Friàrgiu est giai-giai bellu ca spaciau e is scuadras sardas currint concas is ùrtimus duus mesis de giogus

E duncas, a cantu parrit, de su chi ndi potzu cumprendi castiendi su tialu de calendàriu, ca est una de is primus cosas chi fatzu ainanntis de atacai a scriri s'artìculu de su giòbia (est a narai, mellus, s'artìculu chi ndi bessit afora dònnia giòbia de su mesi, chentza de ndi sartai nemmancu unu, e chi ndi pesu in sardu, a su mancu, in su sardu chi si fueddat innoi in Bidd'e Sorris, una bidda chi s'agatat in su Campidanu de mesu), seus arribbaus a is ùrtimus seti diis po su chi pertocat su segundu mesi de s'annu, chi est su mesi de friàrgiu (e mi parit bastanti craru, berus est?). 

E chi pròpriu si ddu depu narai, eia, no mi parrit nemmancu berus de nc'essi arribbaus a sa fini, e at a essi ca custu est su mesi prus crutzu, prus piticheddu tra totus is doxi chi si depeus scroxai, de annu in annu (po giogai a si ddu narai a trassa de poeta, chi mi permiteis de giogai unu pagheddeddu cun is fueddus, e isperu, diaderus, chi nesciunu, e chi nesciuna puru, tengat calincuna cosa de murrungiai), fadendi su contu ca tenit feti bintotu diis, e duncas, eia, su bintotu nd'at a arrui pròproiu custu sabudu chi nd'at a arribbai tra pagu, chi su Cielu at a bolli custu beni po mei e po bosatrus puru; e duncas, eia, megamu a si narai ca mi parit ca su tempus si ndi siat giai giai bobau, e po sa caridadi de Deus, a mei (chistionu po mei, a su mancu) m'est andau beni diaici, ma tocat a narai, puru, immoi chi nci seu (e immoi chi nci seus, chi a sa truma nc'aciungu bosatrus e bosatras puru ca custu artìculu ddu seis ligendi), ca seu incumintzendi a m'arramangai is manigas (cumenti si iat a podi narai e cumenti seu narendu, de su restu, a trassa de cumenti apu sèmpiri intèndiu narai de babbu miu etotu) po totu su trabballu, po totus is fainas chi nc'ant a essi de sighiri, invècias, in su mesi de martzu, chi at a essi bellu cantu fadiosu, feti po su fatu (po incumentzai) ca at a essi longu trintunu diis, ca funt (a fai su contu nci poneus pagu meda) cuatru (e duncas, giai giai una cida in prus) in prus de su tanti chi pertocat a su mesi de friàrgiu. E in prus, m'acudu a si narai custu puru: chi su mesi de friàrgiu, po prus de sa metadi de su tempus (cust'annu funt stètius dexesseti diis, po essi prus pretzisus puru, cumenti unu giornalista iat a depi essi), ddu eus passau (po calincunu at essi stètiu de prus, e po calincun atru at essi stètiu unu pagheddeddu de mancu, ma deu chistionu po mei...) papendi tzipulas e parafritus (po lassai a perdi de totus is atras centumila genias de drucis chi nci funt de tastai in custu mundu), buffendi binu (e mancai calincuna tassa de birra puru, berus est?) e andendi in giru a castiai (e a sighiri) is isfiladas de is maschereddas, in su mesi de martzu nc'at a essi prus pagu (meda prus pagu, po su chi mi pertocat...) de arriri, fadendi su contu ca (e sigu a chistionai po mei, po su chi pertocat su contu miu, ca de bosatrus ndi sciu pagu e giai nudda, de cumenti si dda biveis) sa caresima est incumentzada sa cida passada, est a narai, mercuis passau, (pròpriu cun su chi tzerriaus mercuis de su cinixu), e immoi custa chi si seus bivendi est, si iat a podi narai custu puru, sa primu cida intera (a su mancu po mei) de caresima, cun totu su chi custu cumportat. 
E po mei, caresima, po primu cosa, bolit narai ca depu sighiri, unu pagheddeddu, po su chi fait, sa dìeta: e duncas, eia, fatzu su giogu po custus coranta diis, de sighiri sa dieta a trassa de cumenti iat a fai unu veganu (po ndi furai su fueddu de s'italianu etotu), est a narai, duncas, ca in prus de no papai petza e nè pisci (ca giai no ndi papu), ndi bogu, de sa dieta cosa mia, puru is ous e su casu; e in prus, po fai is cosas ancora prus spassiosas (eia, pigu sa caresima a trassa de unu giogu...), no tocu nemmancu unu mesu stìddiu de cafei (cumenti ddus tzerriaus, cun cussa "i" chi seus costumaus a nc'aciungi a sa fini chi mi praxit meda meda, po cumenti sonat. Diaici fadeus puru unu pagheddeddu de grammatica, ca mabi no si fait) e de tè, tra is atras cosas; e duncas (e cun custu dda serru puru) no mi potzu permiti de papai nemmancu unu mesu arroghededdu de tzucuru, o de cosas bellas (cumenti una tzia de sa bon'anima de mamma mia fiat costumada a tzerriai is drucis, e est unu de cussus modu de narai, de tzerriai is cosas, chi m'est abarrau prantau in conca, e candu ddu arremonu, eia, mi parit totu de dda torrai a intendi. E sa cosa mi fait prexei meda, giai ddu eis a cumprendi a solus). 

E duncas, eia, su mesi de martzu est unu de is prus fadiosus, a su mancu po su chi mi pertocat, ma est su mesi innoi, mancai, cun totus is esercìtzius chi fatzu (e sa cosa sighit a andai ainanntis de una bella pariga de annus, chi pròpriu si ddu depu narai), a trassa de is allenamentus chi faint, chi depint fai is giogadoris po si cuncodrai po is partidas chi depint giogai, est su mesi innoi imparu (o circu de imparai, mi parit chi potzat balli aguali) sa cantidadi prus manna de cosas, sa cantidadi prus manna de letzionis. 
E duncas, eia, sigheus a andai ainnantis cun su coru prenu de isperas bonas (e chi mai ammanchint! ca po s'anima, si ddu naru, torra, a trassa de cumenti iat a fai unu poeta, prus ca unu giornalista sportivu, is isperas bonas funt cumenti s'acua e su pani e sa cosa de papai po su corpus), e candu mi nd'apa a scidai, custu lunis chi at a benni (e sèmpiri chi su Cielu at a bolli custu beni po mei, ca ddu scieis cumenti dda pentzu: bastat unu sbàlliu, fintzas unu sbàlliu pitichinninniu chi durat unu segundu, bastat a ponni mabi unu pei in terra, e t'agatas bellu ca stèrriu in su letu in un aposentu de cancu uspidali, e duncas, eia, ddu naru a mei etotu po incumentzai, at a tocai a aturai atentus) intzandus eus a essi giai a sa segunda dì de su mesi de martzu. 
E eus a podi incumentzai a curri concas a su mesi de abrili, e concas a sa Pasca Manna, ma in dì de oi (fadendi su contu ca seu atachendi a scriri, seu atachendi a ndi pesai cust'artìculu de martis, chi est su binticuatru) est ancora chitzi po si podi pigai su lussu (cumenti m'est bèniu de narai) de chistionai de candu eus a fai is festas po sa Pasca Manna, chi est ancora totu de pesai (a narai sa beridadi, est sa caresima chi est ancora totu de pesai, mi naru a solu a solu). 

E duncas, si potzu narai, puru, ca gràtzias a Deus (mi benit de ddu narai diaici) is diis funt incumentzendi a benni a essi prus longas, e meda ma meda prus callentis, puru, de su chi fiant, a su mancu, fintzas a una cidixedda fait: in su megama de su domìnigu, duncas, nci fiant calincuna cosa cumenti a binti gradus (e po si fai a cumprendi de su chi seus chistionendi, fait a narai, puru, ca sa spiàgia de su Poetu, in Casteddu, fiat prena de genti), e no m'est partu nemmancu berus (e chistionu po mei, est craru) de podi arriciri totu cussa luxi bona, e totu su callenti ca mi pariat fintzas de mi scallai (a trassa de cumenti sucedit in s'istadi) e apustis de totu s'acua chi est protzia, apustis de totu su bentu fridu, e forti (e tontu! M'acudu a ddi narai deu, ca no sciu chi siat poita seu imbecendi, ma su bentu forti est una de is cosas chi seu incumentzendi a timi prus de totu), deu creu ca unu bellu megama de sobi fessit su chi si serbiat (mancai tra una pariga de cidas, e tra una pariga de mesis, cumenti nd'at a torrai a brintai s'istadi, intzandus no eus a acudi a murrungiai e a prangi po sa basca; e calincunu de nosu at a disigiai, custu est pagu ma seguru, su tempus chi fait in s'ierru. Ca ddu scieus cumenti seus fatus: no seus mai prexaus, ma teneus sèmpiri calincuna cosa chi no si andat beni: e chi no est po su frius, intzandus est po sa basca; chi no est po s'acua chi nd'arruit de su Cielu, est po sa secagna). 

E duncas, eia, candu castiu concas a su cielu, ca in custas diis est bellu asullu – asullu, e lìmpiu - lìmpiu de nuis, e candu castiu sa luna (chi est dònnia noti sèmpiri prus manna), eia, mi benit de pentzai ca custu chi s'eus a depi bivi at a essi s'ùrtimu arrogu de s'ierru, e custu bollit narai, intzandus, eia, ca po cust'annu puru nci dda eus giai giai fata. 
E mi fait prexei, ca su beranu est una stagioni toga meda, mescamente innoi in s'isula. 
E custu ddu naru, duncas, po agatai sa fortza, sa gana bona de sighiri a andai ainnantis; e ddu naru, po incumentzai, po mei etotu. 

Su mesi de martzu (e diaici dda serru de mi strollicai, fadendi su contu ca po custa cida puru s'apu chistionau, bastanti, mi parit de podi narai custu puru, siat de su tempus chi est passau, de su tretu chi eus fatu aintru de s'annu, aintru de custu duamilla e bintises, ca mi parrit giai bellu cundiu, chi pròpriu si depu narai custu puru; e apu chistionau puru de su tempus chi est fadendu) est cussu innoi is giogus si imbuddidant, e megu a chistionai, est craru, de is giogus chi pertocant is campionaus de càlciu chi sigheus cun su giàssu de su Diàriu Sportivu: e duncas, eia, in su mesi de martzu eus a cumprendi calincuna cosa in prus, deu creu (cumenti sucedit dònnia annu, de su restu) de cali ant a essi is scuadras chi ant a curri po ndi cassai su primu postu; e duncas, eia, si iat a podi narai puru ca is cincu-ses partidas chi s'ant a giogai in su benidori (me is cincu-ses cidas chi nd'ant a arribbai) ant a essi de importu mannu meda, e sa chistioni ballit, mi parit craru, siat in su campionau de s'Ecellenza, e siat po su chi pertocat su campionau de sa Promotzioni, de sa Primu Categoria e fintzas a nd'arribbai a su campionau de sa Segunda Categoria puru. 

E intzandus, e sèmpiri chi seis de acòrdiu cun mei, su chi si iat a podi fai est pròpriu cussu de andai a castiai cumenti funt cuncodradas in dì de oi is cosas me is listas de is campionaus chi s'apu arremonau pròpriu immoi-immoi (o pròpriu immubagora, po manigiai un antru de cussus fueddus chi mi praxint, e si naru sa beridadi, fintzas a m'amachiai), partendi, pròpriu, de su prus mannu chi teneus in s'isula, e seu chistionendi, est craru, de su campionau de s'Ecellenza, incumentzendi pròpriu, de is partidas chi si funt giogadas in custu fini de cida chi est passau, e fadendi su contu, po oi, feti de is scuadras chi funt currendi po su primu postu de sa lista (est a narai, duncas, ca de is scuadras chi funt currendi, in dì de oi puru, po ndi cassai sa sarvesa, e duncas, sa possibbilidadi de giogai po un antru annu puru, chi at a essi s'annu chi benit, sa stagioni chi at a benni, po ddu narai mellus puru, e chi at a essi, est bastanti craru, sa de su duamilla e bintises – duamilla e bintiseti, nd'eus a chistionai, mellus, me is artìculus chi nd'ant a bessiri aforas in su benidori). 

E duncas, eia, sa nova de importu prus mannu, ddi naru diaici, chi nd'arribbat de su campionau de s'Ecellenza est ca, de custa cida, a su primu postu de sa lista agataus is biancus-nieddus de s'Ossese, ca funt arrannèscius a binci sa partida contras a is de su Sant'Aleni de Cuartu, chi ant giogau in domu cosa insoru etotu, cun su resultau, bellu e tundu tundu, de tres a zeru. E immoi, eia, fait a narai custu puru, is de s'Ossese tenint calincuna cosa cumenti a corantaduus puntus allogaus in buciaca, e chi funt duus in prus de is chi tenint allogaus a su callenti is de s'Ilva de Sa Maddalena, chi in s'ùrtima giorronada chi ant giogau funt arrannèscius a binci, po tres a zeru, contras a is de sa Nuorese, in una de is partidas de importu prus mannu, tra totus cussas chi si funt giogadas fintzas a immoi, a su mancu, in su campionau de s'Ecellenza, a su mancu, de importu mannu po su chi pertocat sa cursa concas a su primu postu. 
E duncas, eia, a fai is contus nci poneus pagu meda, is de s'Ilva de Sa Maddalena nd'ant cassau is de sa Nuorese a su segundu postu de sa lista, cun coranta puntus in totu. Is de su Tèmpiu, invècias, funt arrannèscius a binci sa partida, de importu mannu meda, torra (e si ddu apu narau, ca in custu perìodu is giogus si imbuddidant!), chi ant giogau contras a is de su Lanusè, in domu allena, cun su resultau de duus a unu; e custu bollit narai, duncas, ca is cabonischeddus (is de su Tèmpiu ddus tzerriaus diaici puru, po su caboniscu chi tenint pintau in su simbulu de sa scuadra) si funt lassaus a is pabas pròpriu is de su Lanusè: e duncas, serru is contus chi pertocant su campionau de s'Ecellenza, is de su Tèmpiu tenint trintaseti puntus in buciaca, duus in prus de is chi tenint is de su Lanusè, e s'agatant, in dì de oi, a su de cuatru postus in sa lista, cun cincu puntus in mancu de is chi tenint is de s'Ossese, chi s'apu arremonau giai, de su restu. 

E duncas, eia, si iat a podi narai puru (e cun custa dda serru diaderus) ca in dì de oi nci funt cuatru scuadras chi megant a curri po ndi cassai su primu postu in su campionau de s'Ecellenza, e custu candu ammancant, ancora de giogai, feti otu partidas (ca no funt pagus, ma tocat a fai su contu ca de custas otu, cuatru s'ant a giogai in su mesi de martzu, e is ùrtimas cuatru in su mesi de abrili). 

Po su chi pertocat is duas listas de sa Promotzioni, deu ia a partiri, est craru, andendi a castiai, e no eus a trigai meda po ddu fai, cumenti funt cuncodradas is cosas, po incumentzai, cun sa Lista A (cumenti mi parit giustu, cumenti si iat a podi narai) innoi, a su primu postu, agataus is de su Gùspini, cun calincuna cosa cumenti a cincuantanoi puntus in totu, chi ndi funt arribbaus gràtzias a dexennoi partidas bintas e a duas partidas chi ant serrau cun su resultau siddau in paridadi, apitzus de binticincu bessidas. Una de is cosas de importu prus mannu chi podeus narai, in dì de oi, po su chi pertocat sa cursa chi ndi funt pesendi (ddi naru diaici...) is piciocus sighius de Dessì, est ca in domu cosa insoru no ant ancora pèrdiu nemmancu una partida, est a narai, mellus, ca tra totus is partidas chi ant giogau in domu cosa insoru (mancai, posta diaici, sa chistioni si sonat mellus puru), funt arrannèscius a ndi binci undixi, e feti po una borta si funt dèpius acuntentai feti de unu puntixeddu; e po essi prus pretzisus puru, cumenti unu giornalista iat a depi essi chi bolit fai beni su trabballu cosa sua, si potzu narai, puru, immoi chi nci seu, ca s'ùnica partida innoi is gùspinesus no funt arrannèscius a ndi cassai is tres puntus prenus est stètia cussa chi ant giogau contras a is de s'Arborea, e custu fiat su catodixi de su mesi de friàrgiu, e duncas, eia, una pariga de cidas fait. 
A is pabas de is de su Gùspini agataus is de su Terraba Frantziscu Bellu, cun cincuantotu puntus in totu (chi funt, eia, eis cumprèndiu beni, unu in mancu de is puntus chi tenint is primus de sa classi), chi ndi funt arribbaus gràtzias a dexiotu partidas bintas (eia, torra, is terrabesus ant bintu una partida in mancu de is chi ant bintu is biancus-arrùbius) e a cuatru partidas chi ant serrau cun su resultau de paridadi. Is de su Terraba, intzandus, funt arrutus feti po tres bortas, invècias is de su Gùspini ant pèrdiu, a su mancu fintzas a oi, cuatru partidas; fait a narai puru ca sa batalla po ndi cassai su primu postu est benendu a essi spàssiosa meda po totus is tifosus chi dda funt sighendi; de seguru no si podit narai ca su campionau de cust'annu, po su chi pertocat, sèmpiri, sa Lista A de sa Promotzioni, e po su chi pertocat sa cursa po ndi cassai su primu postu, siat giai acabbau; e cun custu bollu narai (e nd'eus a chistionai mellus candu eus a arribbai a arraxonai apitzus de su chi est sucedendi in sa Lista B) ca, de seguru, no est una de cussas stagionis innoi s'agatat una scuadra chi benit a essi meda, ma meda prus forti de is scuadras aversàrias, cun sa cursa po su primu postu chi, mancai, si serrat giai unu mesi ainnantis chi nd'arribbit sa Pasca Manna. 
Sa cursa concas a su primu postu in sa Lista A de cust'annu, intzandus, benit a essi spàssiosa meda poita a su de tres postus agataus un'antra scuadra bella e forti meda, e seu chistionendi de is cidresus (cumenti seus costumaus a ddus tzerriai innoi in Bidd'e Sorris, a su mancu, fadendi su contu ca seus bixinus, fadendi su contu ca tra is duas biddas ddoi funt feti calincuna cosa cumenti a binti chilometrus) de sa Villacidrese, sa scuadra sighida de su presidenti Mateu Marrocu, chi in dì de oi tenit, allogaus a su callenti in buciaca, calincuna cosa cumenti a cincuantases puntus, e chi funt tres in mancu de is chi tenint is de su Gùspini, e feti duus in mancu de is chi tenint allogaus a su callenti is de su Terraba, chi s'apu arremonau immubagora de su restu. 
A su de cuatru postus, invècias, nci funt is de su Castiadas, cun cincuantacuatru puntus in totu, chi funt cincu in mancu de is chi tenint is de su Gùspini: e duncas, si potzu narai ca is de su Castiadas ant fatu una primu parti de stagioni toga meda, fadendi su contu ca si funt agataus a su primu postu po cidas e cidas de sighiu; po si fai a cumprendi de ita seus chistionendi, si potzu narai ca is biancus-birdis ant bintu po cuindixi bortas, ant serrau in paridadi sa partida po noi bortas e ant pèrdiu, fintzas a oi, a su mancu, feti una partida; sa scuadra de su Sarrabus, duncas, est cussa chi nd'est arruta prus pagu bortas tra totus is scuadras chi currint in sa Lista A, ma su dannu mannu est pròpriu chi ant serrau sa partida cun su resultau siddau in paridadi po una biga manna de bortas. S'ùnica partida chi is de su Castiadas ant pèrdiu, intzandus, est stètia cussa, mancu a ddu fai aposta, chi ant giogau in domu de is de su Gùspini, su seti de su mesi de idas. 
E duncas, fadendi su contu ca sa scuadra ca in dì de oi s'agatat a su de cincu postus in sa lista, e megu a chistionai de is casteddaius de su Vecchio Borgo Sant'Elia, sighius, po cust'annu puru, de un allenadori giòvunu cumenti est Miro Murgia, tenint calincuna cosa cumenti a catodixi puntus in mancu de is chi tenint is de su Castiadas, e duncas, eia, si iat a podi narai ca sa cursa po ndi cassai su primu postu pertocat cuatru scuadras, e eus a biri cumenti ant a andai is cosas in totu su mesi de martzu, ca at a essi cussu de importu prus mannu. 
Po immoi, po serrai sa chistioni, si potzu feti narai cumenti funt cuncodradas is cosas po su chi pertocat sa giorronada chi s'at a giogai custu fini de cida chi nd'at a arribbai (e sèmpiri chi su Cielu at a bolli custu beni po nosu): is de su Castiadas ant a depi arriciri sa visita (ddi naraus diaici) de is de s'Atleticu de Casteddu; is de su Gùspini si dda ant a depi biri, sèmpiri in domu cosa insoru, contras a is allenus de su Samugheo, e po is de su Terraba Frantziscu Bellu nc'at a essi de giogai sa partida, chi no at a essi facìli de seguru, contras a is aristanesus de sa Tharros. 

E duncas, su chi podeus fai immoi est su de andai a castiai (impari, chi ndi teneis gana) cumenti funt cuncodradas is cosas po su chi pertocat sa Lista B, e megaus a sighiri a chistionai de su campionau de sa Promotzioni (gei s'at a cumprendi bastanti beni, e chi no si cumprendit, deu seu innoi po essi su prus craru chi fait). 
E duncas, in sa Lista B a su primu postu agataus is grogus-arrùbius de s'Alighera, sighius cust'annu (cumenti apu tentu giai s'ocasioni de s'arremonai giai me is artìculus chi ndi funt bèssius me in totus is mesis passaus) de Mauru Giorico, chi est unu de is allenadoris cun s'esperièntzia prus manna tra totus cussus chi nci funt in dì de oi in Sardìnnia. 
Duncas, is primus de sa lista tenint allogaus in buciaca calincuna cosa cumenti a setantunu puntus (e no funt pagus de seguru, fadendi su contu de su chi s'apu narau immoi-immoi apitzus de is de su Gùspini, chi ndi tenint cincuantanoi, e chi ballint po su primu postu in sa Lista A), chi ndi funt arribbaus gràtzias a bintitres partidas bintas apitzus de is binticincu partidas chi ant giogau in totu; e duncas, sa primu cosa chi nc'est de narai, sa primu cosa chi mi benit de narai apitzus de sa stagioni toga meda chi ndi funt pesendi is de s'Alighera, est ca, a su mancu fintzas a oi, no ant pèrdiu nemmancu una partida, e custu si iat a depi fai cumprendi cantu funt fortis, e cantu funt currendi a forti. 
E duncas, eia, is de s'Alighera, cumenti si iat a podi narai (e cumenti seu narendusì, de su restu) funt lassendi feti is pimpirillas a totus is scuadras aversàrias: is ùnicas duas scuadras chi funt arrannèscias a ndi cassai unu puntixeddu, candu ant giogau contras a is primus de sa lista, funt stètius, a su mancu fintzas a oi, is de su Istintinu (chi funt stètius is primus, in custa stagioni, a sciusciai is giogus a is primus de sa lista) e in sa partida apustis, in sa giorronada apustis, sa pròpriu cosa est sucèdia a is de su Thiesi, sighius de un allenadori bravu cumenti est GianMario Rassu. E custu est su chi m'at contau pròpriu s'allenadori de is nieddus-birdis candu ddu apu intèndiu po ndi pesai una ciaciarrada, e po cumprendi cumenti ddis fiant andendi is cosas. 
«Eus agatau, e fiat ora puru, is echilìbbrius giustus, ma po ddu fai eus dèpiu trabballai, e meda puru, a partiri de is allenamentus chi ndi pesaus dònnia, dònnia cida po si cuncodrai, in sa manera mellus chi podeus, po is partidas chi andaus a giogai in su fini de cida. In s'ùrtima intervista chi estus fatu impari, ti ia narau ca, a su mancu a parri miu, iant a essi sèrbius una parighedda de mesis po aparixai totus is cosas chi si pertocànt, fadendi su contu ca seus stètius piscaus torra a s'ùrtimu momentu, est a narai, duncas, ca nosu eus scìpiu de depi giogai, de depi curri in su campionau de sa Promotzioni feti su cincu de su mesi de agustu, candu pentzastus de depi giogai in su campionau de sa Primu Categoria, e duncas, eia, sa rosa cosa nosta no fiat de seguru cuncodrada po fai una stagioni, fadiosa meda, in su campionau de sa Promotzioni. Immoi potzu narai ca is cosas funt andads pròpriu cumenti pentzamu: is resultaus chi ndi seus cassendi si funt donendi arrexoni, est a narai, ca, a cantu parrit, seus fadendi unu trabballu bonu, unu trabballu in gràtzia de Deus. Deu pentzu, duncas, ca po su chi eus potziu biri fintzas a oi, sa stagioni de su Thiesi siat bona meda. Est berus, puru, ca cun totus is scuadras chi s'agatant me is primus postus de sa lista seus fadendi a biri cosas bonas: seus arrannèscius a binci contras a is de su Coghinas, contras a is de s'Ozierese e contras a is de su Bonorva nd'eus cassau unu puntixeddu de oru. Peròu deu creu ca sa cosa mellus chi podeus, e depeus fai, est cussa de pentzai feti a nosu: seus currendi, intzandus, po ndi cassai sa sarvesa e po tenni sa possibbilidadi, mi parit craru puru, de curri in su campionau de sa Promotzioni po s'annu chi at a benni puru. Apustis, chi eus a podi cabai in campu chentza de tenni pentzamentus lègius in conca, chi est cussu chi sucedit candu ti serbint, ammarolla ammarolla, puntus po ndi cassai sa sarvesa, intzandus eus a biri, mellus, cumenti s'ant a andai is cosas. Fintzas a oi, a su mancu a parri miu, si iat a podi narai ca sa scuadra chi est fadendu a biri is ispantus prus mannus est pròpriu cussa de su Thiesi, fadendi su contu, duncas, de totus is dannus chi eus tentu a s'incumintzu de sa stagioni». 

Torrendi nosu, intzandus, si potzu narai ca a su segundu postus agataus is de su Bonorva, chi tenint, allogaus in buciaca, calincuna cosa cumenti a cincuantases puntus in totu, e chi ndi funt arribbaus gràtzias a dexiotu partidas bintas, e gràtzias a is tres puntixeddus chi nd'ant cassau candu sa partida s'est serrada cun su resultau in paridadi. A su de tres postus, cun corantaseti puntus, agataus invècias is de s'Ozierese, cun corantaseti puntus in totu: is grogus-asullus ant bintu catodixi partidas e nd'ant serrau cincu cun su resultau siddau in paridadi. A su de cuatru postus, invècias, agataus duas scuadras, cun corantaduus puntus: is de su Coghinas e is de s'Usinese. Is piciocus sighius de Paulu Congiu ant bintu trexi partidas e nd'ant serrau tres cun su resultau in paridadi (ma depint ancora giogai sa partida contras a is de s'Atleticu de Bono, e duncas si iat a podi narai, eia, ca tenint una partida in mancu); po sa scuadra de Scotto, invècias, is partidas bintas benint a essi doxi, e ses funt is partidas chi ant serrau cun su resultau siddau in paridadi. 
Is de s'Usinese, est craru, funt partius cun sa bidea de abarrai me is primus postus de sa lista fintzas a sa fini de sa stagioni, e fadendi su contu ca s'agatant a su de cuatru postus in sa lista, no si podit narai, custu est pagu ma seguru, ca sa stagioni cosa insoru siat andendi mabi, ma tocat a nc'aciungi, puru, po essi prus crarus, ca is arrùbius-brau, apitzus de is otu partidas chi ant giogau immoi po sa torrada (cumenti seus costumaus a tzerriai sa segunda parti de sa stagioni, sa segunda parti de su campionau) ant pèrdiu po cincu bortas, po duas bortas ant serrau cun su resultau in paridadi e ant bintu feti una borta, fiat su dexiotu de su mesi de gennàrgiu, in sa partida contras a is de su Ilartzi (chi funt currendi, invècias, po ndi cassai sa sarvesa). 

E duncas, eia, podeus narai, puru, ca is de s'Usinese funt, in dì de oi, de prus de unu mesi chi no arrannèscint a si ponni in buciaca is tres puntus prenus, fadendi su contu ca s'ùrtima partida chi ant giogau, contras a is de su Bosa, in domu allena, ant pèrdiu cun su resultau de duus a zeru; e cun su resultau de duus a zeru si fiat serrada sa partida chi is de s'Usinese iant giogau, sa cida ainnantis, in domu cosa insoru, contras a is de su Bonorva. Contras a is de s'Altzaghena, invècias, is de s'Usinese funt arrannèscius a ndi cassai unu puntixeddu, chi nd'est arribbau, peròu, apustis de sa partida chi iant pèrdiu, torra in domu, contras a is de su Campanedda. 
E duncas, eia, torrendi a nosu, e torrendi a sa chistioni de importu prus mannu, chi est cussa chi pertocat sa batalla, ddi naru diaici, po ndi cassai su primu postu de sa lista (e duncas, s'artziada in su campionau de s'Ecellenza) si iat a podi narai, puru, chentza de timi de si sballiai, ca in domu de is de s'Alighera funt feti fadendi su contu de cantu giorronadas ammancant po serrai is giogus: e su contu ddu podeus fai impari; cun cussa chi s'at a depi giogai in custu fini de cida, intzandus, nc'ant a essi de giogai feti atras noi partidas (feti po modu de narai, si cumprendit), e po custu chi megu a narai ca su mesi de martzu at a balli meda po sa cursa concas a s'Ecellenza. 
E fait a narai, puru, ca su spàssiu prus mannu, po is tifosus chi sighint is giogus in sa Lista B (e po is giogadoris chi a sa fini ndi cabant in campu), benit a essi sa cursa po ndi cassai sa possibbilidadi de giogai is partidas finalis, cussas chi, a trassa de is ingresus etotu, seus costumaus a tzerriai play-off. 
E andaus mellus a cumprendi, sèmpiri chi seis de acòrdiu cun mei, cumenti funt cuncodradas is cosas: po is partidas finalis (cussas chi s'ant a giogai, intzandus, candu ant a acabbai is giogus de sa stagioni regolari, cumenti seus costumaus a dda tzerriai) ant a curri cuatru scuadras (est a narai, duncas, is cuatrus scuadras chi ant a serrai is giogus a is pabas de is primus de sa lista), e in dì de oi is suadras chi iant a depi brintai me in sa fasi finali (diaici m'est bèniu de dda tzerriai) iant a depi essi, intzandus, is de su Bonorva, is de s'Ozierese, is de su Coghinas (ca in s'interis chi scriu custas rigas, funt gioghendi sa partida, de importu mannu meda, contras a is de s'Atleticu de Bono) e is de s'Usinese, ma tocat a fai su contu, puru, ca po ndi cassai unu postu po is play-off (si ddu scriu a trassa de is ingresus, isperendi ca nesciunu tengiat nudda de murrngiai) nci funt puru is de su Logusantu, ca tenint in buciaca corantunu puntus (eia, unu in mancu de is chi tenint in dì de oi is de s'Usinese), is de s'Altzaghena, cun coranta puntus, e is de sa Macumerese, ca in dì de oi, apustis de binticincu partidas fatas, tenint trintanoi puntus allogaus in buciaca. 
E tantu ballit, ddi naru diaici, chi a su contu nci poneus is de su Thiesi puru, chi s'apu arremonau pròpriu ainnantis in custu artìculu etotu, fadendi su contu ca is nieddus-birdis tenint feti unu puntixeddu in mancu de is chi tenint is de sa Macumerese (trintotu puntus, po essi prus pretzisus), ma tocat a narai, puru, ca po is de su Thiesi at a essi meda difìcili su de arrannèsci a arribai ainanntis de is cuatru scuadras chi tenint ainnantis in sa lista, e si cumprendit beni. 

E duncas, eus a biri ita totu at a sucedi me is partidas chi s'ant a giogai immoi in su mesi de martzu, partendi pròpriu de cussa chi s'at a giogai custu domìnigu chi at a benni (e chi est, pròpriu, sa primu dì de su de tres mesis de s'annu), e podeus andai a biri cumenti funt cuncodradas is cosas. 
Intzandus, po incumentzai si potzu narai ca is de s'Alighera ant a depi andai a giogai in domu de is de su Li Punti, cun is tataresus sighius de Cosimu Salis chi tenint bintises puntus in buciaca e cuatru scuadras a is pabas, e duncas, eia, funt currendi po ndi cassai sa sarvesa. E duncas, eia, si cumprendit cumenti is duas scuadras (e seu chistionendi de is de s'Alighera e de is biancus-asullus, est bastanti craru?) nd'ant a cabai in campu cun sentidus diversus; is de s'Alighera ant a circai de ndi cassai sa de binticuatru bìncidas, e chi fadeus su contu ca tra is duas scuadras ddoi funt, badda badda, calincuna cosa cumenti a corantacincu puntus (e no funt pagus de seguru), intzandus parit craru ca is de s'Alighera iant a podi binci chentza de fai tropu trabballu, ma su giogu de sa bòcia benit a essi togu pròpriu poita no sciis mai, no podis sciri cumenti ant a acabbai is cosas. 

Una partida de importu mannu po ndi cassai sa possibbilidadi de giogai is partidas finalis (e po ndi cassai, intzandus, s'artizada in su campionau de s'Ecellenza) at a essi, custu est pagu ma seguru, cussa tra is de su Logusantu e is de s'Altzaghena; chini at a binci, tra is duas, at a podi sighiri a isperai, cun is smeraldinus chi, peròu, depint binci po fortza, fadendi su contu ca tenint unu puntu in mancu de is chi tenint is aversàrius. 
De importu mannu meda at a essi puru sa isfida tra is de s'Usinese e is de su Coghinas, mancai is allenus sighius de Congiu iant a podi essi unu pagheddeddu prus stracus de is aversàrius, fadendi su contu ca ant a depi giogai po tres bortas in una cida (domìnigu passau, su mèrcuis, cumenti s'apu arremonau ainnantis, e domìnigu chi at a benni). 
Is de su Bonorva, invècias, si dda ant a depi biri contras a is de su Campanedda, in domu allena; e serraus cun is de sa Macumerese, chi ant a depi torrai sa visita a is de s'Atleticu de Bono, chi pròpriu de dexi diis funt trabballendi impari a Celestinu Ciarolu; Ma de sa cosa, mancai, si nd'apa a chistionai mellus me is artìculus chi nd'ant a bessiri in su benidori, e sèmpiri chi su Cielu at a bolli custu beni po mei. 
Po oi, invècias, no potzu fai atru ca si saludai e si imprassai, isperendi de essi torra innoi tra seti diis, est a narai, giòbia chi at a benni.



Attività realizzata col contributo della Regione Sardegna. IMPRENTAS 2025-2026. LR 22/2018 art. 22