Sa Sardìnnia tra is dannus fatus de su tempus mau e is partidas de sa Sèrie D: su Latte Dolce cassat sa primu bìncida, su Lanusè arruit in domu

Su mesi de Donniasantu s'est serrau, e si dispraxit meda meda meda, cun is dannus fatus de totu s'acqua chi nd'est protzia de su cielu me is diis passadas, tra su cenàbara megama e su domìnigu: pentzaus, mescamente, a is cristianus de Bitzi, chi ant depiu fai is contus cun d'unu arrori mannu e legiu fatu de ludu, tronus, lampus e perdas, chi at fatu tres mortus e at ghetau apari domus e bias. Po oi, duncas, eus scerau de partiri cun is Novas de Diario de su mesi de Idas cun custu unconi marigosu meda: imprassaus a forti totu sa genti de sa bidha de Bitzi,  po su chi podit serbiri. E chi sa terra potzat essi lebia po is chi no funt prus in custu mundu.

Torraus duncas a chistionai de bòcia, chi est cussu chi prus pertocat custu giassu, incumintzendi de is partidas de is scuadras sardas de sa Sèrie D, chi funt cabadas in campu pròpriu s'atra dì.
Po sa de cincu giorronada, intzandus, is de su Latte Dolce ant bintu sa batalla contras a is lazialis de su Vis Artena, in domu cosa insoru, po duus a unu, gràtzias a is gol fatus de Kone: su primu est arribau apustis de otu minutus de giogu, in su secundu tempus; cussu chi invècias at arregalau is tres puntus a is tataresus sighius de mister Stefano Udassi est arribau a duus minutus de s'acabada de sa gara, agoa de su gol fatu de Sabatini, chi est balliu po s'unu a unu, po is meris de domu.

Nudha de fai, invècias, po is de su Lanusè, chi ant perdiu sa partida, chi ballit po su recùperu de sa de ses giorronada, contras a is strangius de su Latina, po unu a zeru, cun su gol de Di Renzo, a su de trexi minutu in su segundu tempus.
Nudha spassiu e nudha bòcia po is de su Murera, chi domìnigu passau depiant giogai contras a is de su Giugliano, chi nd'arribant de sa Campània: is grogus-brau, pròpriu cenàbara merì, candu fiant po artziai in sa navi po benni in Sardìnnia, ant scrobetu (e fatu sciri allestru) de tenni, in sa rosa de giogadoris, un apuntorau e duncas, cumenti narant is règulas, sa partida est sartada po sa secunda borta, apustis de sa primu, chi depiat essi su binticincu de su mesi de Ladàmini.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020