lunis, e duncas, eia, boghendindi de su contu su primu lunis de custu mesi (ca nd'est arrutu su duus), nc'ant a essi in totu atrus cuatru lunis de si scroxai, e chi nd'ant a arrui, su noi, su sexi, su bintitres e su trinta. E apustis (ma feti apustis) s'eus a podi ghetai, a fundu 'e susu, in su de doxi mesis de s'annu puru, e benimindi prexu (cumenti si iat a podi narai, e cumenti apu sèmpiri intèndiu narai in bidda mia, a su mancu); ma de sa cosa, est craru, fortzis est mellus chi ndi chistionaus torra, e mellus, in su benidori; ma de su restu (cumenti eis a sciri mellus de mei puru) fadendi su contu ca po custu mesi is festas funt giai acabbadas (e megu a chistionai, est craru, de is festas chi fadeus po sa dì de totus is santus, e po sa dì de totus is mortus), su giogu chi podeus fai po su mesi de donniasantu est pròpriu cussu de abertai, cun su coru in paxi e cun passièntzia, po su chi fait, po su chi arrannèsceus, chi ndi lompat su mesi de idas e intzandus, chi ndi lompat sa dì de su Nadali puru, ca benit a essi una de is diis prus drucis chi nci funt aintru de s'annu, e si cumprendit, e sa chistioni no ballit e no pertocat feti is pipius, e mi parrit bastanti craru. 

E mi parrit una cosa stramba meda, su de m'agatai a si chistionai giai de su de doxi mesis de s'annu e de su Nadali, candu ammancant calincuna cosa cumenti a cincuanta diis, ma chi pròpriu si ddu depu narai, in Casteddu apu giai biu is primus matas cuncodradas po is festas, est a narai cun totus is luxixeddas e is apicajonis; e duncas, ddu scieis beni cumenti si pigat, cumenti si movit s'afròddiu: apustis chi ndi bogaus is apicajonis chi pertocant, chi eus postu po cussa tialu de festa de Halloween (e cumenti s'apu giai narau sa cida passada, de su restu, a mei sighit a mi parri una festa chentza de nesciunu sentidu, a su mancu po su chi pertocat sa Sardìnnia; ma mancai, mi megu a solu a solu, megu a chistionai diaici poita seu bèciu scorantau, cumenti naràt sa bon'anima de mamma mia, poita de su chi apu potziu biri innoi in bidda, is pipius gei si funt spassiaus, e meda puru, a si cuncodrai, est a narai a si bistiri a maschera e a si nd'andai in giru, a travessu), intzandus si benit acoitu sa gana de ndi pesai is apicajonis chi pertocant su Nadali, ca mi parrit ca sa genti est bessendi aforas de conca, cun custa chistioni de is apicajonis; e no nc'est nudda de mabi, siat craru su chi seu circhendi de si narai, ma deu apa a fai, apa a cuncodrai, nd'apa a pesai su presèpiu feti s'otu de su mesi de idas, cumenti si iat a depi fai de su restu. 

Ma parrit ca sa genti no biat s'ora chi nd'arribbit su Nadali, fadendi su contu ca s'atra a dì a su supermercau ddoi fiat una sennora, una picioca, ca fiat comperendi, giai, calincuna cosa cumenti a tres panetonis; ca si cumprendit: candu unu disigiat una cosa, intzandus si pasiat feti candu tenit tra is manus su chi bollit; ma deu creu ca gei eus a acudi, po cust'annu puru, a papai drucis e ciuculati e pani de orus (po ddu narai a trassa de cumenti ddu tzerriaus in italianu, cumenti m'at consillau de fai su fueddàriu etotu) e panetonis e totu su restu de is cosas chi seus costumaus a si nci ghetai in brenti po is festas (e megu a ddu narai po brullai, e si cumprendit). 
E torrendi a sa chistioni ca su giogu chi podeus fai in su mesi de donniasantu est cussu de abertai chi nd'arribbit su Nadali (ca atras festas no nci ndi funt, de su restu), mi benit in conca ca esistit puru su chi tzerriaus, in italianu, su calendàriu de s'aventu, ca serbit, pròpriu, a s'acumpangiai in custu tretu ca in dì de oi (seu atachendi a scriri custas rigas candu seu arribbau a su de cuatru de su mesi de donniasantu) mi parrit diaici longu ca iat a podi no acabbai mai prus (e megu a brullai, torra, e si cumprendit), ma chi eus a tenni passièntzia (ca est sa mexina mellus chi nci podit essi po si bivi sa vida in custu mundu), eis a biri ca po cust'annu puru si nd'eus a prandi, de totus is festas chi nc'ant a essi de fai (e eus a depi fai su contu ca cust'annu su binticuatru, est a narai sa dì ainnantis de su Nadali, e duncas, cussa chi nonna mia, o ajaja mia, fiat costumada a tzerriai sa dì de sa noti de cena, nd'at a arrui de giòbia, e duncas, eia, seu giai pentzendi ca apa a depi cuncodrai s'artìculu chi nd'at a bessiri po is Novas, cumenti a dònnia dònnia giòbia, chentza de ndi sartai nemmancu unu, cun totu sa gràtzia chi apa a tenni e chi apa a agatai; apa a depi infrochitai po beni s'artìculu chi nd'at a bessiri po Nadali, chi mi permiteis de giogai cun is fueddus cumenti iat a podi fai unu poeta, prus ca unu giornalista sportivu). 

Ma torraus a nosu, e duncas, si potzu narai ca po su chi pertocat su tempus chi passat (e is cosas de importu chi nci funt de narai po su benidori) si nd'apu chistionau po oi puru, e cumenti s'arrapitu fatu fatu, mancu mali ca su tempus est sighendi a curri, e a passai po mei puru (e po bosatrus e bosatras chi custus artìculus ddus ligeis). 
E duncas, ainnantis de mi nci fuiai a fundu 'e susu me is chistionis chi pertocant is campionaus de càlciu chi sigheus cun su giàssu de su Diàriu Sportivu, e chi funt cussus pesaus de is de sa Federatzioni Italiana de su Giogu de su Càlciu e de is de sa Lega Natzionali de is Diletantis, no m'abarrat atru de fai chi andai a castia cumenti funt andendi is cosas po su chi pertocat su clima. 
E duncas, eia, sa primu nova chi si potzu contai est ca, 'tendei 'tendei, est arribbada sa primu nì in Sardìnnia puru, e custu giai de is primus oras, de is primus diis de su mesi de donniasantu; e nc'est unu amigu miu, chi atobiu giai giai dònnia dì innoi in bidda etotu, ca sighit a m'arrapiti ca apustis de una istadi innoi fait basca meda (e cussa chi seus arrannèscius a si lassai a is pabas, mancai totu trisia-trisia e totu murrungia – murrungia, cumenti si narat, est stètia una de is istadis prus bascosas de is ùrtimus centus annus) intzandus nd'arribbat un atonzu e un ierru, mescamente, innoi fait frius meda; e mancu mali ca sa linna de nci ponni, de nci ghetai aintru a sa ziminera po allui e po fai su fogu, a su mancu po immoi, no m'ammancat, custu est pagu ma seguru, intzandus potzu sighiri a andai ainnantis cun su coru prenu de afròddiu, ca su de allui su fogu benit a essi unu de is prexus prus mannus chi mi nd'arribbant, chi tengu me is mesis prus fridus, e duncas tenit axiu su bentu a suai e s'acua a nd'arrui, ca de seguru no m'apa a fai frigai, cumenti si iat a podi narai; e chi pròpriu si ddu depu narai, mi ia a depi bregungiai chi si contu ca cust'annu apu allutu giai su fogu una pariga de bortas (cun sa iscusa ca nci fiat sa ziminera nova de incingiai), mancai no fessit fadendi frius (chi est berus ca apustis chi alluia su fogu dda acabammu a maigas crutzas, a mi sudai coba coba); e custa cosa de fai su fogu candu, mancai, no serbit, mi fait intendi a trassa de ladroni, e no sciu nemmancu deu poita mi pigat diaici, cumenti chi ndi siast furendindi calincuna cosa. 
Ma nc'est de narai, puru, ca custu domìnigu passau (ca fiat sa primu dì de su mesi de donniasantu) nci seu bèssiu de dommu candu fiat giai totu proi proi (cumenti naràt sa bon'anima de mamma mia; e mi praxit fintzas a m'amachiai, chi pròpriu si ddu depun scoviai, custa cosa chi teneus in sa lingua sarda, chi est cussu de arrapiti po duas bortas su verbu po cuncodrai su tempus a su gerundiu, cumenti si iat a podi narai furendindi sa trassa de s'italianu etotu), e duncas, eia, in s'interis chi mi seu fatu sa passillada chi mi fatzu dònnia dònnia dì, chentza de ndi sartai giai nemmancu unu, intzandus mi seu totu sciustu, e apu pigau puru unu bellu tanti de bentu fridu (e si cumprendit beni, chi fadeis su contu ca nd'est arribbada giai sa nì me is montis de su Gennargentu), ca su de allui su fogu m'arrachediàt, e meda puru; e fadendi su contu ca sa linna dda tengu, e sa ziminera est bella nova nova, intzandus mi seu fatu custu regalu, est a narai, custu scancèriu; ca po mei su de allui su fogu benit a essi unu ritu e mescamente unu scancèriu po su cropus e mescamente po s'anima puru, chi mi cumprendeis po su chi seu circhendi de si contai. E seu seguru ca po su chi m'abarrat de bivi in custa vida, su fogu in s'ierru (ma a partiri giai de sa segunda parti de s'atonzu) no m'at a mancai mai. E sèmpiri chi su Cielu at a bolli custu beni po mei.

E duncas, immoi, po primu cosa, andaus a castiai cumenti funt postas is cosas po su chi pertocat is previsionis apitzus de su tempus chi at a fai me is diis chi nd'ant a arribbai e, mescamente, po su chi pertocat su fini de cida, candu nd'ant a cabai in campu, candu nd'ant a torrai in campu, po ddu narai mellus puru, is scuadras chi currint me is campionaus pesaus de sa Federatzioni Italiana de su Giogu de su Càlciu. 
E duncas, po immoi podeus feti isperai ca su tempus malu no fetzat tropus dannus, cumenti invècias est fadendi, diaici apu intèndiu pròpriu custu mengianu, in una pariga de regionis e de citadis italianas (est a narai: in una pariga de regionis e de citadis in su chi tzerriaus continenti, poita po su chi pertocat sa Sardìnnia su tempus no est andendusì mabi, a su mancu fintzas a oi), a partiri de Roma, po nd'arremonai una. Po su chi si pertocat, e po su chi pertocat su tempus chi est fadendi innoi in su Campidanu de mesu, in sa dì de su mercuis (est a narai, ariseu) at fatu unu bellu benti frius, cun sa temperadura massima chi comentecasiat nd'est artziada fintzas a bintiduus gradus (e si iat a podi narai puru ca, a su mancu su mengianu, nc'est ancora unu bellu callenti, e apu castiau pròpriu immubagora su tempus chi invècias est fadendi in Milano, cun is temperaduras massimas chi no nci spundint prus a in artu de doxi-trexi gradus; e tra innoi in Bidd'e Sorris e Milanu nc'ant a essi cussus dexi gradus de diferèntzia, ca de seguru no benint a essi pagus, e si cumprendit); po su chi pertocat is temperaduras prus bàscias, e duncas, eia, cussas chi seus costumaus a tzerriai temperaduras minimas, no ndi iant a depi cabai (a su mancu sighendi e pighendi po bonu su chi nc'est scritu, su chi narant, mellus puru po cumenti sonat, is previsionis) prus in bàsciu de undixi gradus, e custu po su chi pertocat su cenabara, su sabudu e su domìnigu puru, poita de sa cida chi at a benni is temperaduras iant a depi torrai a artziai, a su mancu de una parighedda de gradus, e sa cosa ballit siat po is temperaduras massimas e siat po is temperaduras minimas, cun bintitres – binticuatru gradus aintru de sa dì, e cun trexi-catodixi e fintzas cuindixi gradus po su chi pertocat is oras prus fridas, est a narai, is oras de su mengianeddu e de su noti. 
Ma po sa dì de su giòbia (chi est sa dì innoi custu artìculu chi teneis asuta de is ogus nd'at a bessiri aforas) at postu acua puru; ma is piciocus chi nd'ant a depi cabai in campu po is partidas chi s'ant a giogai in su fini de cida podint abarrai selenus, poita, de su chi si cumprendit, de su chi ndi podeus cumprendi in dì de oi castiendi is tialus de previsionis (e megu a scerai custus fueddus po brullai, mancai feti po unu pagheddeddu) nc'at a essi su sobi e no iat a depi proi, a su mancu, seu chistionendi po su chi pertocat sa zona de su Campidanu de mesu. 
E duncas, eia, si iat a podi narai ca custu fini de cida at a benni a essi perfetu, po su chi pertocat is temperaduras, po giogai a bòcia: est a narai ca no at a fai nè tropu basca e nè tropu frius; e ddu sciu deu puru ca candu su tempus abarrat diaici bonu, diaici druci, intzandus sa Sardìnnia benit a essi unu de is logus prus togus, e prus bonus, chi nci funt po bivi in custa terra, in custu mundu. 

E duncas, mi parrit mi parrit ca po custa cida mi seu strollicau bastanti, e fortzis prus de su tanti chi mi iat a depi spetai, e deu creu ca sa cosa mellus chi si potzat fai siat cussa de andai a castiai cumenti funt andendi is cosas me is listas de is campionaus chi si giogant innoi in s'isula cosa nosta bella e stimmada, fadendi su contu, chi si ddu arregodais (e chi no si ddu arregodais, deu seu innoi pròpriu po fai cutu trabballu puru), ca sa cida passada s'apu chistionau de su campionau chi ndi funt pesendi is de sa Torres, chi currint in Sèrie C, e chi est su campionau chi pertocat no feti is scuadras sardas (e custa cosa dda megu a narai, po su prus, po totus is personas chi no funt acapiadas a istrintu cun is chistionis chi pertocant su mundu de is giogadoris diletantis sardus), ma puru is assòtzius, ddi naru diaici, chi nd'arribbant de is atras regionis; e sa pròpriu cosa ballit po is scuadras chi currint in su campionau de sa Sèrie D; e invècias, po custa cida deu fia pentzendi de si chistionai, de andai a castiai impari, a su mancu, po su chi acudeus a fai, cumenti funt cuncodradas is cosas poi su chi pertocat su mundu de sa Segunda Categoria, chi benit a essi su campionau prus piticheddu (ddi naru diaici, isperendi ca si cumprendat su chi seu circhendi de si narai) tra totus cussus chi sigheus cun is collegas de su Diàriu Sportivu (e custu bollit narai ca sa de Tres Categoria no acudeus a dda sighiri, a su mancu in dì de oi, cun s'atentzioni chi si iant a minesci; fadendi su contu, mescamente, ca circaus de sighiri is diletantis sardus cun sa pròpriu atentzioni chi nci poneus po sighiri is scuadras de is professioneris; e custa benit a essi, deu creu, sa fortza, sa cosa prus toga o, mellus, una de is cosas prus togas, de su giàssu cosa nosta). 

E duncas, eia, torrendu a nosu, andaus a castiai cumenti funt cuncodradas is cosas po su chi pertocat is otu listas de sa Segunda Categoria, partendi, est craru, de sa Lista A, chi est cussa innoi agataus totus is scuadras chi ndi lompint de sa zona de Casteddu etotu. E duncas, a su primu postu agataus duas scuadras, apustis de ses partidas giogadas, e seus chistionendi de is masesus de sa Frassinetti e de is de su Kalagonis, ca po immoi no ant pèrdiu nemmancu una borta, e si podeis feti immaginai totu su prexu chi ndi tenint is tifosus cosa insoru, ca candu bincis e no perdis intzandus su spàssiu benit a essi mannu meda, cumenti si iat a podi narai. E duncas, eia, is de sa Frassinetti e is de su Kalagonis tenint calincuna cosa cumenti a sexi puntus allogaus in buciaca, e chi ndi funt arribbaus gràtzias a cincu partidas bintas e a una partida ca, invècias, ant serrau cun su resultau siddau in paridadi; is giogus po su chi pertocat sa Segunda Categoria puru (a trassa de su chi at a sucedi, de su chi ballit po is scuadras de s'Ecellenza, de sa Promotzioni e de sa Primu categoria puru) ant a andai ainnantis fintzas a su binti de su mesi de idas, candu s'ant a giogai is ùrtimas partidas po su chi pertocat su duamilla e bintises, ma fait a narai, puru, immoi chi nci seus, ca is primus duas scuadras de sa lista s'ant a agatai s'una aranti de s'atra pròpriu in custu fini de cida chi est arribbendindi, e si cumprendit totu s'afròddiu chi si intendint in su coru is tifosus de custas duas scuadras: chini depessit binci sa partida si iat a agatai, a su mancu po una cida, a su primu postu de sa lista, ma chentza cumpangia, chi mi permiteis de manigiai custu fueddu e de cuncodrai sa fràsia diaici; e si cumprendit ca candu nci funt duas scuadras chi currint diaici a forti, intzandus sa isfida benit a essi ancora prus toga; e chi invècias is duas scuadras depessint serrai sa partida cun su resultau siddau in paridadi, intzandus nci iat a podi essi sa possibbilidadi, ddi naraus diaici, po is scuadras chi tenint a is pabas (po sa truma de scuadras ca is primus duas de sa lista tenint a is pabas, po ddu narai mellus puru, diaici nd'aprofitaus puru po fai unu pagheddeddu de grammatica, ca mabi no s'at a fai de seguru), de ndi cassai su primu postu de sa lista, partendi de is de su Burcei, ca fortzis funt currendi prus a forti puru de su chi podiant bisai de fai a s'incumintzu de sa stagioni; ma sa pròpriu chistioni iat a balli puru po is de su Setimu, ca in dì de oi tenint feti unu puntixeddu in mancu de is chi tenint is de su Burcei, e chi s'apu arremonau pròpriu immubagora, est a narai catodixi puntus apustis de ses partidas giogadas, e chi ndi funt arribbaus gràtzias a cuatru partidas bintas e a duas partidas chi ant serrau cun su resultau siddau in paridadi. 
E duncas, eia, is de su Setimu puru no ant ancora pèrdiu nemmancu una partida, e custa cosa bollit narai ca funt fadendi unu campionau bonu meda; is de su Burcei, invècias, chi s'agatant, in dì de oi, a su segundu postu de sa lista, cun calincuna cosa cumenti a cuindixi puntus in buciaca, ant bintu po cincu bortas (eia, una borta in prus de su chi funt arrannèscius a fai is de su Setimu) ma ant pèrdiu giai una partida, est a narai cussa chi est bàllia po sa segunda bessida de s'annu, e chi s'est giogada su cuatru de su mesi de ladamini, eia, prus o mancu unu mesi fait, e custu po si fai a cumprendi de cumenti parrit chi su tempus si nci bobit, e a mei est una cosa chi praxit meda, chi pròpriu si ddu depu, e si ddu potzu scoviai; e duncas, megamu a si narai, is de su Burcei ndi funt arrutus in sa partida chi ant giogau contras a is meris de domu de sa Castiadese, ma su chi m'arrepitint fatu fatu is allenadoris, candu ddus intendu po ndi pesai is ciaciarradas, est a narai, is intervistas chi ndi bessint aforas in su giàssu de su Diàriu Sportivu, est ca sa cosa de importu prus mannu in su giogu de sa bòcia est cussa de si ndi torrai a strantaxai, acoitu, apustis chi nd'arruis (e sa cosa ballit no feti po su giogu de su càlciu e po su mundu de sa bòcia, ma ballit, puru, po sa vida chi si depeus bivi totus); e duncas, eia, is de su Burcei apustis chi ndi funt arrutus, ant bintu cuatrus partidas de sighiu, e immoi s'agatant a su segundu postu de sa lista, cun unu puntixeddu in mancu, feti, de is chi tenint is de sa Frassinetti e is de su Kalagonis; e si cumprendit ca is de su Burcei ant a sighiri, de acanta (chi mi permiteis de manigiai custus fueddus e chi mi cumprendeis po su chi seu circhendi de si narai), sa isfida tra is duas scuadras chi s'agatant a su primu postu de sa lista; e duncas, eia, a fai is contus nci poneus pagu meda, chi is de su Burcei depessint arrannèsci a binci sa isfida chi tenint de giogai contras a is de su Sinnia (in domu cosa insoru etotu), intzandus si ndi iant a podi scirai, su lunis, cun su primu postu in buciaca, ma custu at a sucedi feti (e si naru feti) chi is de sa Frassinetti e is de su Kalagonis depessint serrai sa partida cosa insoru cun su resultau in paridadi. 
E duncas, sa de seti giorronadas iat a podi benni a essi una de cussas de importu mannu meda po sa cursa concas a su primu postu e duncas, concas a s'artziada de categoria: e duncas s'ant a agatai aranti, s'una contras a s'atra, duas tra is scuadras prus fortis (a su mancu, ddi naraus diaici po su chi ndi podeus cumprendi in dì de oi castiendi sa lista, mescamente) chi nci funt in sa Lista A; e po cumprendi mellus de su chi seus narendi, podeus andai a castiai, impari, is numerus ca is duas scuadras ndi funt pesendi: e duncas, eia, is masesus tenint su tanti prus mannu de gol fatus, fadendi su contu ca in dì de oi, apustis de calincuna cosa cumenti a cincucentus e coranta minudus de giogu, funt arrannèscius a ndi cassai calincuna cosa cumenti a bintises gol fatus, chi no benint a essi pagus, e si cumprendit. Po su chi pertocat sa difesa, invècias, a is de sa Frassinetti is cosas ddis funt andendi beni meda, fortzis mellus puru de cumenti ddis funt andendi is cosas po su chi pertocat s'atacu: e duncas, a castiai is numerus nc'est de abarrai spantaus, a buca oberta (cumenti si iat a podi narai, puru), pentzendi ca is de sa Frassinetti nd'ant ingotu feti duus gol: unu in sa primu partida de custa stagioni, chi ant giogau in domu cosa insoru, contras a is de su Pula; e su segundu su dexiotu de su mesi de ladamini, in sa partida chi ant giogau in domu de is de su Club San Paolo, ca sa dì fiat arrannèsciu a ndi pesai a su mancu unu gol, mancai su resultau finali fessit de cuatru a unu po is allenus. 
Nc'est de narai puru, immoi chi nci seu, e fadendi su contu ca seu sighendi a castiai is numerus, ca is de sa Frassinetti staint beni meda, chi pentzaus ca nd'ant pesau calincuna cosa cumenti a ses gol in sa partida chi ant giogau in domu cosa insoru contras a is de su Belvedere de Biddesatu, chi est sa scuadra chi pertocat una biddixedda pitica meda, chi fait calincuna cosa cumenti a otucentus e sessanta cristianus (e custu po si narai ca su giogu de sa bòcia benit a essi una chistioni de importu manna fintzas, e mescamente, po is biddas prus piticheddas; ca a bortas, dda intendu fatu fatu custa cosa, su giogu de sa bòcia est s'ùnicu sprèviu, o su sprèviu prus sanu, chi nc'est de sighiri in una bidda, e sèmpiri chi a tui no praxiat a abarrai po oras e oras sètziu a su bar a bufai birra a totu dì e a imbutilliai su sobi (cumenti si iat a podi narai e cumenti apu intendiu de unu amigu miu stimmau); e torrendi a is masesus de sa Frassinetti, funt arrannèscius a ndi pesai atrus ses gol puru in s'ùrtima partida chi ant giogau, est a narai cussa de custu fini de cida passau, contras a is meris de domu de su Mulinu Bècciu, in Casteddu etotu; e tocat a narai, puru, si ddu bollu arregodai torra poita mi parrit ca sa nova siat de importu mannu, ca is de sa Frassinetti nd'ant bodditu, nd'ant ingotu feti duus gol fintzas a immoi. 
Is numerus chi ndi funt pesendi is de su Kalagonis funt togus etotu, fadendi su contu ca, a su mancu fintzas a immoi, nd'ant pesau calincuna cosa cumenti a bintitres gol, e po su chi pertocat sa difesa, nci funt arrutus feti po seti bortas in cincu partidas (est a narai ca nd'ant ingotu feti seti gol fintzas a immoi); e chi arraxonaus unu pagheddeddu (ma unu pagheddeddu feti, diaici no si ndi furu, mancai, totu su tempus chi mancai nemmancu teneis) apitzus de is numerus chi ndi funt pesendi is de su Kalagonis, si nd'acataus ca me is partidas aforas de domu nd'ant ingotu feti duus goiteddus (ca benit a essi una cosa de importu, e sèmpiri chi pigaus po bonu su chi narànt is alleandoris etotu, ca sa cosa chi ti fait binci is partidas, narant, est pròpriu su de arrannèsci a no pigai su gol de is aversàrius); ma a su pròpriu tempus nci funt is allenadoris puru chi narant, e mi parrit bastanti craru ca no siant totus de acòrdiu tra de issus, ma dònnia allenadori dda pentzat a modu sù, ca sa cosa mellus chi tui podis fai po binci sa partida siat cussa de circai de fai, de ndi pesai unu gol, mancai feti unu, in prus de cussus chi arrannèscint a ndi pesai is aversàrius cosa tua. E custu dipendit, intzandus, de sa bidea de giogu chi s'allenadori tenit in conca: nci funt allenadoris ca preferrint atacai e ndi pesai una surra de gol; e nci funt allenadoris chi preferrint a si serrai beni in difesa e binci sa partida, mancai, cun su resultau de unu a zeru feti).
Is de su Kalagonis, intzandus, nd'ant bodditu unu goiteddu in sa partida chi ant giogau in domu de is de su Sinnia, e chi fiat sa segunda partida de sa stagioni, chi s'est giogada su cuatru de su mesi de ladàmini, e apustis nd'ant bodditu un antru gol, e megu a chistionai feti de is partidas chi is biancus-birdis ant giogau in domu allena, in sa partida chi ant fatu contras a is de sa Castiadese. Po su chi pertocat is partidas ca is de su Kalagonis ant giogau in domu cosa insoru, e megu a chistionai de su Campu Comunali de Maracalagonis, nd'ant bodditu duus gol in sa primu bessida, contras a is de su Belvedere de Biddasatu, chi eus giai arremonau de su restu (ma a sa fini is primus de sa classi funt arrannèscius a binci sa partida cun su resultau, togu meda, de seti a duus), apustis funt abarraus cun sa porta cosa insoru lìmpia, ddi naru diaici, est a narai, chentza de pigai nemmancu unu gol, in sa partida chi ant giogau contras a is de su Club Santu Paulu, e megaus a chistionai de una scuadra de Casteddu chi currit, cun una truma de giogadoris giòvunus, in sa lista A. 
E in sa partida apustis, est a narai cussa chi s'est giogada su dexiotu de su mesi de ladàmini, e chi ballit po sa de cuatru giorronadas, is de su Kalagonis nd'ant bodditu feti unu gol contras a is de su Mulinu Beciu; de su chi est sucèdiu in sa trasferta contras a is de sa Castiadese si ddu apu arremonau giai (po su chi apu acutu a fai, est craru), cun sa isfida chi s'est serrada cun su resultau de cuatru a unu po is allenus; e atrus duus gol is de su Kalagonis ddus ant dèpius boddiri in sa isfida, toga e de importu mannu, contras a is de su Setimu, chi s'est serrada cun su resultau finali de duus a duus. 

Is de su Kalagonis, acudu a si narai custa cosa puru immoi chi nci seu, tenint fatus, funt arrannèscius a ndi pesai calincuna cosa cumenti a bintitres gol, chi funt tres in mancu de cussus chi ant fatu is de sa Frassinetti. E nareus ca in dì de oi agataus cuatru scuadras acapiadas tra de issas po una chistioni de duus puntus de diferèntzia, chi mi cumprendeis po su chi seu circhendi de si narai (Frassinetti e Kalagonis a su primu postu cun sexi puntus; apustis is de su Burcei, chi s'apu arremonau immubagora etotu, e is de su Setimu puru). 
E immoi, duncas, eus a biri cumenti ant a andai is cosas in campu, e custu, si ddu torru a arrapiti, ballit feti po sa cursa concas a is primus postus de sa lista. Po su chi pertocat is cosas acapiadas a is ùrtimus postus de sa lista, e sigheus a arraxonai apitzus de su campionau de sa Segunda Categoria, mi parrit bastanti craru, agataus is de su Biddasatu cun tres puntus feti, chi ndi funt arribbaus gràtzias a s'ùnica partida chi funt arrannèscius a binci fintzas a immoi; e sèmpiri cun tres puntus in buciaca, agataus is pirresus de sa Jupiter, ca funt arrannèscius a ndi cassai sa primu bincida de s'annu feti a sa de cuatru giorronadas, candu si funt agataus a cumbati (ddi naru diaici, mancai su fueddu no mi praxiat diaici meda, chi pròpriu si ddu depu scoviai) contras a is de sa Castiadese, chi ant bàtiu cun su resultau de tres a unu. 
Apustis, is pirresus de sa Jupiter ant pèrdiu puru su derby (ddu tzerriaus diaici, a trassa de is ingresus etotu, mancai nosu no seus ingresus), chi est, mi parrit bastanti craru (ma ddu ollu arregodai, peròu, po totus is personas chi mancai no sciint de ita seus chistionendi), sa partida chi si giogat tra duas scuadras chi nd'arribbant de sa pròpriu zona o, fintzas, de sa pròpriu citadi, contras a is de s'Uragano de Pirri, e ndi funt arrutus torra in s'ùrtima partida chi ant giogau, custu domìnigu passau, in domu de is de su Pula. 
Cun cuatru puntus in totu allogaus in buciaca agataus, invècias, is de su Sinnia, chi seu arremonendusì fatu fatu in custu artìculu (ma no nc'est nudda de mabi, nudda de sbàlliau, e si cumprendit); cun cuatru puntus in buciaca (e duncas, cun feti duas scuadras a is pabas) e is de su Club San Paolo. E custu, duncas, funt is cosas, is novas de importu prus mannu chi nd'arribbant de sa Lista A. E custu, duncas, po su chi pertocat sa lega acapiada a sa Segunda Categoria, ma fadendi su contu ca su tempus e mescamente su logu chgi tengu po s'artìculu de custa cida est giai giai acabbendi, si promitu, giai de oi, ca me is cidas chi ant a benni (e duncas, eia, a partiri de is tres giòbias chi nc'ant a essi, ancora, po su chi pertocat su mesi de donniasantu) eus a sighiri a chistionai de cumenti funt postas is cosas in custu campionau; po oi peròu, si ia a bolli chistionai puru de sa Promotzioni, fadendi su contu, mescamente, ca custu sabudu chi est arribendindi, e chi at a essi su primu sabudu de su mesi de donniasantu, ant a torrai a cabai in campu, e in truma manna, totus is scuadras chi currint in sa Lista B, po sa de noi giorronadas de sa lista de s'andada (e si potzu incumentzai a narai, puru, immoi chi nci seu, ca su sabudu avatu, su sabudu apustis, est a narai, su sabudu chi nd'at a arrui su catodixi, at a tocai a totus is scuadras chi currint in sa Lista A, e megu a chistionai sèmpiri de su campionau de sa Promotzioni, mi parrit bastanti craru, a ndi cabai in campu de sabudu): e duncas, totus is ogus ant a essi apitzus, ddi naru diaici a trassa de cumenti si narat in italianu etotu, a is primus de sa lista de s'Ozierese, ca funt sighendi a curri a forti meda, fadendi su contu ca fintzas a immoi no ant pèrdiu nemmancu una partida, ma nd'ant cassau sa bìncida po ses bortas e po una borta feti si funt dèpius acuntentai de unu puntixeddu feti; e immoi is piciocus sighius de Mura si dda ant a depi biri in domu de is de su Santu Giorgiu de Peifugas, po una de is trasfertas prus dilicadas chi nci funt in custu torneu; e immoi eus a biri cumenti ant a fai a si ndi scabulli de sa cosa is grogus-asullus, ca de su restu tenint apicigaus a is carronis (cumenti si iat a podi narai, e cumenti seu narendu, de su restu) is de su Casteddusardu, chi nd'ant pesau calincuna cosa cumenti a bintunu puntus, chi funt feti unu in mancu de is puntus chi tenint allogaus in buciaca is de s'Ozierese; e fait a narai, puru, ca custas duas scuadras funt stesiendusì de sa truma de scuadras chi tenint a is pabas, fadendi su contu ca is de su Coghinas, chi s'agatant in dì de oi a su de tres postus, tenint cuindixi puntus, chi funt seti in mancu (e incumentzant a no essi pagus) de cussus chi tenint is primus de sa classi. 
E immoi eus a biri ita totu nd'at a bessiri aforas custu sabudu. 
E de sa cosa, podeis abarrai segurus, nd'eus a chistionai mellus in s'artìculu chi nd'apa a pesai e chi at a bessiri giòbia chi at a benni, e sèmpiri chi su Cielu at a bolli custu beni po mei e po bosatrus puru. 
In s'interis chi abertaus de si torrai a ligi, si imprassu a forti meda.




Attività realizzata col contributo della Regione Sardegna. IMPRENTAS 2025-2026. LR 22/2018 art. 22