Is de su Castiadas currint forti po essi prontus po su campionau ma po sa Coppa Italia funt giai aforas de is giogus

Mancant feti tres diis e sa stagioni de su duamilla e binti \ duamilla e bintunu de is scuadras sardas at a podi incumentzai cun is primus partidas de sa Coppa Italia: in campu is giogadoris de s'Eccellenza e de sa Promozione, cun is campionaus chi ant a torrai a partiri, invècias, s'ùrtimu domìnigu de su mesi de Cabudanni, est a nai su bintisetti: no parit berus, dhu podeus tzerriai a forti, apustis de unu de is annus prus marigosus chi podeus arregodai, no feti po su sport, est craru.

Sa Coppa Italia de Eccellenza perdit peròu giai un arrogu: seus chistionendi de su Castiadas, chi no at a curri impari a is atrus poita at incumentzau tradu cun is allenamentus, est a nai lunis passau. Is birdis-biancus ant biviu un istadi callenti e totu atrotoxada: in d-unu primu tempus nci funt stetias is dimissionis de su presidenti beciu, Pierpaolo Piu, cun Celestino Recupito chi at pigau in manu is crais de s'assotziu e, a luegus, at fatu totu cussu chi nci fiat de fai po iscriri sa scuadra in su campionau.

Apustis, nci fiat de scerai s'allenadori, cun Antonio Prastaro chi si nc'est ghetau, cun prexei e afrodhiu, in custa storia noba e imoi est trabballendi cun is piciocus chi faint parti de sa rosa.

Impari a su portieri Matteo Forzati, chi s'annu passau at giogau tra is paus de sa porta de su Lanusei, ma fiat in prèstidu e duncas est torrau a domu, cumenti si narat; a Nicola Manca, chi s'annu passau fiat in sa Nuorese, e a Musie Tesfai, s'unicu chi in su campionau de su duamilla e dexianoi \ duamilla e binti at giogau cun su Castiadas, cun noi gol in buciaca, arregotus in binti-tres bessidas, nci fiant puru totus is giogadoris nous: seus chistionendi de is centrucampistas Gianluca Rolandone, chi at fatu beni meda cun sa Nuorese duus annus fait, e Andrea Porcheddu, nasciu in su milli e noicentus noranta noi e cresciu, po su chi pertocat sa bòcia, in sa scuadra de su Castedhu, e cun d'una storia bella meda a is pabas, impari a is de s'Alzachena in Sèrie C.

In sa rosa de su Castiadas nd'arribant puru su fuori-quota Lorenzo Melis, chi est lompius fintzas a sa Sèrie A cun su Castedhu ma apustis s'est depiu frimai poita si fiat ingotu.
De Murèra, invècias, nd'arribant is giòvanus Mattia Zinzula e Mirco Zugliani.

In s'interis, is de su Castiadas funt circhendi atrus giogadoris de aciungi a sa rosa e ant a fai de totu po cassai is primus postus de sa lista in su campionau.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020