Fadeus is contus de cumenti funt andendi is cosas me is campionaus de sa Primu Categoria po su chi pertocat sa batalla po ndi cassai su primu postu de sa lista

E duncas, sighendi su dìciu (unu de cussus chi mi praxint de prus) chi narat ca chini tenit su tempus no iat a depi abertai a s'incras a fai is cosas, atacu a scriri, e a ndi pesai s'artìculu chi teneis asuta de is ogus una cida ainnantis, prus o mancu, de candu nd'at a bessiri: podeis abarrai selenus, de su restu, ca novas de si torrai a contai no nd'ammancant mai, e duncas, eia, chi seis de acòrdiu cun mei, po custa cida fadeus ca mi strollicu pagu, po no narai nudda (e mancu mali, s'at a megai calincunu de bosatrus, berus est?), e no abarru innoi a si contai (e a fai su contu impari a bosatrus) de su tretu chi eus giai fatu cust'annu, e duncas de su tempus chi passat, e duncas de is diis, de is cidas e de is mesis (giai duus) chi si seus lassaus a is pabas; e no abarrau nemmancu a mi strollicai contendusì de su tempus, bellu meda (no tropu lègiu, chi si praxit de prus cumenti sonat sa cosa), ca est sighendi a fai, fadendi su contu, a bolli narai sa beridadi, ca seus ancora in sa stagioni de s'ierru, e cumenti si narat (po arremonai un antru dìciu), "sa coa est sèmpiri maba de scroxai" (e sa chistioni ballit po unu muntoni mannu de cosas, e no feti po is stagionis), e duncas, eia, fadendi su contu ca su beranu nd'at a brintai su bintunu de custu mesi etotu, nci funt ancora calincuna cosa cumenti a cuindixi diis (prus o mancu) de si scroxai, e chi puru depessit proi un antru pagheddeddu (e gràtzias a Deus, de acua cust'annu, in custu ierru, gei nd'at fatu bastanti, a su mancu mi parrit de podi narai diaici, mancai, apustis, meda de s'acua chi est protzia me is cidas ainnantis nd'est cabada a mari), no nd'eus a fai unu dannu, ca cumenti at a brintai torra su beranu, e s'istadi mescamente, intzandus gei eus a acudi, deu creu, a si sicai po beni. 
Po su restu, ita si contu? 
Po su chi mi pertocat seu sighendi a andai ainnantis cun is esercìtzius acapiaus a sa caresima, e in custu nc'agatu, dònnia dònnia annu, una biga manna de cosas chi torrant pari pari cun is esercìtzius (e is allenamentus, po su prus) chi depint fai is giogadoris po si cuncodrai po is partidas chi depint giogai, ma de custa chistioni, mancai, nd'eus a arraxonai mellus me is artìculus chi ant a bessiri in su benidori, partendi de su chi nd'at a bessiri sa cida chi at a benni, e sèmpiri chi su Cielu at a bolli custu beni po mei. 

E duncas, chi si ddu arregodais (e desinò nci pentzu deu a fai custu trabballu, e nci iat a mancai atru puru), sa cida passada apu incumentzau a fai su contu de cumenti funt cuncodradas is cosas me is listas de totus is campionaus chi sigheus cun su giàssu de su Diàriu Sportivu, partendi de is de s'Ecellenza e arribbendi a is duas listas chi pertocant su campionau de sa Promotzioni. 
E custa cida, deu ia a sighiri a andai ainnantis in cussu arrastu etotu, e duncas, fadendi su contu de cumenti funt postas is cosas, po incumentzai, me is cuatru listas chi pertocant su campionau de sa Primu Categoria, e mescamente po su chi pertocat sa cursa concas a su primu postu (cun sa prumissa, chi si fatzu oi etotu, de chistionai, in su benidori, puru de cussas scuadras chi funt cumbatendi, ddi naru diaici, po ndi cassai sa sarvesa). 
E duncas, in sa Lista A su spàssiu de is giogadoris, e mescamente de is tifosus chi sighint is giogus, benit a essi mannu meda, fadendi su contu ca, in dì de oi, ddoi funt cincu scuadras (eia, is primus cincu scuadras de sa lista) chi tenint is cartas bonas po ndi cassai sa bìncida de su campionau, partendi, duncas, de is de s'Academia Sulcitana, sa scuadra sighida de Andrea Loi, chi s'agatant a su primu postu cun cincuanta puntus in totu; ma de seguru is de s'Academia no funt currendi a solus, fadendi su contu (e a fai is contus nci poneus pagu meda, a narai sa beridadi) ca a is pabas tenint is de sa Gioventudi de Sarroch, sighius de un allenadori forti e de esperièntzia cumenti est Nunzio Falco. E cun custu no bollu narai, peròu (isperu ca nesciunu cumprendat allu po cibudda, cumenti si narat), ca Andrea Loi siat s'ùrtimu allenadori tra totus cussus chi s'agatant in Sardìnnia, antzis; Loi de su restu at acutu a binci unu bellu tanti de campionaus, partendi de s'aventura bona meda chi fiat stètiu bonu a ndi pesai impari a is de su Pirri, una pariga de stagionis fait, e no si depeus scaresci ca duus annus fait ndi iat cassau s'artziada in su campionau de s'Ecellenza impari a is de su Sant'Aleni de Cuartu. E immoi Loi est fadendu de totu (est a narai: est pesendindi unu trabballu de oru) impari a is de s'Academia Sulcitana. Is de s'Academia, acudu a si narai custu puru, ant pèrdiu sa partida chi iant giogau contras a is de sa Gioventudi de Sarroch (e seu chistionendi, mi parit craru, de sa partida chi s'est giogada po su chi pertocat sa lista de s'andada), cun su resultau de tres a duus (cun sa partida chi s'est giogada su bintitres de su mesi de donniassantu, si ddu naru po benni a essi prus pretzisu puru, cumenti unu giornalista iat a depi essi chi bollit fai beni su trabballu cosa sua), e ant serrau cun su resultau de paridadi (unu a unu) sa partida chi ant giogau, in domu cosa insoru etotu, contras a is decimesus de sa Deximu 07. 
E pròpriu is decimesus s'agatant in dì de oi a su de tres postus in sa lista, cun feti duus puntus in mancu de cussus chi tenint allogaus in buciaca is primus de sa classi. Po sa cursa concas a su primu postu, intzandus, depeus cracullai (po manigiai unu fueddu chi m'est sèmpiri praxu a totu coddu, cumenti si narat innoi in Bidd'e Sorris) puru is casteddaius de La Palma, chi s'agatant cun su pròpriu tanti de puntus (corantacincu) de is chi tenint is ollastrinus de su Tertènia, sighius de Salerno. 
Acudu a si narai, puru, ca is decimesus ant passau unu perìodu lègiu meda, cun tres partidas pèrdias s'una avatu de s'atra (e su de perdi una pariga, a sa sarda, de partidas totu paris no fait mai prexei, e si cumprendit, mescamente po su chi pertocat s'umori de is piciocus), partendi de cussa chi ant giogau in domu de is de su La Palma, chi eus arremonau pròpriu immubagora (e seus chistionendi de s'ùrtima partida chi s'est giogada in su duamilla e binticincu, ainanntis de is festas de su Nadali e po is vacantzas po s'annu nou), e chi s'est serrada cun su resultau, bellu e tundu tundu, de tres a zeru po is casteddaius; e apustis, cumenti ndi funt torraus in campu po sa primu partida de s'annu nou, is decimesus ant lassau is pinnas (m'est benniu de ddu narai diaici) in sa partida contras a is de su Deximeputzu, chi s'est serrada cun su resultau de unu a zeru po sa scuadra sighida de Diego Mariano Ruggiero. E s'undixi de su mesi de gennàrgiu, in s'ùrtima partida de sa lista de s'andada, is de sa Deximu 07 ndi funt arrutus, torra, in domu de is de su Sestu. Is cosas si funt unu pagheddu aparixadas, po is decimesus, de sa primu partida po su chi pertocat sa torrada (cumenti seus costumaus a tzerriai sa segunda parti de su campionau), candu nd'ant cassau unu puntixeddu in sa isfida contras a is meris de domu de su Tertenia, cun su resultau de unu a unu; e su gol chi est bàlliu po ndi cassai su puntixeddu nd'est arribbau, pròpriu, me is segundus de su recuperu (est a narai, duncas, me is minudus chi si giogant apustis de su de noranta minudus). E si cumprendit (e sa cosa, sa chistioni ballit po su chi si sucedit in su fetianu, e chi pertocant sa vida, e no feti su giogu de sa bòcia, duncas), is decimesus fiant giai giai po ndi cassai sa de cuatru partidas pèrdias de sighiu, ma de cussu momentu, cun cussu goiteddu arribbau giai giai a s'ùrtimu segundu (e si podeis immaginai beni totu su prexu chi nd'ant tentu), intzandus ant incumentzau a si strantaxai, a ndi strantaxai sa conca. 
Ca candu is cosas andant mabi, a bortas bastat pagu, pagu diaderus po torrai a pigai unu pagheddu de coràgiu. E chi no fessit stètiu po cussu goiteddu, bai e circa cumenti dda iant a essi acabbada. 
E in sa vida puru, a su mancu est cussu chi mi praxit a arrapiti, no estus a depi perdi mai sa ispera, mancai candu totus is cosas si parint nieddas cumenti a sa pixi, cumenti a una noti chentza luna (po giogai unu pagheddeddu a fai su poeta), poita, mancai puru candu ti parrit ca no nci siat prus nudda de fai, candu su dannu ti parrit diaici mannu ca no nd'as a bessiri mai prus, ti podit arribbai unu agiudu (de unu amigu, o fintzas de su Cielu) chi ti fait torrai a partiri. E pròpriu cussu goiteddu chi is de sa Deximu 07 nd'ant cassau me is ùrtimus segundus ddus at agiudaus a torrai a partiri e a ndi strantaxai sa conca, chi cumprendeis su chi seu circhendi de si narai. Me is partidas apustis, difatis, is de sa Deximu 07 ant serrau in paridadi sa isfida, chi s'est giogada in domu cosa insoru etotu, contras a is primus de sa lista de s'Academia Sulcitana, cun su resultau de unu a unu. Contras a is de su Cuartu 2000, is de sa Deximu 07 nd'ant cassau, invècias, torra is tres puntus prenus (s'ùrtima borta fiat sucèdiu, de su restu, in sa partida contras a is de s'Azurra de Pauli, chi si fiat giogada su catodixi de su mesi de idas), gràtzias a su resultau, bellu e tundu tundu, de tres a zeru; e ant bintu torra in sa partida contras a is de s'Idolo, custa borta in domu allena, cun su resultau de unu a zeru. 
E diaici funt sighendi a curri, gràtzias, puru, a is tres puntus chi nd'ant cassau, duus domìnigus fait, contras a is de sa Gialeto, cun su resultau, torra, de tres a zeru. E si ddu torru a arrapiti: no estus a depi mai perdi sa ispera bona de torrai a si strantaxai apustis chi nd'arrueus. E sa cosa ballit po su giogu de sa bòcia, ma puru po sa vida cosa nosta. 
E sa cosa chi mi praxit de prus a fai, mescamente candu scriu, e candu ndi pesu is artìculus in sardu, est cussa de acapiai is letzionis chi nd'arribbant de su giogu de sa bòcia (chi si iat a podi narai, puru, ca est una iscola de vida), a is trumentus chi si tocat a scroxai (ddi naru diaici) in sa vida de dònnia dì. Mancai chistionendi feti, cumenti apu fatu in custu artìculu etotu, de una scuadra de bòcia chi perdit tres partidas de sighiu, s'una avatu de s'atra. 

E duncas, po su chi pertocat sa Lista A si iat a podi narai ca s'apu contau totu su de importu, po cumprendi cumenti funt cuncodradas is cosas po sa cursa concas a sa bìncida de su campionau. 
E duncas, deu creu, puru, ca si potzat fai sa pròpriu cosa po su chi pertocat sa Lista B, innoi, a su primu postu, agataus is de s'Atleticu de Masainas, cun corantatres puntus in totu. Is grogus-birdis, chi funt sighius de Fabiu Tinti, ant bintu fintzas a oi doxi partidas e po seti bortas nd'ant serrau sa giorronada cun su resultau siddau in paridadi. «S'agataus in artu de unu bellu arrogu de tempus – mi iat scoviau s'allenadori de sa scuadra de su Sulcis candu ddu ia intèndiu, una pariga de cidas fait, po ndi pesai una bella ciaciarrada – e immoi boleus abarrai a su primu postu, chi nc'eus a arrannèsci, est craru, fintzas a sa fini. Su puntixeddu chi nd'eus cassau in sa partida chi eus giogau contras a is de s'Arbus ballit cantu una perda de oru, poita issus funt una de is scuadras prus fortis chi nci funt in sa lista cosa nosta, in sa Lista B innoi curreus nosu puru, po ddu narai mellus. Candu arrannèscis a ndi cassai unu puntu, contras a una scuadra diaici forti, e in prus gioghendi in domu allena, intzandus nc'est sèmpiri su tanti po essi prexaus de cumenti funt andadas is cosas. Is resultaus chi seus stètius bonus a ndi pesai fintzas a oi – at sighiu a mi contai Tinti – ndi funt arribbaus, po primu cosa, gràtzias a su trabballu, de importu mannu meda, ca is piciocus faint aintru de sa cida, me is allenamentus; is piciocus chi tèngu sa fortuna de sighiri, e chi trabballant cun mei, faint una biga de sacrìficius e tenint sa gana bona de mellorai, ddi naru diaici, in dònnia partida, e custa est una de is cosas de importu prus mannu, candu bolis binci unu campionau. Tra is cosas chi mi funt praxendi de prus, sceru, custu est pagu ma seguru, su modu chi sa scuadra cosa mia tenit de abarrai in campu, est a narai, duncas, cussa chi estus a podi tzerriai, furendindi is fueddus de s'italianu etotu, "organizatzioni tatica", chi cumprendeis su chi seu circhendi de si narai, de si ispiegai. Un'antra cosa de importu mannu meda, a su mancu po su chi mi pertocat, a su mancu a parri miu, est ca totus is piciocus chi faint parti, in dì de oi, de sa rosa de s'Atleticu de Masainas, si intendant parti de su progetu, e seu chistionendi, mancai, de totus cussus piciocheddus chi giogant prus pagu de is atrus, ma candu ndi cabant in campu, intzandus ndi bogant aforas totu su chi tenint in su coru. Custa cosa, in una stagioni longa e trumentosa cumenti est cussa chi seus bivendi nosu, iat a podi fai sa diferèntzia, ddu sciu beni, est craru. Po su restu, si potzu narai ca seus bivendi unu perìodu bonu meda, e selenu, ddi naru diaici, isperendi ca si cumprendat su chi seu circhendi de si contai. Seus partius cun s'afròddiu a cucuru, chi mi permiteis de manigiai custus fueddus, e boleus sighiri a curri fintzas a s'ùrtimu segundu de su campionau, fintzas a s'ùrtimu segundu de custa stagioni. Eus a fai de totu, custu est pagu ma seguru, po ndi cassai su primu postu de sa lista, ma po serrai is giogus, e po serrai sa chistioni acapiada a sa batalla po ndi cassai su primu postu de sa lista, ammancant ancora una biga manna de partidas. No at a essi facili su de si lassai a is pabas totus is scuadras de is aversàrius ca funt currendi, impari a nosu, po ndi cassai su primu postu, a partiri de is de s'Arbus, ca funt sighendi a curri forti cumenti a nosu etotu. Eus a fai totu su chi at a essi possibbili po binci su campionau, ma est sèmpiri su campu chi tenit s'ùrtimu fueddu, e duncas, eus a biri cumenti ant a andai is cosas, de prus in dì de oi no si potzu narai. Po immoi si potzu narai, feti, ca eus a fai de totu, in dònnia partida chi eus a giogai, po ndi cassai sèmpiri is tres puntus prenus, chi est, chi iat a depi essi, a su mancu, s'ùnica bidea in sa conca cosa nosta. Scieus beni, de su restu, ca totus is scuadras bisant de frimai sa cursa de is primus de sa classi, e duncas, eia, is scuadras de is aversàrius cosa nosta nd'ant a cabai in campu, dònnia giorronada, cun su corteddu tra is dentis, cumenti si narat». 
E duncas, eia, impari a is de s'Atleticu de Masainas, po su primu postu ddoi funt puru is de s'Arbus, ca in s'interis ant scerau de donai is crais de sa scuadra a un allenadori bravu, e de esperièntzia manna, cumenti est Nicola Agus, chi at giai guidau s'Arbus me is stagionis passadas. A su de tres postus, invècias, agataus is de s'Antiochense (sa scuadra chi nd'ant pesau, e si cumprendit bastanti beni, deu creu, in Sant'Antiogu), sighius de Fabiu Piras, chi est stètiu s'allenadori, tra is atras, de su Crabònia. Is de s'Antiochense s'agatant a su de tres postus in sa lista, cun calincuna cosa cumenti a dexi partidas bintas e ses partidas chi ant serrau cun su resultau siddau in paridadi. E de sa cosa, de cumenti funt andendiddi is cosas, po ddu narai mellus puru, nd'apu chistionau cun s'allenadori cosa insoru, poita, cumenti s'arrapitu fatu fatu, chini mellus de un allenadori podit sciri cumenti funt andendi is cosas in domu cosa sua? «Sa lista narat ca in dì de oi seus currendi impari a totus is scuadras prus fortis, a totus is primus de sa classi, chi mi permiteis de manigiai custu fueddu, isperendi ca si cumrendat su chi seu circhendi de si narai. Po sa cursa concas a su primu postu, chi fadeus beni is contus, nci funt cuatru-cincu scuadras, e in custa truma depeus ponni, est craru, puru s'Antiochense, ma deu creu ca is de s'Atleticu Masainas e is de s'Arbus tengiant is rosas prus fortis. Po su restu, si potzu narai ca sa scuadra cosa mia arrannèscit a fai biri a totus cantu ballit candu s'agatat contras a scuadras chi circant de giogai beni; e invècias no seus diaici abbilis candu, mancai, tocat a si dda gherrai, chi cumprendeis su chi seu circhendi de si narai. A narai sa beridadi, is trumentus nd'arribbant candu depeus cumbati apitzus de dònnia bòcia, poita mancai, po is calidadis de is giogadoris chi teneus in sa rosa, si iat a praxi de prus a si dda giogai cun is peis, e no cun is fueddus malus, mancai, o cun is manus, cumenti invècias s'est sucèdiu de depi fai. E sa cosa no m'est praxia po nudda, e deu creu ca si cumprendat beni. Sa truma de piciocus chi fait parti de sa rosa cosa nosta est pitica meda de edadi; is giogadoris funt, po su prus, totus giòvuneddus, e duncas tocat a tenni unu pagheddeddu de passièntzia in prus, e custu ddu sciestus giai, de su restu, de s'incumintzu de sa stagioni etotu. Seus circhendi de mellorai e de cresci dònnia dì, dònnia giorronada, e fintzas a immoi potzu essi prexau po cumenti si funt andendi is cosas. Immoi eus a circai de sighiri a andai ainnantis in custu arrastu etotu, chentza de si fai pigai tropu de s'afròddiu, chi eia, podit andai bastanti beni cumenti a cosa, ma apustis no depis mai perdi, no iast a depi mai perdi, po ddu narai mellus puru, s'umilesa. Poita, desinò, arriscas de fai figuras lègias, cumenti si iat a podi narai. Chi pròpriu ti depu narai sa beridadi, sa lista preferru a no dda castiai prus de su tanti; est a narai ca preferru a mi cuncentrai apitzus de su trabballu chi nc'est de fai, impari a is piciocus, impari a is giogadoris, est craru, cida po cida. E deu creu ca su trabballu chi seus fadendi cust'annu at a essi bonu po torrai a partiri, mancai, in su benidori; su chi bollu narai est ca, eia, mancai no eus a arrannèsci a ndi cassai su primu postu, o comentecasiat, s'artziada in su campionau de sa Promotzioni, che est su bisu, est craru, de totus is scuadras chi s'agatant a curri me is primus postus, ma su chi seus imparendi cust'annu s'at a serbiri, cumenti una letzioni de importu mannu, po is stagionis chi ant a benni. Pròpriu po custu, in su mercau chi s'est obertu in s'istadi, e chi s'est serbiu po cuncodrai mellus sa rosa cosa nosta, eus decìdiu de scumiti apitzus de una pariga de giogadoris de esperièntzia, chi podint donai una manu manna de agiudu a totus is piciocus prus giòvuneddus, e seu chistionendi, mancai, po nd'arremonai duus, de Momo Cosa e de Alessandru Ciccu, po incumentzai. In prus, eus fatu sa scumissa apitzus de una bella pariga de giogadoris de bintitres-binticuatru annus, e chi nd'arribbant de sa zona cosa nosta: seus prexaus, e meda puru, de podi narai ca sa rosa de s'Antiochense est stètia pesada feti, e si naru feti, cun giogadoris chi nd'arribbant de sa bidda de Sant'Antiogu e de totus is biddas chi ddoi funt totu a giru a giru, chi cumprendeis su chi si bollu narai. Po su chi pertocat is giogadoris nàscius in su duamilla e unu e in su duamilla e duus, e chi benint a essi is prus giòvuneddus, seus chistionendi de piciocus chi, mancai, teniant gana de torrai a partiri, apustis de una pariga de stagionis isfortunadas. Mi benit in conca sa istoria de Christian Muscas, po nd'arremonai unu, chi est dèpiu abarrai frimu po duus annus de sighiu, poita s'est ingotu, e mabi puru, a totus e duus is genugus, e dda at acabbada fintzas a s'uspidali. Tenestus sa bidea de curri prus a forti de su chi seus arrannèscius a fai, mancai, s'annu passau, e deu creu ca fintzas a oi nci seus arrannèscius. Seus mellorendi, unu pagheddeddu, in dònnia giorronada, e custa est sa cosa chi mi fait prus prexei. No si potzu cuai, peròu, ca is cosas si fiant potzias andai fintzas mellus, fadendi su contu ca nc'eus fuiau a s'aliga, eia su fueddu giustu est pròpriu custu, su fueddu chi mi benit in conca po si fai a cumprendi mellus de ita seus chistionendi, una biga manna de puntus; nci funt stètias, mancai, unu bellu tanti de partidas, e funt stètias medas, innoi mancai tenestus su giogu in manu, ma a sa fini si seus pèrdius po una mesu tontesa, po unu sbàlliu. Po medas bortas festus bincendi sa partida, e estus mancai potziu fai su segundu gol puru, chi si iat a essi permitiu de serrai sa chistioni, cumenti si narat, e invècias no seus stètius bonus. Mancai po crupa de sa maba sorti, o mancai poita no seus stètius bastanti abbilis, una cosa comentecasiat chi podit capitai, e nci iat a mancai atru puru. Ma peròu, chi estus tentu unu stìddiu de atentzioni in prus, e unu stìddiu, mancai, de fortuna, bona sorti in prus, intzandus, fortzis, is cosas si fiant potzias andai fintzas mellus de cumenti funt andadas fintzas a oi. Custu bollit narai, duncas, mescamente, ca no seus ancora prontus, ddi naru diaici, po curri impari a is scuadras prus fortis; s'ammancat ancora calincuna cosa, no tanti po su chi pertocat is peis, chi mi cumprendeis, ma mescamente po su chi pertocat sa conca, sa mentalidadi chi teneus candu ndi cabaus in campu po giogai is partidas. Su chi s'ammancat de prus, in dì de oi, a su mancu a parri miu – at sighiu a mi contai Piras – est su de essi bonus a giogai beni duas o tres partidas de sighiu, poita mancai fadeus ispantus unu domìnigu, e sa giorronada apustis ndi pesaus dannus e arroris, chi cumprendeis su chi seu circhendi de si narai. Deu peròu tengu su coru prenu de isperas bonas, poita sciu beni, e ddu biu dònnia cida me is allenamentus, ca is piciocus cosa mia funt circhendi de fai totu su chi podint; s'impegnu chi nci podint, a partiri de is allenamentus, mi parit craru, benit a essi sèmpiri mannu meda. Podeus mellorai meda, custu ddu scieus totus, ma nci funt puru piciocus chi funt arribbendi giai a essi giogadoris fatus, e fortis, chi mi cumprendeis po su chi seu circhendi de si narai». 

E a is pabas de is de s'Antiochense, e sigu a chistionai (ma seu serrendi sa chistioni) po su chi pertocat sa Lista B de su campionau de sa Primu Categoria, agataus is de s'Isili, chi funt un'antra de cussas scuadras chi funt pesendindi una stagioni de importu mannu meda, e is de sa Virtus de Futei puru, impari, duncas, cun is de sa Verde Isula, sa scuadra chi nd'ant pesau, e custu giai de una bella pariga de annus, in Carluforti: is grogus – birdis, sighius de Albertinu Melis, no funt partius beni, est a narai ca a s'incumintzu de sa stagioni ant tentu unu pagheddu de strobbus in prus de is chi pentzànt, mancai, de agatai (torrendi a sa chistioni, chi apu giai arremonau ainnantis in custu artìculu etotu, ca sa cosa de importu prus mannu no est su de no nd'arrui, ma sa cosa de importu prus mannu est cussa de circai de si strantaxai acoitu. E duncas, eia, is de sa Verde Isula ndi funt arrutus, cust'annu, po ses bortas, e no funt pagus de seguru. E bollu narai, deu creu ca si cumprendat bastanti beni, ca ant pèrdiu po ses bortas cust'annu), ma apustis funt stètius bonus a binci po seti partidas de sighiu, ca no funt pagus de seguru. 

E duncas, immoi chi seu lòmpiu, immoi chi seu arribbau a custu puntu de sa chistioni, de sa lega, e intzandus, de s'artìculu, e mancai su logu (prus ca su tempus) chi tengu ancora po scriri siat giai giai po spaciai, deu creu ca sa cosa mellus chi potzu fai est cussa de sighiri su "giogu" chi apu fatu fintzas a immoi, e duncas deu ia a andai a castiai cumenti funt cuncodradas, in dì de oi, is cosas po su chi pertocat sa Lista C de su campionau de sa Primu Categoria; e custu bollit narai, puru, ca su chi no acudu a si narai in s'artìculu de custa cida, si ddu apa a intregai in s'artìculu chi nd'at a bessiri aforas sa cida chi at a benni (e sèmpiri chi su Cielu at a bolli custu beni po mei, ca si cumprendit, de su restu, ca de giòbia ndi ponint unu dònnia seti diis, e megu a brullai, si cumprendit, berus est?, ma custu po narai, duncas, ca at a serbiri feti unu stiddieddu de passièntzia). 

E duncas, eia, po su chi pertocat sa cursa concas a su primu postu, cun corantotu puntus in totu agataus is de su Macumere, sighius de un allenadori giòvuneddu, ma giai bravu e forti, cumenti a Marchi; e duncas, po immoi si potzu narai ca is grogus-arrùbius funt arrannèscius a binci po cuindixi bortas apitzus de bintunu partidas chi ant giogau, cun tres partidas ca, invècias, ant serrau cun su resultau in paridadi. Is de su Macumere, si potzu narai custu puru, ant pèrdiu (est a narai ca ndi funt arrutus) po tres bortas: una borta in domu cosa insoru (contras a is de su Supramonte de Orgòsolo, in sa partida chi s'est giogada su noi de su mesi de donniasantu) e duas bortas in domu allena: contras a is de su Fonne (cun su resultau de cuatru a zeru, in sa partida chi s'est giogada su catodixi de su mesi de idas) e contras a is de s'Oschirese (sa scuadra chi nd'ant pesau in Oscheri, si cumprendit berus est?), in sa partida chi s'est giogada su bintiduus de su mesi de friàrgiu, e duncas, eia, duas cidas fait. 
A su segundu postu de sa lista, invècias, cun corantaduus puntus in totu (chi funt ses in mancu de is chi tenint is de su Macumere, ca a fai is contus gràtzias a Deus nci poneus pagu meda) agataus is de su Fonne (chi s'apu arremonau pròpriu immubagora, de su restu), cun is piciocus sighius de Giacomu Coinu chi funt arrannèscius a binci po doxi bortas e po ses bortas ant serrau sa partida cun su resultau siddau in paridadi. E a su de tres postus agataus puru is de su Supramonte (eia, is de su Macumere tenint a is pabas, apicigaus a is carronis, cumenti si iat a podi narai, totu e duas is scuadras chi funt arrannèscius a ddus binci, a ddus bati), cun trintanoi puntus, chi nd'ant pesau gràtzias a undixi partidas bintas e ses partidas chi ant serrau cun su resultau in paridadi. A su de cuatru postus, cun trintases puntus (chi peròu funt doxi in mancu de is chi tenint in dì de oi allogaus in buciaca is de su Macumere, e no benint a essi pagus de seguru, e gei si cumprendit bastanti beni deu creu) agataus is de sa Corrasi de Uliana (cun undixi partidas bintas, cumenti a is de su Supramonte etotu), cun tres partidas serradas in paridadi ma cun seti partidas pèrdias e allogadas aintru de su bagàgliu, ddi naru diaici gioghendi a fai prus su poeta ca su giornalista sportivu. Ma dònnia tanti mi praxit a giogai unu pagheddeddu cun is fueddus. E chi eis lìgiu a su mancu unu de is artìculus chi nd'apu bogau aforas po is Novas de su Diàriu Sportivu, intzandus scieis beni cumenti mi pigat s'ingiogatzu, e cumenti mi andat, e meda puru, a scriri in sardu. 

Duncas, at a essi berus (cumenti est berus, po ddu narai a trassa de cumenti fadiat sa bon'anima de mamma mia) ca po is de sa Corrasi at a benni a essi meda, ma meda difìcili su de ndi cassai su primu postu de sa lista, ma si iat a podi narai ca is giogus funt ancora obertus po issus puru, e megu a chistionai de sa possibbilidadi chi tenint de ndi cassai, a su mancu, su segundu postu de sa lista, chi est cussu chi donat sa possibbilidadi, intzandus, de giogai is partidas finalis (eia, is partidas chi s'ant a giogai apustis chi at a acabbai sa stagioni regolari, cumenti seus costumaus a dda tzerriai, e chi at a spaciai, intzandus, immoi chi nci seu si ddu scoviu acoitu, su dexi de su mesi de maju; e custu ballit, est craru feti po su mundu de sa Primu Categoria), cussas ca a sa moda de is ingresus, a trassa de cumenti narant is ingresus, estus a podi tzerriai play-off. 
E po sa cursa concas a su segundu postu, intzandus (e seu sighendi a fai is contus po su chi pertocat, sèmpiri, sa Lista C, gei si cumprendit deu creu), nci depeus ponni, puru, is de s'Oschirese, chi s'agatant in dì de oi a su de cincu postus in sa lista, cun noi puntus in mancu de is chi tenint is de su Fonne, ma apustis tocat a fai su contu ca ammancant de giogai ancora calincuna cosa cumenti a noi partidas, po calincuna cosa cumenti a bintiseti puntus in su pratu, e duncas, eia, po su spàssiu de totus is tifosus chi funt sighendi is campionaus, si iat a podi narai ca iat a podi sucedi de totu. 

E immoi chi nci seus, andaus a serrai is chistionis acapiadas (is chistionis chi pertocant) su mundu de sa Primu Categoria, andendi a castiai cumenti funt postas is cosas in sa Lista D puru, (e custu bollit narai, intzandus, ca apa a a fai su pròpriu giogu chi apu fatu, in custas ùrtimas duas-tres cidas, puru po totus is otu listas chi pertocant su campionau de sa Segunda Categoria). E duncas, a su primu postu de sa lista agataus is de su Monte Alma, sa scuadra chi nd'ant pesau in Nujvi, chi in dì de oi tenint calincuna cosa cumenti a cincuantatres puntus in buciaca, a su callenti, e chi ndi funt arribbaus gràtzias a dexesseti partidas bintas, e a duas partidas chi ant serrau cun su resultau in paridadi. Custu bollit narai, puru, (ca a fai is contus nci poneus pagu) ca apitzus de bintunu partidas chi ant giogau in totu, ndi funt arrutus feti po duas bortas. A is pabas de is de su Monte Alma, chi funt trabballendi impari a Falchi giai de una pariga de annus, intzandus, agataus is de sa Lanteri, cun is tattaresus, sighius de Rusani chi peròu tenint otu puntus in mancu de is chi tenint is primus de sa classi, est a narai, duncas, corantacincu puntus, e chi ndi funt arribbaus gràtzias a trexi partidas bintas e a ses partidas chi ant serrau cun su resultau in paridadi; e duncas, eia, is de sa Lanteri ndi funt arrutus, a su mancu fintzas a immoi, feti po duas bortas. Cun corantunu puntus (chi funt doxi in mancu de is chi tenint is primus de sa lista de su Monte Alma) agataus is de su Valledoria, una de is scuadras chi ddoi funt in Codaruina, e chi funt sighius de un allenadori de esperièntzia cumenti est Massimilianu Nieddu: is arrùbius-brau nd'ant cassa trexi partidas bintas (su pròpriu tanti de is partidas chi tenint bintas is de sa Lanteri) e duas partidas serradas cun su resultau in paridadi; ma is piciocus sighius de Nieddu, tocat a narai custu puru, ndi funt arrutus po ses bortas cust'annu (e no benint a essi pagus, e gei si cumprendit, deu creu), ma fadendi su contu ca tenint feti cuatru puntus in mancu de is chi tenint is tattaresus de sa Lanteri, intzandus funt ancora in sa truma de scuadras chi podint bisai de nd'artziai in su campionau de sa Promotzioni, mancai depant abertai, po ddu fai, a is partidas finalis de is play-off. In sa Lista D, duncas, po sa cursa a su primu postu contaus feti custas tres scuadras, fadendi su contu ca is de su Sorso s'agatant, in dì de oi, cun trintatrs puntus, e chi ballint po su de cuatru postus in sa lista, tenint doxi puntus in mancu de is chi tenint is segundus de sa lista de sa Lanteri, e binti puntus in mancu  (e no funt pagus de seguru) de is chi tenint in buciaca is de su Monte Alma. 

E duncas, s'ùrtima cosa chi acudu a si narai po custa cida, est chi s'eus a torrai a ligi tra seti diis a partiri de oi, e si promitu giai chi eus a andai a castiai (impari, e si cumprendit) cumenti funt cuncodradas is cosas po su chi pertocat su mundu de sa Segunda Categoria. 
In s'interis si imparassu a forti!




Attività realizzata col contributo della Regione Sardegna. IMPRENTAS 2025-2026. LR 22/2018 art. 22