Arregodus: is de su Uddusò ndi torrant a artziai in Ecellenza passendi de sa porta manna

Chi si ddu arregodais, atacu diaici s'artìculu po custa cida, sa cida passada apu tentu s'ocasioni (e m'at fatu prexei meda, chi pròpriu si ddu depu narai) de si torrai a chistionai de cumenti funt andadas is cosas a is de su Lanusè, ca in sa Lista A de su campionau de sa Promotzioni funt arrannèscius, funt stètius bonus a ndi cassai su primu postu e, duncas, sa bìncida de su campionau e, duncas, s'artziada in su campionau de s'Ecellenza. Custa cida, duncas, sigheus a andai ainnantis in custu arrastu etotu, e custu bollit narai, pruschetotu, ca po s'artìculu chi ndi bessit in su segundu giòbia de su mesi de Lampadas (seus arribbaus a su doxi, sèmpiri chi su calendàriu no est contendumì brullas) eus a depi fai sa pròpriu cosa, su pròpriu trabballu chi eus fatu sa cida passada, ma po su chi pertocat sa Lista B (e seus chistionendi sèmpiri, est craru, de su campionau de sa Promotzioni, si cumprendit, berus est?), e duncas eus a depi chistionai de is de su Uddusò, chi ant serrau sa stagioni de su duamilla e binticuatru – duamilla e binticincu cun setantunu puntus in buciaca (e chi no funt pagus de seguru), chi ndi funt arribbaus gràtzias a bintunu partidas bintas e a otu partidas chi nd'ant serrau cun su resultau siddau in paridadi, cun cincu partidas pèrdias, otanta gol fatus, e trintases gol feti (feti po narai) ingotus. 

Fait a narai, immoi chi nci seus e immoi chi seus castiendi is numerus (e is numerus, est craru, s'agiudant a cumprendi mellus cumenti funt andadas is cosas po is scuadras chi ndi funt cabadas in campu po cussus otu-noi mesis de su campionau; si iat a podi narai, duncas, gioghendi unu pagheddeddu a fai is poetas, prus ca is giornalistas, ca is numerus, a sa fini, benint a essi su sprigu de sa stagioni, o de una partida. 
E no nc'eis a crei, ma in su mundu de sa bòcia, cumenti ddu seus connoscendi in custus ùrtimus tempus, in custus ùrtimus annus, nci funt personas ca, po trabballu, sighint pròpriu sa faina de andai a castiai totus is numerus chi ndi bessint aforas in una partida: est a nai, po si fai un esèmpiu, ca in dì de oi nci funt personas chi abarrant a fai su contu de cantus tirus sa scuadra arrannèscit a fai concas a sa porta de is aversàrius, e cantus tirus, mancai, intzertant sa porta e cantus tirus, invècias, nci bessint aforas de su campu, ma su pròpriu contu si iat a podi fai, e de su restu ddu faint, apitzus de is passagius, est a nai ca nc'est una persona, in s'assotziu, ca sighit sa faina de contai cantus passàgius giustus fait dònnia giogadori tra is undixi chi ddoi funt in campu, e cantus passàgius sballiaus puru, mi parit craru), ca is de su Uddusò in domu cosa insoru (est a narai, po ddu narai mellus puru) no ant pèrdiu nemmancu una partida, est a narai, duncas, ca ant bintu calincuna cosa cumenti a doxi partidas e po cincu bortas ant serrau sa gara cun su resultau siddau in paridadi, cumenti si iat a podi narai. E invècias, po su chi pertocat is partidas chi ant giogau atesu de domu, in domu allena, si iat a podi narai, mellus puru cumenti sonat su fueddu, mi parit de podi narai, ant bintu po noi bortas, ant serrau in paridadi tres partidas e ndi funt arrutus (est a nai ca nd'ant busacau una surra) po cincu bortas in totu. 
E chi pròpriu depeus abarrai innoi a gioghitai cun is numerus, chi pròpriu teneus sa gana de si strollicai cun is numerus (fadendi su contu, mescamente, ca in s'artìculu de custa cida, cumenti podeis cumprendi a solus, apu atacau acoitu e allestru cun is chistionis acapiadas a su mundu de sa bòcia, a is partidas e a is resultaus, chentza de nc'essi stichiu, ancora, a su mancu po immoi, nemmancu unu strollichimini, de cussus chi, po si cumprendi mellus a pari, tèngiu sèmpiri badda badda in conca), po du narai mellus puru, intzandus si potzu narai ca, eia, is de su Uddusò funt stètius bonus a ndi pesai coranta gol (e de seguru no funt pagus) me is partidas chi ant giogau in domu cosa insoru, e coranta gol (un antru tanti aguali, si iat a podi narai diaici puru, berus est?) me in totus is partidas chi ant giogau in domu allena. 

E duncas, si iat a podi narai ca po is de su Uddusò cussa de su duamilla e binticuatru – duamilla e binticincu est stètia una stagioni de oru, e fait prexei (deu creu custu, mancai deu no apa mai giogau a bòcia in una scuadra in custa vida, ma sèmpiri e feti in sa bia, impari a is cumpàngius de scola cosa mia) a totus, deu creu, candu is cosas ti andant beni, e ballit po dònnia gènia de faina, si cumprendit, e no feti po is partidas de bòcia. 

Ca candu fais beni su trabballu cosa tua, e candu is cosas de su trabballu cosa tua ti ndi bessint aforas in sa manera mellus chi nc'est, eia, intzandus nd'arribbat su prexu e s'afròddiu puru, ca funt duus tra is sentidus prus togus chi si podeus agatai aintru de su coru. 

E fortzis sa crai de sa vida etotu (s'apu narau immubagora chi no mi fia ancora strollicau, a su mancu po su chi pertocat s'artìculu de custa cida, ma cumenti podeis cumprendi a solus, e cumenti podeis lìgi, po incumentzai a mi strollicai a bortas mi bastat pagu, a bortas mi bastat feti unu fueddu, e is bideas incumentzant a ndi bessiri aforas de sa conca mia cumenti s'acua chi ndi bessit candu oberris su grifoni, po giogai a si fai un esèmpiu, a trassa de is poetas etotu) est cussa de podi bivi sentidus bellus, e drucis, cumenti su prexu e s'afròddiu, chi funt, mi fait prexei a ddus tzerriai diaici, is sentidus prus saborius (ddi naru diaici, chi mi permiteis de manigiai custu fueddu) tra totus cussus chi podeus provai in custa vida; ma peròu si nd'estus a depi arregodai ca su chi ballit in dì de oi iat a no podi balli po s'incras; est a narai ca mancai oi ses prexau cumenti a una Pasca, cumenti si narat, ma mancai s'incras ses totu disisperau; o, ballit aguali, oi t'agatas e t'intendis motu de su disprexei e de is daboris, ca giai giai ti benit de pentzai ca no nci dda as a fai mai a ti torrai a ti strantaxai, e invècias sa dì apustis, mancai chentza daboris, ses torra cun su coru prenu de isperas bonas. 

E in su giogu de sa bòcia custa cosa ballit sèmpiri: candu bincis is partidas, est su chi is allenadoris mi torrant a contai fatu fatu, a su mancu, ti intendis su prus forti de su mundu (o de su campionau cosa tua, si cumprendit, berus est?) ma iast a depi abarrai cun is peis prantaus in sa terra, cumenti si narat, a trassa de su dìciu in italianu etotu; e sa pròpriu cosa iat a podi balli (cumenti ballit, de su restu) po is tempus lègius, est a narai po totus cussus momentus innoi is cosas ti andand mabi, e no beni (o, mancai, peus meda de su chi ti podiast abertai); e duncas, su chi mi arrapitu fatu fatu (chi no sèmpiri) est ca candu is cosas si andant mabi estus a depi circai de no perdi sa passièntzia, e pruschetotu sa fidùtzia apitzus de tui etotu, sa fidùtzia apitzus de su chi sciis fai e arrannèscis a fai. 

E duncas, torrendi a nosu, e torrendi duncas a su campionau chi nd'ant pesau is de su Uddusò, si iat a podi cumprendi cantu funt sètius fortis chi andaus a castiai cumenti funt acabbadas is cosas po su chi pertocat sa lista: de is de su Uddusò s'apu narau giai totu, partendi de su fatu ca funt stètius bonus a ndi cassai su primu postu, ma chi tui bolis cumprendi cantu est stètia forti una scuadra, intzandus depis andai a castiai, puru e mescamente, cumenti si funt cumportadas is atras scuadras, is scuadras de is aversàrius. 
E nosu podeus incumentzai andendi a castiai ita totu funt stètius bonus a ndi pesai is de s'Usinese, chi ant serrau sa stagioni a su segundu postu de sa lista, cun sessantotu puntus in totu (chi no funt pagus de seguru, e gei si cumprendit, deu creu), chi funt (a fai is contus nci poneus bastanti pagu) tres in mancu de is chi nd'ant cassau is primus de sa lista. E tocat a narai puru ca, cumenti a dònnia annu (e sa cosa a narai sa beridadi andat ainnantis de una bella parighedda de annus) ca is de s'Usinese po cust'annu ndi iant pesau, iant cuncodrau una rosa forti meda, cun sa bidea, cun sa ispera de ndi cassai s'artziada in su campionau de s'Ecellenza, ma a sa fini funt dèpius abarrai (e mi dispraxit meda po issus, e si cumprendit, ca chi fessit po mei, ca po trabballu fatzu su giornalista, ia a fai a binci totus is scuadras chi currint in su campionau, ma si ndi rendeis contu a solus ca no est possibbili, mancai a mei mi iat a praxi meda, si ddu torru a narai) a buca asciuta puru po su chi pertocat sa stagioni de su duamilla e binticuatru – duamilla e binticincu, ca est cussa de cust'annu, mi parit bastanti craru: e immoi nc'est de crei ca is de s'Usinese nc'ant a torrai a provai ma in sa stagioni de s'annu chi at a benni. 
Ca sa cosa prus toga, o mellus, una de is cosas prus togas de su giogu de su càlciu, est ca tui tenis sèmpiri un antra ocasioni po ti fai balli, o po circai de cuncodrai mellus is cosas prus de su chi ses arrannèsciu a fai fintzas a cussu momentu. E duncas, eia, nc'eis a podi scumiti, ca is de s'Usinese ant a torrai a partiri, me in su campionau de su duamilla e binticincu – duamilla e bintises (e chi at a torrai a partiri, cumenti a sèmpiri, cumenti a dònnia, dònnia annu, a sa metadi de su mesi de Cabudanni), cun sa bidea de ndi cassai su primu postu de sa lista, fadendi su contu, immoi chi nci seus, ca cust'annu nci fiant giai giai po arrannèsci, fadendi su contu ca funt stètius bonus a binci calincuna cosa cumenti a binti partidas in totu, apitzus de trintacuatru bessidas, e fait a narai ca is de s'Usinese ant bintu una partida in mancu de su chi ant fatu is de su Uddusò; poita, po su restu, ant serrau po otu bortas, po otu partidas, po ddu narai mellus puru, cun su resultau siddau in paridadi, chi funt stètias, tra is atras cosas, su pròpriu numeru de partidas chi ant serrau in paridadi is de su Uddusò. 

E custu bollit narai, duncas, ca is de s'Usinese ant pèrdiu una partida in prus (est a narai ses contras a is cincus chi ant pèrdiu is de su Uddusò). E podeus sighiri a andai ainanntis in cust'arrastu etotu (chi no si dispraxit tropu, e de su restu, a su mancu po custa cida, a su mancu po custu artìculu, a su mancu fintzas a oi, no eis a podi narai ca no s'apu chistionau de bòcias, de numerus e de resultaus de partidas, ma custu no bollit narai, peròu, ca in totus is rigas chi nc'amancant po serrai s'artìculu de custa cida no nci iant a podi brintai, puru, una parighedda de cussus strollichiminis chi tèngiu sèmpiri badda badda in conca), andendi a castiai cumenti funt andadas is cosas po is de su Coghinas, chi funt stètius sighius, po totu sa stagioni, de un allenadori bravu, forti e sèriu puru cumenti est Pauleddu Congiu. 
E duncas, eia, is de su Coghinas funt stètius bonus a serrai sa stagioni a su de tres postus in sa lista, cun sessantaseti puntus allogaus in buciaca, chi ndi funt arribbaus gràtzias a binti partidas bintas, chi funt su pròpriu tanti de is partidas chi ant bintu is de s'Usinese, e chi eus arremonau ainnantis etotu, ma a sa faini nd'ant pèrdiu seti (chi funt una in prus, est a narai seti contras a ses, de is chi ant pèrdiu is de s'Usinese) e nd'ant serrau atras seti cun su resultau siddau in paridadi. E si podit narai, duncas, ca is de s'Usinese e is de su Coghinas ant donau de fai a is de su Uddusò; est a nai ca sa scuadra sighida de Ferruciu Terrosu no fiat currendi a sola po ndi cassai su primu postu de sa lista, e duncas, cumenti si narat fatu fatu, in campu ddoi andant e ndi cabant puru is aversàrius, e nesciunu t'arregalat nudda, cumenti m'arrapitint fatu fatu meda is allenadoris etotu. 

E custu bollit narai, pruschetotu, ca in su mundu de sa bòcia, chi bolis binci, depis sudai, e meda puru, e fadiai po otu-noi mesis de sighiu, mancai tui siast unu giogadori diletanti e duncas unu giogadori chi fait su chi fait (est a narai ca ndi cabat in campu) feti po su spàssiu chi ndi tenit de giogai is partidas, e no, de seguru (custu est pagu ma seguru, si iat a podi narai diaici puru, e mi praxit meda, ma meda, cumenti sonat sa cosa) po ti ponni in busciaca una barca manna de dinai, cumenti capitat (e biaus issus, s'at a megai calincunu de bosatrus) a is grandus campionis chi currint, mancai, me is campionaus de sa Sèrie A e de sa Sèrie B, chi funt is duus campionaus prus mannus chi teneus in dì de oi in Italia, tra cussus pesaus, est craru, de is de sa Federatzioni Italiana de su Giogu de su Càlciu. 

Ma si iat a podi narai puru, immoi chi nci seu (diaici mi strollicu unu pagheddeddu impari a bosatrus, ma feti unu pagheddeddu, ca no ia a bolli arribbai a si ndi furai su tempus chi mancai nemmancu teneis), ca in su mundu de is diletantis puru serbit unu bellu tantixeddu de dinai, de arriabis (po manigiai unu fueddu chi apu sèmpiri intèndiu in bidda mia, chi est Bidd'e Sorris, in su Campidanu de mesu), po ndi pesai is scuadras, po ddas cuncodrai beni, cun totus is giogadoris prus forti (e gei si cumprendit, berus est?) chi nci funt in dì de oi in s'isula; e si naru custu po si fai a cumprendi ca, eia, mancai nosu chistionaus de diletantis, e duncas de is campionaus de diletantis, in custu mundu puru, innoi su spàssiu e su spreviu benint a essi is cosas de importu prus mannu, o a su mancu, iant a depi essi is cosas de importu prus mannu, serbint sacrifìcius, ddus tzerriant e ddus tzerriaus diaici, de parti de is dirigentis de is assòtzius, chi si depint ponni is manus in busciaca, cumenti si narat, po circai de cunvinci a giogai po s'assòtziu cosa insoru is giogadoris prus bravus, prus abbilis chi nci funt. 

E torrendi a nosu, a su de cuatru postus in sa lista agataus is de su Logusantu, sighius de un allenadori bravu e forti cumenti est Tony Madeddu: e medas bortas podit sucedi, cumenti sucedit, de su restu, ca una scuadra cuncodrit sa rosa cosa sua cun sa bidea in conca de ndi cassai, mancai, sa sarvesa, e a sa fini invècias s'agatat a curri po ndi cassai su primu postu de sa lista. Is de su Logusantu, duncas, funt partius cun a bidea de ndi cassai sa sarvesa chentza de si bivi tropus trumentus (chi nci pentzais, de su restu, est su chi estus a bolli totus po is vidas cosa nosta: est a narai una vida chentza de trumentus e de daboris, feti cun prexus e satisfatzionis, ma is cosas no andant mai diaici beni, e mi dispraxit a si ddu narai, puru, ca nc'est sèmpiri unu stiddiu de dabori chi depeus inguti, in custa vida) ma a sa fini ant serrau sa stagioni cun sessantaseti puntus in busciaca (e chi funt, de su restu, su pròpriu tanti de puntus chi nd'ant cassau is de su Coghinas, chi s'apu arremonau pròpriu immubagora), cun binti partidas bintas (su pròpriu tanti de is partidas chi ant bintu is de su Coghinas e is de s'Usinese puru, chi apu arremonau ainnantis, pròpriu immubagora) e seti partidas chi ant serrau in paridadi, e seti partidas pèrdias. 

Is numerus de is de su Logusantu, duncas, funt agualis (tènticus, si iat a podi narai po manigiai unu fueddu chi apu sèmpiri intèndiu narai a sa bon'anima de sa tzia de sa bon'anima de mamma mia, e serru cun una rima puru!) a is chi nd'ant pesau is de su Coghinas, ma a sa fini a is partidas finalis (cussas chi tzerriaus, a sa moda de is ingresus etotu, play-off) nci funt andaus is de su Coghinas, e custu poita is piciocus sighius de Paulu Congiu funt stètius bonus a binci totu e duas is partidas chi ant giogau contras a is de su Logusantu, sa primu partida, e si ddu naru po essi pretzisu, chi at obertu sa stagioni de su duamilla e binticuatru – duamilla e binticincu, cun su resultau togu meda de tres a zeru, e sa segunda, in domu allena, est a narai, duncas, in domu de is de su Logusantu, cun su resultau de cuatru a duus). 

E torrendi a sa chistioni de is scuadras prus fortis chi ddoi fiant cust'annu in su campionau de sa Promotzioni, po su chi pertocat sa Lista B, no si ndi podeus scaresci, custu est pagu ma seguru, nè de is de su Bonorva e nè, mescamente, de is de s'Altzaghena. 
E duncas, is segundus ndi funt partius cun totus is cartas bonas (cun totus is cartas in regula, si iat a podi narai diaici puru, a trassa de cumenti si narat in italianu etotu) po ndi cassai sa bìncida de su campionau, ma a sa fini po binci is partidas e duncas is campionaus serbit puru unu stìddiu, unu tzicheddu de bona sorti, e si podit narai, duncas, ca is de s'Altzaghena no funt stètius diaici fortunaus, mancai siant arrannèscius a ndi cassai calincuna cosa cumenti a sexi partidas bintas, cun dexi partidas chi si funt serradas cun su resultau siddau in paridadi e otu partidas, invècias, chi si funt serradas cun unu resultau lègiu, est a nai, eia, gei si seus cumprèndius deu creu, ca po otu partidas funt abarraus a buca asciuta. 

Is de su Bonorva puru funt una de cussas scuadras chi funt circhendi, e sa cosa andat ainanntis giai de una bella pariga de annus, de ndi cassai s'artziada in su campionau de s'Ecellenza: cust'annu, si ddu naru immoi chi nci seu, ant scerau de donai is crais de sa rosa a un allenadori giòvuneddu, ma forti e bravu meda, cumenti est Micheli Pulina, e nd'ant pesau una scuadra noba, partendi de zeru, chi cumprendeis su chi si bollu narai: est a nai ca nd'ant torrau a pesai sa rosa de bellu e nou, e is cosas ddis fiant andendi beni puru, chi fadeus su contu ca funt arrannèscius a binci calincuna cosa cumenti a dexiotu partidas, e nc'est stètiu unu momentu innoi is de su Bonorva s'agatànt, puru, me is primus postus de sa lista, ma a sa fini ant acabbau sa stagioni a su de cincu postus in sa lista, ma si cumprendit puru ca is de su Bonorva nc'ant a torrai sa stagioni chi at a benni (e chi at a essi cussa de su duamilla e binticincu – duamilla e bintises, gei si cumprendit beni, berus est?), ca sa cosa prus toga de su giogu de sa bòcia (una de is cosas prus togas) est cussa ca ti donat sa possibbilidadi de nci torrai a provai, de bellu e nou, sa stagioni apustis, cumenti s'apu giai arremonau, de su restu.
Cumenti sa vida ti donat sa possibbilidadi, dì po dì, de podi fai mellus is cosas chi, mancai, sa dì ainnantis ti funt bessidas unu pagheddeddu a trotas. 

Ma torraus duncas a is chistionis acapiadas a is de su Uddusò, ca po ndi cassai su primu postu de sa lista, e si cumprendit, ant dèpiu sudai e fadiai, ma meda, e no feti me is trintacuatru partidas chi ant dèpiu giogai cust'annu (a trassa de is scuadras aversàrias etotu, e gei si cumprendit), ma aintru de sa cida puru, po is allenamentus, chi funt sa parti prus trumentosa de totu su giogu. 
Ca eia, in su giogu de sa bòcia, mancai tui ndi cabist in campu feti po su spàssiu chi nd'arricis, feti po ti spreviai unu pagheddeddu apustis chi serras is fainas cosa tua acapiadas a su trabballu o a su studiu, nc'est de fadiai, de sudai, de trumentai, mancai feti po is allenamentus, ca si cumprendit, no funt lìgerus de seguru. 
Antzis, prus andas ainnantis, e prus giogas in categorias mannas (po ddu narai mellus puru) e prus is allenamentus si faint tostaus, chi cumprendeis su chi si bollu narai. 

E duncas, immoi chi seu lòmpiu a custu puntu de s'artìculu, andu a si torrai a contai (diaici, mancai, arrannèsceus a nd'arraxonai impari puru, ca su de arraxonai impari a is personas est una de is cosas chi mi praxit a fai de prus in custa vida, fintzas a m'amachiai, mancai mi iat a praxi a arraxonai e a mi strollicai impari a bosatrus de milli chistionis, e invècias, po su prus, mi depu acuntentai, acuntentai po modu de narai, de ciaciarrai e de arraxonai cun bosatrus feti de is chistionis chi pertocant, chi nd'arribbant de su mundu de sa bòcia de is diletantis sardus. E no megu, no bollu spudai in su pratu innoi seu papendi, cumenti si narat, ma antzis, torru gràtzias a su Cielu, immoi chi nci seu, e no est de seguru sa primu borta chi ddu fatzu, in totus custus annus, po tenni unu trabballu diaici bonu cumenti custu chi megu a sighiri de calincuna cosa cumenti a cuindixi annus e chi, si cumprendit, no funt pagus de seguru) totu su chi m'at contau Ferruciu Terrosu s'ùrtima borta chi si seus intèndius po ndi pesai una ciaciarrada impari; e duncas, po essi prus prètzisu puru, si potzu narai ca apu intèndiu a Terrosu su martis de s'otu de su mesi de Abrili, candu ammancant duncas feti dexi diis a sa Pasca Manna e is de su Uddusò fiant giai giai po ndi serrai is chistionis apicadas a sa cursa po su primu postu de sa lista. 
E duncas, eia, a is de su Uddusò, fadendi su contu de cumenti fiant cuncodradas is cosas me in sa lista, ddis ammancàt feti unu puntixeddu (unu puntixeddu feti, si iat a podi narai mancai diaici puru, gioghendi a fai unu pagheddeddu su poeta) po ndi torrai in su campionau de s'Ecellenza apustis de calincuna cosa cumenti a bintiduus annus de s'ùrtima borta, e no funt pagus de seguru. Is de su Uddusò, duncas, fait a narai acoitu custu puru, immoi chi nci seus, funt stètius bonus a ndi cassai duus campionaus bintus (est a narai ca, eia, funt arrannèscius a binci duus campionaus de sighiu, s'unu avatu de s'atru, in custus ùrtimus duus annus), su primu fiat cussu de sa Primu Categoria, in s'annu de giogus de su duamilla e bintitres – duamilla e binticuatru; e su segundu cust'annu etotu, in su campionau de su duamilla e binticuatru – duamilla e binticincu, ca diaderus nc'est pagu de si perdi, e pagu puru de si cunfùndiri, cumenti si iat a podi narai), e duncas, eia, cust'annu fiant una matricula, cumenti si narat a trassa de s'italianu etotu (e cun su fueddu matricula tzerriaus, mancai, is personas chi s'agatant po sa primu borta in una classi a iscola, o fintzas in su postu de su trabballu. E si cumprendit, candu unu piciocheddu atacat cun is iscolas medias, o cun is iscolas superioris, intzandus su primu annu benit a essi una matricula, e custu po si cumprendi mellus, cun un esèmpiu, e no seu narendu ca seis tontus e ca a solus no arrannèsceis a cumprendi is cosas, antzis, ma circu de fai su trabballu cosa mia in sa manera mellus chi arrannèsciu, in sa manera mellus chi potzu, in sa manera prus pretzisa, duncas). 

E duncas, eia, mancai is de su Uddusò siant artziaus in su mundu de sa Promotzioni feti de un annu, apustis de essi bintu su campionau de sa Primu Categoria, no si funt fatus pigai de sa bregùngia, o de is timorias, cumenti si iat a podi narai, ma antzis funt stètius bonus a si lassai a is pabas totus is scuadras de is aversàrius, e eus giai tentu su modu de chistionai de is aversàrisu, ca de seguru no fiant is ùrtimus arribbaus, cumenti si iat a podi narai. E duncas, est de duus annus, a fai is contus (e a fai beni is contus nci poneus pagu, mesu segundu in totu, cumenti mi praxit a narai, po brullai unu pagheddeddu impari a bosatrus), ca is de su Uddusò funt regalendi prexus mannus (mannus cumenti unu monti, o mannus cumenti a su mari, chi si praxit de prus cumenti sonat custu esèmpiu) a totus is tifosus cosa insoru, fadendi su contu ca fiant arrannèscius a serrai su campionau de sa Primu Categoria (si ddu torru a narai: fiat s'annu, sa stagioni de su duamilla e bintitres – duamilla e binticuatru) cun bintotu partidas bintas apitzus de calincuna cosa cumenti a trintaduas bessida, cun feti duas partidas pèrdias. 

E duncas, apu intèndiu (apu tentu s'ocasioni po ciaciarrai cun issu, chi si praxit de prus cumenti sonat) a Ferruciu Terrosu una pariga de diis ainnantis de giogai sa partida, de importu mannu meda, contras a is de su Logusantu; e a is de su Uddusò, po serrai sa cursa concas a su primu postu e, duncas, po binci su campionau, ddis bastat feti unu puntixeddu. E duncas, Terrosu mi iat contau ca sa partida contras a is de su Logusantu fiat una de cussas de importu prus mannu po cust'annu, a su mancu, fadendi su contu ca si dda depiant biri contras a una de is scuadras prus fortis, e nd'eus giai chistionau de sa cosa, chi est arrannèscia a curri a forti meda, mancai, fortzis, prus a forti de su chi pentzànt de fai a s'incumintzu de sa stagioni; e de su restu, in domu de is de su Logusantu is giogadoris fortis no ammancànt de seguru. E duncas, candu depis giogai contras a una scuadra diaici forti, depis circai de ti cuncodrai in sa manera mellus chi podis aintru de sa cida, po is allenamentus. Ma una scuadra chi bolit binci su campionau e, duncas, chi una scuadra bolit, diaderus, si lassai a is pabas totus is aversàrius, intzandus si depit allenai dònnia, dònnia cida cun totu sa gana bella chi s'agatat in su coru, fadendi su contu ca po binci unu campionau tocat a binci su numeru prus mannu de partidas, e is partidas prus dificilis a bortas benint a essi pròpriu cussas cun is scuadras chi s'agatant me is ùrtimus postus de sa lista (custu a su mancu est su chi apu imperau in totus custus annus chi seu fadendi su trabballu de su giornalista sportivu, cumenti si iat a podi tzerriai, a trassa de s'italianu etotu); e duncas, eia, sa crai po binci unu campionau benit a essi cussa de trabballai, dònnia dì de sa cida, cumenti chi depessist giogai una partida finali de importu mannu, contras, mancai, a sa scuadra prus forti de su mundu; ca no iast a depi abarrai ingunis a pentzai ca sa scuadra de is aversàrius t'at a regalai is tres puntus chi ddoi funt badda badda in su pratu feti poita, mancai, s'agatat me is ùrtimus postus de sa lista. Antzis, podit sucediri, cumenti sucedit, de su restu, ca is partidas chi giogas contras a is scuadras ùrtimas in sa lista, candu tui mancai t'agatas in artu, mancai me is primus postus, benint a essi cussas innoi fais is figuras prus lègias, po ddu narai a trassa de cumenti si narat in italianu etotu. Un'antra cosa chi podit sucèdiri, e chi, de su restu, sucedit, est cussa de abarrai a fai is contus, ainnantis de brintai in campu: fadeus s'esèmpiu de is de su Uddusò, po no si stesiai tropu de sa lega chi eus pigau in custu artìculu; in sa partida chi ant giogau contras a is de su Logusantu si podiant puru acuntentai (cumenti si narat) de ndi cassai feti unu puntixeddu, ma a sa fini Terrosu m'at ispiegau (e si torru a arrapiti ca deu no apu mai giogau a bòcia in una scuadra e no apu mai tentu un allenadori, tra is atras cosas) ca una scuadra chi bollit binci su campionau iat a depi brintai in campu sèmpiri, e naraus sèmpiri, cun sa bidea de ndi cassai is tres puntus. Sèmpiri, duncas, bolit narai siat me is partidas in domu e siat in cussas in domu allena; e sèmpiri bolit narai, duncas, mi parit bastanti craru, me is partidas contras a is scuadras prus fortis ma puru, est craru, me is partidas contras a is scuadras chi, mancai, s'agatant a annadai (cumenti naràt fatu fatu un amigu miu a is tempius de is iscolas medias e de is iscolas superioris) in acua lègias e no bonas. 
«Deu creu – m'at contau Ferruciu Terrosu – ca totus is scuadras de bòcia ndi cabint in campu cun sa bidea in conca de binci sa partida e, duncas, de ndi cassai totus is puntus chi ddoi funt in su pratu. E sa pròpriu cosa, mi parit bastanti craru, eus a fai nosu puru, cumenti est giustu. No podeus abarrai innoi a passai su tempus a fai is contus, cumenti si narat, mancai po binci su campionau s'ammanchit, in dì de oi, feti unu puntixeddu. Ma a sa fini is piciocus ndi cabant in campu po giogai, e po ndi pesai su tanti prus mannu de gol, e po si spàssiai, e su spàssiu benit a essi pagu meda chi tui abarras totu pentzendi a ndi cassai, mancai, feti unu puntixeddu. Seus pentzendi feti a sa partida chi depeus giogai, e apa a circai de mandai in campu is giogadoris prus fortis e, duncas, is giogadoris chi staint mellus tra totus cussus chi faint parti de sa rosa cosa nosta». 

Sa cosa peus, candu t'agatas a giogai partidas de importu diaici mannas, nd'arribbat, est craru, de is pentzamentus chi t'agatas in conca. Eia, mancai siant piciocus chi currint me is campionaus de is diletantis, custu no bollit narai ca no intendant sentidus fortis e mannus meda ainanntis de ndi cabai in campu po partidas de importu; est a nai ca iast a podi essi totu ghetau a pari de is sentidus chi tenis, e candu ses emotzionau, si cumprendit, nc'est s'arriscu, s'arriscu mannu meda, de no arrannèsci a gigoai beni sa partida cumenti invècias iast a podi fai. 
Ma Ferruciu Terrosu est stètiu bonu, e bravu, a mantenni sa passièntzia, e sa calma, in sa scuadra cosa sua, e custu ballit, puru, est craru, po dònnia piciocheddu, po dònnia giogadori chi fait parti de sa rosa. 
«Si dda seus bivendi beni meda, cun su coru selenu – mi iat scoviau Ferrucio Terrosu candu ammancant feti una parighedda de oras po ndi cabai in campu po giogai sa partida contras a is de su Logusantu – fadendi su contu ca teneus su coru prenu de afròddiu, ma eus cumprendiu puru, in totus custus mesis de campionau, ca is resultaus, bonus e togus meda, chi nd'eus cassau in custas cidas, ndi funt arribbaus poita seus stètius bonus a abarrai cun is peis prantaus in terra, chi cumprendeis su chi si bollu narai, e chi, a parri miu, a su mancu, est una de is cosas de importu prus mannu chi sebint po binci unu campionau. Eus pentzau feti, custu est pagu ma seguru – at sighiu a mi contai Ferruciu Terrosu – a fai beni su trabballu cosa nosta e, duncas, no podeus fai atru ca sighiri a curri in custu arrastu etotu, chi mi cumprendis po su chi si bollu narai. No depeus abarrai innoi a pentzai a sa positzioni chi teneus in sa lista in dì de oi, o a sa positzioni innoi s'agatant is de su Logusantu; e no podeus duncas nemmancu abarrai innoi a pentzai a su resultau chi nd'ant a pesai is scuadras chi teneus a is pabas, e megu a chistionai de is de s'Usinese e de is de su Coghinas. Depeus feti pentzai, duncas, a giogai sa partida cosa nosta; depeus sighiri a pentzai feti a su trabballu chi teneus de fai e chi s'amancat de fai e diaici eus a fai fintzas a sa fini de sa stagioni, mi parit bastanti craru. Teneus un arrastu de sighiri e teneus una faina de acabbai: custa est s'ùnica cosa de importu po nosu. Chi apustis de custus noranta minudus, nc'at a essi sa possibbilidadi de fai sa festa, intzandus eus a fai festa, cumenti est giustu». 

E sa festa is de su Uddusò, a sa fini, dda ant fata po diaderus, e festa manna puru, ant fatu, fadendi su contu ca fiant de calincuna cosa cumenti a bintiduus annus chentza de nd'artziai in su campionau de s'Ecellenza. 
«Po su chi mi pertocat – at sighiu a mi contai Ferruciu Terrosu – po mei su de podi binci su campionau e su de ndi podi artziai de categoria est una cosa de importu mannu, chi mi prenit su coru de su prexu, fadendi su contu, cumenti seus fadendi, de su restu, ca candu giogamu ancora, candu ndi cabamu in campu, duncas, seu stètiu unu de cussus chi iat bintu su campionau impari a is de su Uddusò, e chi si iat portau a giogai po sa primu borta in totu sa storia cosa nosta in su campionau de s'Ecellenza. E duncas, su de arrannèsci a binci su campionau me is pannus de s'allenadori, puru, e no feti cun sa camisedda de giogadori, cumenti apu giai fatu, de su restu, iat a essi una cosa toga meda po su chi mi pertocat e po su chi pertocat sa carriera cosa mia: iat a tenni unu tastu druci cumenti a su tzucuru, e gei si cumprendit ca candu fais annus e annus in custu mundu, e seu chistionendi est craru de su mundu de sa bòcia, duncas is prexus prus mannus ti nd'arribbant de su campu de giogu».





Attività realizzata col contributo della Regione Sardegna. IMPRENTAS 2024-2025. LR 22/2018 art. 22