Mancant feti seti diis a s'incumintzu de sa "Fase 2": certus negotzius torrant a oberri, s'at a podi curri e passillai, ma no in cricca manna

Custa cida incumentzaus sa nosta passillada avatu de totu is nobas chi funt apillendi aforas me is urtimas oras fadendi su contu, po una borta, de cantu amancat a s'incumintzu de cussa chi tzerriant sa "Fase 2", chi, pighendi po bonus is fueddus de ariseu merì de su presidenti de su Guvernu, Giuseppe Conte, iat a depi partiri pròpiu lunis chi benit, su cuatru de su mesi de maju.

Po una borta, duncas, circaus de castiai ainnantis, apustis de unu mesi e mesu de "corantena" e de acorru in domu: is negòtzius e is atividadis chi ant a torrai a oberri is portas a sa genti ant a essi medas, una cosa de importu mannu po s'economia de sa Sardìnnia e de totu s'Italia; imoi nc'at a essi de fai is contus de is dannus chi nci funt stetius fintzas a oi, est a nai cantu dinai nc'eus perdiu in custas cincuanta diis.

Tra is atras cosas, a cantu parit, de su mesi ch'intrat eus a podi torrai a curri e a passillai a travessu, ma a solus, o in cumpangia feti de un'atra persona, aturendi atentus a abarrai atesu a su mancu de duus metrus s'unu cun s'atru.

Po su restu, su mundu de sa bòcia, ma ballit po is atrus sport puru, est pretziu in duus arrogus: de una parti nci funt is professionistas, de s'atra totus is atrus.

Is primus funt abetendi de cumprendi candu, e pruschetotu cumenti, torrai a partiri cun in allenamentus: s'atobiu chi nc'est setiu sa cida passada tra su ministru Vincenzo Spadafora, impari a totus is presidentis de is legas, no at donau totus is arrespustas chi mancai s'abetàstus.

Su Guvernu difatis depit ancora cumprendi, pruschetotu, cumenti arregulai is fainas: po totus is giogus chi si faint a solus (seus chistionendi, po nd'arremonai una pariga, de su tennis, de su nuòto, de is chi currint a cuaddu) no nci funt medas strobus; po cussus invècias chi faint sport impari a is atrus, est a nai in d-una scuadra, no si cumprendit beni cumenti ant a podi andai is cosas. Po imoi scieus feti chi a is sotziedadis at a tocai de sighiri, dii po dii, sa salludi de totus is pròprius tesseraus (e de totus cussus chi nci traballant in mesu) cun esamis e abberguadas: chi is cosas in sa batalla contras a su spaniamentu de su virus ant a sighiri a bandai beni, est cussu chi totus bisaus, is giogadoris de bòcia de sa Sèrie A (fortzis) ant a podi torrai a partiri cun is allenamentus su dexiotu de su mesi de Maju.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020