Ndi funt bessius is calendàrius de sa Promotzioni puru: is partidas de s'andada incumentzant su catodixi de su mesi de cabudanni e acabbant su binti de su mesi de idas, chentza de sartai nemmancu unu fini de cida

E duncas, atacu a scriri custas rigas, e a ndi pesai s'artìculu po sa segunda cida de su mesi de cabudanni, candu seu lòmpiu, sanu e totu interu (ca de su restu no si podit mai sciri cumenti andant is cosas...), a su martis, chi nd'arruit s'otu (e atacu a scriri custus fueddus chi teneis asuta de su nasu e asuta de is ogus candu ammancant duas diis a su giòbia; e custu po sighiri su dìciu chi narat ca "chini tenit su tempus po fai una cosa no iat a depi abertai s'incras po dda fai", e nareus chi custu benit a essi unu de is dìcius, tra totus cussus chi nci funt, tra totus cussus chi connòsciu, chi megant a mi praxi de prus in custu perìodu): e duncas una de is primus novas chi si potzu donai, ainnantis de si nci fuiai inpari a fundu 'e susu (cumenti narant in bidda mia, cumenti apu sèmpiri intèndiu narai in bidda mia, chi sonat mellus puru, chi est Bidd'e Sorris, in su Campidanu de mesu) pertocat su tempus chi est fadendi e, mescamente, su tempus chi at a fai is diis chi ant a benni e, pruschetotu, su tempus (e seu chistionendi de su clima, deu creu ca siat bastanti craru) chi at a fai, su tempus chi nc'at a essi custu fini de cida, candu, 'tendei 'tendei (cumenti si megàt sa bon'anima de mamma mia candu intendiat una nova chi dda fadiàt ispantai), ant a torrai a incumentzai is campionaus de s'Ecellenza e de sa Promotzioni puru: me in custas duas cidas passadas, invècias, is scuadras sardas chi currint in custas duas categorias ndi funt giai cabadas in campu (ant tentu giai su modu e s'ocasioni de ndi cabai in campu, chi si praxit mellus diaici po cumenti sonat sa frasia, diaici fadeus puru unu pagheddeddu de grammatica ca mabi no s'at a fai de seguru) po giogai is partidas de su primu turnu (ddi naraus diaici furendindi sa trassa de cumenti si narat in italianu etotu) de sa Cupa Italia, e immoi ant a torrai a partiri, cumenti fia contendusì, cun is campionaus, po su prexu e su spàssiu de totus is tifosus chi nci funt in s'isula cosa nosta bella e stimada. 

E duncas, eia, custu sabudu e custu domìnigu passau m'est bènniu de pentzai a totus cussus poberus piciocheddus (ddi naru diaici po ddus scanceriai unu pagheddeddu, e megu a brullai, gei si cumprendit) chi ant dèpiu fai po noranta minudus (chi no calincuna cosa in prus puru, fadendi su contu ca nci funt puru is tempus suplementaris de giogai ca, ddu naru mancai po cussas personas ca no funt acapiadas a istrintu cun is regulas de su giogu de sa bòcia, funt is minudus chi serbint a recuperai unu pagheddeddu de su tempus chi si perdit in s'interis chi is giogadoris abarrant, mancai, crocaus in terra apustis chi ndi pigant unu corpu o su tempus chi nci bollit po fai bessiri unu giogadori de su campu e po fai brintai su cumpangiu, po cussa chi, in italianu, tzerriaus "sostituzioni", e in sardu su fueddu torrat giai giai aguali, de su restu, e benit a essi "sostitutzioni") totu curri curri avatu de sa bòcia e avatu de is aversàrius, cun una temperadura de prus de trintacincu gradus; e ddu cumprendit su burricu puru ca no benit a essi una situatzioni bona po su cropus de is giogadoris, chi peròu, tocata a narai custu puru, funt allenaus beni (a trassa, prus o mancu, de cumenti s'allenant is giogadoris professioneris, mancai unu giogadori professioneri, tocat a narai custa cosa puru immoi chi nci seus, arribbat a s'allenai po cincu-ses diis a sa cida, a bortas a su mengianu e a su merì puru, eia, a trassa de unu trabballu) e duncas, arrannescint a aguantai chentza de si morri in campu (e megu a ddu narai po brullai, gei s'at a cumprendi deu creu) mancai nci siat su sobi chi, sèmpiri po arremonai unu dìciu, spacat is perdas. 

E duncas, sa nova prus manna, megamu a si narai, pertocat su fatu ca de oi (de oi chi est giòbia, diaici si cumprendeus mellus a pari, e chi benit a essi su dexi de su mesi de cabudanni) is temperaduras massimas (cumenti seus costumaus a ddas tzerriai) iant a depi incumentzai a essi prus bascias: e custu bollit narai, duncas, ca chi martis passau, e fintzas a su mèrcuis, nci fiant prus de trintaseti gradus (ma po sa peddi e po sa petza cosa nosta est cumenti chi nci ndi fessint calincuna cosa cumenti a cuatru o cincu in prus), e sa pròpriu cosa, megamu pròpriu a si ddu narai, at fatu in su fini de cida (sabudu e domìnigu) e puru in sa dì de su lunis, de giòbia iat a depi fai calincuna cosa cumenti a trinta gradus (chi pròpriu depu narai sa beridadi e chi pròpriu depu essi pretzisu cumenti unu giornalista iat a depi essi, su giòbia su termometru nd'at a cabai fintzas a bintinoi gradus, e no mi parit nemmancu berus, fadendi su contu ca fintzas a una pariga de cidas fais sa temperadura nci spundiat fintzas a coranta gradus, chi no de prus puru), po su chi pertocat sa temperadura prus arta, e nc'ant a essi dexennoi gradus po su chi pertocat sa minima; e me is diis chi ant a benni apustis de su giòbia, su tempus iat a depi essi bellu friscu, mescamente a su merì, candu ndi cabat su sobi, e mescamente a su mengianeddu chitzi, cun is temperaduras minimas chi ndi iant a podi cabai fintzas a dexesseti gradus; e fadendi su contu ca fintzas a una pariga de diis fait si parriàt, giai giai, de bivi, de s'agatai aintru de unu forru po binticuatru oras de sighiu (fadendi su contu ca po unu muntoni de diis is temperaduras no ndi funt mai cabadas asuta de is binticuatru – binticincu gradus, candu s'est andada beni sa cosa, poita de su restu, is temperaduras minimas funt arribbadas a essi puru de bintises e bintiseti gradus), intzandus totu custa friscura at a essi, po si fai un esèmpiu, cumenti a si bufai una tassa de acua frisca apustis chi no buffas de duas diis; e po su chi mi pertocat, candu ndi torrat unu pagheddeddu de friscura, e candu ndi torrat s'atonzu (chi est una stagioni chi mi praxit meda, ma meda de prus de s'istadi, e seu chistionendi mescamente po su tempus, est craru), intzandus mi intendu cumenti chi su sangui mi fessit torrendi a conca (cumenti narat su dìciu etotu), e mi intendu cumenti chi totus is energias mi fessint torrendi in cropus, e custu mi sucedit dònnia, dònnia annu, e mancu mali, mi megu a solu a solu, ca po immoi seu sèmpiri arrannèsciu a mi ndi scabulli de is dannus e de is trumentus chi mi donat sa basca in s'istadi, a su mancu fintzas a oi, e immoi eus a biri ita totu at a sucedi in su benidori, fadendi su contu ca is grandus dotoris chi sighint is previsionis de su tempus funt incumintzendi a narai ca s'istadi de su duamilla e bintiseti iat a podi essi ancora prus bascosa puru (e tocat a fai su contu ca apu lìgiu puru un articulu, pròpriu oi, chi naràt ca custu mesi de agustu chi si seus lassaus a is pabas est stètiu su pru bascosu, buddiu e callenti de sèmpiri). Ma po immoi est mellus a no nci pentzai. 

E duncas, eia, apu atacau, me in s'artìculu de custa cida, cun custa chistioni acapiada a su tempus chi est fadendi poita, mi parrit de podi narai custu, est stètia una de is legas de importu prus mannu, una de is chistionis chi sa genti teniat sèmpiri in buca (chi mi permiteis de imboddiai sa cosa, ddi naru diaici, manigendi custus fueddus, e gioghendi, duncas, a fai prus su poeta ca su giornalista sportivu) in custus ùrtimus duus mesis, e duncas, eia, de s'incumintzu de su mesi de treulas (chi no de sa fini de su mesi de lampadas etotu) fintzas a arribbai a custu fini de cida passau: e cust'annu eus fatu su giogu, puru, ddu tzerriu diaici, de fai su contu de is undadas de basca (eia, eus incumentzau a ddas tzerriai pròpriu diaici) chi si ndi funt arribbadas in pitzus (e chistionu mescamente de sa basca chi at fatu in s'isula cosa nosta), e calincunu nd'at contau cincu chi no ses; ma po mei at fatu basca po sessanta diis e prus puru, ca po su restu, nc'est pagu de contai, mi parrit mi parrit de podi narai diaici. 

E duncas, eia, immoi torrat a incumentzai unu de is perìodus prus drucis chi nci funt de si bivi, e po su lunis chi at a benni is previsionis de su tempus ant postu fintzas acua (cumenti si iat a podi narai, cumenti apu sèmpiri intèndiu narai de is bècius), est a narai, duncas, ca nci iat a podi essi puru sa possibbilidadi chi protzat unu pagheddeddu (e no iat a fai dannu, antzis; o po ddu narai mellus puru: ispereus ca no fetzat dannus, chi est, e si cumprendit beni, s'ùrtima cosa chi serbit in dì de oi). E duncas, eia, sa temperadura iat a depi essi prus frisca, mescamente po su chi pertocat su noti e su mengianeddu, e custu bollit narai ca eus a arrannèsci a dromiri unu pagheddeddu mellus (bastat pagu, a bortas, po essi, po si intendi prexaus); e duncas, eia, est cun su coru prenu de afroddiu chi seu prontu a torrai a atacai cun su trabballu cosa mia, chi est su de sighiri (e mi parrit bastanti craru puru) is partidas de is scuadras sardas chi currint me is campionaus pesaus de is de sa Federatzioni de su Giogu de su Càlciu e de is de sa Lega Natzionali de is Diletantis. 

E duncas, ainnantis de incumentzai a chistionai de partidas (mancai feti incumintzendi a castiai is calendarius de is campionaus, chi benint a essi una de is legas de importu prus mannus, tra totus is novas chi ndi bessint aforas in custu perìodu de s'annu, e si cumprendit beni, ca is tifosus e is personas chi si sighint, est a narai, is personas chi brintant in su giàssu de su Diàriu Sportivu, abarrant a totu dì a si domandai: "candu bessint is calendàrius"?) fadeus su contu de su tempus chi si seus lassaus a is pabas: e duncas, apustis de sa dì de su mesaustu (o mesuaustu, o mesuagustu puru, cumenti si narat innoi in Bidd'e Sorris), chi est cussa chi, chistionu po mei, abertu de prus dònnia, dònnia annu, poita est sa dì innoi incumentzat a si ponni in cabada s'istadi, ddi naru diaici, po su chi pertocat is temperaduras; a su mancu, diaici mi praxit a pentzai a sa cosa) seus arribbaus (e su tempus mi parrit chi si ndi siat bobau) a su de noi mesis de s'annu; e a castiai su tialu de calendàriu, iat a fai a narai, puru, ca po su chi pertocat sa primu fita (est a narai is primus dexi diis apitzus de trinta diis chi ddoi funt in totu de si scroxai, po ddu narai diaici, isperendi ca nesciunu de bosatrus tengiat calincuna cosa de murrungiai po is fueddus chi apu scerau de manigiai e de nci stichiri in sa frasia), su giogu, su trabballu est bellu ca fatu; e immoi no s'abarrat atru de fai ca s'arramangai is manigas e circai de si bivi, in sa manera mellus chi podeus, custus binti diis chi teneus aranti. 

E diaici apa a fai, cun su coru prenu de affròddiu, e circhendi de abarrai selenu, e de tenni passièntzia (e sa passièntzia serbit, pruschetotu, candu is cosas mancai no andant beni, e depis abertai ca is acuas torrint a essi bonas, po ddu narai, torra, a trassa de poeta, prus ca de giornalista sportivu). 
E duncas, megamu a si narai, eia, ca me is diis passadas is de sa Lega Natzionali de is Diletantis, impari a is de sa Federatzioni Italiana de su Giogu de su Càlciu, nd'ant bogau aforas sa lista de totus is partidas chi nc'ant a essi de custu fini de cida (est a narai, de su fini de cida de su trexi e de su catodixi), e fintzas a nc'arribbai a s'ùrtima giorronada ca, 'tendei 'tendei (e candu manìgiu custu fueddu, ca naràt sèmpiri sa bon'anima de mamma mia, intzandus est cumenti chi issa nd'arribbit a si setzi innoi, a su costau cosa mia, in s'interis chi seu trabballendi; e si iat a podi narai, diaici mi praxit a pentzai, a su mancu, ca custa siat una de is maghias prus manna chi ndi ingollu candu mi pongiu a scriri in sardu), immoi si ddu potzu narai, nd'at a arrui (e megu a chistionai, sèmpiri, de su campionau de sa Promotzioni) su binticincu de su mesi de abrili; e apustis, cumenti sucedit dònnia dònnia annu, nc'ant a essi is partidas finalis, est a narai cussas chi seus costumaus a tzerriai playoff e playout, a trassa de cumenti ddu narant is ingresus. 

E custu, duncas, ddu megu a narai po incumentzai a si ponni in su pratu sa lega, chi benit a essi tra is prus callentis (o tra is prus friscas, ca fortzis cratzat mellus puru, fadendi su contu de su tempus chi est fadendi e mescamente, duncas, de sa temperadura) tra cussas chi ndi funt bessidas in custas primu diis de su mesi de cabudanni. 
Ca de su restu, ddu scieis mellus de mei puru, po is antigus, po is personas chi mescamente trabballant sa terra, su mesi de cabudanni fiat (e in dì de oi est ancora) cussu innoi si fadiànt (e si faint) is contus de is terras chi nci fiant de prei (mescamente a trigu) e de is terras ca, invècias, andànt lassadas sbuidas, chi mi cumprendeis po su chi seu circhendi de si narai: e duncas, eia, su mesi de cabudanni fiat cussu chi fadiat torrai a partiri totus is trabballus chi ddoi fiant de fai me is campus, me is sartus. 

E po is giogadoris e po is allenadoris, intzandus, benit a essi giai giai sa pròpriu cosa: est a narai ca in su mesi de cabudanni, e mescamente cumenti ndi bessint aforas is calendàrius, incumentzaus a cumprendi cumenti at a essi cuncodrada sa stagioni, a su mancu po su chi pertocat is partidas de importu prus mannu, e puru po su chi pertocat is festas e is diis, is dominigus, innoi no nc'ant a essi partidas (chi ant a essi pagus meda, a narai sa beridadi) ma giai si potzu contai, poita mi seu acutu a castiai cumenti fiat cuncodrada sa cosa, ca cust'annu, 'tendei 'tendei, no nc'at a essi partidas su sabudu de PascaManna (cumenti est sucèdiu, invècias, me in custus ùrtimus tres-cuatru annus de sighiu), po totu su prexu chi ndi potzu tenni deu, fadendi su contu ca seu costumau a fai festa manna po sa Pascamanna, chi pròpriu si ddu depu narai, e duncas, eia, mi fait prexei meda a sciri giai ca apa a podi fai festa chentza de mi depi ponni strobbus, o problemas, e chentza de depi trumentai, duncas, avatu de is partidas. 

Ma chi pròpriu nci pentzu beni (e podeis abarrai segurus de su fatu ca nc'apu arrexonau meda apitzus de sa chistioni, in custas ùrtimas oras), mi parrit una cosa istramba meda, (o stramballada, cumenti si narat, cumenti apu intèndiu narai innoi in bidda mia etotu) custu de pentzai a sa fini de is giogus ainnantis chi is giogus siant partius, ma est su chi sucedit, mi megu a solu a solu, candu fais su contu de sa stagioni chi tenis aranti, candu fais is contus apitzus de sa stagioni de trabballus chi depis sighiri. 

E duncas, chi seis de acòrdiu cun mei, podeus andai a biri cumenti ant a andai is cosas. 
E duncas, eia, po su chi pertocat sa primu giorronada de su campionau de sa Promotzioni, e mescamente po su chi pertocat sa Lista A, intzandus, is partidas ant a torrai a incumentzai custu domìnigu, chi at a essi su catodixi, a is cuatru de su megama (s'ora de su sobi, cumenti dda tzerriant innoi in Bidd'e Sorris, fadendi su contu ca su megama est unu de is momentus innoi fait prus basca), e tra is partidas de importu prus mannu, ddoi est, custu est pagu ma est seguru, sa isfida tra is de s'Academia Sulcitana, chi ndi funt artziaus pròpriu cust'annu de sa Primu Categoria, e ant a giogai po sa primu borta in sa istoria cosa insoru (e megu a chistionai, mi parrit bastanti craru, de sa storia de s'assòtziu) in su campionau de sa Promotzioni, ca cumenti eis a sciri giai (e chi no ddu scieis, deu seu innoi po ddu spiegai puru a cussas personas chi no funt acapiadas a istrintu cun is chistionis chi pertocant su mundu de is giogadoris), est su segundu de importu prus mannu (a is pabas feti de cussu de s'Ecellenza) tra totus is torneus (manigiu custu fueddu, isperendi ca nesciunu tengiat cosa de murrungiai) chi si giogant innoi in s'isula stimada cosa nosta (ma sa pròpriu cosa ballit, est craru, po is atras regionis de s'Italia puru); e duncas, torrendi a nosu, is de s'Academia Sulcitana ant a depi giogai, in domu cosa insoru etotu, contras a is casteddaius de sa Ferrini, chi ndi funt cabaus pròpriu cust'annu, apustis de calincuna cosa cumenti a dexi stagionis, de sighiu, s'una avatu de s'atra, chi ant fatu in Ecellenza; e si cumprendit, is casteddaius de sa Ferrini funt tra cussus assòtzius ca ant a curri po ndi cassai su primu postu, ma no ant a essi is ùnicus, e mi parrit bastanti craru: at a tocai a biri, duncas, cumenti s'ant a cumportai, est a narai, mellus, ita nd'ant a bogai aforas, in custa stagioni, in custu campionau, is de su Sant'Aleni de Cuartu, chi ndi funt cabaus de categoria pròpriu impari a is de sa Ferrini etotu; e duncas, eia, sa primu partida de is cuartesus at a essi in domu de is de su Ceraxius, ma nc'est afroddiu mannu puru po sa primu partida de is de su Cus de Casteddu (e magaus a chistionai de sa scuadra pesada de is de s'Universidadi de Casteddu, ca giogat is partidas in domu in su campu de sa Duchessa), chi ant a depi arriciri sa visita de una de is scuadras chi ndi funt artziadas deretas deretas de sa Primu Categoria (fadendi su contu ca is de su Masainas ant bintu su campionau cosa insoru in sa stagioni de s'annu passau, e seus chistionendi de sa stagioni de su duamilla e binticincu – duamilla e bintises), e chistionaus de is de s'Atleticu de Masainas. Tra is scuadras novas, po su chi pertocat sa Lista A de su campionau de sa Promotzioni, agataus puru is de s'Antiochense, chi funt stètius piscaus torra (apustis chi ndi funt sparessias duas scuadras de sa lista de su campionau de s'Ecellenza, e megaus a chistionai de is de su Crabònia e de is de s'Olbia; e de sa cosa si nd'apu arremonau me is cidas passadas, chi si ddu arregodais, e chi no si ddu arregodais, deu seu innoi pròpriu po fai custu trabballu puru) po curri in su campionau de sa Promotzioni, e ant a tenni, custu est pagu ma est seguru, s'afroddiu a is isteddas, cumenti si narat, e sa pròpriu cosa at a balli no feti po is giogadoris e po s'allenadori, ma po is tifosus puru; e duncas, eia, is de s'Antiochense ant a depi andai a giogai a Casteddu, e po ddu narai mellus puru, in domu de is de su Vecchio Borgo Sant'Elia (sa scuadra pesada in Sant'Elia, chi est unu cuartieri chi ddoi est in citadi, e si cumprendit beni de su nomini, deu creu; ma chi nc'est calincunu chi no connoscit, chi no est praticu cun sa citadi de Casteddu, immoi s'apu narau custu puru); tra is scuadras chi s'annu passau funt arrannèscias a ndi pesai una cursa toga meda, e unu campionau de importu, agataus puru is de su Castiadas, ca in sa stagioni de su duamilla e binticincu – duamilla e bintises si funt agataus a curri, a si dda gherrai (cumenti si narat, mancai su fueddu "gherra" no mi praxiat diaici meda, chi pròpriu si ddu depu narai) po ndi cassai su primu postu, e custu fintzas a is ùrtimas giorronadas, e immoi, si cumprendit, nc'ant a torrai a provai cust'annu puru, in custu campionau. 

E custu, duncas, po su chi pertocat is partidas de sa primu giorronada, chi tenit sèmpiri unu sabori druci meda (druci cumenti a su tzucuru, si iat a podi narai diaici puru) a trassa de sa primu dì de iscola (po chini si dda arregodat...). 
E duncas, eia, custu est su tanti de novas chi si donu po incumentzai a fai is contus, po incumentzai a si fai una bidea apitzus de is partidas chi nc'ant a essi, chi s'ant a giogai in sa primu giorronada. 
Sa segunda giorronada, invècias, e megu a sighiri a chistionai sèmpiri de sa Lista A e de su campionau de sa Promotzioni, s'at a giogai su domìnigu avatu (e si naru custa cosa poita est de importu mannu, fadendi su contu ca nc'ant a essi giorronadas chi s'ant a giogai in sa dì de su sabudu; e difatis, e apustis nd'eus a chistionai mellus puru, su sabudu chi nd'at a arrui su dexennoi, e megaus a chistionai, est craru, sèmpiri de su mesi de cabudanni, nc'ant a essi is partidas po su chi pertocat sa segunda giorronada, ma po is scuadras de sa Lista B), chi nd'at a arrui su binti. 
E duncas, su sabudu avatu, chi nd'at a arrui su bintises (chi at a essi, tra is atras cosas, s'ùrtimu fini de cida po su chi pertocat su mesi de cabudanni), nc'at a essi sa de tres giorronadas po su chi pertocat sa Lista A: e tra is partidas prus togas, sighendi sa chistioni chi nd'apu bogau ainnantis, in custu artìculu etotu, nc'at a essi cussa, de importu mannu meda, tras is de s'Academia Sulcitana e is de s'Antiochense, ca po primu cosa (cumenti sucedit, de su restu, a totus is scuadras chi ndi artziant, friscas friscas, de una categoria prus bascia, cumenti iat a podi essi su campionau de sa Primu Categoria, in una prus arta, prus manna, cumenti est, de su restu su campionau de sa Promotzioni) nd'ant a depi cassai (ant a depi circai de ndi cassai, po ddu narai mellus puru) is puntus chi ant a serbiri, chi ant a balli po nci lompi a sa sarvesa. 
Toga meda, ndi seu giai seguru, at a essi puru sa partida tra is de su Cannonau de Jerzu e is de su Castiadas, cun is meris de domu chi ant a si fai balli, tra is atras cosas. cun s'atza chi tenint, in campu, is scuadras ollastrinas, chi funt nomendas pròpriu po su coru, po sa passioni, po totu sa gana chi nci ponint candu giogant (e sa cosa no ballit feti po is giogadoris, ma ballit, puru, po is tifosus: e si cumprendit beni, po sa scuadra de is aversàrius no benit a essi una cosa facili su de andai a giogai in unu campu prenu fintzas a cucuru de genti chi po noranta minudus, chi no calincuna cosa de prus puru, abarrat totu tzerria-tzerria). 

Sa de cuatru giorronadas de sa Lista A (e seu chistionendi, e si cumprendit, de is partidas chi ant a balli po su gironi de s'andada) s'at a giogai su cuatru de su mesi de ladamini: tra is isfidas prus togas e chi ant a essi prus spàssiosas, ndi seu giai seguru, potzu arremonai, giai de immoi, sa batalla tra is de s'Arbus (chi cust'annu nd'ant pesau una scuadra impari a is de su Gùspini, est a narai, duncas, ca de duus assòtzius nd'ant pesau feti unu) e is de su Vecchio Borgo Sant'Elia; de importu mannu at a essi (tra is atras, ca no megu a narai ca su restu de is partidas chi no acudu a s'arremonai intzandus siant de pagu importu o no ballant nudda, cumenti si narat) puru sa isfida tra is casteddaius de s'Atleticu e is de su Ceraxius. 

Is scuadras de sa Lista A de sa Promotzioni nd'ant a cabai torra in campu s'undixi de su mesi de ladàmini, chi at a essi sèmpiri de domìnigu, e sèmpiri de domìnigu, intzandus, s'at a giogai sa de ses giorronadas puru, candu eus a essi giai arribbaus a su dexiotu de su mesi de ladàmini (e a castiai su calendàriu, si parrit de curri meda cun su tempus, chi cumprendeis su chi seu circhendi de si narai). 

Sa de seti giorronadas, invècias, s'at a giogai de sabudu, est a narai su binticuatru de su mesi de ladàmini etotu, e sa nova de importu chi pertocat custa giorronada est, puru, ca is partidas ant a incumentzai a is tres de su megama (e no prus a is cuatru, cumenti sucedit invècias po is primus ses giorronadas), e custu bollit narai, intzandus, ca in cussu fini de cida at a cambiai s'orariu puru, cumenti seus costumaus a tzerriai sa cosa; est a narai ca nd'at a brintai s'oràriu de s'ierru (chi seus costumaus a tzerriai, puru, ora solari, po ndi furai sa trassa de s'italianu etotu), e duncas, eia, tanti po incumentzai, at a scurigai un'ora ainnantis de su chi fait me is mesis ainnantis, e pruschetotu chistionaus de is mesis de su beranu e de s'istadi. 
Ma torraus a nosu.
Sa de otu giorronadas, e seu chistionendi, est craru, sèmpiri de is partidas chi pertocant sa Lista A, s'at a giogai torra de domìnigu, sa primu dì de su mesi de donniasantu (eia, eis cumprèndiu beni: sa festa po totus is santus nd'at a arrui de domìnigu, e duncas chini trabballat nc'at a perdi, ddi naru diaici, una dì de vacantza, fadendi su contu ca at a essi dì de festa, ma nd'at a arrui comentecasiat de dominigu, chi est giai festa po contu sù, po ddu narai diaici, isperendi ca nesciunu de bosatrus tengiat calincuna cosa de murrungiai po cumenti apu cuncodrau sa frasia); sa de noi giorronadas puru s'at a giogai de dominigu, s'otu, cun sa partida tra is oristanesus de sa Tharros e is meris de domu de su Vecchio Borgo Sant'Elia chi parrit, giai de immoi, una de is prus togas e spàssiosas (ma apustis at a tocai a biri, e duncas eus a biri ita totu nd'at a bessiri aforas in campu); sa de dexi giorronadas po su chi pertocat sa Lista A at a essi su catodixi, e duncas, eia, de sabudu torra (po su de tres sabudus de sa stagioni, chi no seu fadendi mabi su contu, e mi parrit mi parrit de podi narai ca seu fadendi su contu cumenti si spetat, chentza de sballiai); sa de undixi giorronadas e sa de doxi giorronadas puru ant a arrui, torra, e totu e duas, de domìnigu (est a narai su bintiduus e su bintinoi de su mesi de donniasantu), e diaici eus a serrai (a fueddus si benit facili a curri de unu mesi a s'atru) su de undixi mesis de custu duamilla e bintises puru (e chi su de ddu scriri benit a essi facili meda, su de si ddu bivi, su de si ddu scroxai at a benni a essi meda ma meda prus tostau, e po mei su mesi de donniasantu est unu de is prus trumentosus, impari, fortzis, a su mesi de gennàrgiu, de martzu e de agustu). 

Po su chi pertocat su mesi de idas (e duncas, su mesi innoi nd'arribbant is festas de su Nadali) nc'ant a essi tres giorronadas: su ses, chi at a essi de domìnigu, su doxi, chi nd'at a arrui invècias de sabudu, e su binti, chi at a essi de domìnigu etotu, e at a essi, 'tendei 'tendei, s'ùrtima giorronada de s'annu, e duncas s'ùrtima giorronada de su duamilla e bintises, e s'ùrtima giorronada, puru, po su chi pertocat sa lista de partidas chi ant a balli po s'andada. 
E duncas, eia, is giogus, e intzandus is campionaus, in su duamilla e bintiseti ant a torrai a partiri su ses de su mesi de gennàrgiu (cumenti funt costumaus a fai giai de una bella pariga de annus, a narai sa beridadi), chi at a essi, ddu eis a sciri beni, e mellus de mei puru, sa dì de sa festa de sa Befana, cumenti dda tzerriaus; e duncas is partidas s'ant a giogai de mèrcuis, e a contus fatus, at a essi sa primu, e s'unica giorronada chi s'at a giogai aintru de sa cida, mancai siat una dì de festa. 
Sa segunda giorronada de sa torrada, po su chi pertocat sa Lista A, s'at a giogai torra de domìnigu, chi at a essi su dexi, cumenti s'at a giogai de domìnigu puru sa de tres giorronadas, e megu a chistionai sèmpiri po sa lista de partidas de sa torrada. 
Sa de cuatru giorronadas, invècias, nd'at a arrui de sabudu (est a narai ca is partidas s'ant a giogai de sabudu, chi si praxit mellus diaici po cumenti sonat), chi at a essi su bintitres, e apustis eus a biri ita at a sucedi in sa de cincu giorronadas de sa torrada, chi nd'at a arrui su trintunu (e no nci iat a podi essi manera mellus po serrai unu mesi longu e fadiosu cumenti est, a su mancu po mei, su mesi de gennàrgiu). 
Sa de ses giorronadas s'at a giogai torra de domìnigu, su seti de su mesi de friàrgiu, cumenti s'at a giogai de domìnigu puru sa de seti giorronadas de sa torrada; po su mesi de friàrgiu duncas, e po su chi pertocat sa Lista A de su campionau de sa Promotzioni, is partidas de sa de otu giorronadas ant a essi torra de sabudu, chi nd'at a arrui su binti; sa de noi giorronadas, invècias, s'at a giogai, torra, de domìnigu, chi at a essi su bintotu (eia, su mesi de friàrgiu intzandus s'at a serrai de domìnigu, cumenti su mesi de gennàrgiu etotu). 

Po su mesi de martzu, invècias, si potzu donai giai unu bellu tantixeddu (po ddu narai a trassa de cumenti fueddant innoi in Bidd'e Sorris) de novas de importu mannu meda: is partidas de is campionaus s'ant a giogai su seti, chi at a essi de dominìgu, cun is scuadras de sa Lista A de sa Promotzioni chi nd'ant a cabai in campu su sabudu avatu puru, chi at a essi su trexi; cun is giogus ca, 'tendei 'tendei, ant a torrai a incumentzai feti su cuatru de su mesi de abrili, po sa de doxi giorronadas; e custu poita nc'at a essi, cumenti a dònnia annu, su Trofeu de is Regionis, ca in su duamilla e bintiseti s'at a giogai, torra apustis de calincuna cosa cumenti a cuindixi annus, in Sardìnnia; e duncas, eia, is scuadras de sa Promotzioni no ant a cabai in campu nè in su fini de cida de su dexennoi e de su binti, e nemmancu in su fini de cida avatu, chi at a essi cussu de su bintiseti, poita at a essi sa Cida Santa e duncas, eia, su bintiseti at a essi sa dì de sa Pasca Manna, mancai, tocat a narai custu puru, me is ùrtimus tres – cuatru annus is scuadras de sa Promotzioni fiant costumadas a ndi cabai in campu su sabudu ainnantis de sa Pasca Manna puru (su sabudu santu, si iat a podi tzerriai diaici). 

E duncas, a fai is contus fadeus drabessi meda (acoitaus a totu coddu, po ddu narai a sa sorresa), e cun is contus seus arribbaus a is ùrtimas tres giorronadas, chi s'ant a giogai s'undixi, su dexiotu e su binticincu (cumenti s'apu giai narau) de su mesi de abrili. 

E immoi chi nci seus, andaus a castiai, puru, po su chi fait, po su chi acudeus a fai, candu s'ant a giogai is partidas chi ant a balli po sa Lista B, sèmpiri po su campionau de sa Promotzioni, andendi a castiai, giai, cali ant a essi is giorronadas chi s'ant a giogai, chi nd'ant a arrui de sabudu: e duncas sa segunda giorronada s'at a giogai su sabudu chi at a essi su dexennoi de su mesi de cabudanni, cun sa partida de importu mannu tra is de su Uddusò, chi ndi funt cabaus de su campionau de s'Ecellenza torra in cussu de sa Promotzioni apustis de feti duus annus, contras a is de su Monte Alma ca, invècias, ndi funt artziaus pròpriu cust'annu in su campionau de su Promotzioni, apustis de essi bintu, e beni puru, in sa cursa contras a is tattaresus de sa Lanteri, su campionau de sa Primu Categoria po su chi pertocat sa Lista D; e duncas, eus a biri ita nd'at a bessiri aforas tra duas de is scuadras chi, a su mancu castiendi is nominis de is giogadoris chi tenint in sa rosa, funt cussas chi tenint is cartas prus bonas po curri po su primu postu e, duncas, est craru, po sa bincida de su campionau; is atras partidas de importu mannu meda ant a essi cussa tra is de su Fonne (ca s'annu passau funt arribbaus, est a narai, mellus, ca ant serrau sa stagioni a su segundu postu in sa lista, a is pabas de is de su Macumere), chi ant a depi arriciri sa visita de is de s'Ozierese de Otieri, una de cussas scuadras chi, in sa stagioni passada (est a narai, cussa de su duamilla e binticincu – duamilla e bintises) ant fatu a biri is ispantus prus mannus, no feti a is tifosus cosa insoru (ca si funt fatu unu bellu spàssiu, cumenti si iat a podi narai), ma a is tifosus de totus is scuadras chi ant atobiau in su campionau. 

Po su chi pertocat su mesi de ladàmini, invècias, is scuadras de sa Lista B ant a cabai in campu su sabudu po sa de cincu giorronadas, chi nd'at a arrui su dexi: tra is partidas de importu prus mannu nci poneus torra cussa de su Fonne, chi at a depi giogai, in domu allena, contras a is de s'Altzaghèna, un'antra de cussas scuadras chi ant a circai de ndi artziai torra in Ecellenza, fadendi su contu ca is smeraldinus giogànt in su campionau de sa Sèrie D fintzas a una pariga de annus fait. 
E duncas, eia, po su chi pertocat su mesi de donniasantu, nc'at a essi un antru sabudu, prenu fintzas a cucuru de partidas, su seti, po sa de noi giorronadas de sa lista de s'andada; e po su chi pertocat su mesi de idas, is scuadras de sa lista B ant a tenni su sabudu totu po issus (ddi naru diaici) su cincu, est a narai, binti diis ainnantis de su Nadali (e feti chi nci pentzaus pagu pagu, mancai pagu pagu feti, no bieus s'ora chi nd'arribbit sa festa prus druci de totus, berus est?); po su chi pertocat su duamilla e bintiseti, invècias, is scuadras de sa Lista B chi ant a curri, est bastanti craru, in su campionau de sa Promotzioni, nd'ant a cabai in campu de sabudu su trinta de gennàrgiu (po sa de cincu giorronadas de sa torrada) e, apustis, torra a sa fini de su mesi de friargiu, e duncas, cun sa de noi giorronadas chi s'at a giogai su bintiseti (cun su mesi de friargiu chi, cumenti eis a sciri giai, s'at a serrai su bintotu, poita est su prus crutzu de totus), e invècias s'ùrtimu sabudu de giogus, tra is seti chi ddoi funt in su programma, in sa lista de partidas, nd'at a arrui su tres de su mesi de abrili, est a narai, duncas, sa cida avatu de sa Pasca Manna.




Attività realizzata col contributo della Regione Sardegna. IMPRENTAS 2025-2026. LR 22/2018 art. 22