Contare su pallone cheret nàrrere a contare sa sotziedade

Unu pallone, unu mundu. de Tore Cubeddu

Cando sos amigos de Diario sportivo m'ant preguntadu de collaborare paris cun issos apo torradu a pensare a su pallone, a cussu chi calicunu narat fùbalu, a cussu chi apo bìviu a pitzocheddu. Cando fio pitzinneddu a 12, 13 annos bi fiat unu campu in onni bidda e su pallone, bortas meda, fiat una de sas ocasiones de prus importu pro pònnere paris sa gente. Sa dumìniga, in bidda mia, dae subra sas rocas (ca ispaltos non bi nde aiat e non bi nde at mancu oe) abbaidaiamus sas partidas de sa Sos Paris, iscuadra de "terza categoria" e fagheiamus su tifu pro sos cumpàngios e amigos nostros chi fiant in campu. Su pallone in onni bidda chieriat nàrrere comunidade e pagu contaiat si a giogare fiast prus iscarsu o prus bravu, su chi contaiat fiat a fàghere parte de su grupu. Custu ddu naro ca deo fia unu de sos peus gioghende. Apo fatu annos de panchina e mi fiat pràghidu meda a èssere comente a Bibbi e Caio, o comente Pais, s'istòper, ma mancu in bisura.

Oe, torrende a cussos annos, mi praghet meda s'idea de contare cussu mundu, chi est istadu finas su mundu meu, su chi creo siat ancora oe una parte sana e bella de sa vida de onni bidda nostra e mi faghet tristura a bìere in logos meda campos bellos furriados a trèmene a padentes. Contare su pallone cheret nàrrere a contare sa sotziedade nostra, sas biddas nostras, sos pitzinnos de oe.

Tando a contare su pallone, unu pagu (fortzis), cheret nàrrere a contare su mundu. Nos b'amus a provare, in sa limba nostra. Isperemus chi nos ais a agiudare, ca sa limba, comente sos campos de pallone, bivet si b'at gente chi bi giogat.

"Progetu realizadu cun sa partetzipatzione de sa Regione Autònoma de Sardigna - L.R. 26/97 subra sa limba e sa cultura sarda"