Pro su dopo Padiglia, su Porto Corallo intregat sa panchina a su biddaputzesu Bruno Madeddu

Su Porto Corallo at seberadu su tècnicu a pustis de s’ischirriada cun Angelo Padiglia. Su presidente Franco Massessi at intregadu sa ghia de s’iscuadra a Bruno Madeddu, de 61 annos ex allenadore de su Villasimius (Prima categoria) chi connoschet bene meda sende istadu su primu tècnicu de sos grogu-nieddos in s’istajone de sa fundatzione de su club, su 2004-05. Su mister nadiu de Villaputzu at giai allenadu in Eccellenza, in s’istajone 2007-08, cando cun su Villasimius aiat tentu sa sarvesa serrende s’istajone regulare a su de tres ùrtimos postos ma binchende s’isparègiu playout contra de su Porto Rotondo bìnchidu in domo 3 a 1 mancari perdende a pustis 1 a 0 in Terranoa. De Madeddu a su Porto Corallo nd’aiant numenadu a comintzu de austu ma posca su tècnicu aiat renuntziadu a s’incàrrigu cando non fiat mancu comintzada sa preparatzione.