Is scuadras de sa Promotzioni e de s'Ecellenza si nci ghetant a fundu e susu me is primus partidas de sa Copa Italia

E duncas, atacu a scriri custas rigas, e duncas s'artìculu chi teneis asuta de is ogus pròpriu in custu momentu, candu seus arribbaus, candu seus lòmpius (sèmpiri chi su calendàriu no est contendumì brullas, ma deu no pentzu. E du megu a narai po arriri, a su mancu unu pagheddeddu, isperu chi si cumprendat) a s'ùrtima cida (e fiat ora puru, s'at a megai calincunu de bosatrus) de su mesi de Agustu puru, ca po su chi mi pertocat, mi parit ca siat andendi ainnantis de calincuna cosa cumenti a bintises milla diis (e du megu a narai po arriri), e custu po su fai sciri, tra is atras cosas, ca s'istadi no est de seguru sa stagioni chi fait po mei: eia, mancai mi speddiat puru, sa basca e is diis longas, ma sa cosa durat, fortzis, po unu mesi, o duus, candu seu fortunau, poita cumenti ndi brintat su de otu mesis de s'annu (e, duncas, su mesi de agustu, chi apu arremonai immubagora, e mi parit bastanti craru puru), intzandus est cumenti chi totus is fortzas mi bessant aforas de su corpus, cumenti chi mi bengiat unu stampu, unu stampu mannu in sa brenti, ca si torrat a tupai feti candu ndi brintat s'atonzu, ca invècias, est sa stagioni innoi torru a partiri, cun gana bella e coru prenu, fintzas a cucuru, de isperas bonas. 

E duncas, su chi mi tocat a fai immoi est, po primu cosa, su de abertai ca su mesi de agustu acabit de si nd'andai, e no nc'at a ponni meda, fadendi su contu ca su lunis chi at a benni, su lunis de sa cida chi at a benni (po ddu narai mellus puru) at a essi giai su primu de su mesi de Cabudanni; e apustis, nc'at a essi de abertai atrus bintunu diis (e ita boleis chi siant?) po ndi fai brintai s'atonzu. 

Ma a narai sa beridadi (e de custa cosa mi nd'ant chistionau giai un'amiga mia e un amigu miu), s'atonzu, po medas, incumentzat giai de sa primu dì de su mesi de Cabudanni, ca apu scobertu (propriu gràtzias a su chi m'ant contau is amigus cosa mia, e no nc'est modu mellus de scoberri is cosas de su de ndi chistionai cun is personas chi stimmas) ca s'atonzu climaticu (est a nai, est craru, su chi pertocat is temperaduras) incumentzat pròpriu de su momentu innoi si ndi andat su mesi de agustu. Po su chi pertocat su sobi (e seus chistionendi, duncas, de s'equinoziu, po ndi furai su fueddu de s'italianu), invecias, s'atonzu at a incumentzai, gei ddu scieis (gei ddu eis a sciri mellus de mei puru), feti su bintunu de su mesi de Cabudanni. 

Deu sciu feti, po mi torrai a acapiai a su chi s'apu narau ainnantis, ca ariseu (megu a chistinai de su lunis, fadendi su contu ca apu atacai a scriri cust'artìculu de martis, mancai nd'at a bessiri a pillu feti in su mengianu de su giòbia, cumenti a dònnia cida e, duncas, eia, cumenti a sèmpiri) mi ndi seu scidau ca fia totu acallellau, po sa basca, po primu cosa, chentza de sciri nemmancu poita, ca a mei s'ùrtima parti de s'istadi mi pigat diaici, mi pigat a addormigadura (po manigiai unu fueddu chi apu agatau immubagora pròpriu in su fueddariu, e diaici fadeus puru unu pagheddeddu de grammatica, ca mabi no si fait de seguru, e diaici manigiaus puru calincunu fueddu nou, est a nai, calincunu fueddu chi no apu mai manigiau), e diaici apu fatu: apu dromiu meda ma meda de prus de su chi fatzu in su fetianu, e candu m'agatu chentza fortzas, chentza gana, intzandus no potzu fai atru ca mi dda pigai cun passièntzia, cun lentesa, e abertai ca is cosas torrint a girai cumenti in gràtzias de Deus. Ca su de abertai, a bortas, est una faina maba de scroxai, ma deu sciu puru ca, eia, nci funt diis, nci funt cidas ca, mancai, po crupa de sa pagu gana, mi parint diis lègias; e candu mi capitat, candu mi sucedit, intzandus no nc'est atra mexina de su de abertai ca is cosas si torrint a aderetzai, abertai ca is cosas si torrint a aparixai. Ca a bortas bastat pagu po torrai a artziai sa conca, fintzas una tontesa de pagu contu, ca peròu ti podit agiudai a ti ndi torrai a pesai, a ti intendi, torra, cun s'umori artu: bastat un arregalu, fintzas una mesu tontesa (torra cun custu fueddu) de pagu contu, unu fueddu druci, una nova bona, una cosa de bonu chi ti nd'arribbat, duncas, mancai tui no ti dda abertis. 

E diaici mi tocat a fai, duncas, ca de su restu, cumenti mi megu a solu a solu, atru arrastu de sighiri, po oi, po custa cida, non di tèngiu: est a narai ca mi tocat a tenni passièntzia, abertai ca s'ùrtima basca de s'annu si ndi studit (chi mi permiteis de manigiai custus fueddus, e giogai unu pagheddeddu a fai su poeta e no feti su giornalista sportivu) e curri, eia, concas a sa primu giorronada de is campionaus, cun is giogus de s'Ecellenza e de sa Promotzioni chi ant a torrai a partiri su catodixi de su mesi de Cabudanni, po su chi pertocat is campionaus, poita po su chi pertocat sa Cupa Italia (cumenti dda tzerriaus, a trassa de cumenti si fait in italianu etotu) is giogus ant a partiri tra una pariga de oras, tra una pariga de diis, est a narai, custu domìnigu chi nd'at a arribbai (custa est sa ispera cosa mia) tra pagu (e chi at a serrai, ddu torru a scriri poita no mi parit nemmancu berus, is contus po su chi pertocat su mesi de agustu). 

E duncas, no potzu fai atru ca abertai ca is cosas mi torrint a girai mellus, e mancai is cosas m'ant a parri prus drucis cumenti nd'at a brintai unu pagheddeddu de friscura, ca, po serrai is chistionis acapiadas a su tempus (a su tempus chi passat e a su tempus chi est fadendi, e chistionaus mescamente de is temperaduras, mi parit bastanti craru, berus est?), potzu torrai gràtzias a su Cielu ca in custas ùrtimas diis ddoi funt feti (e naru feti unu pagheddeddu po brullai, e si cumprendit) trinta-trintaduus gradus, e no trintaseti, e fintzas trintotu, cumenti at fatu me in totus is cidas passadas. 

E duncas, si fia narendu, ca a bortas, mescamente candu mi intendu tristu, mi bastat pagu po mudai s'umori, e duncas eia, mi intendu cumenti a cussas scuadras de bòcia chi, mancai, perdint una bella biga de partidas (biga, po chini no ddu sciessit, est su fueddu ca innoi in Bidd'e Sorris, mescamente, manigiaus po narai "muntoni", o chi si praxit de prus, una cantidadi manna meda de calincuna cosa), totu de sighiu, una avatu de s'atra, ma apustis, cumenti ndi bincint, mancai feti una, intzandus torrant a partiri, mancai prus a forti de cumenti fiant fadendi ainnantis. 

E cussu chi isperu, a si nai sa beridadi, chi potzat sucedi me is diis chi ant a benni in su benidori, partendi mancai de sa dì de cras, ma sa crai de su giogu est sèmpiri sa pròpria: sa passièntzia, e duncas, deu creu ca, po cumenti mi intendu custu mengianu, a su mancu, totu su chi potzu fai est cussu de aguantai, de mi fai forti, e abertai ca is diis nieddas potzant passai. 

E duncas, apustis de essi chistionau de su tempus chi passat (e gràtzias a Deus, po oi puru, po custa cida puru, mi parit ca nd'eus chistionau bastanti), e de su tempus chi est fadendi (cun trinta gradus de temperadura no si podit de seguru narai ca s'istadi est spaciada, antzis), deu creu ca podeus incumentzai a arraxonai unu pagheddeddu apitzus de totus is novas chi ndi funt aproillendi de su mundu de sa bòcia, fadendi su contu, mescamente e po primu cosa, ca custu domìnigu passau ndi funt pròpriu torradas in campu is scuadras sardas chi ant a curri in su campionau de sa Sèrie D po sa stagioni duamilla e binticincu – duamilla e bintises, po su chi pertocat sa Copa Italia, e intzandus, po primu cosa, podeus andai a castiai, impari, chi seis de acòrdiu, cumenti ddis funt andadas is cosas, e apustis apa a depi mantenni sa promissa chi s'apu fatu sa cida passada (e sèmpiri in s'artìculu chi nd'apu pesau in sardu), chi fiat cussa de andai a castiai e a arraxonai apitzus de sa lista de su campionau de sa Sèrie D innoi agataus is scuadras de s'isula cosa nosta. 

E duncas, tocat a partiri pròpriu de is partidas de sa Copa Italia, cun sa isfida chi s'est giogada custu sabudu passau (ndi tenestus bintites, chi no seu fadendi mabi is contus, e megu a brullai, si cumprendit, berus est?) tra is meris de domu de su Budoni chi si dda funt dèpius biri contras a is de su Cos, sa scuadra de su Sarrabus – Ollastra: e duncas, sa partida s'est serrada cun su resultau de tres a unu po is piciocus sighius de Cerbone, chi immoi, apustis de essi bintu sa primu partida de s'annu, de sa stagioni noba, s'ant a atobiai cun is tattaresus de su Latte Dolce, po sa primu partida ufitziali de sa Cupa Italia (giai ca sa partida de sa cida passada fiat unu preliminari, cumenti seus costumaus a ddas tzerriai. 

E duncas, Cerbone est abarrau cuntentu meda po su chi ant fatu a biri in campu is piciocus cosa sua, e duncas, eia, est cuntendu po su resultau de tres a unu chi nd'est bèssiu aforas, ma a sa fini, e ddu scieus beni (poita nd'eus chistionau meda bortas) sa cosa de importu est cussa de mantenni is peis beni prantaus in terra (cumenti narat su dìciu, e cumenti naràt su dìciu in italianu puru, de su restu), sa cosa de importu prus mannu, duncas, est cussa de mantenni s'umilesa (o umilidade, chi si sonat mellus diaici). E duncas, Cerbone at scoviau a is giornalistas ca «de su restu seus sèmpiri chistionendi de partidas chi si giogant in su mesi de agustu, e duncas, si sciit beni, is partidas chi is scuadras giogant in s'istadi lassant su tempus chi agatant, cumenti si narat, chi cumprendeis su chi megu a si narai. Seus feti a s'incumintzu de sa stagioni noba, ma is giogadoris cosa mia si funt cumportaus beni meda in campu, mi parit de podi narai custu. Seus andendi ainnantis po su chi pertocat su modu de giogai, sa calidadi de su giogu, e, duncas, is giogadas si bessint beni, e chentza de trumentai prus de su tanti: custu bollit narai, po primu cosa, ca is piciocus funt incumintzendi a cumprendi ita bollu de issus, su chi mi abertu ca est, de su restu, su chi seus circhendi de fai giai de is primus allenamentus chi eus fatu. Is piciocus mi ascutant e faint de totu po torrai a fai, in campu, me is partidas uficialis, pròpriu su chi ddis domandu. Custas partidas, megu a chistionai de is primus partidas chi si giogant ainnantis de partiri cun is campionaus, serbint, pròpriu, a si fai cumprendi cali funt is cosas ca si podint bessiri mellus, cali funt is cosas innoi fadeus is sbàllius prus mannus; e duncas, seus trabballendi pròpriu po fai sparessi, po ndi bogai is cosas chi no andant beni, circhendi, invècias, e mi parit craru puru, de ammanniai sa cantidadi de is cosas chi si bessint beni. Seu prexau, po immoi si potzu narai feti custu: sa truma de giogadoris chi trabballat cun mei, chi est trabballendi cun mei, po ddu narai mellus puru, mi parit forti e giai abbili a regalai a is tifosus chi benint a biri is partidas unu giogu bonu. Tocat a s'arregodai, puru, ca sa rosa est mudada, e meda puru, de sa stagioni de s'annu passau: est a nai ca una biga manna de giogadoris chi ant giogau cun nosu, e nd'ant cassau sa bìncida de su campionau de s'Ecellenza e su sartidu de categoria, su sartidu in su campionau de sa Sèrie D, duncas, no nci funt prus; ma in sa fentana de su mercau de custa istadi is dirigentis funt stètius bonus, est a narai ca ant fatu unu trabballu bonu meda, e de importu, po circai de pigai totus is giogadoris chi potzant fai beni, chi si potzant donai una manu de agiudu po sa stagioni de su duamilla e binticincu – duamilla e bintises. Candu pigas una biga manna de giogadoris nous, est craru, serbit unu pagheddeddu de tempus, e si cumprendit, po aderetzai is cosas, po agatai sa formula mellus de giogai; nosu no teneus totu custu tempus, a narai sa beridadi, fadendi su contu ca su campionau at a partiri tra una parighedda de diis feti, ma potzu narai ca s'agataus in s'arrastu bonu, in sa bia bona. E immoi no depeus fai atru ca sighiri diaici. De su restu, binci is partidas praxit a totus e fait sèmpiri prexei, ma seus chistionendi sèmpiri de partidas chi si giogant in s'istadi, candu is scuadras no funt, e no podint essi, a su centu po centu po su chi pertocat sa forma, e megu a chistionai, mescamente, de sa cunditzioni atletica. Su chi seu circhendi de domandai a is piciocus cosa mia, intzandus, est cussu de no si fai pigai de su prexu, e mescamente, de s'afròddiu, poita, mi parit craru puru, po immoi no eus fatu pròpriu ancora nudda. Tocat a bobai arresenti arresenti de terra, cumenti si narat. Su campionau de cust'annu at a essi dificili meda, e nosu scieus giai ita totu s'abertat: eus a circai de narai su fueddu cosa nosta, est a narai, cun atrus fueddus, chi eus a circai de binci sa cantidadi prus manna de partidas, po circai de abarrai a is pabas de is scuadras prus fortis de sa lista, chi cumprendeis su chi si bollu narai. Po su chi pertocat, e po su chi pertocat, mescamente, sa Cupa Italia, sa cosa de importu prus mannu fiat cussa de passai su turnu, cumenti si iat a podi narai, est a narai, duncas, ca bolestus arribbai a si giogai sa primu partida uficiali e nci seus arrannèscius. De su restu, eus giogau in domu cosa nosta, est a narai, duncas, aranti de is tifosus de sa scuadra, e si cumprendit beni, bolestus giogai una partida toga, de importu, po torrai gràtzias, po primu cosa, a totus is chi s'ant sighiu, e ballit po s'annu passau, ma ballit, mescamente, po s'incumintzu de custa stagioni etotu. Immoi teneus sa possibbilidadi de torrai a cabai in campu po un'antra partida uficiali, e custu s'at a permiti de fai gigoai, po atrus noranta minudus, totus cussus giogadoris chi tenint su bisòngiu de pigai cunfiantza, ddi naru diaici, cun is cumpangius nous, e duncas, seu chistionendi, est craru, de totus cussus giogadoris chi funt arribbaus in sa scuadra cosa nosta de pagu. A custu puntu de sa preparatzioni atletica, e mi parit bastanti craru, nci funt piciocus chi no funt ancora arribbaus a su centu po centu; e s'unica cosa chi si podit fai, duncas, est cussa de sighiri cun is allenamentus, cun su trabballu, e mancai, cun is partidas contras is atras scuadras. Po su chi si pertocat, si iat a praxi a sighiri a andai ainnantis po su chi pertocat sa Cupa Italia: in conca teneus sa bidea de si giogai is partidas cun coràgiu, chi cumprendeis su chi si bollu narai, poita chi ti benit a mancai su coràgiu, custa est sa cosa chi eus imparau de su campionau chi eus giogau in Sèrie D duus annus fait, intzandus is cosas si faint difìcilis meda, e no arrannescis a fai beni cumenti, mancai, iast a podi, e nosu no si ddu podeus permiti de seguru. E megu a chistionai, eia, de su fatu ca no si podeus permiti de sbàlliai torra in su campionau de sa Sèrie D, cumenti est sucèdiu, de su restu, duus annus fait». 

E sèmpiri po su chi pertocat sa Cupa Italia, cumenti s'apu giai arremonau ainnantis, in custu artìculu etotu, in campu custu domìnigu passau ndi funt cabaus puru is de su Muristeni, cun is campidanesus chi funt dèpius andai a giogai in domu de is de s'Unipomezia, una scuadra de su Làziu. Sa partida s'est serrada, e si dispraxit meda meda, est craru (ca nosu chi trabballaus po su Diàriu Sportivu fadeus sèmpiri su tifu po is scuadras sardas), cun su resultau de tres a unu po is meris de domu: su primu tempus s'est serrau cun su resultau siddau in paridadi, in su segundu tempus, invècias, is de su Muristeni ant agatau su gol de s'unu a zeru, e duncas, su gol chi est bàlliu po su vantàgiu, gràtzias a unu tiru de is undixi metrus scutu de Aloia. Ma a su de corantases minudus, eia, candu su segundu tempus fiat acanta acanta de acabbai, is de s'Unipomezia nd'ant cassau s'unu a unu gràtzias a su cropu de conca scutu, de acanta acanta a sa porta, cumenti si narat, de Bordi. Apustis de su segundu tempus, a is duas scuadras est tocau a bati is tirus de is undixi metrus (cumenti si iat a podi narai, furendindi sa trassa de s'italianu etotu) e po crupa, po su prus, de sa maba sorti, is de su Muristeni no nd'ant intzertau nemmancu unu; e duncas, a fai is contus nci poneus pagu meda, sa partida s'est serrada cun su resultau de tres a unu po is meris de domu de s'Unipomezia. 

E duncas, immoi is de s'Unipomezia si dda ant a depi biri, custu domìnigu, contras a un'antra scuadra sarda, e seus chistionendi de is de s'Olbia, chi ant a depi andai a giogai aforas de domu, in domu, duncas, de is latzialis etotu. E invècias, is de su Budoni si dda ant a depi biri, cumenti s'apu arremonau giai, contras a is de su Latte Dolce, po su segundu derby de sighiu (cun derby, si ddu arregodu, is ingresus tzerriant is partidas tra duas scuadras de sa pròpriu citadi, de sa pròpriu regioni, o de su pròpriu stadu puru, a segunda de sa situatzioni). Po su chi pertocat su campionau de sa Série D, invècias, is giogus ant a torrai a partiri su seti de su mesi de Cabudanni, una cida ainnantis de su chi ant a fai, de su chi at a tocai a is scuadras sardas chi ant a curri in su campionau de s'Ecellenza e in su campionau de sa Promotzioni. 

E immoi chi nci seus, fadendi su contu ca dònnia promissa chi fadeus ballit, a sa fini, cumenti a unu dèpidu, andaus a castiai, impari, e si cumprendit, cumenti funt cuncodradas is cosas po su chi pertocat sa Lista G (chi s'apu giai arremonau de su restu) de su campionau de sa Sèrie D, chi est cussa (megu a chistionai de sa lista, si cumprendit berus?) innoi agataus is cincus scuadras sardas. 
E duncas, impari a is de s'Olbia, ant a curri is de su Cos – Sarrabus – Ollastra (ca eus arremonau ainnantis, candu eus chistionau de is primus partidas chi pertocant sa Cupa Italia) e is de su Latte Dolce, chi s'ant agatai, s'una aranti de s'atra, in sa primu giorronada. Is de s'Olbia, invècias, si dda ant a depi biri contras a is de s'Albalonga, in domu allena. Serraus is contus de is scuadras sardas, arremonendi is de su Budoni e is de su Muristeni, chi s'ant a agatai, is unus contras a is atrus, pròpriu po sa primu partida de su campionau po sa stagioni de su duamilla e binticincu – duamilla e bintises. 

E duncas, arribbaus chi seus a custu puntu de is chistionis, deu creu ca sa cosa mellus chi si potzat fai est cussa de sighiri a castiai, impari, est craru, cumenti funt cuncodradas is cosas po su chi pertocat su campionau de sa Primu Categoria, fadendi su contu ca de sa Sèrie D, cumenti si ia promìtiu, nd'eus chistionau bastanti beni, e fadendi su contu, pruschetotu, ca de s'Ecellenza e de is duas listas chi faint parti de su campionau de sa Promotzioni si nd'apu chistionau (apu acutu a si ndi chistionai, po ddu narai manigendi atrus fueddus) in s'artìculu de sa cida passada. 

E duncas, sa primu cosa chi si potzu narai, sa cosa de importu prus mannu, est ca is giogus po su chi pertocat sa Primu Categoria ant a partiri, feti, me in s'ùrtima cida de su mesi de Cabudanni, est a nai, duncas, su bintotu, chi est, a fai is contus nci poneus pagu pagu meda, tra unu mesi. 
E no biu s'ora, chi si depu narai sa beridadi, chi ndi brintit su mesi de Cabudanni (isperendi chi si portit, puru, giai chi nci seus, unu pagheddeddu de friscura, ca de sa basca, chistionu po mei, est craru, no ndi potzu prus), e no m'abarrat atru de fai ca abertai calincuna atra dì, ca nci seus giai giai po lompi. 

E duncas, megamu a s'arremonai de sa Primu Categoria ca, po cust'annu puru (est a narai, duncas, po sa stagioni de su duamilla e binticincu – duamilla e bintises) est stètia pretzida in cuatru listas, cun sexi scuadras in dònnia una, po calincuna cosa cumenti a otu partidas a sa cida, trintaduus in totu. E duncas, po su chi pertocat sa Lista A, sa nova prus manna nd'arribbat de is scuadras chi funt stètias piscadas torra (cumenti mi benit de furriai, in sardu, su fueddu ca in italianu sonat cumenti a: ripescata), e seus chistionendi de is de s'Academia Sulcitana (ca s'annu passau, est a narai in sa stagioni de su duamilla e binticuatru – duamilla e binticincu, chi no si ddu arregodais deu seu innoi pròpriu po custu, funt arribbaus a is pabas de is deximesus de sa Decimo 07, a su segundu postu) e de is de su Biddamanna Strisailis, ca ant a curri, impari e contras (a bosatrus scerai su fueddu chi si praxit de prus, chi si torrat mellus) a is de s'Azzurra de Pauli (unu de is assòtzius ca at fatu a biri is cosas prus togas in custus ùrtimus annus), is de sa Bariese, is de su Deximeputzu, is de su Cardedu (chi ant bintu su campionau cosa insoru, est a narai, duncas, eia, ca ant serrau sa stagioni de s'annu passau a su primu postu de sa Lista C in su campionau de sa Segunda Categoria, est craru), is de sa Deximu 07 (chi ant bintu, issus puru, su campionau cosa insoru, in sa Lista B, peròu, e sèmpiri de su campionau de sa Segunda Categoria), is serramannesus de sa Gialeto, is de sa Gioventù de Sarroch (primus in sa Lista A, sèmpiri de su campionau de sa Segunda Categoria), is de s'Idolo de Arthana (ca fintzas a s'annu passau curriant in su campionau de sa Promotzioni, innoi funt abarraus po una bella parighedda de annus), ca cust'annu ant a torrai a partiri cun un allenadori bravu cumenti est Marcello Guerriero; is casteddaius de La Palma, ca s'annu passau funt arrannèscius a ndi cassai sa sarvesa, gràtzias, puru e mescamente, a su trabballu bonu meda chi est arrannèsciu a fai Riccardo Spini (ca cust'annu, peròu, at a sighiri is fainas de is de sa Deximu 07, chi eus arremonau immubagora, tra is atras cosas). In sa Lista A po su chi pertocat su campionau de sa Primu Categoria agataus puru is cuartesus de su Cuartu 2000, is de su Santu Idu (chi ant donau is crais de sa scuadra, torra, a Angelu Padiglia, chi est, de su restu, s'allenadori chi at sighiu su progetu in totus custus ùrtimus annus), is de su Sestu, is de su Tertenia (ancora cun Daniele Salerno setziu in sa panchina, cumenti si iat a podi narai, e cumenti seu narendi, difatis) po serrai cun is de s'Ulassai. Duncas, in sa Lista A, chi fadeus beni is contus (e a fai beni is contus nci poneus cuatru segundus, no unu de prus, e megu a brullai, gei si cumprendit), ddoi funt cincu scuadras, apitzus de is sexi chi faint parti de sa lista, chi nd'arribbant deretas deretas de sa Segunda Categoria, cun totu cussu chi custu pertocat. 
Po sa Lista B, agataus, invècias, is de s'Antiochense de Calasetta, is de s'Arbus Costa Verde, is de s'Atleticu de Masainas, is de sa Don Bosco Fortitudo, una de is scuadras chi ddoi funt in Gùspini (sa scuadra prus manna currit in su campionau de sa Promotzioni), is de su Gonnosfanadiga, is de s'Isili, is de sa Libertas de Barumini, is de s'Orrolese (chi ndi funt cabaus pròpriu cust'annu de su campionau de sa Promotzioni, apustis de annus e annus innoi ant giogau in su segundu campionau sardu); is de su Perdaxius, is de su Sadali, is de su Santadi, is de su Santa Giusta, is de su Segariu, is carlofortinus de sa Verde Isola, is de su Biddamatzràxia, e is de sa Virtus de Futei, ca (chi si ddu arregodais, desinò nci pentzu deu, cumenti a sèmpiri, a si ddu arregodai) s'annu passau funt arribbaus a su primu postu in sa Lista D de su campionau de sa Segunda Categoria. 
E sigheus, mancai, a andai ainnantis cun sa Lista C, e andaus a castiai cumenti funt cumbinada is cosas: tra is sexi scuadras, agataus, po incumentzai, is de s'Abbasanta (chi ndi funt cabaus pròpriu cust'annu de su campionau de sa Promotzioni), is de sa Bittese, is de su Botidda, is de sa Corrasi de Ulìana), is de sa Dorgalese, is de sa Fanum de Orosei, is de su Fonne, is de sa Lulese, is de su Macumere (chi funt stètius piscaus torra de su campionau de sa Segunda Categoria); is de s'Oschirese, is de su Patada, is de sa San Marcu de Crabas, is de sa Sanverese, is de su Silanus, is de sa Montalbo de Thiniscole, e is de su Supramonte (issus puru funt stètius piscaus torra de su campionau de sa Segunda Categoria). 

E serraus sa chistioni acapiada a sa Primu Categoria, andendi a castiai cumenti funt cuncodradas is cosas po su chi pertocat sa Lista D (chi est s'ùrtima). E duncas, agataus is de su Atleticu de Sorso (chi s'annu passau funt arribbaus a su primu postu de sa lista cosa insoru, in su campionau de sa Segunda Categoria), is de su Badesi, is de sa F.C de Alghero (una de is scuadras chi ddoi funt in sa citadi de s'Alighera, mi parit bastanti craru, berus est?), is de s'Ittiri, is tattaresus de sa Lanteri, is de su Lauras, is de su Malaspina, is de su Monte Alma, is de s'Olmedo, is de su Ploaghe, is de su Porto Torres, is de sa San Paulu de Tattari, is de su Sennori, is de su Siligo, is de su Sorso (chi funt stètius piscau torra, apustis chi ant serrau sa stagioni de s'annu passau a su segundu postu de sa lista cosa insoru, a is pabas, pròpriu, de is fradibis de s'Atleticu de Sorso, po una de is isfidas, de is batallas prus togas, chi at fatu prus ispantus, in totu su mundu de sa Segunda Categoria e, fait a ddu narai, in totu su mundu de is giogadoris de bòcia diletantis sardus). E serraus is contus po su chi pertocat sèmpiri sa Lista D, cun is de su Valledoria (o Codaruina, chi si praxit de prus cumenti sonat, scritu in gadduresu e tattaresu, o Cogas, po ddu narai a sa sarda). 
E duncas, po oi si potzu narai ca po su campionau de sa Primu Categoria nc'est meda afròddiu: funt in medas, difatis, cussus chi pentzant chi cussu de su duamilla e binticincu – duamilla e bintises potzat essi unu de is campionaus prus spassiosus, a su mancu fadendi su contu de is ùrtimus annus, po primu cosa poita is scuadras fortis no ammancant de seguru, e po segundu poita is scuadras chi, in dònnia lista, podint curri po ndi cassai su primu postu ant a essi, a su mancu, cumenti a minimo, cincu o ses. 

E duncas, si promitu, giai de immoi, chi eus a chistionai mellus de totus is scuadras chi ant a curri me is campionaus de sa Primu Categoria de cust'annu, partendi, mancai, pròpriu de cussas scuadras chi funt stètias torradas a piscai, e chi tenint s'afròddiu prus mannu. E s'afròddiu, si cumprendit, no est feti su de is giogadoris, o de is allenadoris, ma chistionaus, puru, de totus is tifosus, ca no bint s'ora, diaderus, cumenti si narat, de torrai a andai a su campu po castiai is partidas. 

E duncas, de sa cosa (est a narai, de su campionau chi at a torrai a partiri tra unu mesi, prus o mancu) nd'apu chistionau, me is cidas passadas, cun su diretori sportivu de s'assòtziu campidanesu, Maurizu Carta, chi at trabballau, impari a is atrus collegas cosa sua chi faint parti de sa dirigenza, in totus is cidas passadas, po circai de cuncodrai una rosa forti, e toga, chi potzat curri, e beni, in su campionau de sa Primu Categoria, chentza tropus strobbus, sa ispera est pròpriu custa e, mancai, chi potzat serrai sa stagioni me is primus postus de sa lista. Is de sa Deximu 07, cumenti s'eis a arregodai beni, ant bintu su campionau cosa insoru de sa Segunda Categoria, cun Albertinu Melis sètziu in sa panchina, e po cust'annu ant a circai de fai totu su beni chi ant a podi in su campionau de sa Primu Categoria puru, cun is crais de sa scuadra chi funt stètias donadas a Riccardo Spini (chi apu arremonau ainnantis puru), unu de is allenadoris prus abbilis, ddi naru diaici, chi nci funt in dì de oi in totu su mundu de is assòtzius de bocia, e chistionaus, est craru, sèmpiri e feti de is diletantis. «S'annu passau, mi parit de podi narai custu, eus fatu unu trabballu bonu meda – m'at contau Mauriziu Carta, chi apustis at aciuntu: e custu s'at permìtiu de ndi cassai, torra, s'artziada in su campionau de sa Primu Categoria. Totus is dirigentis pentzant ca custa siat su campionau, est a narai, duncas, sa categoria, chi potzat andai beni po s'assòtziu sportivu, e chistionaus, est craru, de su giogu de sa bòcia, chi pertocat una bidda chi fait otu milla cristianus, e no funt pagus, e si cumprendit. Sa bidda de Deximu si ddu minesciat, est a narai, duncas, si minesciat de tenni una scuadra de bòcia chi currat in su campionau de sa Primu Categoria. Parteus, duncas, de totu is cosas prus togas chi eus fatu a biri s'annu passau, ma scieus, e si ndi rendeus contu a solus, ca seus is ùrtimus arribbaus, cumenti si iat a podi narai, fadendi su contu ca ndi seus artziaus in su campionau de sa Primu Categoria, torra, apustis de una bella pariga de annus, feti in custa stagioni. E duncas, scieus giai ca is strobbus no ant a mancai de seguru. De sa bidea chi mi seu potziu fai – at sighiu a mi contai Carta – is giogus in sa Lista A ant a essi bellus cantu difìcilis, cumenti, mancai e fortzis, no est mai stètiu, a su mancu chi fadeus is contus de custus ùrtimus annus. Is scuadras fortis funt una bella pariga, est craru, e nci funt medas scuadras chi podint curri, e ant a curri, po ndi cassai su primu postu de sa lista. Po su chi pertocat sa scuadra cosa nosta, teneus totu sa gana bella de ndi pesai unu trabballu fatu in gràtzias de Deus, chi cumprendeis su chi si bollu narai, ma s'umilesa no s'at a depi mancai mai. Eus a circai de abarrai in su campionau de sa Primu Categoria, est a narai ca, est craru puru, po primu cosa parteus po ndi cassai sa sarvesa; eus a circai de no ndi cabai torra in su campionau de sa Segunda Categoria, e custu po incumentzai. Ellus, si iat a praxi a abarrai in sa parti prus arta de sa lista, circhendi, mancai, de no depi sunfriri tropu po ndi cassai sa sarvesa; ma eus a biri cumenti ant a andai is cosas. Sa primu cosa chi eus a circai de fai, a su mancu po su chi pertocat is primus cidas, is primus mesis de giogu, at a essi cussa de circai de mellorai de giorronada in giorronada; candu eus a lompi a is mesis de gennàrgiu e friàrgiu, intzandus, eus a cumprendi mellus innoi eus a podi arribbai. Eus a cumprendi, duncas, cali campionau ndi podeus pesai». Is crais de sa scuadra, cumenti s'apu giai arremonau, de su restu, funt stètias donadas me is manus de Riccardo Spini. «Est stètiu su primu, e s'ùnicu allenadori chi eus circau po ddi donai is crais de sa rosa cosa nosta; est stètiu su primu chi tenestus in conca, fadendi su contu ca ddu stimmaus meda, ma meda, siat po su trabballu chi at fatu in totus custus ùrtimus annus, me is scuadras innoi est andau a allenai, e siat po sa persona toga e bona chi est. Nci eus postu calincuna cosa cumenti a mes'oredda de tempus a agatai s'acòrdiu cun issu; e de su restu si seus agataus acoitu in su pròpriu arrastu, est a narai, mellus, ca tenestus is pròprias bideas apitzus de sa rosa de cuncodrai e, mescamente, apitzus de sa stagioni chi ndi boleus pesai. Teneus sa pròpriu gana de ndi pesai una stagioni de importu, sa pròpriu bidea de giogu in conca; eus a trabballai po ndi cassai is resultaus prus mannus, prus togus, fadendi su contu, peròu, ca in campu ndi cabant puru is scuadras de is aversàrius, e duncas, est craru, no curreus de segurus a solus. Ma cumenti s'apu narau ainnantis, su primu fueddu chi eus a depi tenni in conca est cussu de abarrai umilis, cun is peis beni prantaus in terra, cumenti si narat». 

E duncas, arribbau a custu puntu de sa chistioni, no m'abarrat ca serrai s'artìculu cun s'ùrtima nova chi tèngiu po bosatrus, po custa cida: e duncas, sa nova est frisca frisca, fadendi su contu ca pròpriu in su merì de su mercuis de su bintiseti, is biancu-nieddus de s'Ossese ant bintu sa Super Copa, gràtzias a su tres a zeru chi ant scutu in faci (ddi naraus diaici) a is de su Coghinas: is duas scuadras s'annu passau iant bintu sa Copa Italia po su chi pertocat s'Ecellenza (seus chistionendi, est craru, de is de s'Ossese) e cussa chi pertocat sa Promotzioni (seus chistionendi de su Coghinas) e cun sa partida chi s'est giogada ariseu ant fatu partiri, ant fatu incumentzai sa stagioni de giogus po su chi pertocat su duamilla e binticincu – duamilla e bintises. Is gol funt stètius pesaus de Filippu Mascia, chi a su de bintises minudus ndi cassat su puntu chi ballit po s'unu a zeru; in su segundu tempus, apustis de dexiotu minudus, Gueli agatat puru su puntu de su duus a zeru cun unu tiru scutu de centrucampu. A su de trintases minudus, invècias, nci pentzat Di Pietro a serrai sa chistioni. 

E deu, invècias, cun custu serru s'artìculu po su chi pertocat s'ùrtima cida de su mesi de agustu, e custu bollit narai, duncas, ca si torraus a intendi (a ligi, mellus puru) tra seti diis, chi su Cielu at a bolli custu beni po mei puru, est a narai, duncas, giòbia chi at a benni, candu eus a essi giai in su mesi de Cabudanni.





Attività realizzata col contributo della Regione Sardegna. IMPRENTAS 2024-2025. LR 22/2018 art. 22