Campionaus de is diletantis, Spadafora castiat giai a su duamilla e bintunu: «S'iat a praxi incumentzai s'annu nou cun d'una noba bona"

S'iat a essi praxiu, e meda puru, oberri is novas de DiarioSportivo de custa cida cun d-unu bellu arregalu po totus is giogadoris, is allenadoris e puru po totus is tifosus chi sighint su mundu de sa bòcia de is diletantis in Sardinnia, ma cumenti timestus e, unu paghedhu s'aspetastus, cun s'ùrtimu DPCM bessiu aforas pròpriu me is atras diis, is de su Guvernu, a su mancu po imoi, no aciungint nudha in prus de su chi sciestus giai e chi est balliu fintzas a oi, a partiri de is ùrtimus diis de su mesi de Ladàmini, candu si funt studaus torra is campionaus.
Est a nai, duncas, chi no est arribau (ancora) su permissu po torrai a partiri e a torrai a incumentzai cun is allenametus in truma; chistioni chi ballit puru, po nd'arremonai feti duas, is palestras e is piscinas: totus frimus (cambas e bòcias e bratzus) a su mancu fintzas a su duamilla e bintunu, candu, a metadi de su mesi de Gennàrgiu, s'ant a cumprendi mellus is cosas e, mescamente, is numerus apitzus a su spaniamentu de su virus, chi est sa cosa chi contat de prus.

Apitzus a sa chistioni nd'at arrexonau puru, cumenti est giustu, su ministru de su sport, Vincenzo Spadafora, in d-una ciaciarrada cun su diretori de su giornali "Il Foglio", Claudio Cerasa, chi fiat circhendi de cumprendi candu is diletantis (de dònnia sport e no feti de su calciu) ant a podi torrai a curri e a si spassiai.

«Apu giai domandau — contat Vincenzo Spadafora — a is de su CTS (est a nai su Comitau Tecnicu Scientificu) de si fai intendi me in custus cuindixi diis chi mancant po arribai a Paschixedda, po circai de cumpendi, totus impari, cumenti trabballai, a partiri giai de is primus diis apustis de is festas, po torrai a permiti a sa genti de fai sport, mancai giai de su mesi de Gennàrgiu, chi est su che deu mi auguru, est craru».
Spadafora agoa aciungit: «Iat a essi una cosa toga meda po incumentzai s'annu nou cun coru bonu e un arrisixedhu in prus in sa faci».
Sa chistioni, defatis, pertocat calincuna cosa cumenti a doxi milla assòtzius sportivus, sessanta-cuatru milla scuadras, po unu millioni de cristianus.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020