Is campionaus torrant a partiri custu domìnigu chi benit: in Promozione Crabonaxa e Biddaxidru ant a curri po su primu postu de sa lista

No si parit mancu berus, ma apustis de ses mesis de s'ùrtima partida de campionau, chi s'est giogada sa primu dii de su mesi de Martzu, is scuadras sardas diletantis de bòcia torrant in campu po incumentzai cun sa stagioni de su duamilla e binti \ duamilla e bintunu.

A nai sa beridadi, in su mesi de Cabudanni nci funt giai stetias duas bessidas ufficialis, chi ballint po sa Coppa Italia po is de s'Eccellenza e is de sa Promozione; de domìnigu chi benit, peròu, eus a torrai a biri puru is giogadoris de sa Primu Categoria e apustis, a partiri de su primu domìnigu de su mesi de Ladàmini, est a nai su cuatru, nc'at a essi prexiu e spassiu po is de sa Secunda Categoria puru.

Is trumentus e is pentzamentus acapiaus a su tiau de virus no funt sparessius: po is primus bessidas, difatis, no nc'ant a podi essi tifosus a castiai sa partida; no si cumprendit beni su motivu de custa decisioni, chi nd'arribat de is de su Guvernu, contedi chi po sa Coppa Italia is stadius fiant obetus.

Intzandus, si partiri su bintiseti, cun is giogus chi ant a sighiri, chenza si frimai nudha, fintzas a su trinta de su mesi de Idas, po torrai a partiri, in s'annu nou, su dexi de su mesi de Gennàrgiu.

Po su chi pertocat su campionau de Promozione, in su Girone A totus is luxis funt apitzus de is de su Biddaxidru, chi funt patus giai in saludi me is duas bessidas contras a is de su Gonnosfanadiga, e apitzus de is de su Crabonaxa de mister Nunzio Falco, chi in s'istadi ant pigau medas giogadoris fortis ma  ant giai perdiu sa primu partida de s'annu contras a is de su Tortolì, bessendi, diaici, aforas de sa cursa po sa copa. Pròpriu is ollastrinus sighius de mister Alberto Piras, chi domìnigu ant a depi andai a giogai in domu de su Ceriaxus, iant a podi essi su spantu. At a tocai a biri puru cumenti ant a andai is cosas po is de sa Tharros e po is de s'Arborea, chi no funt ancora cabadas in campu po sa Coppa Italia poita is biancus-arrubius de mister Tonio Madau fiant in corantena.

Po su chi pertocat su girone B, invècias, Tiesi, Istintinu e Lanteri funt is scuadras chi si d'ant a gherrai po su primu postu de sa lista, ma at a tocai a aturai atentus po biri su chi ant a cumbinai is de s'Usini, de su Bitzi e de Valledoria.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020