Salta al contenuto principale
monastir fangwa
Is scuadras de s'Eccellenza torra in campu domìnigu po sa primu giorronada de su campionau

Copa Italia: is de su Taloro bincint in Nùgoro, is de s'Ilva faint cincu gol a is de su Poltu Ridundu; su Gùspini nci ghetat aforas sa Villacidrese

Eus giai chistionau, in s'artìculu chi est bessiu aforas pròpriu sa cida passada, de cantu su mesi de Cabudanni siat de importu mannu meda po is fainas e is atividadis de sa genti, a su mancu innoi in Sardìnnia: est in custu mesi, difatis, chi torrant a partiri totu is trabballus me is campus e me is satus, est a nai po su chi pertocat sa messarìtzia, po nd'arremonai una, ma ballit puru po is scolas, cun d-una biga manna de piciochedhus chi funt giai prontus po torrai a incumentzai cun is studius, e isperaus chi potzat essi un annu bonu po totus issus o, a su mancu, un annu prus bonu de su chi si ndi seus lassaus a is pabas, est a nai su de su duamilla e binti, poita su Covid e mescamente totu is leis e is règulas chi is de su Guvernu nd'ant depiu pesai po circai de cumbati su spaniamentu de sa mobadia (si ddas arregodaus beni...) ant ghetau a fundu 'e susu (cumenti si narat in bidha mia) sa fida de is cristianus de mesu mundu, cun cidas e cidas passadas tupaus in domu e cun totu is atividadis serradas. Impari a is fainas e a is trabballus me is campus e me is scolas, torrant a partiri puru is campionaus e is partidas po is diletantis, chi est sa chistioni de importu prus mannu po su chi pertocat su giassu de su Diario Sportivo: mancai is scuadras s'iant ancora circhendi de cuncodrai is rosas cun is ùrtimus corpus in su mercau, po sa stagioni chi est brintendi, est giai tempus de chistionai de is primus resultaus, cun is scuadras de s'Eccellenza chi pròpriu custu domìnigu passau funt torradas in campu po giogai sa partida de sa torrada de sa primu bessida de sa Copa Italia; is dexiotu scuadras chi ant a curri me in sa lista de s'Eccellenza ant a giogai puru domìnigu chi benit, est a nai su doxi de su mesi de Cabudanni, cun sa prima bessida de su campionau nou. E duncas, po una borta, circaus de no perdi tropus tempus avatu de chistionis filosoficas, dha sas tzerriaus diaici, poita de nobas de sighiri e contus de torrai a contai nci ndi funt una biga manna, e duncas parteus a arrexionai apitzus de is partidas chi si funt giogadas custu fin'è cida passau. Is primus chi funt cabaus in campu, de totu sa truma manna de scuadras de s'Eccellenza, funt stètius cussus de su Castiadas, chi funt andaus a giogai in domu de is àrthanesus de s'Idolo, sabudu passau, est a nai su cuatru de su mesi de Cabudanni. Is nieddus-birdis, sighius de Virgilio Perra, partiànt cun afrodhiu mannu, fadendi su contu chi sa primu partida si fiat serrada cun su resultau de tres a zeru po is sarrabesus, ma is piciocus de Mario Masia nc'ant provau in dònnia modu a torrai a oberri sa chistioni. Sa partida, a nai sa beridadi, est incumentzada giai mes'ora prus a tradu de su chi depiat, po crupa de sa nèbida chi nci fiat in su campu, e giai giai is duas scuadras no arrannesciànt a biri sa bòcia e is portas, ma a sa fini s'arbitru, Marco Casula de Otieri, at potziu donai su permissu po fai partiri sa batalla, cun is meris de domu chi apustis feti de dexi minudus de giogu, ant pigau unu pau gràtzias a su tiru, bellu e forti meda, scutu de Nieddu, ma is de su Castiadas no funt abarraus a castiai is aversàrius e ant arrespustu subitu cun su gol fatu de s'argentinu Mauricio Villa chi, tra is atras cosas, iat giai fatu su trabballu su (est a nai su gol) in sa primu partida puru, giogada otu diis fai a su campu de s'Annunziata. A sa mes'ora, is de su Castiadas fiant acanta de fai su segundu gol puru, cun Melis chi, arribbau totu solu solu contras a su portieri de is de domu, Loi, scudit sa bòcia contras a su pau; apustis nci provat torra Villa, ma Usai sarvat is suus. In su segundu tempus su Castiadas circat de artziai sa conca e ndi ingollit su gol chi ballit po su paregiu gràtzias a sa giogada de Alessandro Manca, po s'unu a s'unu, ma is de su Castiadas bolint binci puru sa segunda partida de s'annu e nc'arrannescint cun su tiru scutu, ancora, de Mauricio Villa, chi est stètiu unu de is giogadoris chi ant giogau mellus tra totus cussus chi nci fiant in campu. Sa di avatu, intzandus, est tocau a totus is atras catodixi scuadras torrai in campu po sa segunda bessida de sa Copa Italia, e is spantus funt stètius medas. Parteus duncas de is cincu gol chi is meris de domu de s'Ilva de La Maddalena ant fatu a is allenus de su Poltu Ridundu, cun is piciocus sighius de Simone Marini chi fiant arrannescius a serrai sa primu partida cun sa bìncida po duus a zeru ma no funt stètius bonus a difendi su chi iant allogau. Is meris de domu, intzandus, si funt gosaus su domìnigu togu meda, e sa partida de oru, dhi naraus diaici, giogada de Tapparello, chi at fatu tres de is cincu gol. Is atrus duus gol, intzandus, funt stètius fatus de Aiana, cun d-unu tiru de is undixi metrus, e de Pisano, unu piciochedhu giòvunu chi est fadendi a biri a totus cantu est forti, torra apustis de is campionaus togus meda chi nd'at pesau me is annus passaus. Domìnigu de prexu mannu in domu de s'Ossese puru, cun is biancus-nieddus chi, apustis de s'unu a zeru bodditu in sa primu partida, chi balliat po s'andada, ndi pesant atru cuatru gol, in domu cosa insoru, contras a is tattaresus de su Li Punti: duus gol funt de Chelo, is atrus portant is firmas de Madeddu e de Sabino. Totu beni puru po is de su Ilartzi, chi apustis de su duus a zeru aciapau in sa primu bessida, in domu de is de su Bosa, bincint puru in sa partida chi balliat po sa torrada e sighint a curri po sa Copa Italia, gràtzias a su tres a unu pesau me is noranta minudus de giogu: is meris de domu nci ghetant sa partida in s'arrastu giustu gràtzias a su gol fatu de Atzei, apustis nci pentzant Cossu e Doukar a ndi pesai su duus e pruschetotu su tres a zeru. De Cabiddu, gràtzia a unu tiru de is undixi metrus, nd'arribbat sa giogada chi ballit po su gol de su tres a unu po is strangius. Unu de is resultaus de importu prus mannu est stètiu, custu est pagu ma est seguru, su duus a zeru chi is de su Taloro de Gavoi ant scutu apitzus de is meris de domu de sa Nuorese: is duus gol fatus de Littarru ndi furriant a fundu 'e susu s'unu a unu bessiu aforas in sa partida de s'andada; po sa Nuorese, duncas, nd'arribbat giai su primu disprexei mannu de sa stagioni noba. Cussa tra is de su Gùspini e is campidanesus de sa Villacidrese de Biddaxidru fiat una de is partidas de importu prus mannu, cun is duas scuadras chi iant giai bintu sa batalla contras a is de s'Arbus e si giogànt, in noranta minudus, sa possibbilidadi de sighiri a curri in sa Copa Italia. Is meris de domu iant bintu sa primu partidas contras a is de s'Arbus po cuatru a zeru, invècias is de sa Villacidrese iant bintu, po ses a unu, sa partida contras a s'Arbus de mercuis passau, est a nai sa primu dì de su mesi de Cabudanni. A fai festa manna, duncas, funt is meris de domu de su Gùspini, chi ant bintu sa partida po unu a zeru, gràtzias a su gol fatu de Bruno Bravo. No funt invecias bastaus atrus noranta minudus a is campidanesus de su Muristeni e a is castedhaius de sa Ferrini po decidi calli de is duas scuadras depessit andai ainnantis in sa cursa po sa Copa Italia; difatis sa primu partida si fiat serrada cun su resultau de unu a unu, diaici cumenti sa partida de sa torrada, cun su gol fatu de Fangwa po is meris de domu, sighius de Manunza, cun is castedhaius chi ant arrespustu cun sa giogada de Argiolas, chi est arrannèsciu a portai torra is contus in su unu a unu. Is cosas no funt cambiadas fintzas a su de noranta minudus, e diaici, si cumprendit beni su poita, funt serbius is tirus de is undixi metrus, cun is meris de domu chi nd'ant intzertau cincu, contras a is tres gol fatus de is allenus. Apustis de su zeru a zeru pesau in sa primu partida, chi balliat po s'andada, is de su Sant'Aleni de Cuartu ant trebau, dhi naraus diaici, is asseminesus de sa San Marco, cun su resultau de cincu a zeru: is gol funt stètius fatus de Merella, Sitzia, Pilosu e Mboup, chi nd'at fatu duus. Is scuadras chi ant a sighiri a curri po ndi cassai sa Copa s'ant a atobiai torra su ses e su binti de su mesi de Làdamini po su segundu turnu de partidas, chi ant a biri is niedhus-birdi de su Castiadas contras a is de su Sant'Aleni de Cuartu; is de su Gùspini si d'ant a depi biri contras a is campidanesus de su Muristeni; is de s'Ilvamaddalena ant a depi giogai contras a is biancus-niedhus de s'Ossese; is de su Ilartzi, invecias, ant a giogai contras a is de su Taloro. Tra is prus prexaus, nc'est de seguru s'allenadori de su Gùspini, Fabrizio Carracoi, chi si gosat s'unu a zeru bodhitu de is piciocus cosa sua in sa bessida contras a una scuadra forti cumenti sa Villacidrese de Biddaxidru, chi nd'arribbat, tra is atras cosas, apustis de su cuatru a zeru scutu apitzus a is de s'Arbus in sa primu bessida de sa stagioni noba. «Seu prexau, e meda puru, po cumenti funt andadas is cosas: sa partida contras a is de sa Villacidrese est stètia bella e tostada, ma si dhu aspetastus. Seu prexau puru de sighiri a andai ainnantis in sa Copa, poita custu m'at a permìtiri de donai sa possibbilidadi a chini giogat prus pagu de is atrus de cabai in campu po prtidas, no si dhu podeus scaresci, de importu mannu». Carracoi apustis scoviat: «Is de sa Villacidrese teniànt duus resultaus bonus po sighiri a andai ainnantis (est a nai sa bìncida e su parègiu ndr), nosu peròu eus agatau su gol, bellu, mèritau e togu meda, chi s'at fatu binci sa partida. Is piciocus mius funt stètius bravus, poita aranti teniant una scuadra forti e tostada, cun giogadoris chi funt costumaus a binci e a giogai partidas de importu; seu seguru chi imoi ant a fai unu campionau togu e bellu». Carracoi serrat cun duus fuedhus po Bruno Bravo, chi at fatu su gol chi ballit po sa bìncida de sa partida. «Dhu eus pigau isperendi chi si potzat agiudai a mellorai, pruschetotu po su chi pertocat s'atacu; est unu giogadori chi agiudat meda sa scuadra e is cumpangius, at giai fatu duus gol me is primus duas bessidas e imoi totus isperaus chi potzat sighiri a fai su trabballu sù». Is scuadras de s'Eccellenza duncas, cumenti eus giai arremonau, funt giai totus prontas po cabai in campu po sa primu giorronada de su campionau nou, esta nai su de su duamilla e bintunu \ duamilla e binti-duus, chi at a partiri pròpriu domìnigu chi ndi benit, su doxi de su mesi de Cabudanni, cun sa partida tra is de sa Nuorese de Nùgoro e is castedhaius de sa Ferrini chi est giai sa primu batalla de importu mannu, pruschetotu poita is duas scuadras ndi funt giai bessidas aforas de sa cursa po sa Copa Italia e ant a bolli artziai impressi sa conca e regalai a is tifosus cosa insoru sa primu bìncida. S'ùrtima giorronada de su campionau, invecias, s'at a giogai su sabudu de Pascamanna, est a nai su sexi de su mesi de Abrili, cun sa batalla tra scuadras de su Campidanu, Gùspini e Villacidrese, chi est stètia, e dhu scieus poita nd'eus chistionai pròpriu imoi, puru sa partida de sa Copa de domìnigu passau. Is de s'Eccellenza ant a cabai in campu puru aintru de sa cida, partendi de s'ùrtimu mèrcuis de su mesi de Cabudanni, est a nai su binti-noi, cun sa partida tra is de s'Ossese e is de sa Nuorese chi parit giai una de cussas de importu prus mannu, cun s'allenadori nou de is nùgoresus, Giuseppe Cantara, chi at a torrai a giogai contras a sa scuadra becia cosa sua, in cussa chi po tres annus de sighiu est stètia sa domu cosa sua, in Ossi. Sa segunda bessida aintru de cida at a essi in dì de festa, s'otu de su mesi de Idas, cun sa partida tra is de su Castiadas e is de su Gùspini chi si parit giai una de is prus togas de sighiri. Fintzas a su trintunu de su mesi de Làdamini, intzandus, po otu bessidas, is partidas ant a incumentzai a is cuatru de su megama; apustis, is partidas ant a incumentzai a is tres de su megama, e custu fintzas a su binti-seti de su mesi de Martzu, candu is partidas ant a torrai, po cuatru bessidas, a incumentzai torra a is cuatru. Is partidas chi ant a balli po s'andada ant acabbai su dexianoi de su mesi de Idas, ma is giogus po s'Eccellenza ant a torrai a partiri su trinta de su pròpriu mesi, sa dì ainnantis de s'ùrtima dì de s'annu, est a nai de custu duamilla e bintunu chi isperaus potzat essi prus druci de su duamilla e binti. Sa primu partida chi is scuadras de s'Eccellenza ant a giogai in s'annu nou at a essi in dì de festa, torra, su ses de su mesi de Gennàrgiu, est a nai sa dì de sa Befana, cun is batallas tra Villacidrese de Biddaxidru e Castiadas, e tra is castedhaius de sa Ferrini e is de s'Ossese, chi ant a balli, e meda puru, po sa cursa a is primus postus de sa lista. Po sa primu giorronada, intzandus, is de su Bosa ant a arriciri in domu cosa insoru is de su Castiadas; is de s'Asseminese si d'ant depi biri contras a is de su Idolo de Arthana; is de su Ilartzi ant a giogai contras a is allenus de su Taloro de Gavoi; is de su Gùspini ant a circai is primus tres puntus de sa stagioni noba in sa partida in domu contras a is de su Poltu Ridundu; is campidanesus de su Muristeni si d'ant a depi biri contras a is cuartesus de su Sant'Aleni; is nùgoresus de sa Nuorese, invecias, ant a circai de artziai sa conca, apustis de su primu disprexei mannu de sa stagioni noba, in sa partida, chi parit giai tostada e bella meda, contras a is castedhaius de sa Ferrini. Po s'Arbus, invecias, nc'at a essi sa partida in domu de is de su Budune; is de s'Ossese ant a arriciri is de s'Ilvamaddalena, mentre a Biddaxidru nd'ant arribbai is tattaresus de su Li Punti, po giogai, est craru, contras a is de sa Villacidrese. Pròpriu is campidanesus, apustis de is ses gol fatus in sa bessida contras a is de s'Arbus, nd'ant giai bodditu, d'eus giai arremonau, tra is atras cosas, sa primu bussinada de sa stagioni noba (dhi naraus diaici...), cun sa partida perdia contras a is de su Gùspini, chi diaici ant a sighiri a andai ainnantis in sa Copa. Po s'allenadori de is cidresus, Matteo Congia, su benidori peròu iat a podi essi ancora bellu e druci. «Sciestus beni — scoviat Congia apustis de sa segunda bessida po sa Copa Italia — chi podestus binci, ma puru perdi, sa partida po un errori, e diaici funt andadas is cosas: nosu eus tentu duas ocasionis po fai su gol ma no nci seus arrannescius; issus invecias ant intzertau sa giogada giusta, mancai su tiru de sa bandieredha chi at fatu nasci su gol, de cussu chi m'ant nau is giogadoris cosa mia, fortzis fortzis mancu nci fiat. Seus andaus a Gùspini cun sa bidea de binci sa partida — sighit a contai Congia — ma no tengiu nudha de strunciai a is giogadoris cosa mia; eus circau fintzas a sa fini, fintzas a s'ùrtimu minudu de cassai su gol de su parègiu, ma no nci seus arrannescius. De su restu, si depeus arregodai chi eus giogau duas partidas in cuatru diis, chi no est facili, pruschetotu candu sa stagioni est incumentzada de pagu e tenis me is cambas pagu diis de trabballu». Domìnigu peròu torrat a partiri su campionau: «Eus circau de cassai s'Eccellenza po duus annus de sighiu, in campu — contat Congia — ma s'afrodhiu nc'est sèmpiri stètiu, puru candu festus in Promotzione e in Primu Categoria. Scieus beni chi eus cuncodrau una rosa forti, bella e toga, cumenti eus fatu me is ùrtimus annus, est berus, cun giogadoris chi connoscint beni custu campionau e d'ant giai bintu puru e podint agiudai totus is atrus, mescamente is chi mancai funt impari a nosu de is tempus de sa Primu Categoria e po custu tenint prus pagu esperièntzia, ma po imoi no podeus fai contus: eus a biri a sa fini de is giogus innoi eus a essi lòmpius. Po imoi intzandus no podeus fai atru chi sighiri a trabballai, poita seu cunvintu de su fatu chi is prexus, e is bìncidas, ant a lompi chitzi, mancai giai de sa partida de domìnigu chi benit, contra a is de su Li Punti».



 

Attività realizzata col contributo della Regione Sardegna. IMPRENTAS 2020-2021. LR 22/2018 art. 22

 

In questo articolo
Campionato:
Argomenti:
Stagione:
2021/2022
Tags:
Eccellenza
Coppa Italia