Salta al contenuto principale
uri paba calaresu

Domìnigu marriu de partidas po is scuadras sardas: in Sèrie D in campu feti su Murera; in Eccellenza s'Atletico de Uri bincit puru contras a sa San Marco

Po is novas scritas in sardu de su Campidanu de mesu, chi ballint po s'ùrtima cida de su mesi de Abrili, obeus partiri, po una borta, chentza si strollicai tropu; mancai a mei praxiat a s'ammachiadura, si nau sa beridadi, a mi strollicai unu paghedhu prima de chistionai de càlciu. E duncas si nci ghetaus in su mundu de sa bòcia de is diletantis sardus: cun sa Sèrie D chi imoi, e po duas cidas, no at a bandai ainnantis cun is giorronadas de su campionau, po circai de ndi recuperai totus is partidas chi ndi funt sartadas, in s'interis, de su mesi de Cabudanni fintzas a su mesi de Abrili, abarrat alluta feti sa cursa de is scuadras sardas concas a sa Sèrie D. Domìnigu poburu meda de partidas, comentecasiat, contendi ca po su chi pertocat s'Eccellenza ndi funt cabadas in campu feti cuatru scuadras, e duncas nci funt stètias feti duas partidas; is de su Castiadas, difatis, iant giai giogau sa partida contras a is de su Poltu Ridundu, fiat su cuatru de su mesi de Ladàmini, cun is de domu chi fiant arrannèscius a ndi pigai is tres puntus, cun su rèsultau de unu a zeru. Partida giai fata e giai giogada puru tra is de s'Ossese e is de su Gùspini, chi si fiat giogada in s'ùrtimu domìnigu de su mesi de Cabudanni, est a nai su trinta, cun su rèsultau, torra, de unu a zeru. Domìnigu de spàssiu, duncas, po is de s'Atletico Uri, chi ndi funt cabaus in su Campidanu de mesu, in Bidd'e Sorris, po giogai contras a is assèminesus de sa San Marco: is leonis, me is primus diis de sa cida passada, ant donau is crais de sa scuadra a mister Paolo Busanca, chi nd'at pigau su postu de Bebo Antinori, chi, sciadau, at depiu saludai is piciocus de sa rosa poita si nd'est pigau, mancu a dhu fai aposta, su puntori de su Covid e intzandus depit abarrai in assètiu po una pariga de cidas, fintzas a candu no at a torrai a stai beni (e totu is chi trabballant po su Diario Sportivo dhi mandant un imprassidu mannu mannu meda), e pròpriu po custu, si cumprendit beni, no at potziu sighiri a allenai Porcu e totus is atrus giogadoris. Sa partida fiat de importu po is grogus-arrubius allenaus de mister Paba, poita is de s'Uri s'agatant a su primu postu in sa lista e bisant de ndi pigai su bòbidu, in sa cursa po ndi artziai in Sèrie D e nc'est de nai ca is cosas funt andendi beni meda po is tattaresus, e s'est biu puru in s'ùrtima bessida, cun is allenus chi funt arrannèscius a binci cun su rèsultau de tres a unu; po is de s'Atletico Uri, intzandus, est stètia un antra partida giogada beni meda, ma is de sa San Marco, apustis de sa batalla pèrdia contras a is de s'Ossese, feti seti diis ainnantis, ant circau de fai de totu po firmai is aversarius, ma no nci funt arrannescius, cun is de s'Uri chi si ndi funt pigaus sa de tres bìncidas de sighiu: fortzis no nc'est nesciuna scuadra chi est currendi diaici forti, tra is otus chi funt circhendi de ndi artziai in Sèrie D. Is de domu de sa San Marco ndi cabant in campu chentza su portieri Galasso, chi at tentu strobus poita s'est ingotu, e chenza su difensori Abib, chi nd'at dèpiu sartai sa partida, est a nai at dèpiu castiai is cumpangius de aforas, poita in sa partida contras a s'Ossese, pròpriu me is ùrtimus minudus de sa batalla, nd'at bodhitu unu cartèllinedhu arrubiu. Is de s'Atletico Uri nci ponint in campu tres piciochedhus giòvunedhus: Uleri, chi est nasciu in su duamilla e unu, in aranti, impari a duus giogadoris de esperièntzia cumenti a Calaresu e Mura; su difensori Brizzi, nasciu issu puru, cumenti a su cumpàngiu, in su duamilla e unu; Loru e Delizos, is prus pitichedhu de totus is chi dhoi fiant in campu, contendi chi funt nascius, ballit po totu e duus, in su duamilla e tres. Is primus chi circant su gol funt is de domu de sa San Marco, cun d'unu tiru scutu de Mancosu, tra is giogadoris prus fortis in sa scuadra sighida de mister Busanca, ma Pittalis arrannescit a cassai sa bòcia, chi agoa ndi bessit aforas de su campu. Apustis de duus minudus, funt torra is de sa San Marco a nci provai cun Mancosu, cun su tiru scutu de acanta chi peròu ndi bessit aforas de sa porta. Is de s'Atletico Uri, peròu, no funt cabaus a Bidd'e Sorris po castiai is aversarius gioghendu: diaici, difatis, a su de dexi minudu, Olmetto donat sa bòcia a Loru, chi fait curri Mura, gràtzias a unu bellu passagiu, chi est prus lestru de Manca; su giogadori de s'Uri peròu no nc'arrannescit a bàtiri Medda. A su de doxi minudu, is de s'Uri nci torrant a provai: Uleri ndi piscat Ravot, chi scudit sa porta conca a sa porta de Medda, cun sa bòcia chi po pagu no atumbat contras a su palu. A su de dexiaseti minudu, torra is de sa San Marco in atacu, sèmpiri cun Mancosu, ma Pittalis est scidu e ndi sarvat torra is suus. De s'antra parti de su campu, tocat a Medda ndi cassai sa bòcia scuta, cun d'unu corpu de conca, da Mura. A su de dexianoi minudu si birit puru Calaresu, unu de is giogadoris prus fortis de s'Atletico Uri, chi agoa de su passagiu de Loru, no nc'arrannescit a binci sa batalla contras a Medda, chi sighit a no sballiai nudha. Candu seus acanta de lompi a sa mes'ora de giogu, is de s'Atletico Uri aciapant su primu gol: Ravot cun d'unu tiru de frimu, ndi piscat Piga chi fait partiri unu tiru forti meda chi abbruxiat Medda. Is de sa San Marco circant de ndi pesai sa conca, cun Podda chi nci provat po duas bortas de sighiu, ma chentza fortuna. Sa partida abarrat bella e alluta: is de s'Uri arrespundint cun sa giogada de Olmetto chi sfundat in sa parti manca de s'atacu e ndi piscat Uleri, chi pigat sa bòcia de conca ma no arrannescit a cassai sa porta de Medda. Is de sa San Marco si ghetant in aranti, sèmpiri cun Podda: s'ex giogadori de is castedhaius de sa Ferrini peròu no arrannescit a stampai sa porta difendia de Pittalis. Me is ùrtimus minudus de su primu tempus, s'Atletico de Uri arribbat acanta a su segundu gol, cun Uleri chi si scapat a curri, lestru cumenti unu lepori, ma Medda est torra scidu e arrannescit a ndi firmai su tiru de s'aversàriu. Sa San Marco nci provat, invècias, cun su corpu de conca de Briukhov, piscau cun d'unu bellu passagiu de Balistreri. In su segundu tempus, apustis de pagu minudus de giogu, Calaresu ndi furat sa bòcia de is peis de Porcu e scudit unu tiru concas a sa porta de Medda, cun su portieri chi narat torra ca nou. In su tiru de sa bandieredha chi nd'arribat apustis, Calaresu circat de scudi sa bòcia a is pabas de Medda, ma sa bòcia atumbat contras a sa linna de sa traversa. Mister Busanca, intzandus, nci ponit in campu Camba, Marongiu e Cirina, ma a aciapai su gol funt torra is allenus de s'Uri: seus lòmpius a su de dexiaseti minudu, candu Mura donat sa bòcia a Uleri chi brintat aintru de s'area de is de sa San Marco e scudit cun su pei deretu sa bòcia a is pabas de Medda, cun su piciochedhu chi agat diaici su primu gol in custu campionau de s'Eccellenza. Is de sa San Marco peròu circant de mantenni is giogus obertus: a su de dexiotu minudu Balestrieri ndi piscat Podda chi donat a sa bòcia unu bellu corpu de conca, cun Pittalis chi no nci podit fai nudha. A su de binti-ses minudu, po pagu is de sa San Marco no agatant su segundu gol puru: Olmetto si ndi fait furai sa bòcia de Podda chi agoa si scapat a curri conca a sa porta de Pittalis, chi ndi benit sartau, ma su tiru de su giogadori de domu benit cassau, a s'ùrtimu, de Brizzi, chi sarvat is suus cun d'una giogada de campioni, mancai siat unu de is giogadoris prus piticus e giòvunedhus chi nci funt in campu. A contus fatus, custa de Brizzi est una de is giogadas de importu prus mannu de totu sa partida, cun is de s'Uri chi aguantant beni contras is atacus de is meris de domu e a su de corantacuatru minudu, Delizos, unu piciochedhu giòvanu meda, nasciu in su duamilla e tres, donat unu bellu corpu de conca a sa bòcia, scuta in mesu a s'area de Ravot, e serrat diaici sa batalla. A s'acabbu de sa partida, e su poita si cumprendit beni, mister Massimiliano Paba tenit su coru prenu de prexu, gràtzias a sa de tres partidas bintas de sighiu e sa lista chi biri is de s'Uri in su primu postu, cun cuindixi puntus in buciaca: «Si apoderaus custus tres puntus, de importu mannu mannu meda, chi nd'eus pigai in sa partida contra a sa San Marco, chi m'est pata meda forti, in d'unu campu tostau e dificili». S'allenadori sighit a contai: «Fortzis podetus puru serrai sa partida una pariga de minudus ainnantis, e mancai, fadendi diaici, estus potziu sunfriri prus pagu de su chi s'est sucèdiu; eus sballiau cancu tiru de tropu, a nai sa beridadi, ma est una cosa chi nci podit stai, chi pentzaus chi is piciocus chi giogant in aranti currint meda po agiudai is cumpangius a centrucampu e in difesa, duncas podit capitai chi calincunu de issus, mancai, no intzertit cancu tiru». Apustis de su gol de su duus a unu, sa San Marco at incumentzau a atacai po ndi cassi su gol chi podiat balli po su duus a duus puru: «Issus nc'ant cretiu fintzas giai a sa fini — ammitit Paba — e a nai sa beridadi s'ant donau medas pentzamentus, ma me is ùrtimus minudus, e po fortuna, su gol fatu de Delizos at serrau sa partida. Eus fatu feti unu sbàlliu e cumenti sucedit dhu podestus pagai caru meda, ma po fortuna nosta ca Brizzi at fatu una giogada toga e bella meda e nd'at bogau de sa porta sa bòcia scuta de Podda, ma nc'est de nai puru chi no minescestus de ndi pigai su gol». Chi castiaus sa lista, is de s'Atletico Uri, a su mancu in dì de oi, parint cussus postus mellus in sa cursa conca a sa Sèrie D: «A is piciocus cosa mia sigu a nai chi no seus is prus fortis, ma depeus circai de essi is prus bravus, chi funt duas cosas diversas. Nau custu, seus prexaus de cumenti funt andendi is cosas: sa scuadra giogat beni, is giogadoris funt in saludi e custu si biri dònnia domìnigu, candu ndi cabaus in campu po giogai contras a is atras scuadras, chi funt fortis cumenti dhu seus nosu. Deu seu prexau po cumenti funt trabballendi is piciocus aintru de sa cida, po is allenamentus, po sa gana chi nci ponint e po cussu chi arrannescint a fai me is noranta minudus de sa partida. Su campionau, peròu, est ancora totu de giogai, e de binci: sa cursa conca a sa Sèrie D est oberta, scieus chi depeus fai ancora atru tretu meda, peròu si dha obeus giogai, cun umildadi e arrespetu po totus is atras scuadras. Apustis de su domìnigu de pasiu eus a depi giogai contras a is de su Gùspini e is de su Castiadas; ant a essi duas partidas de importu, ma nc'ant a essi de giogai puru totus is partidas de sa torrada, duncas est totu de biri, poita badda badda nci funt una biga de puntus. De su restu, seus fadendi una cosa de importu mannu, nesciunu megat a si fai arregalus». Po s'allenadori de is de sa San Marco, invècias, no est stètiu unu domìnigu fortunau: Busanca est partiu cun d'una partida pèrdia, ma is giogadoris de domu nd'ant pesau, comentecasiat, una batalla toga meda, cun d'unu gol fatu e un antru, cussu chi podiat balli po su duus a duus, sarvau a s'ùrtimu de sa giogada de Brizzi. «Po su chi ant fatu biri is giogadoris in campu tengiu pagu meda de strunciai o de murrungiai, po sa conca e su coru chi nc'ant ghetau in campu, mescamente. Chi emus fatu su segundu gol fortzis nd'estus potziu pigai unu puntu; su de tres gol, arribbau feti a sa fini de sa partida, contat pagu. Is giogadoris chi apu agatau in sa scuadra, in sa rosa, funt totus fortis meda: deu seu arribbau innoi de pagu diis, nareus chi seu feti sighendi a andai ainnantis cun su trabballu chi at fatu su chi nci fiat prima de mei e, dhu arregodaus, si nd'est andau feti po crupa de sa mobadia e de custu tialu de virus. Antinori est unu allenadori bravu meda, deu apa sighiri a acumpangiai is piciocus in custu tretu, circhendi de nci ponni totu sa passioni chi tengiu po custu giogu, isperendi, est craru, de lompi prus in artu possibbili in sa lista». Busanca aciungit: «Camba est sanau de su dannu chi teniàt; su tenni duus giogadoris fortis cumenti a issu e Podda est un agiudu mannu: imoi eus circai de dhu sus ponni in campu circhendi de ndi arriciri su mellus chi podeus. Imoi eus a fai de totu po circai de binci totus is partidas chi mancant a s'acabbu; no nc'ant a essi scuadras chi nd'ant a cabai in su campionau de Promotzione, duncas podeus pentzai feti a su spàssiu».

In s'atra partida, invècias, chi s'est giogada tra is de sa Nuorese e is de su Bosa, is nùgoresus si ndi funt pigaus is tres puntus e duncas ndi artziant in sa lista, scancellendindi is cincus puntus chi teniant cumenti a penitèntzia. Po is meris de domu, peròu, est stètia un'antra partida toga meda: mister Tore Carboni dònnia domìnigu nci ghetat in campu una biga de giogadoris in atacu: sa scuadra giogat beni e, pruschetotu, si spassiat meda; est normali, mancai, arriscai calincuna cosa (de tropu) in difesa. Sa partida est toga e spàssiosa fintzas de is primus minudus de giogu: a su de trinta-cincu minudu is de su Bosa agatant su gol; Salvatore Carboni piscat Spanu chi mandat sa bòcia a is pabas de Trini cun d'una carvada de pei deretu. Is de sa Nuorese circant de ndi pesai sa conca cun is giogadas de Ragatzu, ma su Bosa aguantat beni. In su segundu tempus puru, su Bosa sighit a si dha gherrai cun gana bella e coru forti, ma su segundu gol no nd'arribbat; is de sa Nuorese, invecias, ndi pesant sa partida, seus a su de catodixi minudu, candu Ragatzu ndi brintat in area de rigori de is aversàrius e ndi benit sciusciau a terra de una giogada de Di Angelo; de is undixi metrus, Ragatzu stampat sa porta de Piras. Is de su Bosa circant de fai su segundu gol, ma funt sfortunaus; a su de bintotu minudu, is de sa Nuorese torrant a sfundai: Usai donat una bella bòcia a Ragatzu chi si scapat a curri, abbruxiat totu sa difesa de is de su Bosa e nci tzacat unu bellu tiru cun su pei deretu chi ballit po su segundu gol fatu de s'atacanti de Cuartu Sant'Aleni. A su de coranta-tres minudu, is de su Bosa po pagu no nd'aciapant su gol de su duus a duus, gràtzias a sa giogada de Ledda, ma Trini arrannescit a cassai sa bòcia cun d'una camba. Is de sa Nuorese domìnigu chi benit si d'ant a depi biri contras a is de su Castiadas; is de su Bosa invècias ant a torrai in campu feti su noi de su mesi de Maju, candu ant a andai in domu de su Castiadas atotu. Apustis de totu custus fuedhus, podeus puru castiai sa lista, chi biri sèmpiri, cumenti eus giai nau, is de s'Atletico Uri a su primu postu cun cuindixi puntus; sighint is de s'Ossese, cun otu puntus, is de su Castiadas, ses puntus ma feti cuatru partidas giogadas, e no cincu cumenti is primas duas. Cincu funt is puntus po sa San Marco e po su Gùspini; cuatru is puntus po su Poltu Ridundu, sa Nuorese invècias ndi tenit duus (contendi puru is cincu puntus chi teniàt de rècuperai). Po su chi pertocat sa Sèrie D, invecias, custu domìnigu nci fiat feti una scuadra sarda in campu, est a nai is de su Murera, chi ant giogau in domu de is de su Gladiator, po sa partida chi ballit po sa de binti-cuatru giorronada. Is piciocus sighius de mister Loi ant apoderau beni is atacus de is meris de domu, cun Vandelli chi nd'at cassau puru unu tiru de is undixi metrus scutu da Di Pietro. Is de su Murera si ndi pigant unu bellu puntu (a  nai sa beridadi in atacu no ant fatu prus de tanti po circai de binci sa batalla) e nd'artziant diaici a trintotu, unu puntu in mancu de is de su Lanusè, chi tenint peròu duas partidas giogadas in prus. Is piciocus de Loi abarrant a seti puntus de is play-off.
 

Attività realizzata col contributo della Regione Sardegna. IMPRENTAS 2020-2021. LR 22/2018 art. 22

In questo articolo
Campionato:
Argomenti:
Stagione:
2020/2021
Tags:
Eccellenza