Is campionaus sighint a regalai prexus e daboris: andaus a castiai cali funt is scuadras chi funt currendi prus a forti e cussas chi funt trumentendi prus de su tanti chi si podiant abertai

E duncas, sa primu nova chi si potzu donai, po atacai cun s'artìculu de custa cida, est ca, eia, sa primu fita de su mesi de donniasantu (ddi naru diaici, isperendi ca nesciunu de bosatrus, e de bosatras, tengiat calincuna cosa de murrungiai po su fueddu chi apu scerau de manigiai) si dda seus papada; e seu fadendi su giogu, (chi est una metàfora, a narai is cosa cumenti funt) de pigai in consideru su mesi de donniasantu cumenti chi fessit una truta.
E custu bollit narai ca podeus sighiri a curri, concas a su mesi de idas, cun su coru prenu de isperas bonas e de gana bella de sighiri is fainas chi si pertocant, o a su mancu, custu est s'auguriu chi si fatzu, chi si potzu fai, a su mancu, po custu mengianu. 

E duncas, po no s'arrosci tropu, in s'interis chi abertaus chi nd'arribbit su de doxi mesis de s'annu puru, podeus sèmpiri sighiri is campionaus de bòcia de is diletantis chi si giogant innoi in s'isula stimmada cosa nosta, e si potzu incumentzai a contai ca is ispantus, e su spàssiu, no benint a mancai de seguru: e sa cosa prus toga est ca podeus fai su contu de su tempus chi passat, pròpriu, sighendi is giorronadas de is campionaus; est a narai (bieus chi immoi arrannèsciu a si fai a cumprendi ita tengu in conca) ca is campionaus de bòcia si faint cumpangia (una bella cumpangia, si iat a podi narai diaici puru) in s'interis chi si scroxaus is mesis de s'annu; e si faint cumpangia in s'interis chi abertaus chi nd'arribbint is festas; e a fai su contu de is giorronadas chi si funt giai giogadas fadeus, puru, su contu de su tretu chi eus fatu aintru de s'annu; e po si fai a cumprendi mellus su chi seu narendusì, si potzu feti arremonai ca candu nd'at a arribbai su Nadali (e biada s'iat s'ora, cumenti si iat a podi narai), intzandus is campionaus de s'Ecellenza, de sa Promotzioni, de sa Primu Categoria e de sa Segunda Categoria ant a essi giai giai arribbaus a sa metadi, e a si ddu scriri no mi parrit nemmancu berus, de cumenti parrit chi si nci bobit su tempus, a bortas. 

E duncas, eia, po m'apicai a su chi s'apu contau pròpriu immubagora, si potzu narai ca custu fini de cida chi nd'at a arribbai (e chi at a essi su catodixi e su cuindixi, e duncas, eia, si iat a podi narai ca po sa metadi, custu mesi de donniasantu est giai giai bellu ca scroxau) is scuadras chi currint in su campionau de sa Sèrie C nd'ant a cabai in campu poi giogai sa de catodixi giorronadas (e su binti de su mesi de idas, chi at a essi s'ùrtimu domìnigu de giogus po su chi pertocat custu duamilla e bintises, poita seus chistionendi de su domìnigu chi nc'at a essi ainanntis de arribbai a sa dì de su Nadali, e duncas, ainnantis de is festas, is scuadras de sa Sèrie C ant a giogai, nd'ant a cabai in campu po giogai, po ddu narai mellus puru, s'ùrtima partida po su chi pertocat sa lista de isfidas chi ant a balli po s'andada); e custu po si fai a cumprendi mellus ita bollu narai, ita seu circhendi de si contai candu si naru ca is calendàrius de is partidas funt acapiaus a istrintu (giai giai apicigaus apari, si iat a podi narai diaici puru) cun su calendàriu chi sigheus po bivi in custu mundu macu meda e totu ghetau a pari (cumenti mi praxit a narai, a arrapiti fatu fatu). 

E duncas, immoi chi nci seu, immoi chi apu pigau custa lega (e si ia a bolli arregodai, immoi chi nci seu, ca no sciu mai cali legas e cali chistionis apa a pigai in consideru in s'artìculu chi ndi pesu po is Novas de is amigus de su Diàriu Sportivu, est a narai ca ddu decidu in su momentu, est a narai, candu seu sètziu aranti de su tialu de su computer, mancai est berus puru ca in conca tengu una surra manna de contus e de contixeddus chi abarrant a totu dì badda badda, e m'eis a iscusai, duncas, chi ainnantis de atacai cun is chistionis apicadas a su giogu de sa bòcia e duncas, eia, a is partidas, mi benit de mi strollicai unu pagheddeddu cun bosatrus e cun bosatras; ma de su restu, chi eis lìgiu a su mancu un'antru artìculu tra cussus chi ndi bogu aforas po is Novas, intzandus scieis giai cumenti funtzionat sa cosa; e chi invècias custa est sa primu borta chi s'agatais a ligi unu de is artìculus chi ndi pesu in sardu, in su sardu chi si fueddat in su Campidanu de mesu, e mescamente in Bidd'e Sorris, intzandus deu creu ca seis incumintzendi a cumprendi, e allestru puru, cumenti andant is fainas), andaus a castiai impari e a cumprendi cumenti funt postus is giogus po su chi pertocat su campionau de s'Ecellenza, chi benit a essi cussu prus mannu, cussu de importu prus mannu (po ddu narai mellus puru) tra totus cussus chi si giogant in s'isula stimmada cosa nosta, e seu sèmpiri chistionendi, est craru, de is campionaus de is diletantis, pesaus de is de sa Federatzioni Italiana de su Giogu de su Càlciu, e de is de sa Lega Natzionali de is Diletantis): e duncas, custu finid e cida chi est lompendindi,is de s'Ecellenza ant a giogai sa de dexi giorronadas, e is scuadras de s'Ecellenza puru (a partiri de is de s'Ilva de Sa Maddalena, chi s'agatant a su primu postu de sa lista, diaici incumentzaus a si incarai, puru, me is chistionis chi pertocant de acanta is partidas e is resultaus) ant a serrai cun sa lista de is partidas de s'andada pròpriu in s'ùrtimu fini de cida de giogus chi nc'at a essi po custu duamilla e bintises.
E sa pròpriu cosa si podit narai, e ballit, po is scuadras chi currint in su campionau de sa Promotzioni: custu fini de cida nd'ant a cabai in campu po sa de dexi partidas; e nd'aprofitu po s'arregodai ca is partidas ant a torrai a incumentzai giai de sa dì de su sabudu, o mellus, giai de su megama de su sabudu, fadendi su contu ca is scuadras chi currint in sa Lista A de su campionau de sa Promotzioni ant a depi giogai is antìcipus (cumenti si iat a podi narai furendindi sa trassa de cumenti si narat in italianu etotu, e cumenti m'at consillau su fueddariu, tra is atras cosas); est a narai ca ant a depi giogai una dì ainnantis de totus is atrus, po su spàssiu chi nd'ant a tenni is tifosus, mescamente, ca si nd'ant a podi prandi de partidas siat po su chi pertocat su megama de su sabudu, e siat po su chi pertocat su megama de su domìnigu (chi est sèmpiri stètia sa dì innoi sa bòcia est sa meri de is sprèvius, chi mi permiteis de imboddiai sa chistioni diaici, cun custus fueddus, gioghendi, fortzis, a fai su poeta prus ca su giornalista sportivu). 

Po su chi pertocat, invècias, is campionaus de sa Primu e de sa Segunda Categoria, funt incumentzaus duas cidas apustis de totus is atrus (de is atrus campionaus chi s'apu arremonau fintzas a immoi, a su mancu), e duncas, eia, custu fini de cida chi est arribbendindi (su fini de cida de sa metadi de donniasantu, po ddu narai diaici puru) s'ant a giogai is partidas chi ant a balli po sa de otu giorronadas, cun is isfidas chi ant a balli po sa lista de sa torrada chi ant a incumentzai feti su dexesseti de su mesi de gennàrgiu, e seu chistionendi, mi parrit bastanti craru, de s'annu chi at a benni (e sèmpiri chi Deus e su Cielu ant a bolli custu beni po mei, e po bosatrus puru), e duncas, eia, de su duamilla e bintiseti ; e duncas, a fai is contus nci poneus pagu meda, is scuadras chi currint po su campionau de sa Primu Categoria ant a serrai cust'annu (su duamilla e bintises, duncas) cun sa de trexi giorronadas fata, e nd'ant a depi giogai atras duas (e megu a chistionai, est craru, sèmpiri de is partidas chi ballint po sa lista de s'andada) ainanntis de si nci ghetai a fundu 'e susu me is partidas de sa torrada. 
E duncas, eia, si iat a podi narai custu puru (e sèmpiri po si fai a cumprendi mellus ita bollu narai candu si naru ca is giorronadas de is campionaus, e duncas, is calendarius de is campionaus, funt apicigaus a istrintu cun su calendàriu chi ballit po sa vida cosa nosta, po su fetianu): sa lista de partidas de s'andadas s'acumpangiat, cida po cida, mesi po mesi, concas a su Nadali, chi est sa festa prus manna, sa festa de importu prus mannu tra totus cussas chi nci funt de bivi aintru de s'annu (a su mancu po su chi pertocat sa segunda parti de s'annu); e is giogus, po si fai un antru esèmpiu, torrant a incumentzai sa dì de sa Befana etotu; e sa lista de partidas de sa torrada s'acumpangiat, passu passu, cida po cida, mesi po mesi, concas a sa Pasca Manna e, apustis, concas a s'istadi puru (fadendi su contu ca is giogus acabbant, cun is partidas finalis, prus o mancu su duus de su mesi de lampadas). 

E duncas, ammancat de fai su contu de cumenti funt postas is cosas po su chi pertocat su mundu de sa Segunda Categoria: custu fini de cida chi est arribendindi allestru, cumenti chi fessit unu leporeddu scapau a curri in su sartu (chi mi permiteis de ddu narai diaici, gioghendi a fai su poeta prus ca su giornalista sportivu), s'ant a giogai is partidas chi ant a balli po sa de otu giorronadas; e po is scuadras de sa Segunda Categoria puru s'ùrtima partida chi at a balli po sa lista de s'andada s'at a giogai, 'tendei 'tendei, e megu a brullai unu pagheddeddu, su binti de su mesi de idas, candu ant a mancai feti cincu diis po fai sa festa po su Nadali (e giai no bieus s'ora chi nd'arribbit su Nadali, berus est? mancai in dì de oi nci siant ancora calincuna cosa cincuanta diis de si scroxai). 

E duncas, in s'artìculu chi teneis asuta de is ogus, apu arremonau giai su Nadali, po calincuna cosa cumenti a dexi (chi no cuindixi puru) bortas (e megu a brullai, unu pagheddeddu, ma unu pagheddeddu feti); e pròpriu me in custas ùrtimas diis, fia pentzendi, tra mei e mei (cumenti si narat) ca su mesi de donniasantu, de su restu, benit a essi feti su perìodu de s'annu, ddi naru diaici, innoi no fadeus atru, no podeus fai atru, ca abertai su mesi de idas, e no podeus fai atru che ndi pesai su contu de cantu diis ammancant; fadendi su contu, pruschetotu, ca is ùnicas festas chi ddoi funt po su de s'undixi mesis de s'annu ddas teneus pròpriu me is primus duas diis, e spaciadas cussas duas diis (e megu a chistionai, est craru, de sa festa chi fadeus po totus is santus, e chi nd'arruit su primu de su mesi de idas, e de sa festa chi fadeus po totus is mortus, e chi nd'arruit sa dì avatu, est a narai su duus) no nci funt prus festas fintzas a s'otu de su mesi de idas; e pròpriu po custu chi megamu a si narai ca is campionaus s'agiudant, e no pagu, a nci passai su tempus; ca chi fessit po is giogadoris (e mescamente po is tifosus) nci iant a essi partidas dònnia dì de s'annu, chentza de si frimai nemmancu po unu segundu, e si cumprendit puru, ca candu tenis una passioni intzandus no iast a pentzai e no iast a fai atru ca cussa cosa chi ti praxit fintzas a t'amachiai, fintzas a ndi bessiri aforas de conca, cumenti si iat a podi narai. 

E mi benint in conca is fueddus chi m'at regalau Ricardu Balzano, e megu a chistionai de s'allenadori de is de su Logusantu, ca candu ddu apu intendiu a su telefunu po ndi pesai una ciaciarrada (est a narai un'intervista, cumenti si iat a podi narai pighendindi sa trassa de s'italianu etotu) at incarrerau narendumì ca, eppuru, tocat a pentzai a su trabballu, po primu cosa, e no feti a is giogus; ma chi fessit po issus, e seu chistionendi de is giogadoris e de is allenadoris, no iant a pentzai a nudda de atru ca a sa bòcia, a is giogus e a is partidas, pròpriu cumenti capitat, cumenti sucedit, cumenti si podint permiti de fai is giogadoris professioneris, chi funt cussus (e si cumprendit beni de su nomini) chi ndi cabant in campu po trabballu e, duncas, po ndi incasciai barcas e barcas de dinai, de arriabis (po manigiai unu fueddu chi apu sèmpiri intendiu innoi in Bidd'e Sorris, chi est su logu innoi seu stètiu pàsciu e innoi m'agatu ancora); e su de arribbai a giogai in su mundu de is professioneris (chi no megui a mi sballiai, nd'eus giai chistionau e arrexonau impari apitzus de custa chistioni, in unu de is artìculus chi ndi funt bèssius aforas sèmpiri po is Novas me is cidas passadas) benit a essi su bisu, giai giai, de totus is piciocheddus chi incumentzant a donai is primus carvadas de pei a sa bòcia. Mancai si potzat narai, puru, ca nci funt una biga manna de giogadoris, fintzas piciocheddus piticus medas de edadi, ca incumentzant a giogai cun su coru prenu de isperas, ma apustis, a s'acabbada, is chi arrannèscint a nc'arribbai, a nci brintai in su mundu de is professioneris benint a essi pagus meda, fadendi su contu de sa truma manna de personas chi currint me is campionaus de is diletantis de totu s'Italia. 
E in prus, immoi chi nci seus, nc'est de fai su contu ca su trabballu de fai po benni a essi unu giogadori forti (mancai me is campionaus piticheddus de sa Primu e de sa Segunda Categoria) no benit a essi pagu; ca nc'est de trumentai, e de fadiai, a incumentzai de is allenamentus chi si faint aintru de sa cida (antzis, nc'est de sudai e de trumentai giai de su mesi de agustu, mancai is campionaus e is giogus chi ballint po sa Cupa Italia torrint a incumentzai feti in su mesi de cabudanni, po sa chi tzerriaus "preparatzioni atletica", a trassa de cumenti si narat in italianu etotu, e seus chistionendi de is allenamentus chi si faint po si cuncodrai po is noi mesis de giogus chi nci funt apustis chi incumentzant is campionaus); e duncas, eia, podeis abarrai segurus ca nesciunu, in su mundu de sa bòcia, ti fait regalus: est a narai ca su chi fais, e mescamente su chi ndi boddis, ti ddu depis guadangiai in campu; e de seguru nci iant a podi essi una surra manna de atras cosas, de atras fainas chi tui iast a podi fai, invècias de ti nd'abarrai totu curri-curri, po un'ora e mesu (chi no calincuna cosa de prus puru, fadendi ca nci a sa fini de is duus tempus nci funt sèmpiri is minudus de recuperu de giogai), avatu de sa bòcia e de is aversàrius: iast a podi abarrai sètziu a su bar a buffai birra impari a is amigus cosa tua; ti ndi iast a podi fintzas andai a travessu cun sa famìlia cosa tua, o iast a podi abarrai po totu su megama crocau in su tialu de divanu a castiai cincu, ses, dexi film totu de sighiu, s'unu avatu de s'atru; o iast a podi abarrai aranti de sa televisioni po oras e oras e oras de sighiu, fintzas a ti fundi su crobeddu; ma pròpriu fadendi su contu de totus is cosas tontas chi nci funt in custu mundu e chi serbint a si fai perdi su tempus (prus ca a si fai passai su tempus), intzandus cumprendeus, e acoitu puru, ca su de giogai a bòcia (ma sa chistioni ballit, deu creu, puru po totus is atrus giogus chi s'omini nd'at pesau e chi sighint a s'agatai in dì de oi puru) benit a essi una de is maneras prus limpias (ddi naru diaici, isperendi ca si cumprendat su chi seu circhendi de si narai) e prus sanas (ddi naru diaici, torra, isperendi ca si cumprendat su chi tengu in conca) po si sprèviai, po si spassiai e po nci passai su tempus. 
E chi fessit po is giogadoris, megamu a si narai custu, gei ddu cumprendeis a solus puru, de su restu, iant a abarrai dònnia dì in campu a giogai; e si cumprendit: candu unu tenit una passioni, intzandus no pentzat prus a nudda; est a narai ca pentzat feti a sa passioni cosa sua e si ndi scarescit, giai giai, chi nc'est unu mundu de atras cosas de fai e de sighiri. 

E po si cumprendi mellus a pari si ia podi fintzas narai ca candu is campionaus abarrant frimus, est a nara studaus, apustis chi si serrat sa stagioni, intzandus is giogadoris andant a giogai po is torneus chi si cuncodrant in s'istadi, giai giai in dònnia bidda chi nc'est innoi in s'isula, e custu bollit narai, duncas, ca chi fadeus beni is contus arribbaus a cumprendi ca unu gigoadori diletanti (de is professioneris no sciu cumenti ddis pighit sa cosa) no si frimat giai nudda, fadendi su contu ca in su mesi de idas puru, in cussas dexi-doxi diis de festas chi nci funt tra su Nadali, sa noti de annu nou e sa Befana, is scuadras sighint a andai ainanntis cun is allenamentus: e si cumprendit ca po abarrai in forma e in saludi, cumenti m'est bèniu de narai, intzandus no fait a si frimai nudda, mancu po mesu segundu, e mescamente chi po is festas ti papas una cantidadi de cosa de papai (tra drucis e proceddus e totus is atras cosas chi seus costumaus a si cravai in brenti) chi benit a essi, giai giai, aforas de conca. 
Ma de sa cosa, mancai, nd'eus a chistionai mellus in su benidori (e megu a arrexonai, pròpriu, apitzus de sa cantidadi manna de cosa de papai chi si cravaus in brenti po is festas; e de sa lega si nd'apa a chistionai mellus, mancai, me is ùrtimus duus artìculus de is Novas chi nd'apa a pesai po custu duamilla e bintises, fadendi su contu ca su binticuatru, sa dì de sa noti de cena, cumenti naràt sa bon'anima de nonna mia, e s'ùrtima dì de s'annu, nd'ant a arrui de giòbia; e su giòbia, cumenti eis a sciri giai, e chi no ddu scieis seu pròpriu innoi po fai custu trabballu puru, est sa dì innoi ndi bessint aforas is artìculus chi pertocant is Novas de su Diàriu sportivu; e duncas, eia, cumenti si iat a podi narai, is ocasionis po chistionai mellus de sa cosa no s'ant a mancai, custu est pagu ma seguru). 

E immoi chi nci pentzu, m'est bènniu in conca chi no s'apu fatu is contus, e duncas, no s'apu chistionau de cumenti funt andendi is giogus po su chi pertocat su campionau de sa Sèrie D, chi custu fini de cida chi est arribendindi, at a depi bivi (ddi naru diaici, isperendi ca nesciunu tengiat calincuna cosa de murrungiai po su fueddu chi m'est bènniu in conca de scerai) sa de doxi giorronadas (cun is partidas chi ballint po sa lista de s'andada chi ant a acabbai pròpriu su binti de su mesi de idas, ainnantis de is vacantzas). 

E immoi chi eus fatu su contu de su tempus chi est passau e de su tempus chi s'amancat de scroxai po serrai s'annu, chi seis de acòrdiu cun mei podeus andai a castiai, acoitu, cumenti funt postas is cosas me is listas de is campionaus chi sigheus cun su Diàriu Sportivu, e chi funt, de su restu, is campionaus chi s'apu arremonau fintzas a immoi. 
E duncas, po su chi pertocat sa Sèrie C, nc'est de chistionai feti de is de sa Torres, fadendi su contu (cumenti eis a sciri beni, e chi no ddu scieis deu seu innoi po fai custu trabballu puru) ca funt s'ùnica scuadra sarda chi currit in cussa categoria, e seus chistionendi, est craru, de una de is categorias prus mannas chi nci funt, a is pabas feti de sa Sèrie B e de sa Sèrie A: e duncas, in dì de oi, is arrùbius-brau (chi currint in sa Lista B, si ddu bollu arregodai torra) s'agatant a su de cuatru postus, cun calincuna cosa cumenti a bintiduus puntus in buciaca, chi funt, peròu, trexi in mancu, e no funt pagus de seguru, de is chi tenint is primus de sa lista de su Spezia Calcio; ma iat a tocai a narai, immoi chi nci seus, ca is de sa Torres si podint intendi bastanti prexaus po su chi funt arranescendi a ndi pesai cust'annu, chi fadeus su contu e chi si nd'arregodaus, pruschetotu, ca s'annu passau (est a narai, est craru, in su campionau de sa stagioni de su duamilla e binticincu – duamilla e bintises) fiant giai giai po ndi cabai de categoria, ma funt arrannèscius a si sarvai po unu pilu, cumenti si iat a podi narai, e cumenti seu narendusì de su restu. 

E duncas, fadendi su contu ca apustis de is primus trexi partidas, s'agatant ancora in sa parti arta de sa lista (est a narai, impari a totus is scuadras prus fortis, impari a is scuadras chi funt currendi prus a forti, po ddu narai diaici puru) intzandus nc'est su tanti po si intendi prexaus, cun su coru prenu fintzas a cucuru de afròddiu. 
E chi sigheus a fai is contus in buciaca (cumenti si narat) a is de sa Torres, si potzu narai, puru, immoi chi nci seu, ca ant sèmpiri bintu me is ùrtimas tres partidas chi ant giogau in domu cosa insoru, a partiri de sa isfida contras a is de s'Atalanta (sa scuadra de piciocheddus piticus de s'Atalanta, po ddu narai mellus puru, po essi pretzisus cumenti iat a depi essi unu giornalista candu bollit fai beni su trabballu cosa sua, fadendi su contu ca sa scuadra manna de is de s'Atalanta currit in su campionau de sa Sèrie A, e invècias in su campionau de sa Sèrie C nci mandant, a curri e a giogai, totus is piciocheddus chi faint parti de s'assòtziu ma chi no tenint prus de bintitres annus fatus, po cussus ca in ingresu tzerriaus Under 23), e chi s'est giogada s'undixi de su mesi de ladamini; e in sa partida avatu puru, chi ant giogau su binticincu de su mesi de ladamini, e sèmpiri a su Vanni Sanna (diaici si tzerriat su campu, in Tattari, innoi giogant is partidas is arrùbius-brau), is piciocus, is giogadoris sighius de Alfonsu Greco funt arrannèscius a binci, cun su resultau de duus a zeru, sa partida contras a is de su Guidonia Montecelio 1937 (custu est su nomini de sa scuadra, scritu totu interu chentza de ndi perdi nemmancu un arrogu, nemmancu una litera); e pròpriu in custu fini de cida passau, is de sa Torres ant bintu torra, e sèmpiri aranti de is tifosus cosa insoru, e duncas, eia, sèmpiri a su Vanni Sanna, contras a is de su Latina Calcio. 
E sèmpiri arraxonendi po su chi pertocat is de sa Torres, si ia a podi narai, puru, ca in domu funt currendi a forti meda (cun ses partidas bintas, apitzus de seti bessidas fatas, e una partida feti chi ant serrau cun su resultau in paridadi. E custu bollit narai, mi parrit bastanti craru, ca no ant pèrdiu nemmancu po una borta, po su prexu e po s'afròdiu chi nd'ant a tenni is tifosus cosa insoru, e si cumprendit beni), e invècias iant a depi circai de ndi cassai calincunu puntixeddu in prus me is partidas chi giogant in domu allena, fadendi su contu ca no ant bintu nemmancu po una borta aforas de domu cosa insoru, cun tres partidas pèrdias e tres partidas chi si funt serradas cun su risultau siddau in paridadi, apitzus de ses bessidas in totu. 
E immoi is de sa Torres nc'ant a torrai a provai (su campionau est togu, tra is atras cosas, poita chi nd'arruis tenis acoitu sa possibbilidadi de ti fai balli torra e de torrai a ti ndi strantaxai), in sa partida chi ant a depi giogai in domu de is de su Perugia, un assotziu chi me is annus passaus at giogau in su campionau de sa Sèrie A puru; e eus a biri cumenti ddis ant a andai is cosas. 
Sa cosa chi si potzu narai po custa cida est ca, eia, is de sa Torrens ndi funt pesendi sa cantidadi prus manna de puntus me is partidas chi giogant in domu cosa insoru, e eus tentu giai su modu, s'ocasioni, me is cidas passadas (mellus puru: me is artìculus chi ndi funt bèssius a pillu me is cidas passadas) po circai de cumprendi su motivu chi portat una scuadra a giogai mellus in domu ca in domu allena. 
E po serrai cun sa chistioni acapiada a sa Sèrie C, si potzu narai ca nosu eus a sighiri a fai su tifu po is arrùbius-brau, cumenti iant a depi fai is tifosus sardus cun totus cussas scuadras sardas chi currint me is campionaus inter-regionalis (cumenti si iat a podi narai, furendindi sa trassa de cumenti si narat in italianu etotu), est a narai me is campionaus innoi giogant is scuadras chi nd'arribbant de totus is atras regionis de s'Italia. 

E sigheus a fai su contu de cumenti funt postas is cosas me is listas de is campionaus chi sigheus cun su Diàriu Sportivu, andendi a castiai cumenti funt andendi is cosas a is cincu scuadras sardas chi s'agatant a curri in sa Lista G de sa Sèrie D, partendi pròpriu de is de su Muristeni (ca, tra is atras coas, funt bixinus de domu, ddi naru diaici, fadendi su contu ca tra Bidd'e Sorris, innoi m'agatu a bivi de calincuna cosa cumenti a corantacincu annus, e Muristeni nc'ant a essi dexi chilometrus de tretu de fai), ca apustis de undixi partidas giogadas tenint allogaus in buciaca calincuna cosa cumenti a dexesseti puntus, gratzias a cincu partidas chi funt arrannèscius a binci (tres in domu cosa insoru e duas in domu allena) e a is duas partidas chi ant serrau cun su resultau in paridadi, sèmpiri in domu cosa insoru; e duncas, si potzu narai puru ca is de su Muristeni, sighius de Marcellu Angheleddu s'agatant in dì de oi a su de tres postus in sa lista, ma in cuimpangia de atras duas scuadras, e megu a chistionai de is de s'Albalonga e de is de sa Vigor Campagnola Gialloblù; e is cosas no ddis funt andendi mabi, fadendi su contu ca tenint su segundu postu de sa lista giai giai tra is manus (est a narai, duncas, po si cuncodrai mellus sa fràsia, diaici fadeus puru unu pagheddeddu de grammatica, ca mabi no s'at a fai de seguru, ca is de su Muristeni tenint feti unu puntixeddu in mancu de is chi tenint is de su Trastevere, e chi s'agatant a su segundu postu de sa lista); e po su chi pertocat sa cursa po ndi cassai su primu postu (chi est su bisu de is de su Muristeni puru, chi pròpriu depeus narai sa beridadi) intzandus fait a narai ca is de sa Sarnese funt fadendi unu campionau po contu insoru, fadendi su contu ca fintzas a immoi funt stètius bonus a ndi cassai calincuna cosa cumenti a bintises puntus (ellus, benint a essi noi in prus de is chi tenint allogaus in dì de oi is de su Muristeni, e no funt pagus). 

A is pabas de is de su Muristeni (e megu a chistionai feti de is scuadras sardas, mi parrit bastanti craru) agataus is de s'Ossese, ca megant a giogai po sa primu borta in totu sa istoria de s'assòtziu, in su campionau de sa Sèrie D: is biancus-nieddus funt arrannèscius a ndi cassai, fintzas a immoi, calincuna cosa cumenti a catodixi puntus, gràtzias, mescamente, a tres partidas bintas e a cincu partidas chi ant serrau cun su resultau in paridadi. E po una scuadra chi nd'est artziada feti cust'annu in su campionau de sa Sèrie D, apustis chi ant bintu su campionau de s'Ecellenza in sa stagioni passada, si iat a podi narai ca is cosas no funt postas mabi; est a narai, ca is cosas no ddis funt andendi mabi, antzis. 
E chi castiaus is numerus, pròpriu cumenti eus fatu sa cida passada po su chi pertocat su campionau chi ndi funt pesendi is de sa Torres, si nd'acataus, e acoitu puru, ca is de s'Ossese ant bintu prus partidas aforas de domu de cussas ca funt arrannèscius a binci in domu cosa insoru, chi pentzaus chi is biancus-nieddus a su Walter Frau ant bintu, a su mancu fintzas a immoi, feti una borta, in sa primu bessida de sa stagioni nova, contras a is tattaresus de su Late Dolce, e apustis ant bintu po duas bortas in domu allena: a sa segunda bessida, in domu de is de sa Vigor Campagnano Gialloblù (chi s'aou giai arremonau de su restu), e in domu de is de s'Afragolese, in sa partida chi s'est giogada su cuatru de su mesi de ladamini. E custu bollit narai, duncas (a fai is contus nci poneus pagu meda) ca is biancus-nieddus immoi funt de calincuna cosa cumenti a cincu giorronadas de sighiu ca no arrannèscint prus a ndi cassai sa bìncida de una partida, ma nd'ant ingotu feti tres puntixeddus, chi ndi funt arribbaus gràtzias a tres partidas chi ant serrau cun su resultau in paridadi; e immoi eus a biri cumenti ddis ant a andai is cosas in sa partida chi ant a depi giogai immoi, in custu fini de cida, est a narai custu domìnigu, contras a is de sa Città de Agnani, e torra a su Walter Frau in Ossi. 
E cun catodixi puntus (sigheus a fai su contu de cumenti funt andendi is cosas a is scuadras sardas chi currint in su campionau de sa Sèrie D, e si ddu torru a narai a bortas calincunu de bosatrus no apat giai pèrdiu s'arrastu de sa lega chi apu pigau) agataus puru is de su Budoni, chi ant bintu fintzas a oi cuatru partidas (duas in domu cosa insoru, e duas in domu allena); cun doxi puntus, chi ballint po su de cuindixi postus in sa lista, agataus s'assòtziu ollastrinu de su Cos; ma po cumprendi mellus de ita seu chistionendi, fortzis est mellus chi si naru ca is de su Cos Sarrabus Ollastra tenint feti tres scuadras a is pabas, e duncas funt currendi, cumenti ddi est capitau de fai s'annu passau, po circai de ndi cassai sa sarvesa e, duncas, sa possibbilidadi de giogai po un antru annu puru in su campionau de sa Sèrie D. 
E su chi mi benit de narai est ca, in su giogu de sa bòcia e in sa vida puru, nci funt perìodus, stagionis, annus, innoi depis stringiri is dentis (cumenti si iat a podi narai, a trassa de cumenbti si narat in italianu etotu), aguantai, apoderai o assachitai (chi est su fueddu ca innoi in Bidd'e Sorris manigiaus po narai ca depis tenni passièntzia, e sumportai is dannus e is arroris). 
E sa pròpriu cosa iat a podi balli, duncas, po is de su Latte Dolce puru (e megu a chistionai de sa scuadra tattaresa), chi tenit feti dexi puntus in buciaca, e feti una scuadra a is pabas, fadendi su contu ca funt arrannèscius a binci feti po duas bortas, feti po duas partidas, e totu e duas is partidas bintas ddas ant giogadas in domu cosa insoru: sa primu, fiat su cuatru de su mesi de ladamini, contras a is de su COS, e sa segunda, 'tendei 'tendei, pròpriu custu fini de cida passau, est a narai in sa partida chi s'est giogada s'otu, contras a is de s'Unipomezia. Immoi is tattaresus de su Latte Dolce tenint unu puntu in mancu (eia, unu feti) de cussus chi tenint is de su Gelbison, e duus puntus in mancu de cussus chi tenint is de su Cos. 

E cun is chistionis chi pertocant sa Sèrie D po custa cida puru eus spaciau, est a narai, ca eus acabbau. 
Po su chi pertocat, invècias, su campionau de sa Promotzioni, po una borta (po custa cida, a su mancu) no si ia a bolli chistionai de is scuadras chi funt currendi prus a forti e chi s'agatant, in dì de oi, me is primus postus de sa lista, ma si ia a bolli chistionai, po nd'arraxonai impari a bosatrus, est craru, de is scuadras chi s'agatant invècias me is ùrtimus postus, e chi ndi cabant in campu dònnia fini de cida, duncas, po circai de ndi cassai is puntus chi ddis ant a serbiri (ddis iant a depi serbiri, chi si praxit mancai de prus diaici po cumenti sonat su verbu) po ndi cassai sa sarvesa, partendi pròpriu de sa Lista A (chi est cussa innoi ddoi funt totus is scuadras de su Sud de sa Sardìnnia, partendi de is scuadras de su Sulcis e fintzas a arribbai a is scuadras aristanesas e fintzas a s'Ovodda), innoi agataus, a s'ùrtimu postu, is de sa Tharros, cun feti duus puntus allogaus in buciaca: a narai sa beridadi, is biancus-arrùbius (ddus tzerriaus diaici po su cabori de sa camisedda chi si ponint in pitzus mescamente candu depint giogai is partidas in domu) funt partius cun unu dannu de unu puntu (unu puntu asuta de su zeru, chi mi cumprendeis mellus diaici po su chi seu circhendi de si narai), e immoi s'agatant cun duus puntus pesaus me is primus noi giorronadas, poita ant serrau po tres bortas sa partida cun su resultau siddau in paridadi, ma custu bollit narai, puru, ca no funt ancora arrannèscius a binci nemmancu una isfida, e ddu cumprendeis a solus de cantu podit essi fadiosa una cosa diaici, de cantu potzat essi prena de trumentus, e de pentzamentus lègius, sa conca de is giogadoris candu no arrannèscint a fai cussu chi, mancai, provant aintru de sa cida po is allenamentus; e duncas, is crais de sa scuadra aristanesa po immoi abarrant me is manus de Brunu Frongia, chi est s'allenadori, e de Gianluca Pinna, chi ddi donat una manu de agiudu e benit a essi, ddi naraus diaici, su segundu allenadori. 

Sa nova de importu prus mannu, a su mancu po custa cida, nd'arribbat, invècias, de is de s'Arbus Guspini: s'apu giai arremonau, de su restu, me is cidas passadas, sa istoria de is duus assotzius, su de s'Arbus, e su de su Guspini, chi ant decìdiu de ndi pesai una scuadra feti, de is duas chi ddoi fiant me in su campionau de sa Primu Categoria (s'Arbus) e de sa Promotzioni (su Guspini) fintzas a s'annu passau, ma tocat a narai ca is cosas, a su mancu po immoi, a su mancu apustis de noi partidas giogadas, no ddis funt andendi beni cumenti, mancai, podiant isperai, fadendi su contu ca funt arrannèscius a si ponni in buciaca, ddi naru diaici, calincuna cosa cumenti a cincus puntus feti, chi ndi funt arribbaus gràtzias a duas partidas chi si funt serradas cun su resultau in paridadi, e a una partida, s'ùnica fintzas a immoi, chi funt invècias arrannèscius a binci, in domu cosa insoru, a sa segunda bessida (fiat su binti de su mesi de cabudanni, est a narai, giai giai duus mesis fait), contras a is de s'Uda; de sa dì sa scuadra sighida de Nicola Agus est stètia bona a ndi cassai feti unu pentixeddu, in seti partidas chi ant giogau (e chi no benint a essi pagus, e si cumprendit), a sa fini de sa isfida contras a is de s'Atleticu de Masainas, in domu cosa insoru etotu, cun sa partida chi s'est serrada cun su resultau de zeru a zeru. 
E cumenti sucedit fatu fatu in su mundu de sa bòcia, is dirigentis de s'assòtziu, de acòrdiu cun s'allenadori etotu, ant decìdiu de ndi sciusciai s'acapiu chi teniant, e custu bollit narai, est craru, ca immoi is crais de sa scuadra ant a andai me is manus de un antru allenadori, chi at a circai de ndi cassai sa sarvesa, fadendi su conti ca po immoi s'assòtziu est annadendi in acua lègias e no bonas, fadendi su contu ca custu sabudu passau is de s'ArbusGuspini nd'ant bodditu una bella surra in sa partida chi ant giogau contras a is de s'Antiochense, un'antra de cussas scuadras (impari pròpriu a is de s'Atleticu de Masainas, chi s'apu arremonau pròpriu immubagora) chi ndi funt artziadas in su campionau de sa Promotzioni pròpriu cust'annu, e chi duncas, eia, funt currendi po circai de mantenni sa categoria, cumenti si iat a podi narai a trassa de cumenti si narat in italianu etotu. 
In sa lista B puru, e cun custa nova apa a serrai s'artìculu chi teneis asuta de is ogus, nc'est giai stètiu unu càmbiu po su chi pertocat sa panchina de is de su Uddusò, cun Mariu Fadda chi, peròu, at agatau giai un'antra scuadra (is regulas pesadas de is de sa Federatzioni Italiana de su Giogu de su Càlciu si ddu permitint, de su restu) de sighiri, e duncas megaus a chistionai de is de su Bonorva, chi currint in su campionau de s'Ecellenza: e duncas Mariu fadda at lassau is de su Uddusò, ca in dì de oi s'agatant cun feti cincu puntus in buciaca (chi ndi funt arribbaus gràtzias a cincu partidas serradas cun su resultau in paridadi, e custu bollit narai, puru, mi parrit bastanti craru, ca is de su Uddusò no funt arrannèscius a binci nemmancu po una borta) e est andau a donai una manu de agiudu a is biancus-arrùbius, chi s'agatant, invècias, a su de ses postus in sa lista, e duncas no funt postus diaici mabi ma antzis, funt currendi po ndi cassai unu postu in sa parti arta de sa lista, chi iat a podi balli, mancai, po giogai is partidas finalis (cussas chi in ingresu tzerriaus play-off) e chi ant a balli po ndi cassai su sartidu in su campionau de sa Sèrie D. 

Ma torrendi a sa Lista B de su campionau de sa Promotzioni, nc'est un'antra panchina chi, in dì de oi, est callenti meda, e seus chistionendi de sa panchina de is de su Thiesi, ca s'agatant a s'ùrtimu postu, apustis chi ant pèrdiu noi partidas de sighiu me is primus noi bessidas: e immoi eus a biri ita nd'at a essi, cumenti ant a andai is cosas a s'allenadori de s'assòtziu birdi-nieddu, e seus chistionendi de Gianmario Rassu, chi po immoi, peròu, at a sighiri a fai su trabballu cosa sua, a incumentzai de sa partida chi nc'at a essi de giogai custu domìnigu etotu, contras a is de su Fonne, in domu allena.



Attività realizzata col contributo della Regione Sardegna. IMPRENTAS 2025-2026. LR 22/2018 art. 22