Salta al contenuto principale
coronavirus pallone fermo
Su presidenti de su Castiadas chistionat craru: «Nci funt fainas de importu mannu de sighiri imoi»

Is bisus de torrai a giogai si funt studendi; is fueddus de Piu parint bussinadas: «Nosu no nc'eus a essi, is atrus fetzant su chi bollint»

«A parri miu no ant a torrai a partiri. Deu ia a bolli feti cumprendi chi ndi sciusciant totu su campionau o chi pigant po bona sa lista po cumenti est imoi».

Custa est una chistioni chi nd'at bogau aforas unu piciocu chi giocat in su campionau de Seconda Categoria (s'intendeus fatu fatu po arrexonai apitzus de is novas chi nd'arribant apitzus de su Coronavirus): non serbit a fai su nomini, poita tanti est una bidea chi zumiat, ndi seus sigurus, in sa conca de medas atrus giogadoris. In dii de oi, podeus feti circai de cumprendi cumenti funt andendi is cosas, incumintzendi mancai de s'ùrtimu bessida de su presidenti de su Castiadas, Pierpaolo Piu, chi est stetiu craru meda:
«Chi calincunu at a detzidi de sighiri a giogai, nosu no nc'eus a essi, is atrus ant a fai cussu chi creint ca siat su mellus».

Piu ndi tenit po totus: «Nisciunu de nosu est stetiu ancora craculau de su Cumitau Regionali po sciri ita ndi pentzaus de totu custu dannu. Deu creu chi issus siant abetendi is detzisionis de sa Lega Natzionali Diletantis. In totu is modus, su campionau de Eccellenza no est de siguru a su primu postu me is pentzamentus cosa mia. Seu spantau de intendi totu custa genti chi trumentat po sarvai sa stagioni de sa bòcia. Chi fetzant puru cussu chi bollint: sciusciai totu? Totus primus? Totus urtimus? No est custa sa cosa de importu po mei, deu seu giai pentzendi a is cuatru-centu personas chi no ap a podi pigai a traballai e chi imoi arriscant de abarrai chentza dinai e chentza cussu chi tzerriant "sussidiu po su disimpreu"»

Agoa aciungit: «Sigu puru unu centru sportivu, ma cumenti potzu crei de torrai a oberri imoi? Calli est su giugi chi s'iat a pigai una responsabbillidadi diaici manna? Chi feti pentzu a is arregulas chi nc'ant a essi po cussu chi tzerriaus "buffet", po nd'arremonai unu, est craru ca chistionai de bòcia parit una brulla».

In questo articolo
Campionato:
Argomenti:
Stagione:
2019/2020
Tags:
Coronavirus