Salta al contenuto principale
Campionati di calcio

In Trentino funt torradas a incumentzai is partidas de is diletantis, in Sèrie A invècias nd'artziat su numeru de is giogadoris apuntoraus

Mancant feti ses diis a sa fini de su mesi de Agustu, cun totus is scuadras de is diletantis chi funt torrendi in campu po is allenamentus, conca a su benidori e a sa stagioni chi at a benni, cussa de su duamilla e binti \ duamilla e bintunu. Is sotziedadis, in s'interis, funt sparendi is ùrtimus cropus in su mercau, cun d-unu ogu peròu sèmpiri apitzus a su contu de su numeru de is apuntoraus de su Coronavirus, chi in custas oras est torrendi a nd'artziai meda e pertocat puru, tra is atrus, una pariga de giogadoris de su Casteddu: seus chistionendi de Despodov, Bradaric, Ceppitelli e Cerri.

Pròpriu po custu, Gianni Nanni, chi est su dotori de is de su Bologna e unu de cussus chi sighit is fainas e is chistionis po contu puru de is de sa FIGC, scoviat in d'una ciaciarrada a sa radio: «Is timorias po s'incumintzu de su campionau nci funt, no dhas podeus cuai».
Agoa aciungit: «Chi su numeru de is apuntoraus me is scuadras de sa Sèrie A depessit artziai ancora, nc'at a podi essi s'arriscu chi is giogus potzant partiri prus a tradu de su chi totus bisaus. Est craru, totus seus isperendi chi is cosas potzant andai beni, ma obeus arrecumandai a totus is giogadoris, pruschetotu is prus giovanus, de aturai atentus in custa ùrtimas diis de vacanza».

In s'interis, ant a essi is de su Comitau Provinciali Autonomu de Trento a torrai a oberri is giogus po is diletantis in totu Italia, apustis de su lockdown chi, a mitadi de su mesi de Martzu, nd'at sciusciau totus is campionaus: su bintitres de su mesi de Agustu, difatis, funt incumentzadas is partidas chi pertocant sa Coppa Italia de Eccellenza; su ses de su mesi de Cabudanni, invècias, nc'at a essi sa primu bessida de su campionau nou. «S'Italia est castiendusì cun atentzioni — contat su presidenti de su CPA di Trento, Ettore Pellizzari —; nosu imoi depeus circai feti de partiri beni e cuncodrai totus is cosas cumenti si spetat».


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Campionato:
Argomenti:
Stagione:
2021/2022
Tags:
Coronavirus
ultimora