Zemanlandia: su giogu, sa sotziedade, su singulu

Zeman est un'òmine curiosu meda. Unu de cussos chi prima chi una idea de pallone tenet una idea de vida e de sotziedade e non dda càmbiat pro peruna resone. Pro ddu cumprèndere, e pro mi nde cumbìnchere de prus puru, mi sunt bastados pagos faeddos in sa Domenica Sportiva, in Rai 2, dumìniga note.

Calicunu at nadu: comente at a fàghere Montella sena de Cuadrado, Rossi e Gomez?

E isse at nadu. Ddi at àteros giogadores. Cussos puru sunt pagados pro giogare.

E Tardelli at nadu. Ma cussos tres sunt prus bravos.

E isse at torradu. No importat. Totus depent giogare, ca su chi importat est su giogu de s'iscuadra.

E Zazzaroni at nadu, ma cussos tenet prus calidade.

E isse torra. Ma non cheret nàrrere nudda. Si una sotziedade faghet una rosa cun 28 giogadores depent giogare totus.

E calicunu at nadu, ma cussos sunt sos prus fortes.

E isse torra, apo a èssere trevessu, ma no importat, ca sos àteros puru sunt pagados pro giogare, si nono diat a bastare a nde pagare 12 o 13 de giogadores.

E gasi ant sighidu, sena lòmpere a peruna solutzione.

Totu sos commentadores a un'ala e Zeman a s'àtera. Ma pro ite?

Ca in segus ddi at una idea de giogu, chi est finas una idea de sotziedade, de vida.

A un'ala sos chi ispetant chi su sìngulu nde boghet su cunillu dae su capeddu, a s'àtera, unu, Zeman, chi pensat chi prima de totu bi siant sos ischemas, s'iscuadra. In sa visione sua contat de prus unu chi respetet sas règulas, s'ischema, su mòdulu, chi unu giogadore bravu ma anàrchicu (Ibarbo pro nàrrere). Sos giogadores sunt bravos solu si sunt postos in una geometria in ue onni unu est parte de unu sistema de relatziones. Unu òmine, mancari de gabbale, postu foras de s'ischema, non balet, non contat. Pro cantu potzat inventare at a èssere semper casualidade. In Zemanlandia custu non podet acuntèssere. Su sistema suo est matemàticu e sa fantasia intrat in su binàriu de unu modellu. Su binu est prus bellu si ddu bufas in cussa tassa (sa sua) sena tassa o cun una tassa diversa, balet prus pagu.

E issaras, a ue chèrgio lòmpere? In una sotzedade in ue sa persona sìngula balet semper prus de su grupu, su modellu de Zeman diat a èssere profetosu in su mundu amatoriale, in ue su grupu balet prus de totu, in ue, ancora, bi podet èssere logu finas pro cussos chi, pro calicunu, diant a dèpere lassare semper logu a s'ispantu de una note.

Custu est su pallone, ma est finas sa vida. Zeman si dd'imparat. 

De Tore Cubeddu