Salta al contenuto principale
arzachena
Is de s'Altzaghena tenint ses partidas giogadas, cuatru po Crabònia e Murera

At a essi unu mesi de Donniasantu tristu e cun pagu partidas: domìnigu chi benit torrant in campu is scuadras sardas de sa Sèrie D

Is controidas e is arrègulas cuncodradas de is de su Guvernu me is ùrtimus decretus, bessius aforas pròpriu in custas cidas, ant a balli a su mancu fintzas a su tres de su mesi de Idas: in medas peròu funt giai pentzendi a su chi nd'at a essi de sa dii de Paschixedha e duncas de is festas; sa timoria est cussa de no podi bessì nemancu po scioberai e comparai is arregallus. Chi fadeus beni is contus de cumenti est andendi a acabai custu duamilla e binti, legiu e marigosu, si nd'acataus allestru chi est stetiu (e at a essi) prus su tempus chi eus fatu tupaus in domu de cussu chi eus fatu in giru a si spassiai.
De su restu, nc'est pagu de si spantai: seus totus batallendi contras a cussa chi in italianu tzerriant "pandemia"e at a serbiri meda passièntzia, chistioni chi ballit, puru e pruschetotu, po su mundu de sa bòcia de is diletantis, fadendi su contu chi is de sa Sèrie A e de sa Sèrie B funt sighendi a andai ainnantis cun is giogus, impari a is de sa Sèrie C, chi tenint calincunu strobu in prus, e a is de sa Sèrie D, chi funt is prus ghetaus apari, a castiai beni is numerus.

Po is tifosus sardus est stetiu unu domìnigu sbuidu, chenza bòcia e chenza giogadoris a curri in campu, cun su Casteddu chi at giogau su sàbudu e totus is campioaus, de s'Eccellenza fintzas a sa Terza Categoria, chi abarrant studaus, cumenti scieus beni.

In cussa chi tzerriaus Sèrie C, is de s'Olbia funt abarraus frimus po sa secunda giorronada de sighiu: apustis de sa partida sartada contras a is de sa Lucchese, no nc'est stetiu nudda de fai nemancu po cussa contras a su Como, poita is lumbardus, in sa primu scuadra, teniant prus giogadoris apuntoraus de cussus sanus, che no arribànt mancu a trexi personas in totu. Sa partida contras a sa Lucchese s'at a recuperai mercuis chi benit, su dexiotu de su mesi de Donniasantu.

Po su chi pertocat su campionau de sa Sèrie D, invècias, is de sa LND ant detzidiu de recuperai is partidas chi funt sartadas in custus duus mesis, incumintzendi pròpriu de custu domìnigu passau, cun is scuadras sardas chi peròu funt abarradas a castiai e ant a cabai torra in campu su cuindixi e su bintiduus de custu mesi. De su bintinoi, invècias, su campionau de sa Sèrie D iat a podi andai ainnantis cun is atras giorronadas.

In questo articolo
Campionato:
Argomenti:
Stagione:
2020/2021
Tags:
Serie D