Salta al contenuto principale
thiesi esultanza
Girone B: Ilvamaddalena e Thiesi si giogant su primu postu, sa Lanteri currit po is Play-Off

Su campionau torrat a partiri: s'Idolo arricit su Buddusò, Sant'Elena contras a sa Monteponi, su Gonnosfanadiga bollit binci cun su Seulo

In su campionau de Promozione mancant feti noranta minutus po s'acabu de sa prima parti de s'annu: si torrat a giogai dominigu, su cincu de su mesi de gennaxu.
At a toccai a biri, tra is attras cosas, cumenti staint is giogadoris, a pustis de is festas, cun totu cussu muntoni de cosa de papai e de cosa buffai chi no agiudat de sicuru a abarrai làngius.

In su Girone A, sa prima de sa lista Idolo, bintinoi puntus in buciaca, gràtzias a otu bìncidas e cincu paregius, arricit su Buddusò de mister Pische, chi in s'urtima bessida de s'annu bèciu nd'at arregotu tres puntus, a pustis de su quatru a unu scutu a faci a cussus de su Biddaxidru.
Po imoi, peròu, no nc'est una scuadra chi s'est fuia: su Sant'Elena, difatis, sighit cun duus puntus in prus pagu, bintiseti in totu, ma at pèrdiu giai tres bortas: is piciocus de Ravastini ant a circai de binci contras a sa Monteponi Iglesias, ma is arrùbius-brau no podint torra a imbruncuai poita sa conca de sa lista est atesu meda: giai trexi puntus. Su Gonnosfanadiga de mister Renato Incani, invècias, si dd'at a biri in domu contras a su Seulo: is campidanesus ant a fai de totu po ndi igolli atrus tres puntus, a pustis de sa bincida in Tonara, cun is biancu-birdis chi funt currendi a forti e funt tra is scuadras prus in salludi, poita no perdint una partida de su dexiaseti de su mesi de donniasantu.

In su Girone B currint totus avatu de s'Ilvamaddalena: Sergio Valenti, Genaro Vuanello, Salvatore Gallo, dexiotu gol in tres, e totus is atrus bolint abarrai in su primu postu de sa lista, cun sa partida in domu contras a sa Macomerese chi no at a essi una passilada, e cun su Thiesi chi abarrat apicigau, trintases puntus, unu feti prus pagu, e sighit a si dda gherrai: dominigu a su “Comunale” nd'arribat su Siniscola Montalbo, chi at a circai de ndi pinnigai a su mancu unu puntu po si stesiai de sa parti bascia de sa lista. Is tataresus de sa Lanteri funt is de tres in lista: is òminis de Robbi giogant in domu, cun cussus de Oscheri ma depint ghetai un'ogu a Valledoria, Usinese, Pasada e Logusantu chi currint po brintai me is play-off.

In questo articolo
Campionato:
Argomenti:
Stagione:
2019/2020
Tags:
Promozione