Ammuntonada manna, cun su Calangianus cumandant finas s’Atletico Uri, Sant Teodoro e Latte Dolce

Totus paris a istichidura. Si calicunu pessaiat chi su campionadu de Eccellenza no esseret istadu echilibradu bastat a bìere sa classìfica chi, a pustis de 6 giornadas, tenet bator iscuadras a in antis. Su parègiu in su big-match intre La Palma e Calangianus at permìtidu a Atletico Uri, San Teodoro e Latte Dolce de sighire sos gadduresos a su primu postu cun sos casteddajos chi abarrant a duas longàrias dae sa truma chi cumandat. E si su Monastir perdet in Tàtari e sa Ferrini non faghet prus de unu pari in Tergu, sa bìnchida in Valledoria de su Ghilarza est su sinnale chi s’iscuadra aristanesa est pronta a torrare a cusire s’iscòrriu dae su cùcuru a tesu 4 longàrias. Su Tortolì binchet e cassat a su Castelsardo e su Taloro afundat a su Porto Corallo.