LND, Sibilia castiat ainnantis: «A parri miu s'iat podi torrai in campu giai po su mesi de Cabudanni»

A cantu parit is tempus legius, fortzis is prus legius e marigosus de custus ùrtimus cincuant'annus (a parri de chini est scriendi custus fueddus) funt lassendi su logu po is novas bonas e po tempus, est cussu chi isperaus totus, prus drucis, a su mancu po cussu chi pertocat su mundu de sa bòcia.

Cun is professionistas de sa Sèrie A giai prontus torra a partiri (nd'eus chistionau pròpriu ariseu), arribant novas de importu mannu po is diletantis puru, chi funt sèmpiri abetendi, e no bint prus s'ora a nai sa beridadi, is decisionis de su Cumitau Regionali, chi at a depi cuncodrai is listas de is scuadras po sa stagioni chi at a benni.

S'afroddiu est meda, e si cumpredit beni su poita, ma po sciri totus is nominis de is sotziedadis chi ant a artziai de categoria, una chistioni chi pertocat is campionaus chi andant de s'Eccellenza fintzas a sa Terza Categoria, at a tocai a tenni passièntzia po un atra pariga de diis.
Po imui peròu, si podeus gosai, e dhu podeus nai a forti, is chistionis bogadas aforas da Cosimo Sibilia, su presidenti de sa Lega Natzionali Diletantis, in d-una ciaciarrada a "Zona D". Parint fueddus chi alluint sa luxi apustis de prus de noranta diis de scuriu. «Est craru, is tempus po torrai a giogai dhu su decidit su virus e pruschetotu su numeru de apuntoraus, ma deu speru chi potzant torrai totus in campu chitzi, mancai giai in su Mesi de Cabudanni».

Chi custu, in dii de oi, est feti unu bisu, ma chi comentecasiat arranescit a callentai su coru de is giogadoris e de is tifosus, nci funt puru, badda badda, chistionis prus craras apitzus de su benidori. Sibilia aciungit: «De siguru sa stagioni de su duamilla e binti \ duamilla e bintunu at a partiri, cumenti a sèmpiri, de sa primu dii de su mesi de Trìulas; cussa de is professionistas, invècias, at a partiri sa primu dii de su mesi de Cabudanni, po permitti a su campionau de sa Sèrie A de lompi a sa fini intru s'istadi cun totus is resultaus arregotus in campu».


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020