Sa stagioni est giai giai po acabbai: si giogant is partidas finalis e is de su Cr Arborea nd'ant cassau s'artziada in su campionau de sa Primu Categoria

E duncas, a cantu parrit su tempus s'est fatu torra malu: atacu diaici, po s'artìculu de custa cida, fadendi su contu ca est sa primu cosa chi biu aforas de sa fentana de s'aposentu innoi abarru, po oras e oras (po oras e oras de sighiu) a trabballai, est a narai, duncas, a cracai butoneddus apitzus de sa tastiera po ndi pesai su tanti de rigas chi ndi sforru dònnia dì, dònnia cida, e dònnia mesi; e duncas, eia, de su chi mi parrit de biri, prus ca s'agatai in Sardìnnia, in su mesi de maju, parrit giai giai de s'agatai in Scozia, o in Olanda, in su mesi de donniasantu, o de martzu; e duncas, eia, su cielu est prenu de nuis, ca parint grais e fatas de ferru, e custu mengianu at fatu puru una parighedda de stiddius, nudda de malli, no nci funt stètius dannus, e gràtzias a Deus, ma su dannu prus mannu, a su mancu po su chi mi pertocat, ddu tengu a s'umori, cumenti si iat a podi narai: mi intendu grai e stracu, e fadiau, e cun pagu gana in cropus, e est una cosa chi mi capitat, chi mi sucedit dònnia, dònnia annu in custu perìodu etotu, e duncas nc'est pagu de si preocupai, cumenti si iat a podi narai, fadendi su contu, de su restu, ca sa regula, sa letzioni dda apu imparada beni (dda apu imparada a memoria, si iat fintzas a podi narai): candu mi intendu diaici, fadiau e stracu giai giai chentza de nesciunu motivu, intzandus depu feti abertai chi is cosas si torrint a fai bonas. Ca serbit tempus. 
E cumenti ndi brintat su beranu (mancai su beranu ndi siat brintau prus de unu mesi e mesu fait, a fai beni is contus), intzandus mi intendu cumenti chi tenessi unu stampu, una forada in mesu in mesu a is piturras, e mi parrit, giai giai, ca totus is fortzas mi nci bessant aforas de su cropus, de cussu stampu etotu. E custu bollit narai, duncas, ca seu drommendi unu pagheddeddu de prus de su chi seu costumau a fai, e is diis mi parrint prus apicigosas, chi cumprendeis su chi seu circhendi de si narai. E si potzu contai, puru, immoi chi nci seu, ca su de mi ponni a scriri (su de depi scriri, po essi prus pretzisus puru) custas rigas, in sardu campidanesu (in su sardu chi si chistionat e si fueddat innoi in Bidd'e Sorris, in su Campidanu de mesu, po narai totus is cosas in sa manera mellus chi si podit) mi iat a podi agiudai a mi ndi scidai, a mi torrai a ponni in setiu, in su setiu giustu, chi est su chi mi auguru, a su mancu immoi. Ca su de ndi pesai custu artìculi iat a podi essi, iat a podi balli a trassa de una terapia, e mancai, cumenti apa a acabbai de ddu scriri, e de ddu pesai, mancai m'apa a intendi unu pagheddeddu mellus. 
Ca a bortas bastat pagu, e gei ddu eis a sciri mellus de mei puru: candu no ti intendis beni, candu ti parrit de tenni su coru prenu a cucuru de tristura (o de tristuras, ca su fueddu sonat beni, e fintzas mellus, a su plurali), a bortas bastat feti a ndi chistionai cun calincunu, cun unu amigu, o cun un'amiga, po di intendi su coru prus lèbiu puru, mancai. 
E mancai, chi deu ndi bogu aforas custus pentzamentus lègius (e grais) chi m'agatu badda badda in conca, mancai apustis m'apa a intendi unu pagheddeddu mellus.

E duncas, eia, megamu a si contai ca no sciu, nemmancu deu, poita mi intendu diaici stracu, ma mancai, candu at a scurigai, e candu su sobi nd'at a cabai a is pabas de is montis de Biddacidru (chi est cussu chi si biit, dònnia merì, de innoi de Bidd'e Sorris), mancai m'apa a intendi su coru torra selenu. E duncas, eia, s'apa fai a sciri, sa cida chi at a benni, candu nd'apa a pesai un antru artìculu po is Novas de su Diàriu Sportivu, chi is cosas si funt postas mellus, est a narai, duncas, chi su coru miu s'at a essi apaxiau. 
Ca a bortas, si ddu torru a arrapiti torra, abbastat pagu po torrai a strantaxai sa conca (e sa letzioni benit a essi aguali po su chi pertocat su mundu de sa bòcia, e immoi nc'arribbu a si spiegai mellus puru ita seu circhendi de si narai); mancai, a bortas, abbastat una nova bona po ti donai torra sa fortza, sa gana bella, e s'umori druci; a bortas, eia, abbastat a s'atobiai cun una persona, o a bortas abbastat, mancai feti puru, su de arriciri unu messàgiu chi mancai ses abertendi de diora. 

E in su mundu de sa bòcia, benit a essi sa pròpriu cosa puru, e apustis chi dda acabbu de mi strollicai cun bosatrus, deu creu ca s'apa a contai, mancai, sa istoria, toga meda, de is de su Circulu Ricreativu de Arborea, ca si funt depius bìvi, ddi naru diaici, una segunda parti de sa stagioni, sa segunda parti de su campionau, chi est benida a essi meda prus fadiosa, meda prus dificili, de su chi s'abertànt, ma a sa fini nci dda ant fata diaici etotu, cumenti si narat, a ndi cassai sa bìncida de sa stagioni, mancai apant depiu giogai un'antra partida, un'antra partida in prus de is chi nci fiant de giogai po su campionau, e contras a is de sa Busachese, sa scuadra de Busache (e gei si cumprendit beni de su nomini deu creu). 

Ma torraus a nosu: de su tempus chi est fadendi, po custa cida puru si nd'apu chistionau bastanti (e su de si chistionai de su tempus chi est fadendi est una de cussas cosas chi fatzu dònnia cida, in dònnia artìculu chi ndi pesu po is Novas, e de su restu, chi nd'eis lìgiu a su mancu unu tra totus cussus chi nd'apu bogau aforas in custus ùrtimus duus annus, intzandus scieis beni de ita seu chistionendi), e de su tempus chi megat a passai, si potzu narai feti custu (chi est, de su restu, sa cosa chi tenia badda badda in conca in totus custas diis passadas): sa fini de su mesi de Abrili est stètia, giai giai, totu una festa, fadendi su contu ca su binticincu de su mesi de Abrili, chi fiat de sabudu, no si trabballat, e innoi in Sardìnnia nc'est festa (sa festa po sa dì de sa Sardìnnia, ca parrit, giai giai, unu giogu de fueddus po cumenti m'est bessida aforas sa cosa), a su mancu po is piciocus chi andant a iscola, su bintotu de su mesi de Abrili puru, e diaici eus fatu festa, fintzas a nci spundi a su primu de su mesi de maju, chi est sa dì de sa festa de is trabballadoris, e chi cust'annu nd'est arruta (ddi naru diaici) de cenabara, e duncas, eia, seus torraus a partiri, apustis de totus custas festas (e de totus custus pontis) pròpriu custu lunis passau, chi fiat su cuatru, e immoi fia fadendi is contus ca no nc'ant a essi prus festas fintzas a su duus de su mesi de lampadas, chi at a essi de martis (e duncas, eia, su lunis, chi at a essi s'unu, nci iat a podi essi un'antra dì de pàsiu, e de festa; un antru ponti, si iat a podi narai diaici puru); ma po nc'arribbai a su duus de su mesi de lampadas (chi at a essi, cumenti eis a sciri mellus de mei, sa dì de sa festa de sa Repubbrica Italiana), s'eus a depi scroxai, dì po dì (po ddu narai prus a trassa de poeta, ca a trassa de giornalista, e isperu ca nesciunu tengiat calincuna cosa de murrungiai po su fueddu chi apu scerau), atrus bintitres diis a partiri de oi (a partiri de sa dì innoi ndi bessit aforas s'artìculu chi teneis asuta de is ogus), e bintitres diis, a fai is contus acoitaus, e meda puru, funt tres cidas, prus o mancu. 

E duncas, eia, si iat a podi narai custu puru, seus giai giai lòmpius a sa metadi de su tretu po su chi pertocat su mesi de maju, chi tenit trintunu diis, e duncas, eia, at a essi bellu longu e, chi is cosas ant a sighiri a andai diaici, at a essi puru bellu fadiosu, cumenti si iat a podi narai. 
E custu, duncas, po fai is contus de su tempus chi passat, e de su tempus chi si seus giai lassaus a is pabas, po su chi pertocat su duamilla e bintises. 
E po oi, mi parrit mi parrit ca tengiu sa conca sbuida: no s'apa a fai perdi su tempus chi, mancai, nemmancu teneis de perdi, cun contus, contixeddus e strollichiminis, ma apa a atacai, acoitu e allestru, cun is chistionis chi nd'arribbant de su mundu de sa bòcia e, duncas, cun is chistionis de importu prus mannu chi nd'arribbant de is campionaus pesaus de is de sa Federatzioni Italiana de su Giogu de su Càlciu, impari a is de sa Lega Natzionali de is Diletantis. 

E duncas, chi pròpriu si depu narai sa beridadi, in dì de oi s'ùnicu campionau chi est sighendi a andai ainnantis est cussu de sa Primu Categoria, ma si naru puru, acoitu, ca is giogus funt ancora obertus feti po su chi pertocat sa Lista A e po su chi pertocat sa Lista B, fadendi su contu ca po su chi pertocat sa Lista C is de su Macumere (cumenti s'apu giai contau me is cidas passadas, chi no mi megu a sballiai, e deu creu ca no mi seu sballiendi, e megu a brullai, si cumprendit, berus est?) ant giai serrau is giogus (e is chistionis) po sa cursa concas a su primu postu, e duncas, po su chi pertocat sa bìncida de su campionau; e su pròpriu ant fatu is de su Monte Alma (sa scuadra chi nd'ant pesau in Nujvi), in sa Lista D, chi ant bintu su campionau cosa insoru tres giorronadas ainnantis de sa fini de sa stagioni regulari. 
E duncas, custu bollit narai ca abarrant obertus is campionaus de sa Lista A (e megaus a chistionai, est craru, sèmpiri de su mundu de sa Primu Categoria), e is campionaus de sa Lista B puru: in sa Lista A is giogus funt benendi a essi spassiosus meda, chi est berus (cumenti est berus...) ca is de sa Deximu 07, chi s'agatànt a su primu postu fintzas a sa cida passada, ndi funt arrutus in sa partida chi ant giogau in domu de is fradibis (ddus tzerriu diaici, fadendi su contu ca is duas biddas funt giai giai apicigadas, fadendi su contu ca nc'ant essi cincu-ses chilometrus de tretu a ddas dividiri) de su Deximeputzu, e immoi a su primu postu de sa lista agataus duas scuadras: is de s'Academia Sulcitana, sighius de Andrea Loi, e is de sa Gioventudi de Sarroch, sighius de mister Falco. E is deximesus, invècias, s'agatant (est a narai ca ndi funt lisciaus), in dì de oi, a su segundu postu de sa lista, cun unu puntixeddu in mancu de is chi tenint is aversàrius. E immoi is cosas s'ant a decidi me is ùrtimus noranta minudus chi nci funt ancora de giogai. 

E sa pròpriu cosa ballit po sa Lista B, innoi a su primu postu funt torraus is de s'Atleticu de Masainas, cun is de s'Antiochense ca, peròu, ddis abarrant apicigaus a is carronis, cumenti si iat a podi narai, cun is duas scuadras chi tenint feti duus puntixeddus de diferèntzia. 
E in s'interis ca is scuadras de sa Segunda Categoria ca nd'ant cassau su segundu postu in sa lista (cun is campionaus chi funt acabaus s'ùrtimu domìnigu de su mesi de abrili) funt gioghendi is partidas finalis (eia, si ddu torru a arrapiti, ca mabi no s'at a fai de seguru: seus chistionendi de is partidas ca seus costumaus a tzerriai, a sa moda de is ingresus, play-off), is de sa Cr Arborea (Circulu Ricreativu de Arborea, po scriri su nomini de sa scuadra totu interu, po si cumprendi mellus) ant bintu sa partida chi ant giogau, pròpriu custu domìnigu passau, contras a is de sa Busachese (sa scuadra, si cumprendit bastanti beni deu creu, chi nd'ant pesau in Busache), fadendi su contu ca is duas scuadras ant serrau sa stagioni regolari (cumenti si iat a podi narai) a su primu postu de sa lista, impari a is de s'Ales, ma custus ùrtimus ndi funt cabaus a su de tres postus poita iant pèrdiu is partidas chi iant giogau pròpriu contras a is de sa Cr Arborea e de sa Busachese. 

Custas duas scuadras, duncas, ndi funt cabadas in campu po giogai un'antra partida, chi est serbida, duncas, po donai (m'est bènniu de ddu narai diaici) sa bìncida de su campionau. E a sa fini, apustis de centubinti minudus de giogu, a fai sa festa, sa festa manna, funt stètius is piciocus sighius de Alessandru Deplano (e duncas, eia, seu chistionendi pròpriu de is de sa Cr Arborea), fadendi su contu, po incumentzai, ca apustis de is noranta minudus de giogu su resultau fiat de unu a unu: is primus a agatai, a ndi cassai su gol funt stètius is de su Cr Arborea, ma candu ammancànt feti tres minudus po acabbai sa partida, is de sa Busachese funt arrannèscius a ndi pesai su gol de s'unu a unu; me is tempus suplementaris (cumenti si iat a podi narai, furendindi su fueddu, e sa trassa, de s'italianu etotu), invècias, is duas scuadras si dda funt gherrada, ma su resultau no est mudau; e duncas, funt serbius is tirus de is undixi metrus, cun is de su Cr Arborea chi no nd'ant sballiau nemmancu unu, e invècias is de sa Busachese nd'ant sballiau duus, ma nc'est de narai, po incumentzai, ca su portieri de is de sa Cr Arborea est stètiu abbili meda, chi cumprendeis su chi seu circhendi de si narai. 

E apustis de sa partida, cumenti fadeus (e megu a chistionai de mei e de is collegas cosa mia puru, mi parrit bastanti craru), de su restu, dònnia cida, apu intendiu, a su telefunu, a s'allenadori de is grogus-asullus, Alessandru Deplano, ca m'at contau cumenti ddis funt andadas is cosas cust'annu. 
E deu creu ca sa cosa mellus chi si potzat fai, est cussa de si intregai is fueddus chi m'at regalau Deplanu, diaici ndi podeus arraxonai impari. «Custu domìnigu passau, chi pròpriu si ddu depu narai, tenestus su coru prenu, fintzas a cucuru, de afròddiu, chi cumprendeis su chi seu circhendi de si narai – m'at scoviau Alessandru Deplanu candu at incumentzau a mi contai de sa isfida contras a is de sa Busachese -, e deu creu ca sa cosa si potzat cumprendi beni, fadendi su contu ca me in custus ùrtimus noranta minudus si giogastus sa stagioni intera e duncas, sa bìncida de su campionau, fadendi su contu ca apustis de bintises giorronadas a su primu postu si funt agatadas tres scuadras, e a nosu e a is de sa Busachese s'est spetau ndi cabai in campu, torra. Ma de su restu, sciestus giai ca binci sa partida no iat a essi stètia una passillada, chi mi cumprendeis po su chi seu circhendi de si narai». 
E duncas, eia, m'acudu a si domandai: no sciu chi si siat mai capitau de no arrannesci a drommiri, sa noti, mancai candu sa dì avatu depeis fai calincuna cosa de importu mannu meda, cumenti iat a podi essi un esami a iscola o a s'universidadi, o peus ancora, una visita a che su dotori, e fintzas una operatzioni, mancai a s'uspidali. E duncas, eia, candu tenis sa conca prena de pentzamentus, o ballit aguali, sa conca prena de afròddiu, intzandus sa cosa de importu prus mannu chi unu podit fai est cussa de circai de aturai selenu, de abarrai selenu (chi si praxit de prus, mancai, scritu diaici). Mancai no siat facili. 

E intzandus, Deplano at sighiu a mi contai. «Chi pròpriu si depu narai sa beridadi, aintru de sa cida seus arrannèscius a trabballai, a s'allenai chentza de tropus pentzamentus lègius in conca, cun sa conca sbuida, duncas, de totus is trumentus. Apu circau, duncas, de no carrigai, prus de su tanti chi serbiat, sa conca de is giogadoris cosa mia; ddus apu lassaus selenus, chi cumprendeis su chi sei circhendi de si narai. Eus circau de provai, de s'allenai cun  is tirus de frimu, e fintzas is tirus de is undixi metrus. E de su restu, candu ti giogas sa bìncida de unu campionau in una partida, in s'ùrtima partida, depis fai su contu ca su gol ndi iat a podi arribbai in dònnia manera, mancai, puru, cun unu tiru scutu de atesu, o cun unu tiru scutu de frimu. E gràtzias a sa bona sorti, ddi naru diaici, is cosas si funt andadas beni meda, ma deu creu, ancora, in dì de oi puru (apu intèndiu a Deplano su martis, est a narai, duas diis apustis de sa partida ndr), ca sa cosa de importu prus mannu est stètia su de mantenni sboida de is pentzamentus lègius sa conca de is giogadoris cosa mia. Po su chi fait, po su chi est possibbili, est craru. E duncas, sciestus ca si festus gioghendi sa bìncida de su campionau, e sa possibbilidadi de ndi artziai in Prima Categoria, passendi, cumenti si narat, cumenti si iat a podi narai, de sa porta prus manna, ma seus arrannèscius a giogai beni, mancai is cambas fessint totu tremi tremi, chi mi cumprendeis. Ca candu tenis paura, intzandus is cosas benint a essi prus trabballosas, mancai feti is giogadas in una partida de càlciu, e si cumprendit. Seus arrannescius a ndi pesai una biga de giogadas togas e bonas meda, ma nc'est de narai puru, immoi chi nci seus, ca is de sa Busachese si dda funt giogada beni, si funt difèndius cun su corteddu tra is dentis, cumenti si iat a podi narai, e sciestus giai ca po su chi pertocat sa difesa fiant fortis meda, fadendi su contu, de su restu, ca ant serrau sa stagioni regolari cun feti bintunu gol ingotus (contras is bintiduus gol ingotus de is de su Cr Arborea in bintises bessidas ndr). E duncas, nd'est bessida aforas una isfida, una partida echilìbbrada meda, innoi seus arrannèscius a ndi pesai su primu gol, e a narai sa beridadi nci dda estus giai giai fata a binci sa partida, ma is aversàrius cosa nosta nd'ant cassau su gol de s'unu a unu candu ammancant feti tres minudus po serrai is giogus, po acabbai sa partida. Me is tempus suplementaris, fortzis, seus andaus mellus nosu, fortzis poita tenestus calincuna cosa in prus po su chi pertocat sa cunditzioni atletica, e duncas, sa saludi de is cambas e de su coru, po ddu narai diaici puru; a sa fini peròu s'est tocau arribbai a is tirus de is undixi metrus, e scieus beni cumenti andant is cosas; podit sucedi de totu, e difatis est sucèdiu de totu. Nosu seus stètius bravus, e basaus de sa bona sorti puru: bravus po su chi pertocat Cadoni, su portieri cosa nosta, chi nd'at cassau duus tirus de is aversàrius, e basaus de sa bona sorti, e duncas fortunaus, cumenti si iat a podi narai puru, poita eus intzertau totu is cuatru tirus chi eus depiu fai». 

A narai sa beridadi, is de su Circulu Ricreativu Arborea podiant binci su campionau giai una pariga de cidas fait, fadendi su contu ca funt abarraus a su primu postu po mesis e mesis de sighiu, ma a sa fini is cosas si funt fatas trotas, e marigosas, cun cincu partidas pèrdias apitzus de ses bessidas, e is aversàrius nd'ant aprofitau allestru meda, cumenti est craru. 
Deplanu m'at contau cumenti ddis funt andadas is cosas in custus ùrtimus duus annus, po cumprendi mellus totu sa istoria de s'assòtziu. «Po cumprendi cumenti si funt andadas is cosas, po cumprendi de ita seus chistionendi, intzandus depeus torrai agoa, cun is arragodus, a sa stagioni de su duamilla e binticuatru – duamilla e binticincu, candu s'assòtziu est torra partiu de zeru, cumenti si iat a podi narai. Candu seu arribbau in sa panchina de sa Cr, mi seu agatau cun una rosa pesada cun feti doxi giogadoris, e fai su contu ca s'allenastus in unu campu de calciu a cincu. Eus agatau una biga de strobbus po ndi pesai sa rosa,  ma a pagu a pagu, cun passièntzia, seus arrannèscius a agatai un'antra bella pariga de giogadoris chi si podessint donai una manu de agiudu. Duncas, seus stètius bonus, a sa fini, a ndi pesai una rosa bona e forti, cun una biga de piciocheddus giòvunus e feti duus o tres giogadoris prus matucus de edadi, e cun unu bellu tanti de esperièntzia a is pabas. Si seus arramangaus is manigas, cumenti si narat, e si seus postus a trabballai, e in sa lista de is partidas de sa torrada (e seus chistionendi, sèmpiri, mi parrit bastanti craru, de su campionau de sa stagioni de su duamilla e binticuatru – duamilla e binticincu, cumenti s'apu giai arremonau ainnantis de su restu ndr) eus fatu a biri cosas togas e bonas meda, fadendi su contu ca eus serrau su campionau a su de cuatru postus in sa lista. E duncas, cumenti est acabbada sa stagioni de s'annu passau, si ndi seus acataus ca sa scuadra fiat prus forti de su chi podestus pentzai; duncas podestus feti circai de ndi pesai una rosa chi podessit essi ancora prus forti, po circai de ndi cassai unu resultau chi podessit benni a essi ancora prus bonu de su de cuatru postus chi nd'estus cassau s'annu passau. E duncas, cust'annu, giai de s'istadi, giai de is primus diis de sa preparatzioni atletica chi si fait in s'istadi unu mesi ainnantis de s'incumintzu de is giogus e de su campionau, si ndi seus acataus ca podestus tenni me is manus is cartas bonas po ndi pesai una stagioni de importu mannu, e candu eus giogau is primus partidas amichevolis, intzandus, eus incumentzau a cumprendi de totu sa fortza chi custa scuadra teniat. A sa de cincu giorronadas seus arrannèscius fintzas a ndi cassai su primu postu de sa lista, e in cussu momentu eus cumprèndiu ca podestus curri, diaderus, po binci su campionau. In sa lista de partidas de sa torrada, peròu, eus tentu calincunu strobbu in prus de cussus chi pentzastus de agatai: strobbus no tanti po su chi pertocat sa calidadi de su giogu cosa nosta, chi est sèmpiri stètia arta meda, ma po su chi pertocat is puntus chi arrannèscestus, o no arrannèscestus, ballit aguali, a si ponni in buciaca. In dònnia partida festus bonus a ndi pesai una biga manna de ocasionis po ndi cassai su gol, ma po unu motivu o po un antru abarrastus a buca asciuta. No arrannèscemeus prus a essi fridus aranti de sa porta de is aversàrius, cumenti, mancai, si capitàt de fai in sa primu parti de sa stagioni. E duncas, fadendi su contu ca custa situatzioni est sighida a andai ainnantis po calincuna cosa cumenti a cincu, ses giorronadas, intzandus, po m'acapiai a su chi s'apu narau a s'incumintzu de custa intervista etotu, sa conca de is giogadoris s'est prena de timorias, de pentzamentus lègius, ed in prus is scuadras aversàrias, ca fiant currendi, impari a nosu, po ndi cassai su primu postu de sa lista e sa bìncida de su campionau, nd'ant aprofitau acoitu: e seu chistionendi, mescamente, de is de sa Busachese, de is de s'Ales e chentza de si ndi scaresi de is de su Marrubiu puru. Ma is piciocus cosa mia ant sèmpiri trabballau in gràtzia de Deus, cun totu su chi teniant in su coru, cun totu sa gana bella chi si funt agataus in conca e in su cropus; mancai is cosas no si fessint andendi beni cumenti, mancai, podestus isperai. Seus stètius bonus a no si sciaiai a terra, ddi naru diaici, puru candu is cosas si funt fatas tostadas, e marigosas; s'arriscu, candu no arrannèscis a ndi pesai is puntus chi, mancai, ti iant a minesci, est cussu de nd'arrui e de no arrannèsci a si strantaxai prus». 
E sa cosa, m'acudu a si ddu narai, ballit siat po su giogu de sa bòcia, e siat, est craru, po sa vida chi si depeus bivi, totus, e ballit po dònnia dì chi su Cielu s'arregallat. Candu is cosas ti andant mabi, po mi torrai a acapiai cun su chi s'apu scritu, cun su chi s'apu contau a s'incumintzu de custu artìculu etotu, s'arriscu prus mannu est cussu de si fai pigai (de si fai pigai a bussinadas, mi benit de ddu narai diaici, a trassa de poeta prus ca de giornalista sportivu) de sa tristura, de su scoramentu, chi est fortzis, ddi naru diaici, su velenu prus forti, e prus mau de cumbati, chi nci podit essi po unu cristianu in custa vida. E custu ballit po totus, mascus e femineddas, giòvunus o bècius. 

«E duncas depu fai is cumplimentus, cumenti si narat – at sighiu a mi contai Alessandru Deplanu – a is giogadoris cosa mia, po sa fortza chi ant tentu, e chistionu de sa fortza chi unu tenit po su chi pertocat sa conca, prus ca me is cambas. Mancai totus is timorias chi teniant in conca, no si funt arrèndius nemmancu po unu mesu segundu. Po su restu, una de is partidas prus togas chi eus giogau cust'annu est stètia cussa contras a is de su Simaxis, chi a s'epoca (sa partida s'est giogada su primu de su mesi de friàrgiu, e balliàt po sa de cuatru giorronadas ndr) s'agatànt a su primu postu, pròpriu impari a nosu: seus arrannèscius a binci cun su resultau, togu meda, de cuatru a unu, in domu cosa nosta, e seus arrannèscius, duncas, a fai a biri a totus, e chistionu mescamente de is aversàrius in sa cursa po sa bìncida de su campionau, cantu festus fortis, po su chi pertocat sa conca puru, e no feti cun is peis. Un'antra partida chi m'est praxia meda, po cumenti si funt andadas is cosas, est stètia cussa chi eus giogau contras a is de s'Abas (Ales, furriau in italianu ndr), po su chi pertocat sa lista de partidas de s'andada. Est stètia una partida tostada meda de giogai, fadendi su contu, po incumentzai, e pruschetotu, ca sa dì s'ammancant una biga de giogadoris fortis, tra cussus chi fiant strupiaus e atrus ca fiant scualificaus; ma seus arrannèscius a giogai una partida bona, de importu mannu, contras a una de is scuadras chi fiant currendi prus a forti, e chi fiant fadendi a biri unu giogu tra is prus togus de totu sa lista. Ma is partidas innoi is cosas si funt andadas beni meda, ddi naru diaici, funt stètias una bella biga manna, e no feti custas duas; in sa lista de is partidas de s'andada seus stètius bonus a ndi pesai unu giogu togu de biri, e sa cosa ballit, pruschetotu, po is tifosus cosa nosta, e is cosas funt andadas beni fintzas a arribbai a sa partida de custu domìnigu passau, chi eus giogau contras a is de sa Busachese e chi, po su chi balliat, e megu a chistionai, duncas, de sa bìncida de su campionau, fiat cussa de importu prus mannu, e mi parrit bastanti craru puru. Innoi, po su restu, m'agatu beni meda: connosciu giai totus is dirigentis chi faint parti e trabballant po cust'assòtziu, fadendi su contu ca ia tentu s'ocasioni de trabballai cun issus giai dexi annus fait. Potzu narai, a su mancu po su chi mi pertocat, ma sa cosa ballit, custu est pagu ma seguru, puru po is piciocus de sa rosa, ca is de s'assòtziu, is dirigentis duncas, no s'ant mai fatu ammancai nudda; ant sèmpiri donau una manu de agiudu a sa scuadra in totu su chi ant potziu. E sa pròpriu cosa si iat a podi narai po is tifosus cosa nosta, ca funt abarraus a su costau de is piciocus, e de sa scuadra, ddi naru diaici, in totus is partidas chi eus giogau cust'annu, e sa cosa ballit po cussas chi eus giogau in domu cosa nosta e puru, est craru, po cussas chi eus giogau in domu allena. Eus tentu una cantidadi manna meda de tifosus a fai su tifu po nosu, cumenti si iat a podi narai; una cosa chi no si biit, giai giai, nemmancu me is categorias de importu prus mannu de sa Segunda, e custa cosa s'at fatu meda prexei, e si cumprendit beni, deu creu. Chi seus arrannèscius a binci su campionau, duncas, est poita totus is cosas funt andadas beni cumenti bisastus, partendi de is giogadoris, passendi de is dirigentis e intzandus fintzas a arribbai a is tifosus. Po su chi pertocat sa stagioni chi at a benni, e megaus a chistionai, est craru, de sa stagioni chi at a pertocai su duamilla e bintises – duamilla e binticincu, est craru ca mi iat a praxi, e meda puru, a sighiri su trabballu cosa mia cun is de su Circulu Ricreativu de Arborea e impari a custa truma de piciocus chi apu guidau in custus ùrtimus duus annus; est bastanti craru ca candu ndi cassas s'artziada de categoria, intzandus su bisu cosa tua no podit essi atru ca su de sighiri cun su trabballu, cun s'aventura, dda tzerriu diaici. E sa cosa ballit po su chi mi pertocat, po su chi pertocat sa carriera cosa mia, ma puru, est craru, ballit po sa scuadra, po is piciocus, e po is dirigentis. Sa rosa, de su restu, mi parrit de podi narai custu puru, est giai forti, ma chi is dirigentis ant a essi bonus a pigai calincunu atru giogadori, intzandus su campionau cosa nosta in su mundu de sa Primu Categoria iat a ponni benni a essi ancora prus spàssiosu, chi est cussu chi s'auguraus totus, de su restu. Peròu, in dì de oi, est ancora chitzi po chistionai de custas cosas: po su chi mi pertocat, e chistionu po mei, est craru, mi ia a bolli pigai un antru arroghededdu de tempus po mi gosai sa bìncida de custu campionau, a su mancu custu est su disìgiu cosa mia. Apustis, giai de sa cida chi at a benni, deu creu ca eus a agatai s'ocasioni giusta po si setzi a sa pròpriu mesa, cumenti si narat, impari a is dirigentis, po cumprendi cumenti ndi pesai sa rosa e totu is atras cosas po su campionau de sa stagioni chi at a benni. Ia a bolli dedicai, e cun custu dda acabbu puru, sa bìncida de custu campionau a totus is piciocus, si ddu minescint e de su restu funt stètius issus chi ndi funt cabaus in campu po giogai is partidas, fadendi su contu, pruschetotu, ca medas de issus no iant mai bintu nudda, no ndi iant mai cassau su primu postu in unu campionau e duncas, eia, si podeis immaginai beni de totu su prexu chi nd'ant tentu. E deu, mi parrit bastanti craru puru, no potzu ca essi cuntentu po issus. Mi iat a praxi, intzandus, torrai gràtzias a is de s'assòtziu, a totus is personas chi ant trabballau, e ant fatu sacrìficius, e mannus puru, po ndi pesai una stagioni de importu cumenti cussa chi eus potziu bivi cust'annu. Is dirigentis funt abarraus cun su coru in manu, ddi naru diaici, fintzas a s'ùrtimu: timiant ca is cosas podessint andai mabi, e invècias seus arrannèscius a serrai is giogus in sa manera mellus chi podemus. Domìnigu est stètia una festa manna po totus, una festa chi si seus minèscius, po totu su chi eus fatu a biri cust'annu». 

E serru s'artìculu de custa cida, andendi a castiai, e impari a bosatrus, si cumprendti, po su chi apa a acudi, po su logu chi tengiu ancora de preni, cumenti funt andadas is cosas, po incumentzai, cun is atras partidas chi si funt giogadas in custu fini de cida, a partiri, pròpriu, de is partidas finalis chi pertocant su mundu de sa Segunda Categoria, e partendi duncas de is scuadras chi funt currendi, chi megant a curri po ndi cassai s'artziada in su campionau de sa Primu Categoria, passendi de sa porta prus pitichedda, cumenti si iat a podi narai, e cumenti m'est bènniu de ddu narai, e isperu chi nesciunu tengiat calincuna cosa de murrungiai po su fueddu chi apu scerau de manigiai (e megu a brullai, si cumprendit bastanti beni deu creu). 

E duncas, eia, is de La Salle, chi funt arribbaus a su segundu postu in sa Lista A, ant bintu, cun su resultau de unu a zeru, contras a is de su Domusnoas, chi funt arribbaus, invècias, a su segundu postu in sa Lista B, a is pabas de is de su Cabuderra (e invècias, po su chi pertocat sa Lista A, su campionau est stètiu bintu, chi no si ddu arregodais deu seu innoi pròpriu po custu puru, de is casteddaius de sa Next Gen Himalaya, sighius de Mauriziu Idda; e de sa bìncida de su campionau cosa insoru, mancai, si nd'apa a chistionai mellus me is cidas chi ant a benni, a bòcia firmas, candu is partidas ant a essi spaciadas); sa partida s'est serrada cun su resultau de unu a zeru po sa scuadra de Pauli, chi nd'at cassau sa bìncida gràtzias a su gol chi nd'at pesau Pandori, apustis de calincuna cosa cumenti a seti minudus. Is de s'Ottava, invècias, funt arrannèscius a binci sa partida in domu cosa insoru contras a is de su Minerva, cun Salis chi at intzertau sa giogada giusta chi est bàllia po sa bìncida de sa partida, a su de dexennoi minudus. E serru sa chistioni cun is de su Gulfu Aranci, chi ant bintu sa partida contras a is de su Calagonone, cun su resultau de duus a zeru, gràtzias a is gol pesaus de Mulas, apustis de noi minudus feti de giogu, e de Scanu, chi nd'at cassau su segundu gol me is minudus finalis de su primu tempus.



Attività realizzata col contributo della Regione Sardegna. IMPRENTAS 2025-2026. LR 22/2018 art. 22