Salta al contenuto principale
Promozione
Is diletantis torra in campu su cincu de aprili o at a tocai abetai a su sabudu de Pasca Manna?

Coronavirus, is dudas de is giogadoris: campionaus firmus, fintzas a candu?

E intzandus, a cantu parit, tocat feti a abertai, no si podit fai atru, a nai sa beridadi, a su mancus fintzas a su tres de aprili; apustis s'at a biri ita at a sutzedi. In su fratempus, nc'at a essi de sighiri totus is consillus chi si proint apitzus e chi su Guvernu e su Ministru de sa Salludi s'acudint a si donai: de ariseu, difatis, totu s'Itallia, e duncas sa Sardìnnia puru, est una 'zona protetta', aici da tzerriant, po crupa de su Coronavirus, e imoi depeus sighiri is leis nobas: cussa chi parit de importu prus mannu obrigat sa genti a abarrai serrada aintru de is biddas e is citadis, chentza duncas podi bessiri, si no po andai a traballai, o po motivus de salludi, o atras cosas de importu. Po su restu, ballint is pròpriu arrègulas chi ant postu cun su Decreto Legge de su cincu de su mesi de martzu: abarrai atesu de unu metru, unu de s'atru, me is logus innoi nc'est atra genti, sciacuai is manus fatu fatu, circai de no s'atobiai in medas, circai de no si basai e no si imprassai, pruschetotu tra allenus, e chi po mabasorti si depessit carriai sa callentura prus arta de 37,5 tocat a tzerriai in pressi  a su dotori, ma chentza bandai a su “pronto soccorso”, po no ghetai a pari is cosas prus de cussu chi funt giai. Torrendi a is chistionis nostas, e duncas a su giogu de su calciu, no est craru, cun totu su budrellu chi nc'est in giru, cumenti ant a sighiri is cosas: nc'est puru chi timit chi is campionaus de is diletantis potzant abarrai frimus, est a nai chentza nisciunu chi bincit o perdit, chentza nisciuna scuadra chi ndi artziada in sa categoria prus arta o ndi cabada in cussa pru bascia; de su restu, cussu chi seus bivendi est una cosa noa po totus, e no nc'est de si spantai meda chi puru sa Lega Natzionale Diletanti no scidi ancora de calli pati si nci fuiai. No est craru, duncas, chi is giogus ant a torrai a partiri giai su domìnigu de su cincu de aprili, cun totus is scuadras e is giogadoris chi ant a essi peròu chentza allenamentus me is cambas. A custu puntu, Promozione, Prima Categoria e Seconda Categoria iant a podi giogai su sabudu de Pasca Manna, impari a s'Eccellenza, ma est ancora chitzi po ddu nau.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

 

In questo articolo
Campionato:
Argomenti:
Stagione:
2019/2020
Tags:
Promozione