Salta al contenuto principale
francesco loi lanusei

Su Murera sighit a curri: cuatru gol a s'Afragolese e su de tres postu de sa lista in buciaca po serrai beni meda su duamilla e binti

Tra is scuadras sardas chi funt andendi mellus in su campionau de sa Sèrie D, nc'est, de siguru, su Murera, chi gratzias a is tres puntus ingotus in domu de is campanus de s'Afragolese, sighit a bolai sèmpiri prus in artu.
Po is piciocus de mister Francesco Loi su duamilla e binti acabat beni meda, cun su de tres postu in lista, dexi-otu puntus in buciaca, feti tres in mancu de is de su Latina, chi ant a essi, mancu a dhu fai aposta, is aversarius de is sarrabesus in sa primu partida de s'annu nou, su ses de Gennàrgiu de su duamilla e bintunu. Is grogus-brau ant bintu tres partidas de sighiu: cussa contras a is de su Nola, apustis cussa contras a is de su Savoia e, cumenti seus contendi imoi, contras a is de s'Afragolese. Sa partida s'est serrada cun cuatru gol fatus de is strangius, contras a is duus feti fatus de is de domu, ma po cumenti at giogau, mescamente in su segundu tempus, su Murera ndi podiat fai atrus puru.

Su primu gol de sa partida dhu faint is de s'Afragolese: in s'interis chi Nurchis est aforas de su campu po crupa de unu cropu pigau in faci apustis de duus minutus de giogu (cun su Murera duncas in dexi ominis), Puntoriere arrannescit a spingi, cun d'unu cropu de brenti, sa bòcia a is pabas de Vandelli. Ma is strangius nci ponint pagu tempus a si ndi strantargiai, gràtzias a sa giogada de campioni de Pinna, a su de dexiotu minutu, chi ballit po s'unu a unu. Me is urtimus minutus de giogu de su primu tempus, Virdis scudit, cun d'unu cropu de conca, sa bòcia donada da Cadau e stampat sa porta de Caputo. A mitadi de su secundu tempus, duncas, nd'arribat puru un antru gol po is de su Murera, custa borta cun Legal. Is de s'Afragolese peròu no s'arrendint: a su de trinta minutu, sèmpiri in su secundu tempus, Satta firmat Sogno in maba manera, in area de rigori, e s'arbitru donat a is de domu unu tiru de is undixi metrus, ma Vandelli arrannescit a cassai sa bòcia scuta pròpriu de Sogno. Po is de domu is cosas sighint a si fai legias, po crupa de Riccio, chi ndi crocat Kujabi cun d'una intrada stramba meda, e ndi ingollit su cartelleddu arrubiu, lassendi sa scuadra cosa sua in dexi ominis. Mancai siant cun d'unu giogadori in mancu, is de s'Afragolese agatant su segundu gol cun Sogno; is de su Murera si ghetant a s'atacu cichendi de serrai sa chistioni e a su de corantotu minutu nd'arribat puru su gol de Mereu.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Campionato:
Argomenti:
Stagione:
2020/2021
Tags:
Serie D