Salta al contenuto principale
cortoghianamacomerese
Is duas scuadras torra in campu su catodixi de martzu

Macumèrese e Usinese s'ant a giogai sa finalissima de Coppa Italia de Promozione

Funt serbidas atras duas partidas e, duncas, atrus noranta minudus, po connosci su nòmini de is duas scuadras chi su sàbudu catodixi de martzu chi at a benni s'ant atobiai po si gherrai sa Coppa Italia de Promozione, in sa finalissima. Seus chistionendi de sa Macumèrese de mister Massimiliano Mura e de s'Usinese de mister Giampiero Loriga: is primus nci funt arrannescius a allogai su gol fatu de Roberto Sini, in sa primu bessida de cuindixi diis faidi contras a su Atletico de Cortoghiana, cun sa partida chi s'est serrada chentza prexus, po zeru a zeru. Is piciocus sighius de Marco Farci funt abarraus in dexi omis in campu a pustis de s'espulsione boddita de su centrocampista Marco Marteddu, nasciu in su norantatres: po is arrubius-brau-biancus nc'ant provau Madeddu, cun dd-unu bellu corpu de conca, a su de dexiotu minudu, e in is ùrtimus segundus de giogu cun Foddi, chi nci fuiat aforas de sa porta sa bòcia chi podiat balli po sa bìncida. Sa Macumèrese peròu s'est fata balli, cun su portieri de su Cortoghiana, Galizia, chi est depiu bolai de una parti a s'atra po mantenni oberta sa partida fintzas a su de noranta minudu, ma is cosas no funt cambiadas. Prexu mannu invècias in domu de s'Usinese, chi po sa primu borta in custa istagione nc'est arrannescia a binci contras a s'Ilvamaddalena, cun dd-unu tres a zero foras de conca chi nd'at furriau su tres a duus bessiu in sa primu partida. Su primu gol nd'arribat a su de binticuatru minudu con Mascia, poi su gol de Saba, a duus minudus de s'acabu de su primu tempus. Torra in campu po su segundu tempus, nd'arribat su gol de Piredda. Po s'Usinese est una de is partidas prus togas giogadas cust'annu e is cosas iant'essi potzias andai meda mellus, po arremonai su pau pigau in prenu da Nuvoli e su portieri de s'Ilvamaddalena, Esposito, chi s'est fatu balli cun dd-una pariga de giogadas de campioni.

In questo articolo
Campionato:
Argomenti:
Stagione:
2019/2020
Tags:
Promozione
Coppa Italia