S’Atletico Uri torrat in su cùcuru, Muroni: “Cuntentu de su primadu ma a s’iscuadra pedo petzi de sighire gosi”

Giovanni Muroni est prima de totu un’òmine de grandu cultura in prus chi unu allenadore binchidore e a tretu de colare in sas paritzas generatziones de talentos e abarrare semper ampuladu mancari apat coladu dae carchi annu sa cuota de sos Setanta. E pro cummentare sa torrada a su cùcuru de s’Atletico Uri suo, binchidore de mesura in Selargius, mentovat a Socrate e a su ditzu suo “Connosche a tue etotu” pro dare impèllida a s’iscuadra a abarrare in ue est sena essire fora de mesura. “Belle 2500 annos a como –ammentat s’allenadore de sos grogu-rujos – b’est istadu chie at naradu custa fràsia “Connosche chie ses e non ti cumbincas chi ses de prus”.