Urtimus noranta minudus de giogu po su campionau de sa Promotzioni: is cosas s'imbuddidant po is scuadras chi currint po ndi cassai sa sarvesa

E duncas, si seus lassaus a is pabas sa Cida Santa, cun totu cussu chi custu pertocat, partendi, est craru, de is festas po sa Pasca Manna (ca cust'annu apu abertau, e apu disigiau, puru, a trassa de pipieddu, a trassa de notzenti, cumenti si iat a podi narai, puru, e bai e circa, mi megu a solu a solu, bai a cumprendi poita cust'annu m'est pigau diaici) e arribbendi a is festas chi si faint sa dì apustis de su domìnigu de Pasca, e duncas, eia, seu chistionendi de sa dì de sa Paschixedda, chi est su lunis innoi, diaici seus costumaus a fai, de su restu, pigaus is bagàglius e si ndi andaus a si fai unu giru, di naru diaici, in logu de sartu, de monti o de mari puru, a segunda de ita si praxit de prus. 

A narai sa beridadi, e custa cosa andat ainnantis de una pariga de annus, mi funt abarraus prantaus in conca is fueddus, scritus de Goethe (chi, po chini no ddu sciessit, est stètiu unu de is scritoris prus mannus de su mundu e mescamente, de sa Germania; e deu seu innoi po fai custu trabballu, est a nai po si torrai a contai, mancai, calincuna cosa chi no scieis, no scieis ancora, cumenti mi praxit a narai fatu fatu), in cussa opera cosa sua, toga e manna meda, chi si tzerriat "Faust", e innoi s'autori atacat a contai sa storia chi ligeus in su lìbbru, e chi partit pròpriu in su lunis de Paschixedda, e su protagonista de sa storia, duncas, abarrat spantau po su de biri totu sa genti chi si ndi scidat a su chitzi, ainnantis chi obrexat, e si cuncodrat, cun bussas e bagàglius, po nci bessiri, po andai mancai a su sartu; ca sa cosa de importu prus mannu, po sa dì de sa Paschixedda, est ca tui ndi depis bessiri, est a nai ca nci depis stupai aforas de sa bidda, o de sa citadi innoi bivis, a su mancu po una parighedda de oras, mancai po duas oras feti. Ma ddu depis fait, poita diaici si fait, si iat a podi narai diaici puru. 
E Goethe, e duncas su personagiu de su lìbbru, dotor Faust, abarrat spantau de totu s'afròddiu chi tenint is personas, fadendi su contu ca po fai sa Paschixedda funt sèmpiri prontas, mancai (est custa sa parti de importu prus mannu, a parri miu) no apant fatu nemmancu una mesu dì (nemmancu cincu minudus, si iat a podi narai, puru, a bolli essi maus) de Caresima. 

Ma de su restu, e mi parit craru puru, dònniaunu de nosu si bivit sa vida (e is cosas chi nci funt acapiadas a sa vida) cumenti mellus creit, ca no apa a essi deu a si narai cumenti depeis cuncodrai is cosas chi si pertocant. Deu a sa fini, cumenti circu de fai dònnia dònnia dònnia borta, si potzu narai cumenti mi cuncodru deu, cumenti mi bivu is cosas (e de cumenti apu passau custa caresima, de su restu, mi parit ca unu pagheddeddu, a su mancu unu pagheddeddu feti, si iat a podi narai, si nd'apu giai chistionai me in totus is artìculus chi ndi funt bèssius aforas, e sèmpiri in su giàssu de su Diàriu Sportivu, e nci iat a mancai atru puru, partendi de sa primu cida de su mesi de Martzu, candu nd'est arribbau su mercuis de is cinixius, cumenti si iat a podi furriai cussu chi, in italianu, tzerriaus "Mercoledì delle ceneri", e fintzas a arribbai a sa cida passada etotu, chi fiat sa Cida Santa, cumenti seus costumaus a dda tzerriai, a trassa de cumenti faint is catolicus-cristianus), e no ddu fatzu, mi parit craru puru, po si narai ca, eia, is cosas chi fatzu deu funt is prus bonas, o is prus togas, o is prus giustas, e isperu chi si cumprendat su chi seu circhendi de si narai. 

E duncas, cumenti apu sèmpiri intèndiu narai de mamma mia, dònnia unu de nosu sciit su fatu suu, e no nc'est s'obbrigu de abarrai innoi a intregai a is atrus is fainas cosa nosta, is fainas chi sigheus dì po dì; mancai, chi si depu narai sa beridadi, a mei praxat meda, ma meda, su de si podi contai cali funt is cosas chi m'agatu badda badda in conca, e mi praxit fintzas a m'amchiai a si podi contai su chi fatzu (o su chi no fatzu, ca ballit aguali) me is diis cosa mia. 

Po sighiri in cust'arrastu etotu (e si nd'arragodu ca no sciu, ainnantis de mi ponni a ddu fai, cali arrastu apa a sighiri po su chi pertocat is artìculus chi ndi pesu in su sardu chi si chistionat innoi in su Campidanu de mesu e, mescamente, in Bidd'e Sorris, chi est sa bidda innoi seu stètiu pàsciu), pròpriu sa cida passada, est a nai su martis, candu seu arribbau a su forru de su pani (chi tèngiu pròpriu a su costau de su logu innoi bivu), po pigai su chi mi serbit po papai, sa picioca chi ddoi trabballat, e chi est sèmpiri druci cumenti a su tzucuru cun mei, m'at cumbidau unu cafei, fadendi su contu ca si ddu fiat bufendi issa puru pròpriu in cussu momentu, e fadendi su contu ca ddu iat cumbidau, pròpriu candu seu arribbau deu aintru de su negòtziu, a un'antra persona, un'amiga cosa sua, chi ddoi fiat de serbiri ainnantis de mei. 
E duncas mi seu depiu acudi a ddi narai ca no podemu buffai cafei poita fia sighendi sa dieta po sa caresima, e intzandus m'at domandau iscusa, mancai no nci ndi fessit su bisòngiu, est craru, ca no m'at ofèndiu o fatu calincuna cosa de mabi (totus diaici si iant a bolli is ofesas in custu mundu, mi benit de ddu narai diaici). 

Ma sa picioca chi ddoi fiat ainnantis de mei, e chi fiat abertendi su cafei cosa sua, s'est acuta a mi domandai (si sciit cumenti andant is cosas in una bidda pitichedda, ca totus ti domandant de totu, chi cumprendeis su chi si bollu narai; est a nai, mellus, ca totus bolint sciri is fatus de totus is atrus, e no tenint mancu un arrogheddeddu, mancu unu stiddieddu de bregùngia, mi parit craru puru) chi fessi fadendi su Ramadan (diaici ddu at tzerriau), poita iat intèndiu de un'antra signora chi no podiat papai e nè bufai me is oras de luxi (ca, de su restu, est pròpriu su chi faint is musulmanus, po ddus tzerriai a trassa de cumenti ddus tzerriaus in italianu etotu, candu sighint sa caresima cosa insoru); e a sa fini m'at domandau, puru, giai chi nci fiat (bivu in una bidda de una vida, e sciu beni cumenti andant custas cosas. E fortzis est una de is cosas prus lègias de bivi in una bidda, e megu a chistionai, pròpriu, de custa cosa ca totus circant de si fai is fatus, is fainas cosa tua. In una citadi is cosas andant in manera unu pagheddu diversa, a su mancu po su chi pertocat custa chistioni, ma a sa fini si iat a podi narai, puru, ca deu in una citadi no nci sciu abarrai po prus de corantotu oras, ca apustis de cussu tanti de oras mi benint is scimingius a conca, chi est unu de is fueddus chi mi naràt fatu fatu, chi m'arrapitiat fatu fatu sa bon'anima de mamma mia, e chi mi praxint fintzas a m'amachiai), chi deu puru fessi musulmanu (o arabu); e deu no apu potziu fai atru ca ddi arraspundi ca fiat issa chi iat manigiau unu fueddu arabu, ma ca po su chi mi pertocàt sighia sa caresima, ca bollit narai, tra is atras cosas, ca no potzu bufai su cafei (e no mi ddu at narau de seguru su dotori de sighiri custa dieta, e nemmancu su preidi, e nemmancu Deus, e nemmancu Gesù Cristu, est craru. Ma est una cosa chi mi andat a fai, e fatzu, chentza abertai de essi cumandau de nemus). 

E sa picioca no s'est arrèndia (ddu megu a narai po arriri, gei si cumprendit, berus est?) e, duncas, fadendi su contu ca festus ciaciarrendi, at sighiu a mi domandai chi ndi bogamu feti su cafei, po mi intendi apostu cun sa dieta, cun sa cuscèntzia cosa mia, e duncas ddi apu dèpiu fai sa lista (cumenti fatzu sa lista de is scuadras chi currint me is campionaus de bòcia chi sigheus, impari cun is collegas cosa mia po contu de su Diàriu Sportivu), e duncas ddi apu arraspustu ca impari a su cafei ndi bogamu su tè puru (apu incumentzau de cust'annu, a si narai sa beridadi, a ndi bogai su tè po sa dieta chi sigu in sa Caresima. Ca no mi fiat mai bènniu in conca de mi domandai: ma poita ti speddiat a ti bufai su tè a su mengianu apustis chi ti ndi scidat? E seu arribbau a mi donai custa arraspusta: est a narai ca mi speddiat, po su prus, s'acua callenti aintru de is mocas, e prus po una chistioni de mi callentai su stogumu, mescamente in s'ierru e, duncas, mescamente candu fait frius. E duncas, a solu a solu m'est bèniu de mi domandai: e nci depit essi pròpriu su tè aintru de s'acua callenti, o ti iat a podi andai beni calincuna atra gènia de erbas puru? E diaici, duncas, ca apu incumentzau a no bufai prus tè a su mengianu, e mi nci seu fuiau apitzus a sa melissa, est a nai ca, eia, apu incumentzau a buffai acua callenti a sabori de melissa, chi mi cumprendeis po su chi si bollu narai), e custu po su chi pertocat sa cosa de bufai po su mengianu, poita poi, in prus, in s'interis chi sigu sa dieta de sa caresima no bufu nemmancu binu o birra o atras genias de licoris (a narai sa beridadi, no ndi bufu mai, est a narai ca no abertu de seguru a sa caresima po ndi fai de mancu, ma custu a sa signora chi mi fiat fadendi s'intervista, de primu mengianu, cumenti si iat a podi narai, no si ddu apu scoviau), e no papu nè ous, nè casu, nè petza, e no potzu nemmancu papai nemmancu un arrogheddeddu de cosa druci, e nemmancu una pimpirilla de tzùcuru. 

E duncas, eia, totu custu m'est tocau a ddi narai a custa picioca ca nemmancu sciu cumenti si tzerriat de nomini, e chi, a si narai sa beridadi, no ia mai biu in totu sa vida mia (no sciu nemmancu chi siat sorresa, a si narai sa beridadi, ca in Bidd'e Sorris ddoi funt calincuna cosa cumenti a seti millas animas, e deu, custu est pagu ma seguru, no ddas connosciu totus). 

Ma custu po si narai, e cun custu serru sa chistioni, e dda acabbu de si fai sa conca a acua (cumenti si megàt sa bon'anima de mamma mia etotu), ca cust'annu sa caresima m'est bessida beni meda, a su mancu, una de is caresimas prus futas (chi mi permiteis de manigiai custu fueddu, e sèmpiri chi arrannesceis a cumprendi su chi si bollu narai, e chi cumprendeis su seu circhendi de si narai) ca nd'apu pesau de candu apu incumentzau a fai su chi tzerriu "su giogu de sa Caresima" e chi pigu, giai giai, cumenti chi fessit una partida de bòcia de giogai, po su chi fait, po su chi est possibbili, in sa manera mellus chi arrannèsciu. 

E duncas, eia, mi parit totu de podi narai (e cun custa cosa dda serru diaderus cun is strollichiminis, ma chi eis lìgiu a su mancu unu de is artìculus chi nd'apu bogau aforas in custus ùrtimus duus annus, scieis, e meda puru, ca po sa metadi de s'artìculu circu de mi spassiai unu pagheddeddu, e custu bolit narai, duncas, ca po sa primu metadi de s'artìculu nci bogu aforas, aforas de sa conchitedda cosa mia, e si cumprendit, unu scantu de strollichiminis, chi mancai tèngiu badda badda in conca, e feti apustis, a su mancu, seu costumau a fai diaici, mi nci ghetu a fundu e susu me is chistionis chi pertocant, chi funt acapiadas cun su mundu de sa bòcia, de is partidas e de is campionaus de is diletantis chi si giogant innoi in Sardìnnia, e chi est sa faina de importu prus mannu, sa lega de importu prus mannu, po su giàssu de su Diàriu Sportivu, chi est cussu chi mi permitit, a sa fini, nc'est pagu de nc'aciungi, de ndi podi bogai aforas totus is artìculus chi benit a fai parti de is Novas, e chi ndi bessint aforas, si ddu arragodu, immoi chi nci seu, dònnia giòbia de s'annu, chentza de ndi sartai nemmancu unu) ca po cust'annu is festas de sa Pasca Manna (e duncas cussas acapiadas a sa dì de sa Paschixedda puru) mi ddas seu minescias, a su mancu, mi parit de podi pentzai e de podi narai diaici. 

E immoi chi m'est bèniu in conca, si potzu narai ca custu artìculu chi teneis asuta de is ogus, e chi seis ligendi pròpriu immoi, eia, at a essi s'ùrtimu po su chi pertocat su mesi de Abrili. 
E immoi chi nci seus, si iat a podi narai ca, eia, m'est partu (m'est giai giai partu, fait a ddu narai diaici puru) ca su tempus si nc'est giai giai bobau, fadendi su contu ca tra una pariga de diis at a brintai su mesi de Maju puru, ca cumenti scieis, est su de cincu de is mesis chi s'agatant in un annu. 
E iat a fai a narai, puru, immoi chi nci seus, ca seus giai giai arribbaus a sa metadi de custu duamilla e binticincu puru, ca parit ca siat nàsciu s'atra dì, a su mancu po su chi mi pertocat. 
Ma est berus ca candu stais beni (est a narai chentza tropus daboris, chentza tropus dannus) intzandus parit, po diaderus, chi su tempus si nci bobit; e invècias candu ses ingotu, o mobadiu, o tenis daboris, intzandus parit ca is minudus, is segundus, is oras e is diis no passint mai e poi mai. 

Ma torraus a nosu. 
E duncas, atacaus unu pagheddeddu cun is chistionis acapiadas a su mundu de sa bòcia, chi seis de acòrdiu cun mei a su mancu. 
Po incumentzai, si iat a podi partiri de su mundu de sa Promotzioni, ca custu fini de cida chi est arribbendindi at a serrai sa stagioni, cun is ùrtimus noranta minudus po su chi pertocat s'annada de su duamilla e binticuatru – duamilla e binticincu, cumenti m'est bèniu de dda tzerriai. 
E duncas, cumenti eis a sciri giai (e chi no ddu scieis ancora, de su restu, deu seu innoi po custu puru), me is duas listas, e seu chistionendi, est craru, de sa Lista A e de sa Lista B, nci funt giai is duas scuadras chi nd'ant cassau su primu postu e, duncas, mi parit craru puru, sa bìncida de su campionau: po su chi pertocat sa Lista A, duncas, is de su Lanusè funt sighendi a fai festa manna, apustis de nd'essi cassau s'artziada in su campionau de s'Ecellenza: is piciocus sighius de Albertu Piras ant bintu sa de bintitres partidas, apitzus de trintatres bessidas, in domu cosa insoru (est a nai, duncas, aranti de is tifosus cosa insoru), contras a is de sa Tharros, cun is aristanesus chi nd'ant bodditu una bella surra, cumenti si iat a podi narai, fadendi su contu ca sa isfida s'est serrada cun su resultau, bellu e tundu tundu (bellu po is meris de domu, si cumprendit) de cuatru a duus. 

Is de su Lanusè tenint in dì de oi calincuna cosa cumenti a setantacincu puntus allogaus in buciaca, e immoi ant a circai de ndi cassai is ùrtimus tres, me in s'ùrtima partida de su campionau. 
Totu beni po is de su Tortolì puru, sighius de Tore Mereu, chi ant bintu cun su resultau de duus a zeru in domu de is de s'Arborea e funt segurus (giai de una pariga de cidas, chi pròpriu depeus narai sa beridadi) de ndi cassai su segundu postu de sa lista, chi at a balli, gei ddu eis a sciri (e chi no scieisi cumenti funtzionant is cosas, deu se pagau puru po custu, est a nai po s'arragodai cumenti funt cuncodradas is regulas po su chi pertocat is play-off, po ddu narai a trassa de is ingresus, e po is play-out puru, e immoi andu a si ispiegai mellus de ita seus chistionendi), po giogai is ùrtimas duas partidas de s'annu: duncas, sa scuadra chi arribbat a su segundu postu in sa Lista A si dda at a depi biri contras a sa scuadra chi est arribbada a su de tres postus in sa Lista B, e a s'imbressi, mi parit craru puru, sa scuadra chi at a arrannesci a ndi cassai su segundu postu in sa lista B si dda at a depi biri, a su mancu po sa primu partida, contras a sa scuadra chi at a serrai is giogus in su de tres postus in sa Lista A. 
E is duas scuadras chi ant a binci custas partidas, s'ant a atobiai, s'una contras a s'atra, po sa partida finali, chi at a balli po su primu postu me in sa graduatoria, cumenti si iat a podi narai, cumenti dda estus a podi tzerriai, a trassa de s'italianu etotu. 

E duncas, sighendi a castiai cumenti funt postas is cosas me in sa Lista A, si potzu narai, po oi, ca a su de tres postus in sa lista ddoi funt duas scuadras, e seus chistionendi de is de su Sant'Aleni de Cuartu e de is casteddaius de su Cus, chi est sa scuadra, no sciu chi si ddu arregodais (e desinò si ddu arregodu deu, chi mi fait prexei) chi nd'ant pesau is de s'Universidadi de Casteddu etotu. 
E duncas, is duas scuadras tenint in buciaca calincuna cosa cumenti a cincuantaseti puntus e immoi s'ant a giogai totus is cartas chi tenint me is manus me is ùrtimus noranta minudus de sa stagioni (e chi pròpriu si ddu depu narai, eia, a mei no parit nemmancu berus ca po cust'annu puru seu arribbau a sa fini de is giogus, impari a bosatrus etotu, ca is giogus ddus eis sighius, mancai, gràtzias a is artìculus chi ndi bogaus aforas, sa cosa ballit po mei ma ballit puru po is collegas cosa mia, est craru, in su giàssu de su Diàriu Sportivu. E no potzu fai atru ca torrai gràtzias a su Cielu, po su tempus chi sighit a passai, a andai ainnantis po mei puru, chentza tropus strobbus e chentza de tropus dannus). 

E duncas, po primu cosa andaus a castiai, impari, e sèmpiri chi seis de acòrdiu cun mei, cumenti funt andadas is cosas me is partidas chi si funt giogadas su sabudu de Pasca Manna: is de su Sant'Aleni funt arrannèscius a ndi cassai is tres puntus prenus gràtzias a su resultau, togu meda, de cincu a unu, chi funt stètius bonus a ndi pesai in sa partida chi ant giogau in domu de is de s'Atleticu de Casteddu; is de su Cus, invècias, ant arraspustu (ddi naru diaici, cumenti seus costumaus a fai in italianu puru) cun sa bìncida po tres a unu, in domu cosa insoru etotu, chi nd'ant cassau contras a is de sa Villacidrese, cun is campidanesus (seus chistionendi de s'assòtziu de su presidenti Marrocu, est craru) chi, a s'incumintzu de s'annu, fiant una de cussas scuadras chi pariat depessit curri po sa bìncida de su campionau, e invècias depint ai tèntu prus strobbus de su chi si podiant immaginai, ca de su restu, su giogu de sa bòcia est unu pagheddeddu cumenti sa vida etotu, e no sciis mai cumenti ti ant a podi andai is cosas. 
E immoi, po torrai a sa chistioni de importu prus mannu, is de su Sant'Aleni ant a depi arriciri is de s'Orrolese po s'ùrtima partida de s'annu, e tocat a s'acudi a narai, puru, ca sa scuadra sighida de Marcu Marcialis no tenit prus nudda de domandai a custu campionau, a custa stagioni (cumenti si narat in italianu etotu) fadendi su contu ca funt giai segurus de ndi cabai torra in su campionau de sa Primu Categoria (fadendi su contu ca, apitzus de trintatres bessidas, nd'ant ingotu calincuna cosa cumenti a binti partidas pèrdias, e no funt pagus de seguru, e funt stètius bonus a ndi binci feti otu, e po cincu bortas ant serrau sa partida cun su resultau siddau in paridadi). Is de su Cus de Casteddu, invècias, ant a depi andai a giogai in domu de is de su Tortolì, chi podint giogai cun su coru selenu, fadendi su contu ca, cumenti s'apu arremonau ainnantis, funt segurus de serrai sa stagioni cun su segundu postu in busciaca; e immoi nc'at a essi de cumprendi, o de biri, po ddu narai mellus puru, canta gana nc'ant a ponni, in campu, is de su Tortolì, fadendi su contu ca s'afròddiu prus mannu, est craru, ddu ant a tenni is de su Cus, ca ant a depi cassai is tres puntus po s'ammarolla, cumenti si narat, chi bolint sighiri a bisai de ndi cassai su de tres postus in sa lista e, duncas, sa possibbilidadi de giogai is ùrtimas duas partidas chi ant a balli po s'artziada in su campionau de s'Ecellenza, impari a is de su Lanusè etotu. 

E duncas, cumenti si narat, eus a biri cumenti ant a andai is cosas. 
Po immoi, si potzu feti narai, si potzu feti arragodai ca, eia, de is scuadras chi ant bintu is campionaus cosa insoru (e duncas, po su chi pertocat sa Promotzioni megu a chistionai de is de su Lanusè e de is de su Buddusò) nd'eus a chistionai mellus a bòcias frimas, est a nai me is tres mesis de s'istadi innoi no nc'ant a essi partidas (e si cumprendit, ca is giogadoris ant a essi in vacantza, e unu pagheddeddu de pàsiu, mi parit craru, si ddu minescint, e meda puru, po totu su chi ant fatu in custus noi mesis de giogus), e custa cosa chi s'apu apena narau ballit a trassa de promissa. 

E immoi chi nci seu, andaus a castiai cumenti funt postas, cumenti funt cuncodradas is cosas po su chi pertocat sa batalla po ndi cassai sa sarvesa e, duncas, mi parit craru puru, po guadangiai sa possibbilidadi de curri in su campionau de sa Promotzioni puru me in sa stagioni chi at a benni (chi su Cielu at a bolli custu beni po nosu, si cumprendit), e seus chistionendi, est craru, de cussa de su duamilla e binticincu – duamilla e bintises. 

Duncas, giai de una bella pariga de cidas, scieus ca is de su Bidda Matzràxia ant a depi torrai a partiri de sa Primu Categoria, fadendi su contu ca s'agatant a s'ùrtimu postu de sa lista, cun feti catodixi puntus in buciaca. E si cumprendit ca sa stagioni ddis est andada mabi meda, fadendi su contu ca ant pèrdiu po calincuna cosa cumenti a bintitres bortas, cun feti duas partidas bintas e otu partidas chi ant serrau cun su resultau siddau in paridadi (chi mi permiteis de fai sa rima, a trassa de poeta, prus ca de giornalista). E impari a is de su Bidda Matzràxia, in Primu Categoria ndi torrant a cabai puru is de s'Atleticu Masainas, chi nd'ant pesau calincunu puntixeddu in prus de is chi nd'ant pesau is de su Bidda Matzràxia, fadendi su contu ca in dì de oi tenint bintotu puntus, chi ndi funt arribbaus gràtzias a ses partidas bintas e dexi partidas innoi funt stètius bonus a ndi cassai feti unu puntixeddu. Is de s'Atleticu de Masainas, acudu a si narai custu puru, ant pèrdiu po dexesseti bortas (e no funt pagus, e gei si cumprendit). De is de s'Orrolese invècias, si apu contau pròpriu immubagora cumenti ddis funt andadas is cosas: is piciocus sighius de Marcu Marcialis, duncas (chi est s'allenadori de is biancus-arrùbius de una bella pariga de annus) nd'ant pesau calincuna cosa cumenti a bintinoi puntus, chi ndi funt arribbaus gràtzias a otu partidas bintas e a cincu partidas chi ant serrau cun su resultau in paridadi; a fai is contus, de su restu, a acabbai de fai is contus, po ddu narai mellus puru, nci poneus pagu: is de s'Orrolese ant pèrdiu po binti bortas e immoi ant a depi partiri de su campionau de sa Primu Categoria, apustis de giai dexi annus chi fiant currendi in su campionau de sa Promotzioni. E su de torrai a partiri de una categoria prus bascia, de una categoria prus pitichinninnia, cumenti si iat a podi narai, puru, no benit a essi mai una cosa toga, bona, druci o facili, e si cumprendit, ma a sa fini su giogu de sa bòcia est custu puru: oi nd'arruis, e cras, mancai, ti ndi torras a pesai. Cumenti estus a depi fai totus, e custa, diaderus, est una de is letzionis de importu prus mannu chi si nd'arribbant de su mundu de su càlciu, chi iat a podi essi (iat a depi essi, a parri miu) una scola de vida po totus is piciocus chi ndi faint parti, chi mi permiteis de manigiai custus fueddus e chi mi cumprendeis po su chi si bollu narai. 

E duncas, serraus cun is chistionis chi pertocant sa Lista A andendi a castiai cumenti funt postas is cosas po s'ùrtima scuadra chi nd'at a depi cabai, impari a is atras tres chi apu arremonau immoi, in su campionau de sa Primu Categoria: e intzandus, si potzu narai ca is de s'Idolo, sa scuadra chi nd'ant pesau in Arthana, e sighida de Simoni Podda, tenint in dì de oi calincuna cosa cumenti a trintases puntus; cun duus puntus in prus, invècias, agataus is de s'Uda, cun trintotu puntus. Chi is cosas depessint abarrai diaici, duncas, custas duas scuadras s'ant a depi atobiai, s'una aranti de s'atra, po duas partidas (cussa de s'andada e cussa de sa torrada, mi parit craru puru), e cussa chi nd'at a cassai sa cantidadi prus manna de puntus at a tenni sa possibbilidadi de giogai po s'annu chi at a benni puru in su campionau de sa Promotzioni; cussa chi at a perdi, invècias, e si cumprendit, at a depi torrai a partiri de su campionau de sa Primu Categoria. 

E immoi chi nci seu, immoi chi seu arribbau a custu puntu de sa chistioni, si potzu narai, puru, ca is de s'Idolo ant bintu, cun su resultau togu meda, de cuatru a tres, sa partida chi ant giogau pròpriu sabudu passau, in domu de is de s'Orrolese etotu, chi eus arremonau pròpriu immoi. Is de s'Uda, invècias, nd'ant cassau tres puntus grais cumenti a sa pedra (tres puntus de oru, si iat a podi narai puru, gioghendi unu pagheddeddu a fai su poeta, e sèmpiri chi mi ddu permiteis, est craru) in sa partida chi ant giogau in domu de is de su Bidda Matzràxia, cun su resultau de tres a zeru. 
Nc'est de narai un'antra cosa puru, peròu: is de su Ceràxius tenint feti (feti po modu de narai) coranta puntus in buciaca, fadendi su contu ca in s'ùrtima partida chi ant giogau ant pèrdiu, cun su resultau de duus a unu, in domu de is de su Pirri de Busanca, chi, pròpriu gràtzias a cussus tres puntus, nd'ant cassau sa sarvesa cun noranta minudus de antìtzipu. E duncas, immoi is de su Ceràxius ant a depi circai de binci po s'ammarolla, poita chi is de s'Uda e is de s'Idolo depessint binci, e is de su Ceràxius depessint abarrai a buca asciuta, cumenti si narat, cumenti si iat a podi narai, a trassa de s'italianu etotu, intzandus si iant a agatai in acua lègias e iant a depi giogai is ùrtimas duas partidas chi serbint po ndi cassai sa sarvesa. 

E duncas, is ùrtimus noranta minudus de giogu ant a essi callentis meda po custas tres scuadras. 

E po immoi, e po serrai sa chistioni, si potzu narai ca is de s'Uda ant a depi arriciri sa visita de is de su Pirri, ca no tenint prus nudda de domandai a custu campionau, fadendi su contu, cumenti s'apu arremonau immubagora, ca is piciocus sighius de Paulu Busanca nd'ant cassau sa sarvesa pròpriu su fini de cida passau. 
Is de s'Idolo si dda ant a depi biri contras a is de su Bidda Matzràxia, in domu cosa insoru etotu (est a nai, duncas, in Arthana), invècias is de su Ceràxius ant a depi arriciri sa visita de is de s'Arborea. 

E duncas, de prus de custu, a su mancu po oi, no si potzu narai, e eus a biri cumenti ant a andai is cosas me is ùrtimus noranta minudus de sa stagioni, po su chi pertocat, est craru, sa Lista A de su campionau de sa Promotzioni. 

E immoi chi nci seu, deu creu ca sa cosa prus toga chi potzu fai siat cussa de si intregai una pariga de fueddus (ma feti una pariga, ca poi, chi m'at a abarrai su tempus e mescamente su logu, mi iat a praxi a si chistionai, mancai feti po unu pagheddeddu, de cumenti funt cuncodradas is cosas me in sa Lista B, sèmpiri de su campionau de sa Promotzioni) chi m'at regalau pròpriu Paulu Busanca, in una ciaciarrada chi nd'eus pesau pròpriu una pariga de diis fait. «Sciestus beni ca sa partida contras a is de su Ceràxius podiat benni a essi tostada meda de binci: chistionaus, de su restu, de una scuadra forti meda, sighida de un allenadori de importu mannu cumenti est Francu Giordano; de su restu, is de su Ceràxius sciint beni cumenti abarrai in campu, fadendi su contu ca giogant in su campionau de sa Promotzioni de unu bellu tanti de annus. Po nosu, e sciestus beni custu puru, is tres puntus chi ddoi fiant badda badda in su pratu pesànt a trassa de s'oru, chi cumprendeis su chi si bollu narai: no depestus bìnci po fortza po ndi cassai sa sarvesa, fadendi su contu ca, comentecasiat, ddoi funt atrus noranta minudus de giogai, peròu, eia, bisastus de podi serrai sa chistioni chentza depi abertai de giogai sa partida in domu de is de s'Uda. Gràtzias a su Cielu, cumenti si iat a podi narai, seus stètius bonus a ndi cassai is tres puntus prenus, ma eus dèpiu sudai, e meda puru, is camisas, cumenti si iat a podi narai. Deu pentzu, duncas, ca si seus minèscius de binci sa partida, a su mancu po totu su de bonu chi seus arrannèscius a fai in campu, ma tocat a narai, puru, ca is aversàrius cosa nosta ant giogau una partida de importu, chi no prus de noi, de seguru cantu cussa chi eus giogau nosu. Is de su Ceràxius ant fatu a biri a totus cantu ballint, cantu funt fortis». 
E duncas, is de su Pirri podint atacai a fai sa festa po sa sarvesa, e si cumprendit beni, noranta minudus ainnantis de sa fini de is giogus. «De seguru, podeus narai ca su Pirri cust'annu at tentu calincunu strobbu in prus de is chi at tentu s'annu passau, candu tenestus su coru prenu de afròddiu, e si cumprendit beni, po nd'essi cassau s'artziada in su campionau de sa Promotzioni. A narai sa beridadi, eus tentu calincunu strobbu in prus de su chi s'abertastus po su chi pertocat s'atacu, fadendi su contu ca unu de is giogadoris prus fortis chi tenestus, e seu chistionendi de Buba Darboe, s'at lassau po andai a giogai impari a is de s'Arborea. E in prus, me is primus mesis de sa stagioni noba, s'ant lassau puru un'antra pariga de giogadoris, e duncas si seus agataus a giogai una stagioni fadiosa meda, cumenti est stètia cussa de cust'annu, de su restu, cun una scuadra prenza, fintzas a cucuru, de giogadoris giòvuneddus meda, cun tottu chi custu bolit narai, chi mi sigheis in s'arraxonamentu chi seu circhendi de ndi pesai. Bollu narai, est craru, ca candu t'agatas a trabballai cun una truma manna de giòvunus, intzandus t'agatas cun prus pagu esperièntzia, in campu, de su chi iast a tenni trabballendi cun una truma de giogadoris prus matucus de edadi, e si cumprendit, mi parit bastanti craru. Sciestus, duncas, ca po ndi cassa sa sarvesa depestus trabballai unu pagheddu de prus de su chi estus fatu s'annu passau, in sa stagioni de su duamilla e bintitres – duamilla e binticuatru, po si cumprendi mellus a pari. Ma fait a narai puru ca, in una manera o in un'antra, seus arrannèscius a si ndi scabulli de totus is dannus chi eus tentu cust'annu, e no potzu ca essi prexau, e si cumprendit, po cumenti si funt andadas is cosas. A unu giogadori giòvunu de edadi iant a podi tremi is cambas, cumenti si narat e cumenti si iat a podi narai a trassa de s'italianu etotu, mescamente candu s'agatat a giogai partidas de importu mannu meda. Invècias po unu giogadori prus matucheddu de edadi, ca mancai giogat in su campionau de sa Promotzioni de dexi, cuindixi annus, is cosas benint a essi prus facilis, a su mancu po su chi pertocat sa conca, e megu a chistionai, duncas, de is timorias chi ti ndi iant a podi arribbai. E custa cosa, a sa fini, iat a podi fai sa diferèntzia, cumenti si narat». 

E duncas, arribbaus a custu puntu de s'artìculu, tèngiu feti su tempus (e pruschetotu su logu) po andai a castiai, impari a bosatrus, cumenti funt cuncodradas is cosas po su chi pertocat sa Lista B de su campionau de sa Promotzioni, cumenti s'apu promìtiu de su restu (e si cumprendit ca candu promitis una cosa, sa cosa mellus chi podis fait est cussa de mantenni sa promissa). 
E duncas, de is de su Uddusò s'apu giai narau totu, o giai totu: in dì de oi is piciocus sighius de Ferruciu Terrosu tenint calincuna cosa cumenti a setantunu puntus in buciaca, chi ndi funt arribbaus gràtzias a bintunu partidas bintas e otu partidas chi ant serrau cun su resultau siddau in paridadi. E duncas si potzu narai ca me in s'ùrtima bessida, me in s'ùrtima partida chi ant giogau, is de su Uddusò ant serrau sa isfida contras a is de su Tuttavista de Gartddì cun su resultau de duus a duus. Is de su Garteddì, si potzu narai custu puru, tenint in dì de oi trintases puntus in buciaca, e funt sighendi a curri po ndi cassai sa sarvesa chentza de depi arribbai a giogai is ùrtimas duas partidas, chi ant a balli po is play-off, cumenti ddus tzerriaus a trassa de is ingresus etotu. Is de su Tuttavista, acudu a si narai custu puru, tenint in buciaca su pròpriu tanti de puntus chi tenint is de su Tonara, chi pròpriu sabudu passau ant pèrdiu, cun su resultau de duus a unu, in domu cosa insoru etotu, contras a is de su Coghinas, sighius de Paulu Congiu. E duncas, is de su Coghinas funt sèmpiri currendi po ndi cassai su de tres postus in sa lista (chi no su segundu postu puru), fadendi su contu ca po su chi pertocat is play-off (est a nai is partidas chi ant a balli po nd'artziai in su campionau de s'Ecellenza) is cosas funt totus trobeddadas. A su segundu postu, cun sessantacincu puntus in totu, agataus sèmpiri is de s'Usinese, sighius in dì de oi de Fabiu Levacovich: e duncas, si potzu narai, immoi chi nci seu, ca is arrùbius-brau ant bintu sa partida, in domu cosa insoru, e duncas, aranti de is tifosus cosa insoru, contras a is de s'Atletico de Bono, cun su resultau, togu meda (ca parit prus su resultau de una partida de tennis, prus ca de una partida de càlciu, cumenti si narat fatu fatu) de ses a unu. Ma a su de tres postus de sa lista, impari, pròpriu a is de su Coghinas, e duncas cun sessantacuatru puntus, agataus puru is de su Logusantu, sighius de un allenadori giòvunu, ma bravu meda, chi est Tony Madeddu. E duncas, is de su Logusantu ant bintu cun su resultau de cuatru a zeru contras a is de s'Abbasanta, chi funt is ùrtimus de sa lista. In cursa po ndi cassai su de tres postus ddoi funt puru is de su Bonorva, mancai tèngiant pagu possibbilidadis, fadendi su contu ca is de su Coghinas e is de su Logusantu iant a depi perdi s'ùrtima partida chi ant a giogai custu fini de cida chi est arribendindi, allestru cumenti chi fessit unu leporeddu. E duncas, e cun custu acabbu po oi puru, is de su Logusantu si dda ant a depi biri, immoi, e po s'ùrtima partida de sa stagioni, in domu de is de s'Altzaghena; is de su Coghinas ant a depi arriciri sa visita de is de su Istintinu e is de su Bonorva, invècias, si dda ant a depi biri contras a is de s'Usinese. 
E diaderus, cumenti si narat, iat a podi sucediri de totu. 
E sa pròpriu cosa si iat a podi narai po sa batalla po ndi cassai sa sarvesa: in dì de oi scieus giai ca is de s'Abbasanta e is de su Siniscola ant a depi torrai a partiri de sa Primu Categoria, e immoi nc'est feti de cumprendi cali ant a essi is duas scuadras chi ant a tenni sa possibbilidadi de giogai is ùrtimas duas partidas: is de su Sènnaru tenint trintaduus puntus in totu, e tenint feti duas scuadras a is pabas; e duncas, is de su Sènnaru tenint tres puntus in mancu de is chi tenint is de sa Lanteri. Eus a biri, duncas, cumenti ant a andai is cosas, ma po is de su Sènnaru, si potzu narai custu feti, is cosas parint giai tostadatzas meda. 
Is de sa Lanteri, is de su Tonara e is de su Tuttavista (chi de su restu apu arremonau ainnantis) ant a curri po ndi cassai sa sarvesa chentza depi giogai is ùrtimas duas partidas.




Attività realizzata col contributo della Regione Sardegna. IMPRENTAS 2024-2025. LR 22/2018 art. 22