Su giogu de sa bòcia est una chistioni de stima e de afrodhiu: pròpriu po custu isperaus chi is campionaus de is diletantis potzant torrai a partiri allestru

Po s'ùrtimu articulu chi fadeus bessiri aforas in su mesi de Donniasantu, po is Novas de DiarioSportivo, scritas in lìngua sarda de su Campidanu de mesu, obeus chistionai de passioni, e pruschetotu de stima, po unu giogu, cussu de sa bòcia, chi acapiat (tra de issus), trumas e trumas de personas, de dònnia edadi, in dònnia logu de su mundu.

Pagu importat, po sa chistioni nosta, chi siant pipius chi giogant in su corratzeddu apabas de domu, tanti po si spreviai e si spassiai, o chi siant is grandu campionis de sa Sèrie A: sa gana chi serbit e chi nci ponint a curri avatu a sa bòcia, sa fortza chi nci ponint a pigai a carvadas de pei su balloni, a nosu si parit de sa pròpria genia.
Ballit po is tifosus puru: po sa nosta chistioni, andai a castiai una partida de Primu Categoria in sa bidda acanta, o si setzi me is cadiredhas de su istadiu de San Siro, in Milano, po sighiri mancai su chi tzerriant "derby" tra Milan e Inter (po nd'arremonai unu), est aguali, poita seus chistionendi de is sentidus de sa genti.
Funt is sentidus, duncas, e is passionis, chi faint movi sa genti e, duncas, su mundu.

Seus scriendi custus fueddus, e fadendi custus arrexonamentus, sa dì apustis de sa morti de Diego Armando Maradona, unu de is prus mannus giogadoris de bòcia de totus is tempus, unu giogadori chi at fatu bessiri foras de conca is tifosus de su Nàpoli e de totu s'Argentina, cun is giogadas chi arrennesciat a fai in campu. Chi su giogu de sa bòcia est unu de is prus stimaus de sa genti, è duncas gratzias puru a is maxias chi su "numeru dexi" arregalat a totus cussus chi andànt a dhu castiai.

In custas cidas, in s'interis chi is giogus po is diletantis in Sardinnia abarrant studaus, seus circhendi de cumprendi candu, e mescamente cumenti, ant a podi torrai a partiri is campionaus.
Po calincunu, fortzis fiat stau mellus mancu a dhus incumentzai, contendi is dannus e is arroris chi su Covid est sighendi a fai in sa vida de sa genti, partendi de su mesi de Martzu fintzas a arribai a oi.
Ma a chistionai diaici, e apustis serraus sa chistioni, si ndi scaresceus de totu s'afrodhiu chi is giogadoris (pruschetotu is prus giòvanus) teniànt in su mesi de Agustu, cadu funt torraus a partiri is allenamentus, e mescamente in su mesi de Cabudanni, cun is campionaus.
Poita sa vida de sa genti, e de is piciocheddus, andat ainnantis gratzias a s'afrodhiu.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020