Salta al contenuto principale
villacidrese
Piras est s'allenadori nou de su Cortoghiana, Congiu torra cun su Biddaxidru

Is scuadras de sa Promozione penzant giai a s'annu chi benit: su Gonnosfanadiga sciusciat s'acapiu cun Incani; Firinu saludat s'Arborea

Su campionau de s'annu passau, dhu scieus beni, est acabau prima de s'ora, cun otu partidas, prus o mancu, ancora de giogai, chi funt sartadas po crupa de su virus: duncas sa genti tenit fami meda, naraus diaici, e afrodiu in cantidadi manna, de torrai a biri is scuadras in campu, batallendi e gherrendi po is tres puntus, e si cumprendit su poita.

In dii de oi no scieus ancora candu ant a torrai a partiri totus is fainas, ma nc'est giai chini chistionat de su mesi de Ladàmini: eus a biri ita ant a decidi cussus de sa Federatzione, po imoi peròu no podeus fai atru chi pentzai a su mercau, chi cumenti a dònnia annu imbuddidat s'istadi e su coru de totus is tifosus.
Chi est berus chi no s'intendint novas ne de cussus de s'Idolo de Arthana e ne de cussus de s'Ilvamaddalena, chi ant bintu su campionau de Promozione e funt arraxonendi cumenti cuncodrai is rosas po s'annu chi benit, nci funt atras scuadras chi funt traballendi, dii e noti, chentza si frimai nudda, po ndi ingolli is giogadoris e is allenadoris prus fortis.

Po su chi pertocat sa Promozione, duncas, arremonaus is de su Biddaxidru, chi ant scerau de torrai a partiri cun mister Matteo Congia, de tres annus s'allenadori de is biancus-asullus, chi at giai bintu su campionau de Primu Categoria.

Sèmpiri po sa Promozione, arribant novas de importu mannu puru de is de su Cortoghiana, chi saludant Marco Farci, apustis de duus annus togus meda, e scerant, a su postu suu, Fabio Piras, chi nd'arribat agoa de is esperièntzias cun Monteponi de Igrèsias e Cràbonia. Su presidenti de is arrubius-brau-biancus, Corrado Piras, serrat is chistionis po su difensori Nicola Boi, de su noranta-tres, chi at giai giogau in Eccellenza e in Promozione pròpriu cun sa maglia de is minerarius de su Cràbonia.

In domu de s'Arborea, invècias, acabat s'aventura po mister Maurizio Firinu, cun is oristanesus giai de ses annus; po imoi no connòsceus su nomini de s'allenadori chi at a pigai su postu cosa sua. Serraus sa lista cun su Gonnosfanadiga de su presidenti Vacca, chi nd'at sciuciau s'acapiu cun Renato Incani ma torrat a imprassai bomber Alex Tomasi, s'annu passau cun sa Tharros.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Campionato:
Argomenti:
Stagione:
2020/2021
Tags:
Promozione