Is detzisionis de su Cunsillu Diretivu: su La Palma ndi cabat torra in Promotzione; abarrant in Eccellenza Poltu Ridundu, Ilartzi e Taloro de Gavoi

Cenabara passau, su dexianoi de su mesi de Làmpadas, nc'est stetiu un antru atobiu de su Cunsillu Diretivu de su Cumitau Regionali de sa Sardìnnia: nd'eus giai chistionau meda, a nai sa beridadi, ma fortzis, dhu podeus tzerriai a forti, est stetiu cussu de importu prus mannu po custu duamilla e binti, diaici trotu e mabassortau. Badda badda, tra totus is chistionis, dhoi fiat de fai, pruschetotu, is contus apitzus de is promotzionis e de is retrocessionis, po cuncodrai is gironis po is campionaus de s'annu chi benit.

Est stetia sa primu borta, dhu scieus beni, chi is giogus no si funt serraus in campu, po crupa de cussu tiau de Coronavirus; pròpriu po custu motivu nc'est stetiu bisòngiu de su traballu e de is arregionamentus de is de sa Federatzioni, chi ant circau de acuntentai totus, po su chi est stetiu possìbbili. De sa Promotzione fintzas a sa Secunda Categoria, intzandus, no nc'ant a essi retrocessionis.
Po su chi pertocat su Girone A de Promotzione, po nd'arremonai unu, prexu mannu, e si cumprendit beni su motivu, po is de su Ceraxus, de su Seulu, de su Tonara e po cussus de s'Orrolese; po su chi pertocat su Girone B festa manna, duncas, puru po is picciocheddus piticus de su Santu Tiadoru (chi ant depiu batallai po totu sa primu parti de sa stagioni, si dhu arregodaus, cun is giogadoris de sa Juniores), tres puntus in totu, bodditus in binti-duas partidas, po is baroniesus de su Thiniscole, is de Oscheri e po is de su Fonne.

In su campionau de Eccellenza, invècias, ndi calant in Promotzione feti is casteddaius de La Palma, chi in bintitres partidas nd'ant arregotu feti dexiaseti puntus, tres in mancu de cussus de su Poltu Ridundu; is biancus – asullus de Terranoa, intzandus, abarrant po un antru annu a si dha gherrai in su campionau prus mannu de sa Sardìnnia, impari a is de su Ilartzi, bintunu puntus, e a is arrubius-brau de su Taloro de Gavoi, binti-tres puntus.



Davide Onnis


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020