Salta al contenuto principale
arborea villamassargia
Cenabàra nc'at a essi un atru atobiu de su Consigliu Federali

Sa Sèrie A trigat a torrai a partiri, is diletantis ancora a su scuru: s'arriscu de sciusciai is giogus est sèmpiri prus mannu

A su cincu de su mesi de Maju, su mundu de sa bòcia est ancora firmu e nisciunus, a su mancu po imoi, scit cumenti ant a andai is cosas: is scuadras de sa Sèrie A (chi ant a essi is primas, est craru, a torrai a partiri cun is giogus) funt abetendi chi is dotoris de su "Cumitau Tecnicu Scientificu", e apustis is de su Guvernu, cun su ministru de su sport Vincenzo Spadafora in primu fila, torrint sa sceda apitzus de su chi tzerriant su "protocollo sanitario" (chi est stetiu arrexonau, scritu e propònniu de is dotoris de sa "Commissione Medica de sa FIGC"), est a nai totu is arregulas chi andant sighias po cumbati su spaniamentu de su Coronavirus e po permiti a is giogadoris de fai is allenamentus, totus impari, chenza tropus arriscus de s'apuntorai. Is diletantis, invècias, funt sèmpiri a su scuru.

Nc'est de nai puru chi de ariseu, su cuatru de su mesi de Maju, nc'est torra sa possibbilidadi, po totus, de fai fainas in sa ia (est a nai a curri a pei o in bicicreta, po nd'arremonai una pariga, o a passillai) o, innoi funt giai obetus, me is parcus.
Ma po cumprendi calincuna cosa in prus apitzus de is allenamentus in trumas pru mannas, eus a depi abetai a su mancu a su dexiotu de su mesi de Maju, candu at a bessì un atru "decreto legge" chi, est cussu chi bisaus, at a serbiri po crarire mellus is dudas.

In s'interis, custa cida, cenabara su otu de su mesi de Maju, nc'at a essi un atru atobiu de su "Consiglio Federale", chi parit giai de importu mannu meda: s'at a cumprendi, tra is atras cosas, candu e cumenti ant a podi torrai a partiri is giogus de sa Sèrie A e, a sighiri, totus is atrus, fintzas a arribai a sa Terza Categoria.

A nai sa beridadi, is campionaus de is diletantis depiànt acabai pròpriu in custa diis: est craru ca prus passat su tempus e prus at a essi traballosu torrai a giogai po is de su duamilla e dexianoi \ duamilla e binti, ma Gianni Cadoni sighit a contai a totus chi nci funt ancora isperas: de su restu, tocat a su Guvernu pigai e sciusciai is fainas, e feti candu su Guvernu at a pigai totus is detzisionis, intzàndus s'at a podi pentzai a cumenti cuncodrai is fainas e is listas po s'annu chi benit.

In questo articolo
Argomenti:
Stagione:
2019/2020
Tags:
Coronavirus